.jpg)
តំបន់ឧទ្យានជាតិរាមកំពុងត្រូវបានរំលោភជាសម្បត្តិឯកជន។ រូបថត សហការី
ភ្នំពេញៈ លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុបានឲ្យដឹងថា សមត្ថកិច្ចនៃរដ្ឋបាលខេត្ដព្រះសីហនុបានកំណត់អត្ដសញ្ញាណមេក្លោងដឹកនាំពលរដ្ឋចូលទៅទន្ទ្រានយកដីរដ្ឋនៅក្នុងតំបន់ឧទ្យានជាតិព្រះសីហនុរាម និងកំពុងបន្តស្រាវជ្រាវដើម្បីចាត់វិធានការតាមច្បាប់។
លោកបានអះអាងថា ពលរដ្ឋនៅតែចាញ់បោកមេខ្លោងចូលទៅទន្ទ្រានកាន់កាប់ដីរដ្ឋនៅក្នុងតំបន់ឧទ្យានជាតិដោយខុសច្បាប់ដែលពួកគេភាគច្រើនមកពីខេត្តផ្សេងៗគ្នា។
រដ្ឋបាលខេត្ដព្រះសីហនុកាលពីថ្ងៃចន្ទទី ៤ ខែឧសភានេះបានចេញសេចក្ដីប្រកាសព័ត៌មានមួយបង្ហាញថា ក្រោយពេលរាជរដ្ឋាភិបាលបានចេញអនុក្រឹត្យកំណត់តំបន់ឧទ្យានជាតិព្រះសីហនុរាមជាតំបន់ប្រើប្រាស់ដោយចីរភាព និងធ្វើអនុបយោគដីសម្បត្ដិសាធារណៈរបស់រដ្ឋមកជាសម្បត្ដិឯកជនរបស់រដ្ឋកាលពីថ្ងៃទី ២៣ ខែ មិថុនា ឆ្នាំ ២០០៨។
ក្នុងនោះរាជរដ្ឋាភិបាលបានកំណត់តំបន់គ្រប់គ្រងក្នុងឧទ្យានជាតិព្រះសីហនុរាមលើផ្ទៃដីទំហំ ៣ ៣០០ ហិកតា ទៅជាតំបន់ប្រើប្រាស់ដោយចីរភាពស្ថិតនៅក្នុងឃុំរាម ស្រុកព្រៃនប់ ដោយជួលទៅឲ្យក្រុមហ៊ុន ហិះចៀ ធូរីហ្សឹម ឌិវេឡុបមេន ខមភេនី និងជួលទៅឲ្យក្រុមហ៊ុន អេវើគ្រីន សាក់សេស អែន អាស៊ី រីសត ឌីវេឡុបមែន ខូអិលធីឌី ផ្ទៃដីទំហំ ២ ៣៧៧ ហិកតា ដើម្បីធ្វើការវិនិយោគអភិវឌ្ឍលើវិស័យទេសចរណ៍។
រដ្ឋបាលខេត្ដបញ្ជាក់ថា បន្ទាប់ពីទទួលបានសិទ្ធិវិនិយោគពីរាជរដ្ឋាភិបាល ក្រុមហ៊ុនទាំង ២ បានដំណើរការគម្រោងវិនិយោគរបស់ខ្លួននៅលើទីតាំងដែលបានផ្ដល់ជូនតាមកិច្ចសន្យាជួលចុះកាលថ្ងៃទី ២៣ ខែ មិថុនា ឆ្នាំ ២០០៨។
ទន្ទឹមនឹងការអភិវឌ្ឍនេះក៏មានសកម្មភាពលួចកាប់ទន្ទ្រាន រុករានយកដីព្រៃ ធ្វើជាកម្មសិទ្ធិនៅក្នុងតំបន់ឧទ្យានជាតិព្រះសីហនុរាមបានកើតឡើងជាបន្តបន្ទាប់ដោយសកម្មភាពទាំងនោះបានបំផ្លិចបំផ្លាញធនធានធម្មជាតិ ដែលជាសម្បត្ដិសាធារណៈរបស់រដ្ឋ និងបានធ្វើឲ្យរាំងស្ទះដល់ការអនុវត្ដគម្រោងរបស់ក្រុមហ៊ុនដែលទទួលបានសិទ្ធិស្របច្បាប់ពីរាជរដ្ឋាភិបាលផងដែរ។
រដ្ឋបាលខេត្ដបានឲ្យដឹងថា សកម្មភាពល្មើសច្បាប់របស់ពលរដ្ឋដែលចូលទៅទន្ទ្រាន រុករាន កាន់កាប់ដីរបស់រដ្ឋដោយខុសច្បាប់ត្រូវបានអាជ្ញាធរមានសមត្ថកិច្ចចុះធ្វើការណែនាំ និងចាត់វិធានការជាបន្តបន្ទាប់។ រហូតដល់ឆ្នាំ ២០១៦ រដ្ឋបាលខេត្ដព្រះសីហនុបានបង្កើតក្រុមការងារចម្រុះចុះវាស់វែង និងកំណត់អត្តសញ្ញាណក្បាលដីរបស់ប្រជាពលរដ្ឋដែលបាននិងកំពុងរស់នៅ អាស្រ័យផលលើផ្ទៃដីដែលមានផលប៉ះពាល់ក្នុងតំបន់ឧទ្យានជាតិព្រះសីហនុរាមនេះ។
រហូតដល់ឆ្នាំ ២០១៧ រាជរដ្ឋាភិបាលក៏បានចេញអនុក្រឹត្យលេខ ២១៧ ចុះថ្ងៃទី ១៣ ខែ ធ្នូ ឆ្នាំ ២០១៧ ស្ដីពីការកំណត់ជាតំបន់សហគមន៍នៃឧទ្យានជាតិព្រះសីហនុរាមលើផ្ទៃដីជិត ៦៦៨ ហិកតា ក្នុងភូមិសាស្ដ្រ ឃុំរាម ស្រុកព្រៃនប់ ខេត្ដព្រះសីហនុដោយបានកាត់ឆ្វៀលចេញបណ្ណកម្មសិទ្ធិជូនប្រជាពលរដ្ឋដែលរស់នៅជាក់ស្ដែងក្នុងតំបន់នេះ។
រដ្ឋបាលខេត្ដបានបញ្ជាក់ថា ប៉ុន្ដែនៅក្នុងអំឡុងឆ្នាំ ២០១៨ ក្រុមជនអនាធិបតេយ្យដែលបានកៀរគរគ្នាមកពីបណ្ដាខេត្ដនានាធ្វើសកម្មភាពសម្រុកចូលរុករានកាប់ទន្ទ្រានយកដីព្រៃរបស់រដ្ឋធ្វើជាសកម្មសិទ្ធិនៅក្នុងតំបន់នេះ ជាពិសេសចូលទៅដល់ក្នុងទីតាំងដីវិនិយោគរបស់ក្រុមហ៊ុនទាំង ២ ថែមទៀត។
រដ្ឋបាលខេត្ដបញ្ជាក់ថា ដោយអនុវត្ដតាមសេចក្ដីជូនដំណឹងរបស់ក្រសួងបរិស្ថានចុះថ្ងៃទី ១២ ខែ កញ្ញា ឆ្នាំ ២០១៨ ស្ដីពីការហាមឃាត់ការឈូសឆាយ កាប់ឆ្ការ ដុត រុករានទន្ទ្រានកាន់កាប់ដីព្រៃ ធ្វើជាកម្មសិទ្ធិ ការទិញ-លក់ដីរដ្ឋ និងការបញ្ជាក់ការទិញ-លក់ខុសច្បាប់នៅក្នុងតំបន់ការពារធម្មជាតិក្នុងនោះរដ្ឋបាលខេត្ដព្រះសីហនុបានជូនដំណឹង និងផ្សព្វផ្សាយជាបន្តបន្ទាប់ដល់ពលរដ្ឋដែលចាញ់បោកជនខិលខូច ចូលទៅកាប់គាស់ រុករានទន្ទ្រានដីរដ្ឋយកធ្វើជាកម្មសិទ្ធិដោយខុសច្បាប់ឲ្យដកខ្លួនចេញជាបន្ទាន់។
រដ្ឋបាលខេត្ដបន្ដថា ប៉ុន្ដែជនខិលខូចទាំងនោះមិនមានការដកថយនោះទេ ហើយកាន់តែមានសកម្មភាពបំពានថែមទៀត។ ដោយឃើញសកម្មភាពបំពានកាន់តែកើនឡើងទើបមន្ដ្រីឧទ្យានុរក្សប្រចាំការនៅក្នុងតំបន់ឧទ្យានជាតិព្រះសីហនុរាមបានសហការជាមួយកម្លាំងគណៈបញ្ជាការឯកភាពរដ្ឋបាលស្រុកព្រៃនប់ រដ្ឋបាលស្រុកព្រៃនប់ និងកងរាជអាវុធហត្ថខេត្ដព្រះសីហនុបានចុះធ្វើការទប់ស្កាត់ការកាប់ទន្ទ្រាន រុករាន យកដីព្រៃរបស់រដ្ឋធ្វើជាកម្មសិទ្ធិ និងរុះរើខ្ទមអនាធិបតេយ្យដែលបានសង់រំលោភយកដីនៅក្នុងតំបន់ការពារធម្មជាតិក្នុងដែនឧទ្យានជាតិព្រះសីហនុរាម។
ក្នុងអំឡុងពេលនៃការចុះអនុវត្ដការរុះរើ ក្រុមជនអនាធិបតេយ្យទាំងនោះបានប្រើហិង្សាមកលើក្រុមការងារ ដោយបានប្រើប្រាស់កាំភ្លើងច្នៃ កាំបិត ពូថៅ ដុំថ្ម ចំពាមកៅស៊ូ និងដបសាំង បាញ់ វាយ កាប់ និងគប់តបតមកវិញបណ្ដាលឲ្យសមត្ថកិច្ចរងរបួសបន្តបន្ទាប់។
រដ្ឋបាលខេត្ដព្រះសីហនុបានឲ្យដឹងថា៖ «ដើម្បីទប់ស្កាត់សកម្មភាពអនាធិបតេយ្យនេះ រដ្ឋបាលខេត្ដព្រះសីហនុសូមជូនដំណឹងដល់បងប្អូនប្រជាពលរដ្ឋដែលចាញ់បោកជនខិលខូចចូលទៅកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិដោយខុសច្បាប់ត្រូវដកខ្លួនចេញជាបន្ទាន់។ ជាមួយគ្នានេះផងដែរ រដ្ឋបាលខេត្ដព្រះសីហនុនឹងចាត់វិធានការផ្លូវច្បាប់ ស្រាវជ្រាវរកអត្ដសញ្ញាណមេខ្លោង និងអ្នកពាក់ព័ន្ធដែលបំផុសចលនានេះឲ្យមកទទួលខុសត្រូវចំពោះមុខច្បាប់ដោយគ្មានការលើកលែងនោះឡើយ»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានឲ្យដឹងកាលពីថ្ងៃអង្គារថា ករណីទន្ទ្រានដីរដ្ឋនៅតំបន់ឧទ្យានជាតិព្រះសីហនុរាមនេះ គឺបានកើតមានឡើងជាច្រើនឆ្នាំមកហើយ និងបន្តរហូតដល់បច្ចុប្បន្ន។ អ្នកដែលចូលទៅទន្ទ្រានទាំងនោះមានទាំងពលរដ្ឋទូទៅ និងអ្នកមានអំណាច។ លោកផ្ទាល់ក៏ធ្លាប់ចុះទៅស៊ើបអង្កេត និងធ្វើរបាយការណ៍ជូនរដ្ឋបាលខេត្ដពីករណីនេះផងដែរ។
លោកបានឲ្យដឹងថា៖ «បច្ចុប្បន្នតំបន់ឧទ្យានជាតិព្រះសីហនុរាមនេះមានការទន្ទ្រានកាន់កាប់ដោយខុសច្បាប់ជាច្រើនកន្លែងហើយ។ ប៉ុន្ដែមិនទាន់មានចំណាត់ការទប់ស្កាត់នៅចំណុចណាមួយច្បាស់លាស់នៅឡើយទេ។ រដ្ឋបាលខេត្ដព្រះសីហនុ គួរកំណត់ឲ្យបានច្បាស់រវាងដីដែលបានអនុញ្ញាតឲ្យក្រុមហ៊ុនវិនិយោគ និងតំបន់ដែលឆ្វៀលទៅឲ្យពលរដ្ឋ ដើម្បីងាយស្រួលក្នុងការគ្រប់គ្រង បែងចែកដីរដ្ឋនេះ»៕
