ភ្នំពេញៈ មន្ត្រីជំនាញមជ្ឈមណ្ឌលសកម្មភាពកំចាត់មីនកម្ពុជា (CMAC) បានចាប់ផ្តើមបង្វឹកថ្នាក់មូលដ្ឋានដល់សុនខចំនួន ១០ ក្បាល ឱ្យចេះហិតក្លិនរកអ្នកមានផ្ទុកមេរោគកូវីដ ១៩ បន្ទាប់ពីបានទទួលជំនួយសម្ភារសិប្បនិមិ្មត ដើម្បីបង្វឹកសុនខទាំងនេះពីប្រទេសស្វ៊ីស។
លោក ហេង រតនា អគ្គនាយក CMAC ប្រាប់ ភ្នំពេញ ប៉ុស្តិ៍ ពីម្សិលមិញថា ជំនួយសម្ភារសម្រាប់ប្រើប្រាស់ស្រង់ក្លិនជំងឺកូវីដរបស់ប្រទេសស្វ៊ីសបានមកដល់កម្ពុជាកាលពីយប់ថ្ងៃទី ៥ ខែ មេសា ឆ្នាំ ២០២១ ដើម្បីត្រៀមបង្វឹកសុនខឱ្យមានសមត្ថភាព។ ទោះជាយ៉ាងណា លោក រតនា មិនអាចធ្វើអត្ថាធិប្បាយឱ្យបានលម្អិតនៅឡើយទេពីជំនួយសម្ភារដែលទទួលបានពីប្រទេសស្វ៊ីស នេះ។
លោក ហេង រតនាថ្លែងថា៖ «ខ្ញុំបានទទួលសម្ភារមួយចំនួនពីប្រទេសស្វ៊ីសរួចហើយ ដើម្បីប្រើប្រាស់ស្រង់ក្លិន»។ បើតាមលោក រតនា មន្ត្រីជំនាញរបស់ស៊ីម៉ាក់ បានចាប់ផ្តើម ហ្វឹកហ្វឺនថ្នាក់មូលដ្ឋានដល់សុនខទាំងនេះជាបណ្តើរៗ ឱ្យវាចេះស្តាប់បង្គាប់ និងមិនទាន់ឈានចូលឱ្យហិតវីរុសកូវីដនៅឡើយទេ ដោយរង់ចាំតែអ្នកវិទ្យាសាស្ត្រសុខាភិបាលកំពុងពិភាក្សាគ្នា ជុំវិញការបំពាក់ជំនាញប្រភេទក្លិនឱ្យវាប៉ុណ្ណោះ។
ឆ្លើយតបទៅនឹងការព្រួយបារម្ភពីការឆ្លងជំងឺកូវីដ ១៩ ទៅសុនខ លោក រតនា បញ្ជាក់ថា បន្ទាប់ពីស៊ីម៉ាក់ស្រាវជ្រាវព័ត៌មានមួយចំនួនបង្ហាញថា នៅក្នុងអំឡុងពេលនៃការហ្វឹកហ្វឺននេះគឺមានសុវត្ថិភាព ១០០ % ព្រោះមិនធ្វើជាមួយនឹងមេរោគទេ គឺធ្វើជាមួយនឹងសម្ភារសិប្បនិម្មិត ព្រោះសុនខហិតតែខ្លិនរកអ្នកផ្ទុកជំងឺកូវីដ ១៩ មិនមែនយកមេរោគអ្នកជំងឺយកមកឱ្យវាហិតនោះទេ។ «យើងឱ្យហិតក្លិន អ្នកមិនមានជំងឺកូវីដ ១៩ ១០០ នាក់ ហើយឱ្យអ្នកជំងឺកូវីដ ១៩ ម្នាក់ ឬ ២ នាក់ ដើម្បីឱ្យសុនខមានភាពសុំាទៅនឹងក្លិនរបស់វា នៅពេលដែលវារកឃើញមនុស្ស ២ នាក់នោះសុនខវាមានសមត្ថភាពរបស់វាក្នុងការហិតរកអ្នកផ្ទុកជំងឺកូវីដ ១៩ ហើយ»។
ការប្រើប្រាស់សុនខសម្រាប់ហិតរកអ្នកផ្ទុកជំងឺកូវីដ ១៩ នេះធ្វើឡើងដូចទៅនឹងប្រទេសមួយចំនួននៅលើពិភពលោករួមមានប្រទេសអាល្លឺម៉ង់ ហ្វាំងឡង់ អូស្ត្រាលី និងរុស្ស៊ី ជាដើមដែលបាននិងកំពុងប្រើប្រាស់សុនខជាជំនួយហិតរកអ្នកផ្ទុកវីរុសកូរ៉ូណា។
ភ្នំពេញប៉ុស្តិ៍មិនអាចទាក់ទងសុំការអត្ថាធិប្បាយពីលោក ម៉ម ប៊ុនហេង រដ្ឋមន្ត្រី លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងសាស្ត្រាចារ្យនៃសាកលវិទ្យាល័យ វិទ្យាសាស្ត្រសុខាភិបាលបានទេកាលពីម្សិលមិញ។
លោកនាយករដ្ឋមន្ត្រី ហ៊ុន សែន កាលពីចុងខែកុម្ភៈ ឆ្នាំ ២០២១ បានអនុញ្ញាតឱ្យក្រសួងសុខាភិបាល និងមជ្ឈមណ្ឌលសកម្មភាពកំចាត់មីនកម្ពុជារៀបចំកម្មវិធីសិក្សាស្រាវជ្រាវ និងអភិវឌ្ឍសុនខជាជំនួយហិតរកអ្នកផ្ទុកវីរុសកូរ៉ូណាដើម្បីចូលរួមទប់ស្កាត់ និងប្រឆាំងទៅនឹងការរីករាលដាលជំងឺឆ្លងនេះក្នុងសហគមន៍៕