The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ជាន់​ខ្ពស់ CNRP បដិសេធ​ដំណឹង​ដែល​ថា​មាន​ការ​តែងតាំង​ប្រធាន និង​អនុប្រធាន




មន្ត្រី​ជាន់​ខ្ពស់ CNRP បដិសេធ​ដំណឹង​ដែល​ថា​មាន​ការ​តែងតាំង​ប្រធាន និង​អនុប្រធាន

Content image - Phnom Penh Post
លោក កឹម សុខា ប្រធាន​ស្ដីទី CNRP នា​ពេល​កន្លង​មក។ ហុង មិនា

មន្ត្រី​ជាន់​ខ្ពស់ CNRP បដិសេធ​ដំណឹង​ដែល​ថា​មាន​ការ​តែងតាំង​ប្រធាន និង​អនុប្រធាន

ភ្នំពេញ: មន្រ្តី​ជាន់​ខ្ពស់​គណបក្ស​ប្រឆាំង​បាន​ច្រាន​ចោល​ការ​ចោទប្រកាន់​ដែល​ថា​គណបក្ស​បាន​គ្រោង​តែងតាំង​អនុប្រធាន​បី​រូប​សម្រាប់​គណបក្ស ហើយ​ប្រធាន​ស្តីទី​បច្ចុប្បន្ន​លោក កឹម សុខា នឹង​ត្រូវ​តែងតាំង​ជា​ប្រធាន​គណបក្ស​នាពេល​ខាង​មុខ។

បើ​តាម​មន្រ្តី​ជាន់​ខ្ពស់​ម្នាក់​របស់​គណបក្ស​សង្គ្រោះជាតិ​ដែល​បាន​អម​ដំណើរ​តំណាងរាស្រ្ត និង​អ្នក​នាំ​ពាក្យ​គណបក្ស​លោក អេង ឆៃអ៊ាង ទៅ​សួរសុខ​ទុក្ខ​អតីត​ប្រធាន​គណបក្ស​សង្គ្រោះជាតិ​លោក សម រង្ស៊ី នៅ​ទីក្រុង​ហុងកុង​កាលពី​សប្តាហ៍​មុន និង​ត្រូវ​បាន​ស្រង់​សម្តី​កាលពី​ថ្ងៃ​ពុធ​ដោយ​ប្រព័ន្ធ​ផ្សព្វផ្សាយ​ក្នុង​ស្រុក​ដែល​គាំទ្រ​រដ្ឋាភិបាល​ថា​គណបក្ស​សង្គ្រោះជាតិ​កំពុង​គ្រោង​តែងតាំង​ប្រធាន​ស្តីទី​លោក កឹម សុខា ជា​ប្រធាន និង​មន្រ្តី​ជាន់​ខ្ពស់​បី​នាក់​ទៀត​ជា​អនុប្រធាន​ហើយ​ដែល​មួយ​ក្នុង​ចំណោម​មន្រ្តី​ជាន់ខ្ពស់​បី​នាក់​នោះ​គឺ​លោក យឹម សុវណ្ណ។

ទន្ទឹម​នេះ​មន្រ្តី​ជាន់​ខ្ពស់​ម្នាក់​របស់​គណបក្ស​សង្គ្រោះជាតិ​ដែល​បាន​បដិសេធ​មិន​បង្ហាញ​ឈ្មោះ​បាន​ប្រាប់​ប្រព័ន្ធ​ផ្សព្វផ្សាយ​ក្នុង​ស្រុក​មួយ​ទៀត​ថា​មន្រ្តី​បី​នាក់​ដែល​ប្រហែល​នឹង​ត្រូវ​តែងតាំង​ជា​អនុប្រធាន​គណបក្ស​សង្គ្រោះជាតិ​គឺ​ភរិយា​របស់​លោក សម រង្ស៊ី លោកស្រី ជូឡុង សូមូរ៉ា លោក ប៉ុល ហំម និង​លោក យឹម សុវណ្ណ។

ប៉ុន្តែ​នៅ​ពេល​ប្រាប់​ភ្នំពេញប៉ុស្តិ៍​កាលពី​ម្សិលមិញ​អ្នក​នាំពាក្យ​របស់​គណបក្ស​សង្គ្រោះ​ជាតិ លោក អេង ឆៃអ៊ាង ដែល​បាន​ដឹកនាំ​គណៈប្រតិភូ​ទៅ​ជួប​លោក សម រង្ស៊ី ក្នុង​ទីក្រុង​ហុងកុង​ពី​ថ្ងៃ​ទី ១៧‑១៩ កុម្ភៈ បដិសេធ​ចំពោះ​ការ​ចោទប្រកាន់​នេះ​ដោយ​ថ្លែង​ថា​នៅ​ក្នុង​កិច្ច​ជំនួប​ជាមួយ​លោក សម រង្ស៊ី មិន​បាន​លើក​ឡើង​អំពី​គម្រោង​នេះ​ទេ ហើយ​បាន​ហៅ​ការ​ចោទប្រកាន់​នេះ​ថា​ជា «ការ​កុហក» ដើម្បី​បង្ក​បញ្ហា​នៅ​ក្នុង​ចំណោម​មេដឹកនាំ​របស់​គណបក្ស​សង្គ្រោះជាតិ។

លោក អេង ឆៃអ៊ាង បាន​ថ្លែង​ថា៖ «យើង​មិន​បាន​គិត​អំពី​បញ្ហា​នេះ​ទេ។ អ្វី​ដែល​យើង​បាន​និង​កំពុង​ធ្វើ​នាពេល​បច្ចុប្បន្ន​នេះ​គឺ​រៀបចំ​បញ្ជី​ឃុំ​សង្កាត់​ដើម្បី​ចូលរួម​ការ​ប្រកួត​ប្រជែង [ការ​បោះឆ្នោត]»។ «ទេ​ជា​ការ​កុហក​ទាំង​ស្រុង។ យើង​ទៅ​មិន​បាន​និយាយ​អំពី​បញ្ហា​នេះ​ទេ»។

លោក អេង ឆៃអ៊ាង បាន​បន្ថែម​ថា​គណៈប្រតិភូ​របស់​លោក​ទៅ​ជួប​លោក សម រង្ស៊ី គឺ​គ្រាន់តែ​ជា​ការ​ទៅ​ជួប​ធម្មតា​បន្ទាប់ពី​គណៈប្រតិភូ​របស់​យើង​ធ្លាប់​ធ្វើ​ការងារ​ជាមួយ​លោក សម រង្ស៊ី ជាច្រើន​ឆ្នាំ​កន្លង​មក​ហើយ​ក៏​បាន​ជជែក​អំពី​ស្ថានភាព​នយោបាយ​មួយ​ចំនួន​ហើយ​គណបក្ស​សង្គ្រោះជាតិ​មាន​គណៈកម្មាធិការ​អចិន្រ្តៃយ៍ និង​គណៈកម្មាធិការ​កណ្តាល​ដែល​ជា​អ្នក​សម្រេច​ក្នុង​ការ​តែងតាំង​មេដឹកនាំ​គណបក្ស​សង្គ្រោះជាតិ។

លោក ឆៃអ៊ាង បាន​ថ្លែង​ថា៖ «យើង​មិន​បាន​និយាយ​ពីព្រោះ​វា​មិនមែន​ជា​តួនាទី​របស់​យើង ហើយ​ក៏​មិនមែន​ជា​តួនាទី​របស់​លោក​ប្រធាន សម រង្ស៊ី ដែរ​ពីព្រោះ​លោក​បាន​លាលែង​តំណែង​ហើយ»។

លោក សំ គន្ធាមី នាយក​ប្រតិត្តិ​នៃ​អង្គការ​ឃ្លាំ​មើល​ការ​បោះឆ្នោត NICFEC បាន​ថ្លែង​ថា ប្រសិន​បើ​គណបក្ស​សង្គ្រោះ​ជាតិ​តែងតាំង​អនុប្រធាន​បី​នាក់​សម្រាប់​គណបក្ស គណបក្ស​សង្គ្រោះ​ជាតិ​នឹង​ទទួល​ការ​រិះគន់​ហើយ​នឹង​ប៉ះពាល់​ប្រជាប្រិយភាព​របស់​គណបក្ស​តាមរយៈ​ការ​រិះគន់​នេះ​ព្រោះ​គណបក្ស​ប្រឆាំង​ធ្លាប់​រិះគន់​រដ្ឋាភិបាល​ថា​មាន​សមាជិក​ច្រើន និង​ចាត់​ទុក​រដ្ឋាភិបាល​ថា​មាន​ក្បាល​ធំ និង​ខ្លួន​តូច។

លោក សំ គន្ធាមី បាន​ថ្លែង​ឲ្យ​ដឹង​បន្ថែម​ទៀត​ថា៖ «ចំពោះ​ទំហំ​ការងារ​អាច​មាន [អនុប្រធាន] យ៉ាង​ច្រើន។ ប្រសិន​បើ​មាន​បី បួន វា​លើស​តម្រូវការ​ហើយ»៕ PS

អត្ថបទគួរចាប់អារម្មណ៍