.jpg)
លោក ញ៉េប ប៊ុនជិន (ឆ្វេង) និងលោក ប៉ោ ប៊ុនស្រ៊ឺ (ស្តាំ) កាលពីពេលកន្លងមក។ ហេង ជីវ័ន
ភ្នំពេញៈ មន្ត្រីជាន់ខ្ពស់គណបក្សហ៊្វុនស៊ិនប៉ិច ៤ រូបគឺលោក យូ ហុកគ្រី លោក ប៉ោ ប៊ុនស្រ៊ឺ លោក ញ៉េប ប៊ុនជិន និងលោក យឹម សាវី បានបដិសេធទទួលយកតួនាទីថ្មីជាក្រុមប្រឹក្សាព្រឹទ្ធាចារ្យ និងជាអនុប្រធានគណបក្ស បន្ទាប់ពីប្រធានគណបក្សនេះបានផ្លាស់ប្ដូរកាលពីថ្ងៃពុធសប្ដាហ៍មុនដោយបានសំអាងថាពុំអាចបំពេញតួនាទីថ្មីបាន។
តាមលិខិតចុះហត្ថលេខាដោយមន្ដ្រីទាំង ៤ រូបដែលធ្លាប់បម្រើការឱ្យគណបក្សហ៊្វុនស៊ិនប៉ិចយូរឆ្នាំនៅថ្ងៃទី ១៨ ខែសីហាឆ្នាំនេះ ដែលភ្នំពេញប៉ុស្ដិ៍ទើបទទួលបានកាលពីម្សិលមិញបញ្ជាក់ថា «ទូលព្រះបង្គំ យើងខ្ញុំពុំអាចបំពេញតួនាទីខាងលើនេះបានដោយប្រសិទ្ធភាពទូលព្រះបង្គំ យើងខ្ញុំ សូមព្រះអនុញ្ញាតលាលែងពីមុខតំណែងខាងលើនេះដោយសុំរក្សាទុកស្ថានភាពជាសមាជិកស្របតាមលក្ខន្ដិកៈរបស់គណបក្សហ៊្វុនស៊ិនប៉ិចប៉ុណ្ណោះ»។
កាលពីថ្ងៃទី ៨ សីហាឆ្នាំនេះលោក យូ ហុកគ្រី ,លោក ប៉ោ ប៊ុនស្រ៊ឺ និងលោក ញ៉េប ប៊ុនជិន ដែលសុទ្ធតែជាអនុប្រធានគណបក្សត្រូវបានសម្ដេចក្រុមព្រះ នរោត្តម រណឫទ្ធិ ប្រធានគណបក្សសម្រេចផ្លាស់ប្ដូរមកឱ្យធ្វើជាសមាជិកក្រុមប្រឹក្សាព្រឹទ្ធចារ្យគណបក្ស ខណៈលោក យឹម សាវី ឱ្យធ្វើជាអនុប្រធានគណបក្ស។
លោក ញ៉េប ប៊ុនជិន កាលពីម្សិលមិញមិនបានបញ្ជាក់ច្បាស់លាស់ពីករណីនេះទេ តែលោកសម្ដែងអារម្មណ៍ថា ហត់នឿយដោយលោកសុំពេលសម្រាកមួយរយៈសិនមុននឹងឆ្លើយតប។
លោកថា៖ «សម្រាកមួយសន្ទុះសិនអូន បងហត់តិចហើយ សម្រាកមួយសន្ទុះ...ចាំជួបគ្នាទៀត»។
លោក ណុប សុធារិទ្ធ អ្នកនាំពាក្យគណបក្សហ៊្វុនស៊ិនប៉ិចដែលទើបឡើងកាន់តំណែងជំនួសលោក ញ៉េប ប៊ុនជិន បានថ្លែងឱ្យដឹងដែរថា លោកគ្រាន់តែបានឃើញលិខិតបដិសេធនោះលើបណ្ដាញសារព័ត៌មានអនឡាញមួយចំនួនប៉ុណ្ណោះ តែមិនទាន់បានពិនិត្យផ្នែករដ្ឋបាលគណបក្សនោះទេ។
លោកបន្ដថា៖ «ចាំខ្ញុំពិនិត្យនៅផ្នែករដ្ឋបាលខ្ញុំសិន កាលណាខ្ញុំឃើញលិខិតហ្នឹងខ្ញុំនឹងយកទៅថ្វាយសម្ដេចក្រុមព្រះ ហើយលោកជូនដំណឹងយើងម៉េច ខ្ញុំនឹងជូនដំណឹងទៅតាមក្រោយ»។
ទាក់ទងនឹងការផ្លាស់ប្ដូរតួនាទីរបស់មន្ដ្រីជាន់ខ្ពស់គណបក្សហ៊្វុនស៊ិនប៉ិច ជាច្រើនរូបនេះលោក ណុប សុធារិទ្ធ បានបញ្ជាក់ថានេះគឺជាការសម្រេចព្រះទ័យផ្ទាល់របស់សម្ដេចក្រុមព្រះ។
លោកថា៖ «នេះជាការសម្រេចព្រះទ័យរបស់សម្ដេចក្រុមព្រះជាព្រះប្រធានគណបក្ស ហើយលោកកំពុងសម្រាកព្យាបាលនៅក្រៅប្រទេសដែលព្រះរាជសុខភាពមាំមួនអាចបំពេញកិច្ចការអ្វីបានទាំងអស់ដែលនឹងត្រឡប់មកកម្ពុជាវិញក្នុងពេលឆាប់ៗនេះ»។
គួរបញ្ជាក់ថា មន្ដ្រីទាំង ៤ រូបខាងលើនេះត្រូវបានអតីតអគ្គលេខាធិការរងគណបក្សហ៊្វុនស៊ិនប៉ិចលោក សួង ផល្លី ប្ដឹងទៅសាលាដំបូងរាជធានីភ្នំពេញដោយទារជំងឺចិត្ដចំនួន ១០០០ លានរៀលដោយបានចោទថា «បានផ្តួចផ្តើម និងសមគំនិតធ្វើលិខិតរដ្ឋបាលទុច្ចរិត មិនស្របតាមលក្ខន្ដិកៈ និងបញ្ចប់សមាជិកភាពលោកពីបក្ស»។
លោក ផល្លី បានបញ្ជាក់ប្រាប់ភ្នំពេញប៉ុស្ដិ៍ថា៖ «ខ្ញុំដាក់ពាក្យប្ដឹងនេះព្រោះពួកគាត់ចាត់តាំងការងារមិនត្រូវស្ដង់ដារតាមគោលការណ៍ និងលក្ខន្ដិកៈរបស់បក្ស...»។
លោកថា៖ «ខ្ញុំប្ដឹងគណៈកម្មាធិការទាំងនោះដែលបានចាត់ចែងខ្ញុំ អ៊ីចឹងអ្នកប្រឹងប្រែងធ្វើការមិនបានអីបែរជាអ្នកមិនធ្វើការមកចាំត្រងយក។ អ៊ីចឹងខ្ញុំប្ដឹងទារជំងឺចិត្ដ ១០០០ លានរៀល»៕
