The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ជំនាញ​ឃាត់​ឡាន​ដឹក​លើស​ទម្ងន់​ជិត​ ២០០ គ្រឿង​នៅ​ទូទាំង​ប្រទេស

មន្ត្រី​ជំនាញ​ឃាត់​ឡាន​ដឹក​លើស​ទម្ងន់​ជិត​ ២០០ គ្រឿង​នៅ​ទូទាំង​ប្រទេស

Content image - Phnom Penh Post
កម្មករ​កំពុង​ផ្ទេរ​ទំនិញ​ចេញ​រថយន្ត​ដឹក​លើស​ទម្ងន់​ទៅ​ដាក់​លើ​រថយន្ត​មួយ​ទៀ​ត។ រូបថត សហការី

មន្ត្រី​ជំនាញ​ឃាត់​ឡាន​ដឹក​លើស​ទម្ងន់​ជិត​ ២០០ គ្រឿង​នៅ​ទូទាំង​ប្រទេស

ភ្នំពេញ: ក្រសួង​សាធារណការ និង​ដឹក​ជញ្ជូន​ព្រមាន​ និង​បិទ​អាជីវកម្ម​ម្ចាស់​ក្រុមហ៊ុន​ដឹកជញ្ជូន​រយៈពេល ១ ឆ្នាំ​ប្រសិន​បើ​រថយន្ត​នោះ​បន្ត​ដឹក​លើស​ចំណុះ​ផ្គើន​ការ​ណែនាំ។

ការ​ព្រមាន​នេះ​ធ្វើ​បន្ទាប់ពី​ក្រសួង​បាន​ឃាត់​រថយន្ត​ដឹក​លើស​ចំណុះ​ជិត ២០០ គ្រឿង​នៅ​ទូទាំង​ប្រទេស។

ក្នុង​គេហេទំព័រ​របស់​ក្រសួង​សាធារណការ​ដែល​បាន​ចេញ​ផ្សាយ​កាល​ពី​ថ្ងៃ​ម្សិលមិញ​បាន​ឱ្យ​ដឹង​ថា​នៅ​ក្នុង​អំឡុង​ខែ​កក្កដា​គណៈកម្មាធិការ​ដឹកនាំ​ការ​ត្រួតពិនិត្យ​យានយន្ត​បាន​ឃាត់​រថយន្ត​ដឹក​លើស​ទម្ងន់​ ១៩០ គ្រឿង​ និង​ពិន័យ​ជា​ប្រាក់​បាន​ប្រមាណ ៤៥៩ លាន​និង ៣៨ ម៉ឺន​រៀល។

ក្រសួង​បាន​បន្ត​ថា៖ «យើង​សង្កេត​ឃើញ​ថា​ចំនួន​រថយន្ត​ដែល​ចាប់​បាន​ទាំង​នេះ​មាន​ការ​ធ្លាក់​ចុះ ៧៥ គ្រឿង​ពី ២៦៥​ គ្រឿង​នៅ​ក្នុង​ខែ​មិថុនា​មក​ត្រឹម ១៩០ គ្រឿង​ក្នុង​ខែ​កក្កដា»។ នៅ​ក្នុង​ចំណោម​រថយន្ត​ទាំង​នោះ​ផ្ទុក​លើស​ទម្ងន់​កំណត់​ជា​មធ្យម​ចាប់​ពី ០៤ តោន​រហូត​ដល់​ ៣៣ តោន។

តាម​របាយការណ៍​របស់​ក្រុម​ការងារ​ជំនាញ​បាន​រកឃើញ​ថា​រថយន្ត​ចំនួន​ពីរ​គ្រឿង​ក្នុង​ចំណោម​រថយន្ត​ទាំងអស់​ដែល​ឃាត់​បាន​នោះ​គឺ​ដឹក​លើស​ចំណុះ​ពី ៣៨ ទៅ ៤៨ តោន។

ក្រសួង​បាន​សង្កត់​ធ្ងន់​ថា៖ «ចំពោះ​ករណី​នេះ​យើង​បាន​ធ្វើការ​ព្រមាន​ដល់​ម្ចាស់​យានយន្ត​ដែល​បាន​ដឹក​លើស​ទម្ងន់​ទាំង ២ គ្រឿង​នោះ​ថា​ប្រសិន​បើ​មាន​ករណី​បែប​នេះ​កើតឡើង​ម្តង​ទៀត​ក្រសួង​ និង​មន្ត្រី​មាន​សមត្ថកិច្ច​នឹង​ធ្វើការ​ឃាត់​រថយន្ត​ទុក​រយៈពេល ០១ ឆ្នាំ និង​បិទ​ការ​ធ្វើ​អាជីវកម្ម​រយៈពេល ០១ ឆ្នាំ​ព្រម​ទាំង​ដកហូត​ប័ណ្ណ​បើកបរ​រយៈពេល ០២ ឆ្នាំ​ផង​ដែរ»។

អ្នក​នាំពាក្យ​ក្រសួង​សាធារណការ​លោក វ៉ា ស៊ឹមសុរិយា បាន​ថ្លែង​ថា​នឹង​មិន​បន្ត​អនុគ្រោះ​ដល់​រថយន្ត​ទាំង​ឡាយ​ដែល​ដឹក​លើស​ចំណុះ​ទៀត​ទេ​ហើយ​និង​ផាក​ពិន័យ​យ៉ាង​តឹងរ៉ឹង។

លោក​បាន​បន្ត​ថា៖ «ពី​ដើម​យើង​អនុគ្រោះ​ខ្លះ​តែ​ឥឡូវ​អត់​អនុគ្រោះ​ទេ​ចឹង​ការ​ផាក​ពិន័យ​តឹងតែង​ណាស់​ចាប់​តាំងពី​ខែ​មេសា​ពេល​ខ្លះ​គាត់​ដាក់​ទំនិញ​លើស​អាច​ចំណេញ​បង់​ឱ្យ​ក្រៅ​ច្បាប់​ប៉ុន្តែ​ការ​ធ្វើ​បែប​នេះ​មិន​អាច​ទូទាត់​ជាមួយ​ការ​ផាក​ពិន័យ​ទេ​ព្រោះ​យើង​ពិន័យ​ច្រើន​ជាង​ចឹង​គាត់​មិន​អាច​ចំណេញ​បាន​ទេ»។

នាយក​វិទ្យាស្ថាន​សុវត្ថិភាព​ចរាចរណ៍​លោក អ៊ា ចរិយា ថ្លែង​ថា​ការ​ឃាត់​រថយន្ត​ដឹក​លើស​ចំណុះ​ជា​រឿង​ប្រសើរ​តែ​លោក​ក៏​ជំរុញ​ឱ្យ​ក្រសួង​រឹតបន្តឹង​ទៀត​ខណៈ​រថយន្ត​មួយ​ចំនួន​នៅ​តែ​បន្ត​ដឹក​លើស​ទម្ងន់​ទាំង​ក្នុង​រាជធានី​ភ្នំពេញ និង​នៅ​តាម​បណ្តា​ខេត្ត៕

អត្ថបទគួរចាប់អារម្មណ៍