ភ្នំពេញៈ ក្រុមមន្ត្រីជំនាញពាក់ព័ន្ធបានសម្តែងការព្រួយបារម្ភ ចំពោះសុខភាពអ្នកដែលកំពុងជាប់ឃុំនៅក្នុងពន្ធនាគារដែលមួយចំនួនកំពុងរួមរឹតទៅដោយជំងឺរបេង និងជំងឺឆ្លងផ្សេងទៀតរួមទាំងជំងឺបាក់ទឹកចិត្ត ខណៈពន្ធនាគារនីមួយៗមានភាពចង្អៀតណែនដោយត្រូវផ្ទុកអ្នកជាប់ឃុំលើសចំណុះពុំមានអនាម័យ និងពុំមានទឹកស្អាតប្រើប្រាស់គ្រប់គ្រាន់។
បើតាមមន្ត្រីដោយសារតែមានការបើកយុទ្ធនាការបង្ក្រាបគ្រឿងញៀនយ៉ាងសកម្មនៅក្នុងឆ្នាំ ២០១៨ នេះបានធ្វើឲ្យចំនួនអ្នកជាប់ឃុំកើនឡើងដល់ជាង ៣ ម៉ឺននាក់ ខណៈកាលពីឆ្នាំ ២០១៧ មានអ្នកជាប់ឃុំជាង ២ ម៉ឺននាក់។
ការព្រួយបារម្ភរបស់មន្ត្រីជំនាញពីសុខភាពរបស់អ្នកជាប់ឃុំក្នុងពន្ធនាគារនេះត្រូវបានលើកឡើងនៅក្នុងសន្និសីទថ្នាក់តំបន់ដែលមានបណ្តាប្រទេសចំនួន ១៧ ក្នុងតំបន់អាស៊ី និងប៉ាស៊ីហ្វិកចូលរួមដែលធ្វើឡើងនៅភ្នំពេញកាលពីម្សិលមិញ។
សន្និសីទដែលធ្វើឡើងមានរយៈពេល ៣ ថ្ងៃដោយចាប់ផ្តើមកាលពីម្សិលមិញនេះត្រូវបានរៀបចំឡើងដោយគណៈកម្មាធិការអន្តរជាតិនៃកាកបាទក្រហម ដោយមានការចូលរួមពីមន្ត្រីគ្រប់គ្រងពន្ធនាគារ និងមន្ត្រីជំនាញសុខាភិបាល ក្នុងពន្ធនាគារ និងពិភាក្សាផ្តោតទៅលើគោលនយោបាយសុខភាពក្នុងពន្ធនាគារ នីតិវិធីប្រតិបត្តិការជាស្តង់ដារ និងការសម្របសម្រួលតាមអន្តរវិស័យប្រព័ន្ធគ្រប់គ្រងព័ត៌មានសុខភាព និងការផ្តល់សេវាសុខាភិបាលនៅក្នុងតំបន់ដែលមានភាពមិនប្រក្រតីលើការប្រើប្រាស់សារធាតុញៀន សុខភាពផ្លូវចិត្ត និងជំងឺឆ្លងនានា។
លោក រ៉ូម៉ាន់ ផារ៉ាម៉ូនូវ ប្រធានបេសកកម្មនៃគណៈកម្មាធិការអន្តរជាតិនៃកាកបាទក្រហមប្រចាំប្រទេសកម្ពុជាដែលបានចុះទៅត្រួតពិនិត្យ មណ្ឌលអប់រំកែប្រែនៅក្នុងប្រទេសកម្ពុជាបានថ្លែងនៅក្នុងសន្និសីទនេះថា បញ្ហាសុខភាពផ្លូវចិត្ត និងជំងឺឆ្លង និងការប្រើប្រាស់សារធាតុញៀនគឺជាបញ្ហាដែលមិនមែនកើតមានតែនៅក្នុងប្រទេសកម្ពុជាតែមួយនោះទេនៅបណ្តាប្រទេសផ្សេងទៀតក៏កើតមានដែរ។ «បញ្ហានៅក្នុងពន្ធនាគារអាចជាទឹក ហេដ្ឋារចនាសម្ព័ន្ធ សុខភាព និងអនាម័យ។ តួនាទីយើងត្រូវធ្វើម៉េចគាត់អាចបែងចែកធនធាន ធ្វើម៉េចដើម្បីដោះស្រាយ និងឆ្លើយតបតាមបញ្ហា»។
លោកបញ្ជាក់ថា៖ «យើងនឹងខិតខំប្រឹងប្រែងទាំងអស់គ្នាដើម្បីធ្វើឲ្យស្ថានភាពក្នុងពន្ធនាគារបានប្រសើរឡើង»។
លោកបន្តថា៖ «តួនាទីយើងសំខាន់គឺជួយអាជ្ញាធរឲ្យអាចកំណត់បាននូវបញ្ហាជាក់លាក់ណាមួយ និងមធ្យោបាយដើម្បីដោះស្រាយវាតាមរយៈការប្រឹក្សាយោបល់»។
លោក លឹម សុខា អគ្គនាយករងពន្ធនាគារនៃក្រសួងមហាផ្ទៃបានថ្លែងថា បញ្ហាចង្អៀតណែនគឺធ្វើឲ្យមានការប្រឈម និងពិបាកក្នុងការថែរក្សា និងក្នុងការតាមដានជំងឺឆ្លងចំពោះអ្នកជាប់ឃុំ ពីព្រោះពេលមានស្ថានភាពចង្អៀតណែនគឺធ្វើឲ្យអ្នកជាប់ឃុំប្រឈមទៅនឹងជំងឺឆ្លង និងជំងឺកាមរោគ។ «យើងមានចំនួនអ្នកជាប់ឃុំប្រហែលជាង ៣ ម៉ឺននាក់។ ឆ្នាំមុនយើងមានជាង ២ ម៉ឺននាក់»។
លោកបន្តថា៖ «បើនិយាយពីបញ្ហាសុខភាពនៅពន្ធនាគារជំងឺមានច្រើនប្រភេទ។ ប៉ុន្តែអ្វីដែលយើងចាប់អារម្មណ៍គឺជំងឺឆ្លង ជំងឺរបេង ជំងឺអេដស៍ កាមរោគ និងជំងឺសើស្បែក ដែលយើងប្រឈមមុខច្រើនជាងគេ»។
លោក សុខា បាននិយាយទៀតថាលើសពីនេះជនជាប់ឃុំភាគច្រើនមានការបាក់ទឹកចិត្តដោយសារតែគាត់គិតច្រើនតូចចិត្ត ហើយជួនកាលគាត់មានការសោកស្តាយដែលគាត់បានប្រព្រឹត្តបទល្មើស។
ចំណែកលោកស្រី ជា សារ៉េត ប្រធានការិយាល័យសុខាភិបាលពន្ធនាគារនៃនាយកដ្ឋានអប់រំកែប្រែរបស់អគ្គនាយកពន្ធនាគារនៃក្រសួងមហាផ្ទៃបានឲ្យដឹងថា ជំងឺរបេងមានការកើនឡើងជាលំដាប់ដោយក្នុងរយៈពេល ៦ ខែឆ្នាំ ២០១៨ មានអ្នកជាប់ឃុំដែលកើតជំងឺរបេង ចំនួន ១៩១ នាក់ក្នុងចំណោមអ្នកជាប់ឃុំជាង ៣ ម៉ឺននាក់ ខណៈរយៈពេល ១២ ខែក្នុងឆ្នាំ ២០១៧ មានអ្នកកើតជំងឺរបេង ២១៤ នាក់ក្នុងចំណោមអ្នកជាប់ឃុំជាង ២ ម៉ឺននាក់ហើយនៅក្នុងឆ្នាំ ២០១៦មាន ១៣៩ នាក់។
ជាមួយគ្នានេះលោកស្រីបានឲ្យដឹងដែរថា សម្រាប់រយៈពេល ៦ ខែ ២០១៧ និង ២០១៨ មានការកើនឡើងនៃចំនួនអ្នកផ្ទុកមេរោគអេដស៍ដែលក្នុងនោះក្នុងឆ្នាំ ២០១៧ មាន ១,៣៨ ភាគរយនៃអ្នកជាប់ឃុំ ហើយក្នុងឆ្នាំ ២០១៨ មានប្រមាណជាង ១,៥២ ភាគរយនៃអ្នកជាប់ឃុំ។ ភាគច្រើននៃអ្នកផ្ទុកមេរោគអេដស៍គាត់ប្រព្រឹត្តបទល្មើសគ្រឿងញៀន។ «ចំពោះអ្នកផ្ទុកមេរោគអេដស៍យើងដាក់ឲ្យគាត់រស់នៅដាច់ដោយឡែកពីគេ។ ចំពោះប៉ុស្តិ៍សុខភាពយើងអត់មានលទ្ធភាពក្នុងការផ្តល់សេវាទាក់ទងនឹងការថែទាំអ្នកផ្ទុកមេរោគអេដស៍ទេ អ៊ីចឹងយើងត្រូវបញ្ជួនគាត់ទៅទទួលសេវានៅក្រៅ»។
លោក តែ គុយស៊ាង រដ្ឋលេខាធិការក្រសួងសុខាភិបាលបានថ្លែងក្នុងសន្និសីទថា ក្រសួងសុខាភិបាលបានដាក់បញ្ចូលឲ្យមានផ្នែកសុខាភិបាលពន្ធនាគារ ដែលបង្កើតឲ្យមានប៉ុស្តិ៍សុខភាពតាំងពីឆ្នាំ ២០១០។
លោក ជួប សុខចំរើន នាយកប្រតិបត្តិអង្គការ KHANA ដែលធ្លាប់ផ្តល់សេវាគាំពារដល់អ្នកផ្ទុកមេរោគអេដស៍ក្នុងពន្ធនាគារថ្លែងថាការកំណត់ទិន្នន័យនៃអ្នកមានផ្ទុកមេរោគអេដស៍ក្នុងពន្ធនាគារគឺវាមានសារៈសំខាន់។
លោកថ្លែងតាមសារអេឡិចត្រូនិកពីម្សិលមិញថា៖ «នៅពេលជនជាប់ឃុំបានបង្ហាញអំពីស្ថានភាពនៃការផ្ទុកមេរោគអេដស៍របស់ពួកគេបានអនុញ្ញាតឲ្យគណៈគ្រប់គ្រងពន្ធនាគារអាចផ្ដល់ការគាំទ្រឲ្យទាន់ពេលវេលាសម្រាប់សេវាកម្មព្យាបាលដល់ពួកគេ»។ «វាគឺជាតួនាទីរបស់ភាគីពន្ធនាគារក្នុងការធ្វើឲ្យប្រាកដថាជនជាប់ឃុំអាចទទួលបាននូវការថែទាំសុខភាពប្រកបដោយគុណភាពដែលរួមមានទាំងការព្យាបាល និងការផ្គត់ផ្គង់ឱសថជាពិសេសសម្រាប់ជនជាប់ឃុំដែលផ្ទុកមេរោគអេដស៍»។
ជាមួយគ្នានេះលោក សុខចំរើន បានស្នើឲ្យគណៈគ្រប់គ្រងពន្ធនាគារធ្វើឲ្យប្រាកដថាជនជាប់ឃុំដែលមានផ្ទុកមេរោគអេដស៍អាចទទួលបាននូវការព្យាបាលពេញមួយជីវិត ជាពិសេសគឺឱសថពន្យារជីវិត៕