ភ្នំពេញ: មន្ត្រីជំនាញក្រោមឱវាទនៃក្រសួងមហាផ្ទៃបានដកហូតឯកសាររដ្ឋបាលកម្ពុជាមិនប្រក្រតីដូចជាអត្តសញ្ញាណប័ណ្ណ សំបុត្រកំណើត សៀវភៅគ្រួសារ និងឯកសារផ្សេងៗទៀតប្រមាណជាង ៣ ម៉ឺនសន្លឹកពី ជនបរទេសក្នុងរយៈពេល ៥ ខែ ដើមឆ្នាំដែលបានកាន់កាប់ប្រើប្រាស់ដោយមិនស្របច្បាប់។
យោងតាមការបង្ហាញរបាយការណ៍កាលពីម្សិលមិញ ក្នុងកិច្ចប្រជុំបូកសរុបលទ្ធផលការដកហូតឯកសារមិនប្រក្រតី និងការទទួលពាក្យសុំជាជនបរទេសអន្ដោប្រវេសន៍សម្រាប់រយៈពេល ៥ ខែ នៃឆ្នាំ ២០១៩ និងលើកទិសដៅការងារមុនបញ្ចប់ឱសានវាទត្រឹមថ្ងៃទី ៣០ កក្កដា ខាងមុខនេះ។
ជនបរទេសទាំងនោះកំពុងប្រកបការងារ សំណង់ រកស៊ីលក់ដូរ និងការងារផ្សេងៗទៀត។
កិច្ចប្រជុំនេះត្រូវបានដឹកនាំដោយលោក សុខ ផល រដ្ឋលេខាធិការក្រសួងមហាផ្ទៃ និងជាប្រធានគណៈកម្មការគ្រប់គ្រងជនបរទេសអន្តោប្រវេសន៍ និងលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្ដោប្រវេសន៍ និងមន្ត្រីថ្នាក់ដឹកនាំ រួមទាំងមន្ត្រីនគរបាលពាក់ព័ន្ធជាច្រើននាក់ទៀត នៅទីស្តីការក្រសួងមហាផ្ទៃ។
របាយការណ៍ដដែលនេះបានឲ្យដឹងថា ឯកសាររដ្ឋបាលមិនប្រក្រតីទាំងនោះត្រូវបានដកហូតពីជនបរទេសអន្តោប្រវេសន៍សរុបជិត ៧ ម៉ឺននាក់ ចំនួនជិត ២ ម៉ឺនគ្រួសារ ដែលមានសញ្ជាតិខុសៗគ្នាចំនួន ៦ សញ្ជាតិ ក្នុងនោះជនជាតិវៀតណាមមានចំនួនច្រើនជាងគេ។ ទន្ទឹមគ្នានេះដែរសមត្ថកិច្ចក៏បានប្រកាសទទួលស្គាល់ជនបរទេសអន្តោប្រវេសន៍ចុះបញ្ជីចំនួនជាង ៥ ម៉ឺននាក់ដែលរស់នៅដោយស្របច្បាប់។
លោក សុខ ផល រដ្ឋលេខាធិការក្រសួងមហាផ្ទៃ និងជាប្រធានគណៈកម្មការគ្រប់គ្រងជនបរទេសអន្តោប្រវេសន៍បានថ្លែងថា រដ្ឋាភិបាលបានដាក់ឱសានវាទកំណត់ត្រឹមថ្ងៃទី ៣០ កក្កដា ឆ្នាំ ២០១៩ ខាងមុខនេះ ត្រូវតែបញ្ចប់ការដកហូតឯកសារមិនប្រក្រតីពីជនបរទេសទាំងអស់ ដែលរហូតមកដល់ពេលនេះ មន្ត្រីជំនាញបានធ្វើការដកហូតឯកសារមិនប្រក្រតីទាំងនេះបានចំនួនជាង ៩០ ភាគរយ ស្មើនឹងជិត ៧ ម៉ឺននាក់។
លោក សុខ ផល បញ្ជាក់ថា៖ «ចំណែកភាគរយដែលនៅសល់នោះ មានមួយចំនួនគាត់បានត្រឡប់ទៅប្រកបការងារនៅស្រុកគាត់វិញ និងមានហេតុផលច្រើនទៀត ប៉ុន្ដែយើងមិនទាន់អាចបញ្ជាក់ថា ទៅវិញចំនួនប៉ុន្មាននៅឡើយទេ។ ជនបរទេសទាំង ៦ សញ្ជាតិនេះត្រូវបានគ្រប់គ្រងដោយរដ្ឋាភិបាលយ៉ាងល្អ ដោយមានទាំងរូបថត ឈ្មោះ ទីកន្លែង និងឯកសារបញ្ជាក់ផ្សេងៗទៀត»។
លោកថ្លែងថា៖ «ចំពោះអ្នកដែលមកក្រោយៗទៀត ហើយគ្មានឈ្មោះក្នុងបញ្ជីនេះ នឹងក្លាយជាជនខុសច្បាប់ និងត្រូវអនុវត្តច្បាប់មុនគេ។ ឧទាហរណ៍ថា គាត់មកគ្នា ១០ នាក់មកចុះបញ្ជីតែ ៦ នាក់ គឺ ៤ នាក់ទៀតជាអ្នកខុសច្បាប់ បើយើងរកមិនឃើញថ្ងៃហ្នឹង ថ្ងៃស្អែកនឹងរកឃើញ ហើយក៏ត្រូវទទួលទោសតាមច្បាប់ដែរ»។
លោក សុវណ្ណ ពិសាខា អគ្គនាយករងនៃអគ្គនាយកដ្ឋានអន្ដោប្រវេសន៍បានថ្លែងដោយយោងតាមរបាយការណ៍ បានឲ្យដឹងថា លទ្ធផលសរុបពីដើមខែមករា ដល់ថ្ងៃទី ៣១ ខែ ឧសភា ឆ្នាំ ២០១៩ នេះ សមត្ថកិច្ចបានដកហូតឯកសាររដ្ឋបាលកម្ពុជាមិនប្រក្រតីសរុបចំនួន ៣៦ ០៩៤ ឯកសារ ពីគ្រួសារជនបរទេសអន្តោប្រវេសន៍សរុបចំនួន ១៩ ៣៩៥ គ្រួសារ គិតជាមនុស្សសរុបចំនួន ៦៨ ៨០១ នាក់ (ស្រី ៣២ ៨៣៧ នាក់) ដែលមានអាយុចាប់ពី ១៨ ឆ្នាំឡើងចំនួន ៤៩ ៦៣៨ នាក់ (ស្រី ២៣ ៩២១ នាក់) ជនបរទេសទាំងនោះមាន ៦ សញ្ជាតិ។
របាយការណ៍បន្តថា ជនបរទេសបែបអន្តោប្រវេសន៍ បានដាក់ពាក្យសុំប្រកាសទទួលស្គាល់ជាជនបរទេសអន្តោប្រវេសន៍កម្ពុជា ដែលមានអាយុ ១៨ ឆ្នាំឡើង ចំនួន ៧៦ ៤៩៨ នាក់ (ស្រី ៣៦ ៥៨៥ នាក់) គិតជាមនុស្សសរុបចំនួន ១១១ ៤២១ នាក់ (ស្រី ៥៣ ៥៦៧ នាក់) ស្មើនឹងចំនួន ៣៦ ៤៨៥ គ្រួសារ។
គណៈកម្មការជំនាញបានប្រកាសទទួលស្គាល់ជាជនបរទេសអន្តោប្រវេសន៍ឲ្យប្រើប្រាស់ឯកសារអន្តោប្រវេសន៍ចាប់ពីអាយុ ១៨ ឆ្នាំឡើង សរុបចំនួន ៣៣ ៩៣៩ ប្រកាស (ស្រី ១៦ ២៥៤ នាក់) គិតជាមនុស្សរួមចំនួន ៥២ ៧១០ នាក់ (ស្រី ២៥ ៣១៦ នាក់) ស្មើនឹងចំនួន ១៧០៥៧ គ្រួសារនៃអ្នកដែលបានដាក់ពាក្យសុំប្រកាសទទួលស្គាល់ជាជនបរទេសអន្តោប្រវេសន៍ទាំងអស់។
លោក សួន ប៊ុតម៉ៅ នាយកប្រតិបត្តិនៃអង្គការគាំពារសិទ្ធិក្រុមជនជាតិភាគតិច (MIRO) បានថ្លែងកាលពីម្សិលមិញដោយយោងតាមការតាមដានព្រឹត្តិការណ៍កន្លងមក បានឲ្យដឹងថា ការដកហូតឯកសារមិនប្រក្រតីពីជនបរទេសអន្តោប្រវេសន៍ មានផលប្រយោជន៍ដូចជាការធ្វើវិសុទ្ធកម្ម ឯកសារផ្លូវច្បាប់ ១ ប្រភេទ (ប័ណ្ណស្នាក់នៅអចិន្រៃ្តយ៍បរទេសអន្តោប្រវេសន៍ Permanent Resident Card Immigrant Alien) ឲ្យមានសុពលភាពតាមផ្លូវច្បាប់ ១០០% ពីព្រោះចាប់ពីទសវត្សរ៍ទី ៨០ ដល់ ២០១៤ ការចេញប័ណ្ណអន្តោប្រវេសន៍ និងការទទួលស្គាល់មិនទាន់មានស្តង់ដាច្បាស់លាស់នៅឡើយ។ បន្ទាប់មក ជនបរទេសទាំងនោះអាចមានសិទ្ធិសុំសញ្ជាតិបានតាមរយៈសញ្ជាតូបនីយកម្មបន្ទាប់ពីពួកគេបន្តប័ណ្ណស្នាក់នៅអចិន្រៃ្តយ៍ជនបរទេសអន្តោប្រវេសន៍ ៣ ដង (២ ឆ្នាំម្តង)។
លោកថា៖ «(យើងក៏សង្ស័យផងដែរ) ផលប៉ះពាល់ គឺជាការអនុវត្តនីតិវិធីដកហូត នៅមានភាពលម្អៀង មានន័យថា អ្នកខ្លះមិនត្រូវបានដកហូតទេប្រសិនបើពួកគេជាអ្នកមានប្រាក់ជាដើមដូចជានៅក្រុងកំពង់ឆ្នាំង។ តាមការអង្កេតយើងមិនមានតួលេខជាក់លាក់ទេប៉ុន្តែជនអន្តោប្រវេសន៍វៀតណាមរស់នៅប្រទេសកម្ពុជាសព្វថ្ងៃគឺមានចំនួនច្រើនណាស់»៕