.jpg)
មន្ត្រីជំនាញរ៉ែ និងកម្លាំងអាវុធហត្ថសហការបង្ក្រាបសកម្មភាពបូមខ្សាច់គ្មានអាជ្ញាប័ណ្ណ កាលពីពេលថ្មីៗនេះ។ រូបថត GRK News
រតនគិរី: មន្ត្រីមន្ទីររ៉ែ និងថាមពលខេត្តរតនគិរី និងមន្ត្រីកងរាជអាវុធហត្ថខេត្ត បានចុះបង្ក្រាបបទល្មើសបូមខ្សាច់ដោយគ្មានអាជ្ញាប័ណ្ណត្រឹមត្រូវពីអាជ្ញាធរ នៅក្នុងភូមិ ៣ ឃុំស្រែអង្ក្រង ស្រុកកូនមុំ ខេត្តរតនគិរី ដោយសមត្ថកិច្ចបានរឹបអូសវត្ថុតាងដែលកំពុងបម្រើឲ្យការធ្វើសកម្មភាពបូមខ្សាច់ ប៉ុន្ដែមន្ត្រីមិនបានបញ្ជាក់ពីការឃាត់ខ្លួនជនល្មើសទេ។
លោក សេក ហៃ អភិបាលស្រុកកូនមុំបានថ្លែងពីម្សិលមិញថា សមត្ថកិច្ចចម្រុះរួមមាន មន្ត្រីកងរាជអាវុធហត្ថខេត្តរតនគិរី និងស្រុកកូនមុំបានចូលរួមសហការជាមួយមន្ត្រីជំនាញនៃមន្ទីររ៉ែ និងថាមពលខេត្តរតនគិរីបានចុះបង្ក្រាបសកម្មភាពរុករករ៉ែ បូមខ្សាច់ ក្រោយពីសង្ស័យថាគ្មានអាជ្ញាប័ណ្ណធ្វើអាជីវកម្មត្រឹមត្រូវ។
លោកបញ្ជាក់ថា៖ «គាត់ទទួលបានដីធ្វើខាងកសិកម្មនៅលើដីសម្បទានសេដ្ឋកិច្ច ប៉ុន្ដែគាត់បែរជាយកម៉ាស៊ីន និងត្រាក់ទ័រមកបូមខ្សាច់ និងដឹកជញ្ជូនខ្សាច់គគ្រឹកគគ្រេងទៅវិញ។ ខ្ញុំអត់ដឹងឃាត់មនុស្សឬអត់ទេ ព្រោះខ្ញុំបានប្រាប់ឲ្យកម្លាំងខ្ញុំទៅសហការជាមួយមន្ត្រីជំនាញ ដើម្បីធ្វើការងារនេះ។ ហើយរឿងការងារបន្តទៀតគឺស្ថិតនៅលើខាងមន្ត្រីជំនាញខាងរ៉ែ និងថាមពលជាអ្នកចាត់ចែង»។
លោកបានឲ្យដឹងថា លោកមិនបានស្គាល់ឈ្មោះម្ចាស់អាជីវកម្ម និងអ្នកដឹកនាំកម្មករបូមខ្សាច់នោះទេ ប៉ុន្ដែទទួលដំណឹងថា សម្ភារទាំងអស់នោះជារបស់ក្រុមហ៊ុនវៀតណាមឈ្មោះ ហ័ង អាញ ដែលជាក្រុមហ៊ុនទទួលបានដីសម្បទានសេដ្ឋកិច្ចលើដីកសិកម្មនៅតំបន់នោះ។
តាមរបាយការណ៍របស់កងរាជអាវុធហត្ថលើផ្ទៃប្រទេសដែលបានបង្ហាញតាមរយៈគេហទំព័រ GRK News បានឲ្យដឹងនៅថ្ងៃទី ០៣ ខែមីនានេះថាកម្លាំងមូលដ្ឋានកងរាជអាវុធហត្ថស្រុកកូនមុំដឹកនាំដោយលោក សុ វណ្ណា មេបញ្ជាការស្រុកកូនមុំ សហការជាមួយកម្លាំងជំនាញរ៉ែ និងថាមពលខេត្តបានចុះបង្ក្រាបបទល្មើសរ៉ែ រឹបអូសដកហូតនូវវត្ថុតាងដែលកំពុងធ្វើសកម្មភាពរុករករ៉ែក្នុងភូមិសាស្ត្រស្ថិតក្នុងភូមិ ៣ ឃុំស្រែអង្ក្រង ស្រុកកូនមុំ ខេត្តរតនគិរី។
ក្នុងប្រតិបត្តិការនេះកម្លាំងចម្រុះបានធ្វើការរឹបអូសគ្រឿងចក្រ (អេស្កាវ៉ាទ័រ) ចំនួន ១ គ្រឿង ម៉ាស៊ីនបូមធុន ២៨ សេះចំនួន ៣ គ្រឿង, ទុយោជ័របូមខ្សាច់មួយចំនួន និងវត្ថុតាងមួយចំនួនទៀត។ វត្ថុតាងត្រូវបានរក្សាទុកដើម្បីរង់ចាំជំនាញអនុវត្តនីតិវិធីបន្ត។ លោក អ៊ុង ហួរ ប្រធានមន្ទីររ៉ែ និងថាមពលខេត្តរតនគិរីពីម្សិលមិញមិនអាចទាក់ទងសុំការបញ្ជាក់ជុំវិញករណីនេះបានទេ។
លោក យស មុន្នីរ៉ាត់ អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលពីម្សិលមិញបានបដិសេធការធ្វើអត្ថាធិប្បាយ។ ក្រុមហ៊ុន ហ័ង អាញ មិនទាន់អាចស្វែងរកប្រភពទាក់ទងបំភ្លឺបានទេ៕
