ភ្នំពេញៈ អគ្គនាយកអគ្គិសនីកម្ពុជា លោកកែវ រតនៈ ថ្លែងថា ក្នុងរយៈពេល ៧ ខែ ឆ្នាំ ២០១៩ នេះ មាន ២៣៧ បណ្តឹង ដែលបានប្តឹងតាមរយៈបណ្តាញសង្គមហ្វេសប៊ុកទាក់ទងនឹងបញ្ហាកុងទ័រថាមពលអគ្គិសនី ខណៈដែល លោកឲ្យដឹងថា ប្រទេស កម្ពុជា នឹងមានការប្រើប្រាស់សូឡា បាន១៥ ភាគរយ នៅឆ្នាំក្រោយនេះដែលមានតម្លៃសូឡាថោកជាងគេបង្អស់នៅក្នុងអាស៊ាន។
ការថ្លែងរបស់លោក កែវ រតនៈ ធ្វើឡើងនាព្រឹកថ្ងៃទី ៨ ខែ សីហា ក្នុងឱកាសដែលលោកបានចូលរួមក្នុងសន្និសីទសារព័ត៌មានស្តីពី «ចម្ងល់ពាក់ព័ន្ធនឹងកុងទ័រភ្លើង» ដែលបានរៀបចំឡើងដោយអង្គភាពអ្នកនាំពាក្យរាជរដ្ឋាភិបាលនៅទីស្តីការគណៈរដ្ឋមន្ត្រី។
លោក កែវ រតនៈ ដែលជាប្រតិភូរាជរដ្ឋាភិបាលទទួលបន្ទុកអគ្គនាយកអគ្គិសនីកម្ពុជាថ្លែងថា ចាប់ពីខែ មករា ដល់ខែ កក្កដា ឆ្នាំ ២០១៩ មានអ្នកប្រើប្រាស់អគ្គិសនីកម្ពុជាបានប្តឹងតាមរយៈបណ្តាញសង្គមហ្វេសប៊ុកដែលមានចំនួនសរុប ២៣៧ បណ្តឹង ហើយបណ្តឹងទាំងនោះមានលក្ខណៈជេរប្រមាថ ឬក៏រិះគន់ទៅលើបញ្ហាកុងទ័រភ្លើងលឿន។
លោកបញ្ជាក់ថា៖ «បទពិសោធយើងក្នុងដើមឆ្នាំ ២០១៩ ដូចជាព្យុះសង្ឃរា ដោយសារមានការតវ៉ា រឿងមានការជេរប្រមាថតាមរយៈបណ្តាញសង្គមហ្វេសប៊ុក។ ពេលខ្លះបងប្អូនយើងប្រើពាក្យអសុរោះ ដូចជាពាក្យបឺតឈាម ជញ្ជក់ឈាមរាស្ត្រ ។ល។ រាជរដ្ឋាភិបាលគ្មានចេតនាណាមួយធ្វើបែបហ្នឹងទេ ហើយបុគ្គលដែលធ្វើបែបនេះ គឺមានទោសចំពោះមុខច្បាប់ដូច្នេះវាគ្មានប្រយោជន៍អីទៅកេងប្រជាពលរដ្ឋទេ»។
លោកបានបន្តថា ក្នុងចំណោម ២៣៧ បណ្តឹង គឺមានតែ ៥០ បណ្តឹងប៉ុណ្ណោះ ដែលការប្រើប្រាស់របស់គាត់មានការកើនឡើង ខណៈដែលមាន ១៨៧ បណ្តឹងមានការថយចុះ។ លោកអះអាងថា ឧបករណ៍ ដែលប្រើប្រាស់អគ្គិសនីចាស់ៗ អាចជាកត្តាមួយដែលធ្វើឲ្យចំនួនភ្លើងប្រើប្រាស់កើនឡើង។
លោកថ្លែងថា៖ «យើងបានអំពាវនាវដល់ប្រជាពលរដ្ឋយើងថា នៅពេលដែលពួកគាត់មានចម្ងល់ផ្នែកប្រើប្រាស់កុងទ័រភ្លើងឬ ក៏បញ្ហាផ្សេងៗទៀត ឬការតវ៉ាអ្វីក៏ដោយ សូមឲ្យគាត់ទូរស័ព្ទមកលេខទំនាក់ទំនងបន្ទាន់ ឬហ្វេសប៊ុកដែលមានដាក់ឈ្មោះថា អគ្គិសនីកម្ពុជា។ ប៉ុន្តែបងប្អូនមួយចំនួនធំ គឺគាត់បានបង្ហោះលក្ខណៈ ជេរប្រមាថ តែយើងនៅតែបញ្ជូនភ្នាក់ងារអគ្គិសនីទៅដោះស្រាយ។ ម៉ាស៊ីនទូទឹកកក ម៉ាស៊ីនត្រជាក់ កង្ហារ ដែលប្រើប្រាស់យូរទៅ គេលើកទឹកចិត្តឲ្យដូរចេញ និងទិញឧបករណ៍ថ្មី ដោយសារតែកាលណាឧបករណ៍នេះកាន់តែចាស់ប្រសិទ្ធភាពរបស់វាកាន់តែធ្លាក់ចុះហើយកាលណាប្រសិទ្ធភាពធ្លាក់ចុះវាស្រូបភ្លើងកាន់តែខ្លាំង»។
លោក កែវ រតនៈ លើកទៀតថា អាជ្ញាធរអគ្គិសនី ធានាពីកុងទ័រភ្លើងទាំងអស់នៅកម្ពុជា គឺមិនមានការកែច្នៃ ហើយថាបើមានជនខិលខូចណាមួយហ៊ានតែច្នៃកុងទ័រភ្លើងឲ្យដើរលឿន នឹងមានទោសទណ្ឌទៅតាមផ្លូវច្បាប់។ លោកបញ្ជាក់ថា បើសិនកុងទ័រភ្លើងមានបញ្ហាអ្វីមួយកើតឡើង អាជ្ញាធរអគ្គិសនីនឹងទៅដោះស្រាយជូនប្រជាពលរដ្ឋដោយមិនគិតថ្លៃឡើយ។
ទន្ទឹមនឹងនេះដែរ លោកបានលើកឡើងថា ខណៈពេលដែលរាជរដ្ឋាភិបាលបាននិងកំពុងខិតខំអភិវឌ្ឍវារីអគ្គិសនី ដើម្បីជួយផ្គត់ផ្គង់ប្រជាពលរដ្ឋ ប៉ុន្តែបែរជាក្រុមប្រឆាំងមួយចំនួនបានធ្វើបាតុកម្មប្រឆាំងមិនឱ្យមានការអភិវឌ្ឍវារីអគ្គិសនីទៀត។
លោកមានប្រសាសន៍ថា៖ «យើងអភិវឌ្ឍអគ្គិសនីនៅក្នុងព្រៃ ដោះមីនផង អភិវឌ្ឍផង ការពារផង។ បងប្អូនប្រជាពលរដ្ឋបានឃើញហើយ នៅពេលដែលយើងខំប៉ុណ្ណឹង នៅមានអ្នកប្រឆាំងផ្កាប់មុខមួយចំនួនធ្វើបាតុកម្មប្រឆាំងមិនឲ្យមានការអភិវឌ្ឍវារីអគ្គិសនី។ នៅវៀតណាមគេអភិវឌ្ឍវារីអគ្គិសនីបានយ៉ាងច្រើន ហើយនៅយើងបាន ១ ឬ ២ ជេរផង ប្រមាថផង»។
ជាមួយគ្នានេះ លោក កែវ រតនៈ ឲ្យដឹងថា ប្រទេស កម្ពុជា នឹងមានការប្រើប្រាស់សូឡាបាន ១៥ ភាគរយ នៅឆ្នាំក្រោយនេះ ហើយក៏ជាប្រទេសដែលមានតម្លៃសូឡាថោកជាងគេបង្អស់ នៅក្នុងអាស៊ានផងដែរ។ លោកបន្ថែមថា ជាក់ស្តែង តម្លៃសូឡា នៅឡាវ គឺជាង ៨ សេន ក្នុងមួយគីឡូវ៉ាត់ម៉ោង នៅវៀតណាម ៩,៣៥ សេន នៅថៃជាង ១០ សេន ខណៈនៅកម្ពុជា មានតម្លៃតែ ៧,៦ សេន ក្នុងមួយគីឡូវ៉ាត់ម៉ោងតែប៉ុណ្ណោះ។
លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា បានឲ្យដឹងថា កាលពីឆ្នាំ ២០១៨ មានអ្នកកែច្នៃកុងទ័រភ្លើងឲ្យដើរលឿនជាងធម្មតា ហើយអាជ្ញាធរអគ្គិសនីកម្ពុជា បានពិន័យថវិកាពីពួកគាត់ជាង ៦០ លានរៀល ហើយថា បើពលរដ្ឋដឹងមានកែច្នៃកុងទ័រភ្លើងឲ្យលឿនត្រូវរាយការណ៍ មកអាជ្ញាធរអគ្គិសនីភ្លាមៗ ដើម្បីចាត់វិធានការជនខិលខូចទាំងនេះ។
ប៉ុន្តែលោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា ថ្លែងថាអគ្គិសនីកម្ពុជាគួរតែមានការសហការល្អ និងមិនត្រូវចេញប្រតិកម្មហួសហេតុជាមួយអ្នកប្រើប្រាស់អគ្គិសនីនោះទេ ដោយសារតែស្ថាប័ននេះជាអ្នកទទួលកម្រៃពីការផ្តល់សេវាកម្មនេះ។
លោកបានបញ្ជាក់ថា៖ «ការផ្គត់ផ្គង់អគ្គិសនី គឺជាសេវាកម្មសាធារណៈដែលរដ្ឋតម្រូវឲ្យអតិថិជនត្រូវបំពេញកាតព្វកិច្ចជាច្រើន ហើយនៅពេលដែលអ្នកប្រើប្រាស់មិនអាចបំពេញដូចជាពេលដែលអ្នកប្រើប្រាស់ទៅបង់យឺត ត្រូវធ្វើការផាកពិន័យ និងការផ្តាច់អគ្គិសនី។ អគ្គិសនីកម្ពុជាគួរតែមានភាពចាស់ទុំក្នុងការឆ្លើយតបនឹងប្រតិកម្មរបស់អ្នកប្រើប្រាស់ នៅពេលដែល ពេលខ្លះបានបង្កការលំបាកដល់អ្នកប្រើប្រាស់ដូចការដាច់ភ្លើង កុងទ័រភ្លើងមិនប្រក្រតី»៕