.jpg)
មន្ត្រីជំនាញតម្រូវឲ្យម្ចាស់ការដ្ឋានជីកដីបំពេញបែបបទ និងបង់ពិន័យ បន្ទាប់ពីសមត្ថកិច្ចចម្រុះបានចុះផ្អាកសកម្មភាព និងបានឃាត់គ្រឿងចក្រទុក។ នរគបាល
សៀមរាបៈ មន្ត្រីជំនាញរ៉ែ និងថាមពលខេត្តសៀមរាបបានតម្រូវឲ្យម្ចាស់ការដ្ឋានជីកបកដីស្រែយកអាចម៍ដីធ្វើអាជីវកម្មចំនួន ២ កន្លែង មកបំពេញបែបបទ និងបង់ពិន័យ បន្ទាប់ពីសមត្ថកិច្ចចម្រុះបានចុះផ្អាកសកម្មភាព និងបានឃាត់គ្រឿងចក្រទុកនៅនឹងកន្លែងក្នុងឃុំ-ស្រុកបាគង ខេត្តសៀមរាបកាលពីចុងសប្ដាហ៍មុន។
កាលពីថ្ងៃទី ១៥ ខែមករា មន្ត្រីជំនាញនៃមន្ទីររ៉ែ និងថាមពលខេត្តសៀមរាបសហការជាមួយសមត្ថកិច្ចប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប និងអាជ្ញាធរដែនដីបានផ្អាកសកម្មភាពជីកដីស្រែយកអាចម៍ដីលក់ និងឃាត់គ្រឿងចក្រទុក បន្ទាប់ពីរកឃើញថា ការដ្ឋានទាំង ២ នោះគ្មានច្បាប់អនុញ្ញាត។
លោក មាស ជូរ៉ានី ប្រធានមន្ទីររ៉ែ និងថាមពលខេត្តនេះបានប្រាប់ភ្នំពេញប៉ុស្តិ៍ពីម្សិលមិញថា ក្រោយពីការហាមឃាត់សកម្មភាពទាំងនេះ ក្រុមមន្ត្រីជំនាញបានឲ្យម្ចាស់ការដ្ឋានទាំង ២ ទីតាំងនោះមកបំពេញបែបបទ ដើម្បីសុំការអនុញ្ញាតធ្វើអាជីវកម្មទៅតាមផ្លូវច្បាប់។
លោកថា៖ «ទន្ទឹមនឹងនេះក្រុមការងារយើងបានតម្រូវឲ្យម្ចាស់ការដ្ឋានជីកបកដីស្រែទាំង ២ ទៅបង់ប្រាក់ផាកពិន័យតាមមាត្រា ៣៥ ថ្មីនៃច្បាប់ស្ដីពីវិសោធនកម្មច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ»។
លោកបានពន្យល់ថា តាមមាត្រានៃច្បាប់ខាងលើនេះម្ចាស់ការដ្ឋានទាំងនោះត្រូវប្រឈមការផាកពិន័យទ្វេដងនៃតម្លៃប៉ាន់ស្មានលើផលិតផលរ៉ែ និងបរិមាណរ៉ែដែលមានក្នុងទីតាំងនោះ ឬពិន័យជាប្រាក់ ១,៥ លានរៀលក្នុង ១ ថ្ងៃគិតពីថ្ងៃចាប់ផ្ដើមប្រតិបត្តិការអត់ច្បាប់រហូតដល់ថ្ងៃត្រូវបានបញ្ឈប់។
ក្នុងករណីនៅតែបន្តលួចធ្វើសកម្មភាពជីកបកដីស្រែនោះអត់ច្បាប់ទៀត ពួកគាត់អាចរងពិន័យជាប្រាក់ទ្វេដង ដូចដែលមានចែងក្នុងកថាខណ្ឌទី ១ នៃមាត្រា (៣៥ ថ្មី) នេះ ឬត្រូវផ្ដន្ទាទោសដាក់ពន្ធនាគារពី ១ ឆ្នាំដល់ ៥ ឆ្នាំដោយមិនទាន់គិតដល់សំណងខូចខាតផ្សេងទៀត។ រីឯឧបករណ៍គ្រឿងចក្រ ផលិតកម្មផ្សេងទៀតត្រូវរឹបអូសជាសម្បត្តិរដ្ឋ។
លោក សូរ ប្លាតុង អភិបាលស្រុកបាគងបានប្រាប់ភ្នំពេញប៉ុស្តិ៍ថា ការដ្ឋានជីកបកដីស្រែទាំង ២ នោះ ទើបតែចាប់ផ្ដើមប្រតិបត្តិប៉ុណ្ណោះ ដោយប្រើគ្រឿងចក្រទាំងជីក និងដឹកជញ្ជូនជិត ១០ គ្រឿងក្នុងនោះការដ្ឋានទី ១ ជីកបានទំហំ ៣០x៦០ ម៉ែត្រ ឯការដ្ឋានទី ២ ជីកបានទំហំ ៣០x៥០ ម៉ែត្រ និងជម្រៅ ០,៤ ម៉ែត្រ ដូចគ្នា។
លោកបានបញ្ជាក់ថា៖ «បច្ចុប្បន្នគ្រឿងចក្រទាំងនោះត្រូវបានឃាត់ទុកជាបណ្ដោះអាសន្នដើម្បីរង់ចាំការដោះស្រាយតាមនីតិវិធីច្បាប់»៕
