បាត់ដំបងៈ រដ្ឋបាលក្រុងបាត់ដំបងបានបើកឲ្យពលរដ្ឋដែលរស់នៅតាមបណ្ដោយផ្លូវលេខ ១ ត្រង់ចំណុចភូមិកំពង់ក្របី ភូមិកម្មករក្នុងសង្កាត់ស្វាយប៉ោ និង តាមបណ្ដោយផ្លូវ ១៥៩D ស្ថិតនៅភូមិរំចេក ៤ ក្នុងសង្កាត់រតនៈចេញប្រកបរបររកស៊ី និងធ្វើចរាចរណ៍ទៅមកឡើងវិញហើយបន្ទាប់ពីក្រុមមន្ត្រីជំនាញស៊ីម៉ាក់ បានធ្វើការបំផ្ទុះគ្រាប់ B40,5 បានដោយជោគជ័យកាលពីរសៀលថ្ងៃម្សិលមិញ។
លោក ផេង សិទ្ធី អភិបាលក្រុងបាត់ដំបងប្រាប់ភ្នំពេញប៉ុស្តិ៍ថា គ្រាប់យុទ្ធភណ្ឌមិនទាន់ផ្ទុះប្រភេទ B40,5 ១ គ្រាប់ និង QF75mm ១ គ្រាប់ក្នុងចំណោមគ្រាប់ជាច្រើនទៀតដែលក្រុមការងារជួសជុលច្រាំងស្ទឹងសង្កែបានរកឃើញនៅផ្នែកខាងក្រោមនៃស្ទឹងសង្កែកាលពីរសៀលថ្ងៃទី ២៩ និងព្រឹកថ្ងៃទី ៣០ ខែមករា ឆ្នាំ ២០២០ នៅចំណុចខាងកើតឆៀងខាងត្បូងក្បែរស្ពានថ្មចាស់ត្រូវបានក្រុមមន្ត្រីជំនាញស៊ីម៉ាក់បំផ្ទុះចោលបានដោយជោគជ័យនៅរសៀលថ្ងៃព្រហស្បតិ៍។ លោកថ្លែងថា៖ «ការសម្រេចបំផ្ទុះគ្រាប់ទាំង ២ គ្រាប់នៅនឹងកន្លែងនេះ គឺដោយសារតែមន្ត្រីជំនាញអះអាងថា វាងាយនឹងផ្ទុះឡើង បើជីកកាយ និងចល័តវាចេញពីទីតាំងដែលប្រទះឃើញ»។
ជុំវិញការប្រទះឃើញគ្រាប់យុទ្ធភណ្ឌមិនទាន់ផ្ទុះនៅចំណុចច្រាំងស្ទឹងសង្កែនេះត្រូវបានលោក អ៊ឹម កុសល ប្រធានក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបងបានប្រាប់ភ្នំពេញប៉ុស្តិ៍ថា កាលពីអំឡុងខែមករា ឆ្នាំ ១៩៧៩ វត្តសង្កែដែលមានទីតាំងនៅចំណុចខាងលើនេះត្រូវបានគេប្រើប្រាស់ជាឃ្លាំងដាក់គ្រាប់ និងអាវុធយុទ្ធភណ្ឌតូចធំជាច្រើនប្រភេទ ហើយគ្រាប់មួយចំនួនបានផ្ទុះធ្វើឲ្យគ្រាប់ជាច្រើនបានខ្ទាតរប៉ាត់រប៉ាយតាមបណ្ដាយច្រាំងស្ទឹងសង្កែ។
កន្លងមកអង្គភាពកំចាត់មីនប្រចាំខេត្តបាត់ដំបងបានចុះស្រាវជ្រាវ និងប្រមូលគ្រាប់យុទ្ធភណ្ឌទាំងនោះយកទៅកម្ទេចចោលអស់មួយចំនួនហើយ ប៉ុន្តែដោយបច្ចុប្បន្នមានការអភិវឌ្ឍកែលម្អច្រាំងស្ទឹងឲ្យមានសោភណភាពកាន់តែស្រស់បំព្រងឡើងនោះ ក្រុមការងារអភិវឌ្ឍន៍ក្រុងបាត់ដំបងបានប្រើគ្រឿងចក្រជីកកាយច្រាំងស្ទឹង ហើយក៏ប្រទះឃើញគ្រាប់យុទ្ធភណ្ឌមិនទាន់ផ្ទុះមួយចំនួនទៀត ដែលរួមមានគ្រាប់កាំភ្លើងត្បាល់ ១២០ មិល្លីម៉ែត្រ ១ គ្រាប់ គ្រាប់បែកដៃ ២ គ្រាប់ គ្រាប់កាំភ្លើងត្បាល់ ៦០ មិល្លីម៉ែត្រ ៥ គ្រាប់ B 40,5 ១ គ្រាប់ និងគ្រាប់ QF 75mm ១ គ្រាប់។ «ក្នុងចំណោមគ្រាប់ដែលបានប្រទះឃើញត្រូវបានក្រុមមន្ត្រីជំនាញស៊ីម៉ាក់ខេត្តបាត់ដំបងជួយអន្តរាគមន៍ ជីកយកចេញពីទីតាំងដែលបានប្រទះឃើញបានដោយជោគជ័យ លើកលែងតែគ្រាប់ B 40,5 និង គ្រាប់ QF75mm ប៉ុណ្ណោះដែលក្រុមមន្ត្រីជំនាញសម្រេចដុតបំផ្ទុះចោលនៅនឹងកន្លែង ព្រោះវាអាចនឹងផ្ទុះនៅពេលជីកកកាយវាចេញពីក្នុងដីនោះ»។
លោក ព្រីង បញ្ញារិទ្ធ ប្រធានអង្គភាពកំចាត់មីនខេត្តបាត់ដំបងបានប្រាប់ភ្នំពេញប៉ុស្តិ៍ថា ដោយទីតាំងច្រាំងទន្លេនោះមានភាពមិនរាបស្មើ ងាយនឹងបង្កឲ្យគ្រាប់ដែលកប់នៅក្នុងដីនោះមានភាពប្រែប្រួល និងផ្ទុះឡើងនៅពេលជីកកាយយកវាចេញ ទើបក្រុមជំនាញបានប្រើមធ្យោបាយដុតបំផ្ទុះវាចោលនៅនឹងកន្លែង៕