ភ្នំពេញៈ មន្ត្រីជំនាញកសិកម្ម និងធនធានទឹកក្នុងខេត្តចំនួន ៣ គឺពោធិ៍សាត់ បាត់ដំបង និងបន្ទាយមានជ័យ កំពុងបន្តស្ដារប្រព័ន្ធប្រឡាយរងមួយចំនួន និងលើកកម្ពស់ខ្នងទំនប់ដើម្បីទប់ទឹកទុកស្រោចស្រពដំណាំស្រូវប្រាំង បន្ទាប់ពីការជួសជុលប្រព័ន្ធធារាសាស្ត្រក្នុងជំហានបឋមបានសម្រេចជោគជ័យ។
លោក យឹម ប៊ុនរ៉ុម ប្រធានមន្ទីរធនធានទឹកខេត្តបន្ទាយមានជ័យបានប្រាប់ ភ្នំពេញ ប៉ុស្តិ៍ ថា បន្ទាប់ពីបញ្ចប់ការងារជួសជុលខ្នងទំនប់ ដែលរងការខូចខាតដោយជំនន់ទឹកភ្លៀងកន្លងមក ក្រុមការងាររបស់លោកកំពុងសហការជាមួយមន្ត្រីជំនាញនៃមន្ទីរកសិកម្ម និងអាជ្ញាធរមូលដ្ឋានបន្តអនុវត្តជំហានទី២ គឺការជីកស្ដារប្រព័ន្ធប្រឡាយរងមួយចំនួនទៀត ដើម្បីសម្រួលដល់ការប្រើប្រាស់ទឹករបស់ប្រជាកសិករដែលមានស្រែនៅផ្នែកខាងលើ។
លោកថ្លែងថា៖ «ក្នុងខណៈនេះ យើងកំពុងបន្តការងារជីកស្ដារ ប្រព័ន្ធប្រឡាយរង និងអូរមួយចំនួនដើម្បីងាយស្រួលក្នុងការបញ្ជូនទឹកទៅតំបន់ស្រែប្រាំងរបស់កសិករនៅតាមទីខ្ពស់»។
បើតាមលោក ប៊ុនរ៉ុម បទពិសោធខ្វះទឹកពីឆ្នាំមុន បានធ្វើឲ្យកសិករភាគច្រើនភ្ញាក់រឭក និងចូលរួមយ៉ាងសកម្មក្នុងចលនាស្ដារប្រព័ន្ធធារាសាស្ត្រដែលអាចរក្សាទឹកទុកបានច្រើនសម្រាប់ធ្វើស្រែប្រាំង។
ទោះយ៉ាងណានៅក្នុងខែកុម្ភៈឆ្នាំ ២០២១ ខាងមុខនេះ តំបន់ស្រែប្រាំងមួយចំនួនក្នុងខេត្តនេះអាចខ្វះទឹក ពិសេសតំបន់ស្រែប្រាំងនៅឃុំសឿ ស្រុកមង្គលបុរី ដែលស្ថិតនៅទីទួលខ្ពស់ និងឆ្ងាយពីប្រព័ន្ធស្រោចស្រព។
លោក ប៉ាង វណ្ណាសេដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តបន្ទាយមានជ័យក៏បានលើកឡើងស្រដៀងគ្នានេះដែរ បន្ទាប់ពីបានពិនិត្យឃើញកសិករក្នុងស្រុកនេះដាំដុះស្រូវប្រាំងរហូតដល់ទៅ ២៥០ ភាគរយដែលលើសពីផែនការហើយត្រូវប្រើទឹកច្រើន។
លោកថ្លែងថា៖ «នៅក្នុងផែនការដាំដុះស្រូវប្រាំងសម្រាប់ឆ្នាំ ២០២០-២០២១ ស្រុកមង្គលបុរីដែលតំបន់ដីស្រែប្រាំងស្ថិតនៅទីទួលខ្ពស់ និងឆ្ងាយពីប្រភពទឹកត្រូវបានកំណត់ឲ្យដាំដុះត្រឹម ២ ០០០ ហិកតាប៉ុណ្ណោះ តែកសិករបាននាំគ្នាដាំដុះរហូតដល់ ៥ ០០០ ហិកតា។ នេះជាក្ដីកង្វល់របស់យើងពីការខ្វះទឹក»។
បើតាមលោក វណ្ណាសេដ្ឋ ការងារដាំដុះស្រូវស្ដារឡើងវិញក្រោយទឹកជំនន់សម្រេចបាន ១០០ ភាគរយ លើផ្ទៃដី ១៩ ០០០ ហិកតា និងការដាំដុះស្រូវប្រាំងសម្រេចលើសផែនការ ១០ ភាគរយ គឺក្នុងផែនការបានកំណត់ត្រឹមតែ ២០ ០០០ ហិកតា នៅទូទាំងខេត្ត ប៉ុន្តែកសិករបាននាំគ្នាដាំដុះរហូតដល់ ២២ ០០០ ហិកតា។
ចំណែកលោក ឡុង ផល្គន ប្រធានធនធានទឹក និងឧតុនិយមខេត្តបាត់ដំបងបានប្រាប់ ភ្នំពេញ ប៉ុស្តិ៍ ថា ការងារជីកស្ដារ និងតភ្ជាប់ប្រព័ន្ធប្រឡាយមេ ដើម្បីនាំទឹកពីទំនប់ដែលមានចម្ងាយប្រមាណ ១២០ គីឡូម៉ែត្រ ទៅតំបន់ដីស្រែប្រាំងក្នុងស្រុកមោងឫស្សី រុក្ខគិរី និងស្រុកគាស់ក្រឡនៅផ្នែកខាងលើដំណើរការជិត ១០០% ហើយ។
លោកថ្លែងថា៖ «នៅពេលនេះក្រុមការងារយើងកំពុងបន្តកិច្ចការជីកស្ដារ និងកែសម្រួលខ្នងទំនប់ ដែលក្រាលក្រួសក្រហមមកជាចាក់បេតុង ដើម្បីពង្រឹងគុណភាពខ្នងទំនប់ និងសម្រួលដល់ការធ្វើដំណើររបស់ប្រជាពលរដ្ឋ»។
បើតាមលោក ផល្គន ក្រសួងធនធានទឹក និងឧតុនិយមមានគម្រោងពង្រីក និងកែសម្រួលឡើងវិញនូវប្រព័ន្ធធារាសាស្ត្រធំៗជាច្រើនទៀតក្នុងខេត្តនេះ ដើម្បីធានាដល់ការផ្គត់ផ្គង់ទឹកទុកប្រើប្រាស់ និងស្រោចស្រពប្រកបដោយនិរន្តរភាព។
លោកថា៖ «ជារួមការផ្គត់ផ្គង់ទឹកសម្រាប់រដូវប្រាំងខាងមុខនេះនឹងមិនមានបញ្ហាប្រឈមនោះទេ សម្រាប់អ្នកបាត់ដំបង លើកលែងតែមានការស្នើសុំអន្តរាគមន៍ពីអាជ្ញាធរខេត្តជាប់ព្រំដែនខេត្តរបស់យើង»។
ស្រដៀងគ្នានេះលោក កែវ វ័យ ប្រធានមន្ទីរធនធានទឹក និងឧតុនិយម ខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ ថា ការជួសជុលខ្នងទំនប់ និងទ្វារទឹកនៃទំនប់ស្ទាក់ទឹកមួយចំនួនដែលរងការខូចខាតដោយសារជំនន់ទឹកភ្លៀងបានបញ្ចប់ដោយជោគជ័យហើយ និងកំពុងបន្តអនុវត្តការងារគ្រប់គ្រងទឹកសម្រាប់ផ្គត់ផ្គង់លើវិស័យកសិកម្មនារដូវប្រាំង។
លោកថ្លែងថា៖ «ពេលនេះយើងមានអាងទឹកធំៗចំនួន ២ ដែលមានផ្ទុកទឹកសរុប ៥០ លានម៉ែត្រគុប ដែលអាចធានាដល់ការស្រោចស្រពស្រូវរដូវប្រាំងបាន ៣០ ០០០ ហិកតា»។
យ៉ាងណាក្ដីលោក ឡាយពិសិដ្ឋ ប្រធានមន្ទីរកសិកម្ម ខេត្តពោធិ៍សាត់ បានឱ្យដឹងពីថ្ងៃទី ២១ ធ្នូ ថា ការដាំដុះស្រូវស្ដារឡើងវិញក្រោយជំនន់ទឹកភ្លៀងសម្រេចបានតាមផែនការលើផ្ទៃដី ១៧ ៥០០ ហិកតា។
ឯផែនការដាំដុះស្រូវប្រាំងគឺមន្ទីរបានកំណត់ត្រឹមតែ ១២ ០០០ ហិកតាប៉ុណ្ណោះទូទាំងខេត្ត។
លោកថ្លែងថា៖ «ទិន្នន័យការងារដាំដុះស្រូវប្រាំងសម្រាប់ឆ្នាំ ២០២០-២០២១ យើងនៅមិនទាន់ប្រមូលបានអស់ពីបណ្ដាស្រុក-ក្រុងនោះទេ តែការដាំដុះស្រូវស្ដារឡើងវិញក្រោយទឹកជំនន់គឺបានសម្រេច ១០០%»។
បើតាមទិន្នន័យនេះ ការផ្គត់ផ្គង់ទឹកសម្រាប់កសិកម្មក្នុងរដូវប្រាំងនេះអាចនឹងខ្វះខាត ប្រសិនបើកសិករដាំដុះលើសពីផែនការដែលបានគ្រោងទុក។
ដោយឡែកនៅស្រុកក្រូចឆ្មារ ខេត្តត្បូងឃ្មុំ វិញ ក្រុមមន្ត្រីជំនាញធនធានទឹក និងអាជ្ញាធរមូលដ្ឋានកំពុងសហការគ្នាបូមទឹកពីព្រែកឆុង ដែលស្ថិតនៅផ្នែកខាងក្រោមដើម្បីទម្លាក់ទៅកាន់បឹងឈើទាលនៅផ្នែកខាងលើ ដើម្បីជួយសង្គ្រោះស្រូវប្រាំង ២១៧ ហិកតារបស់កសិករក្នុងឃុំព្រែកអាជី ដែលកំពុងប្រឈមកង្វះទឹក។
លោក ហ៊ី លីហ៊ូវ មេឃុំព្រែកអាជីបានប្រាប់ភ្នំពេញប៉ុស្តិ៍ថា ដោយសារឆ្នាំនេះទឹកមិនបានជន់លិចចូលទៅក្នុងបឹងតូចធំក្នុងភូមិសាស្ត្រឃុំរបស់លោកដូច្នេះទើបធ្វើឲ្យកសិករដែលមានដីស្រែនៅផ្នែកខាងលើជួបបញ្ហាខ្វះទឹក។
លោកថា៖ «ពេលនេះយើងបានសហការជាមួយមន្ត្រីធនធានទឹក បូមទឹកពីព្រែកឆុងទៅសង្គ្រោះហើយ»។
ក្រៅពីការងារបូមទឹកសង្គ្រោះស្រូវប្រាំងក្រុមមន្ត្រីជំនាញក៏ដូចជាអាជ្ញាធរមូលដ្ឋាន និងម្ចាស់ស្រែ កំពុងបន្តសហការគ្នាជីកស្ដារប្រឡាយ និងដៃអូរដើម្បីនាំទឹកពីប្រភពផ្សេងទៀត ចូលទៅកាន់តំបន់ស្រែប្រាំងរបស់ពួកគេ៕