ភ្នំពេញៈ នាយការិយាល័យបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញលោក ព្រហ្ម យ៉ន ប្រាប់ភ្នំពេញប៉ុស្តិ៍កាលពីថ្ងៃទី ៩ សីហា ថា មន្ត្រីជំនាញបាននិងកំពុងចុះណែនាំពលរដ្ឋដែលដាក់លក់ហ្គាសនៅតាមទីតាំងនានាជាបណ្តើរៗហើយ។ ការចុះណែនាំនេះធ្វើឡើង ក្រោយពីអភិបាលរាជធានីលោក ឃួង ស្រេង ប្រាប់មន្ទីរជំនាញឲ្យណែនាំ ឬលុបបំបាត់កន្លែងលក់ហ្គាសអនាធិបតេយ្យ គ្មានលក្ខណៈបច្ចេកទេសត្រឹមត្រូវឲ្យអស់។
លោក ព្រហ្ម យ៉ន បញ្ជាក់ថា ប្រសិនបើរកឃើញថាអ្នកណាមិនមានច្បាប់ត្រឹមត្រូវ សមត្ថកិច្ចនឹងបិទទីតាំងគាត់ អ្នកណាមានច្បាប់ត្រឹមត្រូវ សមត្ថកិច្ចពន្យល់អំពីវិធានការសុវត្ថិភាពដល់ពួកគាត់។
អភិបាលរាជធានីភ្នំពេញលោក ឃួង ស្រេង កាលពីថ្ងៃទី ៦ ខែសីហា បានណែនាំដល់មន្ទីរជំនាញត្រូវណែនាំ ឬលុបបំបាត់កន្លែងលក់ហ្គាសអនាធិបតេយ្យ គ្មានលក្ខណៈបច្ចេកទេសស្តង់ដាត្រឹមត្រូវឲ្យអស់ក្នុងភូមិសាស្ត្ររាជធានីភ្នំពេញ ដើម្បីកាត់បន្ថយហានិភ័យគ្រោះថ្នាក់របស់ប្រជាពលរដ្ឋដោយប្រការណាមួយ។
លោក យ៉ន បញ្ជាក់ថា៖ «យើងកំពុងប្រជុំសម្រេចថា យើងត្រូវធ្វើម៉េច ដើម្បីចុះទៅឲ្យការងាររលូន ហើយពួកគាត់មានការទទួលយល់ដឹង សាទរ និងចូលរួមជាមួយពួកយើងដើម្បីវិធានការសុវត្ថិភាពដល់ពួកគាត់ ហ្នឹងតែប៉ុណ្ណឹងទេ»។
លោក ថេង សុថុល អភិបាលខណ្ឌចំការមនប្រាប់ភ្នំពេញប៉ុស្តិ៍ពីថ្ងៃអាទិត្យថា លោកបានចាត់ឲ្យមន្ត្រីចុះស្រង់ស្ថិតិធ្វើកិច្ចការងារនោះបានខ្លះៗហើយ។ លោកថា ប្រសិនបើរកឃើញមានកន្លែងដាក់លក់ហ្គាស ដែលគ្មានស្តង់ដាបច្ចេកទេសត្រឹមត្រូវ វិធានការដំបូងគឺត្រូវធ្វើការអប់រំណែនាំ។
លោកថ្លែងថា៖ «កិច្ចការហ្នឹង គឺយើងត្រូវសហការជាមួយមន្ទីរជំនាញពាក់ព័ន្ធធ្វើការណែនាំ ឬធ្វើកិច្ចសន្យាក៏ដូចជាណែនាំឲ្យពួកគាត់មានការទុកដាក់ឲ្យបានត្រឹមត្រូវទៅតាមលក្ខណៈបច្ចេកទេស»។ លោកថា ក្រោយការអប់រំ ណែនាំហើយបើពួកគាត់នៅតែបំពានមិនព្រមកែប្រែ ឬក៏ពិនិត្យឃើញថានៅតែមានខុសលក្ខណៈបច្ចេកទេស នោះទើបមានវិធានការផ្សេងក្រៅពីនោះទៀត។
លោក ហែម ដារិទ្ធិ អភិបាលខណ្ឌពោធិ៍សែនជ័យបានឲ្យដឹងថា៖ «នៅពេលរកឃើញថា កន្លែងដាក់លក់ហ្គាសមិនមានលក្ខណៈបច្ចេកទេសត្រឹមត្រូវដំបូង គឺយើងត្រូវធ្វើការអប់រំណែនាំ និងទុកពេលវេលាឲ្យគាត់ផ្លាស់ប្តូរទៅរកទីតាំងណាសមរម្យ ហើយងាយស្រួលក្នុងការពន្លត់ប្រសិនបើមានហានិភ័យកើតឡើង»។ លោក ដារិទ្ធ បន្តថាមិនមានបញ្ហាអ្វីធ្ងន់ធ្ងររហូតដល់ថ្នាក់បិទទីតាំងភ្លាមៗនោះទេ។ ប្រជាពលរដ្ឋជាអ្នកលក់ហ្គាសបានសហការល្អជាមួយអាជ្ញាធរ។
លោក ជា រ៉ា អ្នកបញ្ចូលហ្គាសនៅម្តុំផ្លូវលំ សង្កាត់កាកាប ខណ្ឌពោធិ៍សែនជ័យ គាំទ្រទៅលើចំណាត់ការនេះ។ លោកបានលើកឡើងថា នេះជាវិធីល្អមួយដើម្បីធ្វើឲ្យមានសុវត្ថិភាពសម្រាប់ប្រជាពលរដ្ឋទូទៅ ជាពិសេសកន្លែងដាក់លក់ និងបញ្ចូលហ្គាស។
បុរសរូបនោះនិយាយថា៖ «ហ្គាសដែលខ្ញុំបញ្ចូលលក់ឲ្យគេនេះ គឺទទួលយកពីដេប៉ូដែរ ហេតុនេះប្រសិនបើគេដាក់ធុងប្រភេទណាមក យើងត្រូវទទួលទៅតាមនោះដែរ។ ដូច្នេះខ្ញុំសង្ឃឹមថា ចំណាត់ការថ្មីរបស់អាជ្ញាធរធ្វើឲ្យខ្ញុំកាន់តែងាយស្រួលជាងមុនក្នុងការទទួលបានធុងហ្គាសដែលមានគុណភាពស្តង់ដា មិនបារម្ភពីហានិភ័យផ្សេងៗដែលអាចកើតមានឡើង»។
លោក រ៉ា បញ្ជាក់ថានៅកន្លែងបញ្ចូលហ្គាសមិនងាយមានការផ្ទុះកើតឡើងទេ លុះត្រាតែមានការធ្វេសប្រហែស។ ធ្វេសប្រហែសត្រង់ថា អ្នកខ្លះបញ្ចូលហ្គាសបណ្តើរជក់បារីបណ្តើរ ឬក៏អ្នកបញ្ចូលអត់មានបច្ចេកទេស មិនធ្លាប់ឆ្លងកាត់វគ្គសិក្សាជាដើម។
អ្នកលក់ និងបញ្ចូលហ្គាសនៅសង្កាត់ក្រាំងធ្នង់ ខណ្ឌសែនសុខម្នាក់ទៀត លោក សេង ហាក់ ប្រាប់ ភ្នំពេញប៉ុស្តិ៍ថាកន្លែងទុកដាក់ហ្គាសត្រូវមានលម្ហគ្រប់គ្រាន់មិនត្រូវរក្សាទុកនៅទីកន្លែងបិទហប់ជិតនោះទេ។ ព្រោះវាអាចបណ្តាលឲ្យមានហានិភ័យផ្សេងៗអាចកើតមានឡើងព្រោះការហៀរហ្គាសចេញប្រតិកម្មជាមួយភ្លើង។
លោកថា៖ «កន្លែងលក់ហ្គាសតូចៗបំផុតដែលគ្មានបច្ចេកទេសមួយចំនួនគាត់ដាក់លក់លាក់ៗ ព្រោះខ្លាចគេដឹង ហើយអ្នកខ្លះទៀតយកធុងហ្គាសទៅទុកក្នុងបន្ទប់តូចចង្អៀតដោយខ្លាចវាផ្ទុះ ប្រសិនបើនៅហាលថ្ងៃ»។
លោក ហាក់ បន្ថែមថាការពិតធុងហ្គាសល្អបំផុតគឺទុកនៅទីមានលម្ហធំទូលាយ ទោះជាហាលថ្ងៃក៏ដោយវាមិនបង្កឲ្យផ្ទុះ ឬហានិភ័យផ្សេងៗកើតឡើងឡើយ។ ម្យ៉ាងទៀតធុងហ្គាសធំៗ តែងមានក្បាលបិទដោយស្វ័យប្រវត្តិនៅពេលហ្គាសហៀរចេញ។ មានបទពិសោធក្នុងការលក់ហ្គាសជិត ២០ ឆ្នាំលោក ហាក់ កត់សម្គាល់ឃើញថា អ្នកលក់ហ្គាសគ្មានបច្ចេកទេសមួយចំនួនគឺប្រកបរបររកស៊ីតាមគេ ដាក់លក់ផ្តេសផ្តាសមិនបានសិក្សារៀនសូត្រឲ្យដឹងច្បាស់ពីហ្គាស។
អ្នកលក់ហ្គាសនោះនិយាយថា៖ «អ្នកខ្លះឃើញគេរកបានចង់រកដែរ អត់ជំនាញក្នុងការលក់ អត់ដឹងថាហ្គាសហ្នឹងបង្កហេតុដោយសារអីទេ។ ដំបូងអ៊ីចឹងឲ្យតែឃើញ គេលក់ដាច់ចេះតែលក់ដែរទៅ ហ្នឹងកន្លែងលក់ហ្គាសតូចៗ»។
លោក ឆេង សុខនី អ្នកលក់ និងបញ្ចូលហ្គាសនៅភូមិស្លែងរលើង សង្កាត់ទឹកថ្លា ខណ្ឌសែនសុខឲ្យដឹងថា កន្លែងលក់ហ្គាសមិនត្រូវដាក់ឡូកឡំជាមួយរបស់ផ្សេងៗទេ។ បើលក់ហ្គាសឲ្យដឹងថាហ្គាស កាលណាលាយឡំគ្នាមិនច្បាស់លាស់អាចបណ្តាលឲ្យមានហានិភ័យផ្សេងៗកើតឡើងដូចជាផ្ទុះជាដើម។
លោក សុខនី បញ្ជាក់ថា៖ «ខ្ញុំសង្កេតឃើញថា កន្លែងលក់ហ្គាសដែលមានការផ្ទុះកើតឡើងគឺដោយសារតែទុកដាក់ហ្គាសមិនត្រឹមត្រូវ។ អ្នកខ្លះលក់ហ្គាសផង ផ្សារ និងជួសជុលកង្ហារផង ហ្នឹងជាហេតុធ្វើឲ្យងាយមានហានិភ័យកើតឡើង»។
កាលពីល្ងាចថ្ងៃសៅរ៍ទី ១៨ ខែកក្កដាហាងលក់ហ្គាស ១ កន្លែងស្ថិតនៅតាមបណ្ដោយផ្លូវត្រសក់ផ្អែម សង្កាត់ផ្សារថ្មី ៣ រាជធានីភ្នំពេញមានការផ្ទុះធុងហ្គាសដែលបណ្តាលឲ្យមនុស្ស ៤ នាក់ស្លាប់ និង ៥ នាក់ផ្សេងទៀតរងរបួស។ មូលហេតុនៃការផ្ទុះនេះ ដោយសារតែការផ្សារធុងហ្គាសខុសបច្ចេកទេស បង្កឲ្យផ្ទុះធុងហ្គាស ហើយបង្កើតជាអគ្គិភ័យតែម្ដង។ នេះបើតាមការឲ្យដឹងពីអាជ្ញាធរមានសមត្ថកិច្ច៕