.jpg)
លោកឧបនាយករដ្ឋមន្ត្រី យឹម ឆៃលី នៅក្នុងវេទិកានៅថ្ងៃទី ១៣ខែសីហា ឆ្នាំ ២០២០។ ហុង មិនា
មន្រ្តីជាន់ខ្ពស់រាជរដ្ឋាភិបាល បានអំពាវនាវដល់យុវជនឱ្យបន្តយកចិត្តទុកដាក់ទទួលទានចំណីអាហារចម្រុះមុខដែលមានអាហារូបត្ថម្ភល្អ ដើម្បីការពាររាងកាយនិងសុខភាពឲ្យបានល្អក្នុងការរៀនសូត្រ និងធ្វើកិច្ចការងារផ្សេងសម្រាប់អភិវឌ្ឍន៍ប្រទេសជាតិ ខណៈកម្ពុជាមានយុវជនអាយុក្រោម ៣០ ឆ្នាំ ប្រមាណជា ៦៥ ភាគរយនៃប្រជាជនសរុប។
លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទបានថ្លែងនៅថ្ងៃទី ១៣ ខែ សីហា ឆ្នាំ ២០២០ ក្នុងវេទិកាយុវជនជើងឯកអាហារូបត្ថម្ភ ២០២០ ថា នៅប្រទេសកម្ពុជា មានក្រុមមនុស្សវ័យជំទង់ប្រមាណជិត ២៥ ភាគរយ នៃចំនួនប្រជាជនសរុប ប៉ុន្តែអ្នកទាំងអស់នោះ មានការយល់ដឹង និងយកចិត្តទុកដាក់តិចតួចបំផុត លើបញ្ហាអាហារូបត្ថម្ភ រីឯកុមារវ័យជំទង់វិញ មានប្រមាណ ១ ភាគ ៤ ដែលមានបញ្ហាស្គមស្គាំង និងចំនួនពាក់កណ្តាលនៃពួកគេមានបញ្ហាស្លេកស្លាំងផងដែរ។
លោកបញ្ជាក់ថា និន្នាការធាត់លើសទម្ងន់ ជំងឺធាត់ជ្រុលនិងជំងឺមិនឆ្លងនានា ក៏បាននិងកំពុងតែកើតឡើងនៅក្នុងចំណោមមនុស្សវ័យជំទង់ និងស្រ្តីក្នុងវ័យបន្តពូជ។
លោក យឹម ឆែលី មានប្រសាសន៍ថា៖ «ទាំងនេះគឺជាបញ្ហារួម ដែលយុវជនយើងត្រូវចូលរួមធ្វើការងារសង្គមផ្តល់ការអប់រំនិងយុទ្ធនាការនានា ក្នុងការលើកកម្ពស់អាហារូបត្ថម្ភដល់ក្រុមយុវជនរបស់យើងផង ដល់ស្រ្តីក្នុងវ័យបន្តពូជ និងដល់មាតាបិតា សម្រាប់ការយល់ដឹងក្នុងការថែទាំកុមារផង»។
មនុស្សវ័យជំទង់ត្រូវការពេលវេលា ដើម្បីលូតលាស់ និងអភិវឌ្ឍន៍រាងកាយ ពួកគេអាចប្រឈមនូវហានិភ័យនានាហើយបញ្ហាកង្វះ និងលើសអាហារូបត្ថម្ភទាំងនេះ មិនត្រឹមតែប៉ះពាល់ដល់សុខភាពប៉ុណ្ណោះទេ ប៉ុន្តែវាក៏ប៉ះពាល់ដល់ការរីកចំរើនខាងសតិបញ្ហា ស្មារតី ការសិក្សារៀនសូត្រ និងផលិតភាពការងារកូនចៅជាច្រើនជំនាន់របស់ពួកគេទៀតផង។
លោក អៀន រ៉ូសែល (IeanRusell) តំណាងបណ្តាញអង្គការសហប្រជាជាតិ ដើម្បីអាហារូបត្ថម្ភកម្ពុជា ក៏បានលើកឡើងនៅក្នុងវេទិកានេះដែរថា ការចូលរួមរបស់យុវជន គឺជាចំណុចផ្តល់ការយកចិត្តទុកដាក់មួយ របស់ទីភ្នាក់ងារអង្គការសហប្រជាជាតិ ដើម្បីធ្វើការជំរុញការអភិវឌ្ឍក្នុងប្រទេសកម្ពុជា។
លោកថ្លែងថា៖ «ប្រសិនបើយើងមិនមានកុមារនិងយុវជនដែលមានអាហារូបត្ថម្ភល្អ ដែលអាចសម្រេចបាននូវសក្កដានុពលពេញលេញរបស់ខ្លួនទេនោះ វឌ្ឍនភាពនៃការអភិវឌ្ឍន៍ទាំងមូល ប្រាកដជារងនូវផលប៉ះពាល់ជាក់ជាមិនខាន»។
កញ្ញា ឈុន បូរមី អាយុ ២២ ឆ្នាំ ជាអ្នកសម្របសម្រួលក្រុមយុវជនជើងឯកអាហារូបត្ថម្ភថ្លែងថា យុវជនខ្មែរហាក់មានការយល់ដឹងច្រើន ពីអត្ថប្រយោជន៍នៃអាហារូបត្ថម្ភដែលពីមុនពួកគាត់ហាក់មិនសូវយកចិត្តទុកដាក់លើបញ្ហាទាំងនេះ និងធ្វើការផ្លាស់ប្តូរទៅលើរបបអាហារប្រចាំថ្ងៃរបស់ពួកគាត់ផងដែរ។
ប្រទេសកម្ពុជា មានយុវជនអាយុក្រោម ៣០ ឆ្នាំប្រមាណជា ៦៥ ភាគរយនៃប្រជាជនសរុប គឺជាកម្លាំងស្នូលនិងសក្កដានុពលមួយក្នុងការអភិវឌ្ឍប្រទេសជាតិ នាពេលបច្ចុប្បន្នក៏ដូចជាថ្ងៃអនាគត។ យុវជនបាននិងកំពុងចូលរួមយ៉ាងសកម្មនិងរស់រវើកគ្រប់សកម្មភាពនិងគ្រប់កំរិតទាំងអស់ ក្នុងក្របខ័ណ្ឌសង្គម វប្បធម៌ សេដ្ឋកិច្ច និងនយោបាយ៕
