The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​ជាន់ខ្ពស់ ១៣ រូប​ទទួល​បាន​គោរមងារ «សន្តិបណ្ឌិត​»




មន្ត្រី​ជាន់ខ្ពស់ ១៣ រូប​ទទួល​បាន​គោរមងារ «សន្តិបណ្ឌិត​»

Content image - Phnom Penh Post
លោក នេត សាវឿន​ អគ្គស្នងការដ្ឋាន​នគរបាល​ជាតិ​។ រូបថត ហ្វេសប៊ុក

មន្ត្រី​ជាន់ខ្ពស់ ១៣ រូប​ទទួល​បាន​គោរមងារ «សន្តិបណ្ឌិត​»

ភ្នំពេញៈ មន្ត្រី​ជាន់​ខ្ពស់​ក្រសួង​​មហាផ្ទៃ​​ចំនួន ១៣ ​រូប​ត្រូវ​បាន​លោក​ សាយ ឈុំ ប្រធាន​ព្រឹទ្ធសភា​ក្នុង​នាម​ជា​ប្រមុខរដ្ឋ​ស្តីទី​បាន​ត្រាស់​បង្គាប់​​ផ្តល់​គោរមងារ​ «សន្តិបណ្ឌិត» ក្នុង​វិស័យ​ការពារ​សន្តិសុខ​ និង​រក្សា​សណ្តាប់ធ្នាប់​សង្គម។

ព្រះរាជក្រឹត្យ​ដែល​ចុះ​ហត្ថលេខា​ដោយ​លោក​ សាយ ឈុំ ក្នុង​នាម​ប្រមុខរដ្ឋ​ស្តីទី​នៅ​ថ្ងៃ​ទី​ ៣ មេសា​បាន​ត្រាស់​បង្គាប់​​ឲ្យ​បង្កើត​គោរមងារ​ជូន​មន្ត្រី​ចំនួន​ ១៣ រូប​ដែល​បាន​ធ្វើការ​ដឹកនាំ​បញ្ជា​កម្លាំង​នគរបាល​កន្លងមក​រួម​មាន​លោក ឯម សំអាន លោក តេង សាវង្ស លោក អ៊ុក គឹមលេខ លោក ឌុល គឿន ដែល​អ្នក​ទាំងអស់​នេះ​សុទ្ធ​ជា​រដ្ឋលេខាធិការ​លោក នេត សាវឿន អគ្គស្នងការ​នគរបាល​ជាតិ លោក លួ រ៉ាមីន លោក ហេង ហាក់ លោក ចាន់ អ៊ាន សុទ្ធ​តែ​ជា​អនុរដ្ឋលេខាធិការ​ក្រសួង​មហាផ្ទៃ​លោក ម៉ៅ ប៊ុណ្ណារិន ជា​អគ្គនាយក​ភ័ស្តុភារ​ និង​ហិរញ្ញវត្ថុ​លោក សុខ ផល ជា​អគ្គនាយក​អន្តោប្រវេសន៍​លោក ម៉ៅ ច័ន្ទតារា ជា​អគ្គនាយក អត្តសញ្ញាណកម្ម​លោក ខៀវ សុភ័គ នាយក​ខុទ្ទកាល័យ​លោក​រដ្ឋមន្ត្រី និង​លោក ចាន់ គឹមសេង អគ្គនាយក​ពន្ធនាគារ។

ព្រះរាជក្រឹត្យ​ផ្តល់​គោរមងារ​ដែល​បាន​ស្នើ​ឡើង​ដោយ​លោក​នាយក​រដ្ឋមន្ត្រី​ ហ៊ុន សែន ​បាន​សរសេរ​ថា​ថ្នាក់ដឹកនាំ​ទាំង ១៣ រូប​បាន​ទទួល​សញ្ញាបត្រ​ថ្នាក់​បណ្ឌិត​កិត្តិយស​ជំនាញ​ក្នុង​វិស័យ «សន្តិសុខ និង​សណ្តាប់ធ្នាប់​សាធារណៈ»។

លោក អ៊ុក គឹមលេខ ដែល​បាន​ទទួល​គោរមងារ​ជា​ «សន្តិបណ្ឌិត» បាន​ថ្លែង​ថា​លោក​មាន​ការ​សប្បាយ​ចិត្ត​នូវ​ការ​ផ្តល់​​គោរមងារ​នេះ​ពីព្រោះ​លោក​បាន​​ចំណាយ​ពេលវេលា​ស្ទើរ​ពេញ​មួយ​ជីវិត​របស់​លោក ដើម្បី​បម្រើ​ជាតិ​ និង​ពលរដ្ឋ។ លោក​ គឹមលេខ បាន​ចូល​ធ្វើ​នគរបាល​ចាប់​តាំងពី​ឆ្នាំ​ ១៩៧៩ ​​មក​ម្ល៉េះ។

លោក​បន្ត​ថា៖ «នេះ​ជា​កម្លាំង​ចិត្ត​លើក​ទឹកចិត្ត​​ថ្មី​មួយ​ទៀត​សម្រាប់​បន្ត​ការងារ​របស់​ពួកយើង»។

កាលពី​ខែ​កុម្ភៈ​កន្លង​​ទៅ​ក្នុង​គោលដៅ​ដែល​មន្ត្រី​រដ្ឋាភិបាល​តែងតែ​អះអាង​ថា​ដើម្បី​ការពារ​សុខ​សុវត្ថិភាព​ជូន​ពលរដ្ឋ អគ្គស្នងការដ្ឋាន​នគរបាល​ជាតិ​ក្រោម​ការ​ដឹកនាំ​របស់​លោក នេត សាវឿន ដែល​នៅ​ពេល​នេះ​​បាន​ទទួល​គោរមងារ​ជា​ «សន្តិបណ្ឌិត» ដែរ​​នោះ​បាន​ធ្វើការ​ផ្តល់​រថយន្ត​ចំនួន​ ២០ គ្រឿង​ដល់​​នគរបាល​រាជធានី​ភ្នំពេញ​ដើម្បី​​បម្រើ​​ដល់​ការ​ថែរក្សា​សន្តិសុខ ​និង​ការពារ​​សុវត្ថិភាព​ក្នុង​ពេល​បោះឆ្នោត​នាពេល​ខាង​មុខ បន្ទាប់ពី​ស្នងការដ្ឋាន​នគរបាល​រាជធានី​ភ្នំពេញ​​បាន​ទប់ស្កាត់​នូវ​អ្វី​ដែល​គេ​ឲ្យ​ឈ្មោះ​ថា​ជា​ «បដិវត្តន៍​ពណ៌​» និង​យុទ្ធនាការ​ថ្ងៃ​ចន្ទ​ពណ៌​ខ្មៅ​បាន​ជោគជ័យ។

លោក អ៊ុក គឹមលេខ ក៏​បាន​បន្ថែម​ថា​ទាំង​នោះ​ក៏​ដោយសារ​ស្នាដៃ​ល្អ​ដែល​នគរបាល​បាន​បម្រើ​ជាតិ​កាលពី​មុន​ដោយ​លោក​បាន​​ពន្យល់​​​ថា​បញ្ហា​បដិវត្តន៍​ពណ៌​គឺជា​អ្វី​ដែល​ខុស​ច្បាប់ និង​ត្រូវ​តែ​បង្ក្រាប។

លោក​​បញ្ជាក់​ថា៖ «ក្នុង​នាម​រដ្ឋាភិបាល​ យើង​ត្រូវ​បង្ក្រាប​អ្វី​ដែល​ផ្ទុយ​នឹង​ច្បាប់។ យើង​ជា​កម្លាំង​រដ្ឋាភិបាល​អ្វី​ដែល​ប៉ះពាល់​ដល់​​ការ​ដឹកនាំ​របស់​​រដ្ឋាភិបាល​យើង​មាន​កាតព្វកិច្ច​នឹង​អនុវត្ត​ (ទប់ស្កាត់)»។

លោក Phil Roberson នាយករង​អង្គការ​ឃ្លាំ​មើល​សិទ្ធិ​មនុស្ស​ទទួល​បន្ទុក​កិច្ចការ​អាស៊ី​បាន​ថ្លែង​ថា​៖ «រឿងរ៉ាវ​ប្លែកៗ​របស់​គណបក្ស​ប្រជាជន​កម្ពុជា​ត្រូវ​បាន​គេ​ដឹង​ថា​ធ្វើ​ឡើង​គ្មាន​ព្រំដែន​កំណត់​នោះ​ទេ»។

លោក​បាន​ចោទ​សួរ​ថា​៖ «តើ​អ្វី​ដែល​នឹង​កើតឡើង​បន្ទាប់​ទៀត? ​តើ​លោក ហ៊ុន សែន​ គឺជា​អ្នក​ជួយ​សង្គ្រោះ​​ពិភពលោក​ឬ? រឿង​ដ៏​គួរ​ឲ្យ​សោកស្តាយ​នោះ​គឺ​អ្នក​មាន​អំណាច​របស់​គណបក្ស​ប្រជាជន​កំពុង​បំពាន​លើ​សិទ្ធិ​ទាំង​នោះ​ហើយ​សហគមន៍​អន្តរជាតិ​មើល​ទៅ​ពិត​ជា​គួរ​ឱ្យ​អស់​សំណើច​ណាស់​។ គ្មាន​នរណា​ម្នាក់​ត្រូវ​បាន​គេ​បោកបញ្ឆោត​ដោយ​រឿង​មិន​សម​ហេតុផល​ទាំង​នេះ​ទេ»។

លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ​មិន​អាច​ទាក់ទង​បាន​ទេ​កាលពី​ថ្ងៃ​មិ្សលមិញ។

បើ​តាម​វចនានុក្រម​របស់​សម្តេចសង្ឃ​ ជួន ណាត សន្តិ​មាន​ន័យ​ថា​សេចក្តី​ស្ងប់ សេច​ក្តី​​សាន្ត​ត្រាណ...។ ចំណែក​បណ្ឌិត​មាន​ន័យ​ថា​អ្នក​ប្រាជ្ញ​៕

(រាយការណ៍​បន្ថែម​ដោយ​ Ananth Baliga)

អត្ថបទគួរចាប់អារម្មណ៍