កំពង់ឆ្នាំងៈ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតការិយាល័យនគរបាលនៃបេឡាជាតិរបបសន្តិសុខសង្គម (បសស) កាលពីថ្ងៃអង្គារបានផ្សព្វផ្សាយអប់រំច្បាប់ចរាចរណ៍ដល់អ្នកបើកបររថយន្តដឹកកម្មករ និងកម្មករប្រមាណ ១២០ នាក់ នៅរោងចក្រ CAN STORTS SHOSE CO.LTD នៅក្នុងខេត្តកំពង់ឆ្នាំង។ យោងតាមហ្វេសប៊ុករបស់ ប.ស.ស។
ហ្វេសប៊ុកដដែលនេះបានដកស្រង់ការថ្លែងរបស់លោក កេត យ៉ុង តំណាងស្នងការនៃស្នងការដ្ឋាននគរបាលខេត្តកំពង់ឆ្នាំងបានឲ្យដឹងថា៖ «(ការ) ផ្សព្វផ្សាយអប់រំច្បាប់ស្ដីពីសុវត្ថិភាពចរាចរណ៍ផ្លូវគោកដល់បងប្អូនអ្នកបើកបរយានយន្តដឹកកម្មករនិយោជិតក៏ដូចជាបងប្អូនកម្មករនិយោជិត ដើម្បីរួមចំណែកទប់ស្កាត់គ្រោះថ្នាក់ចរាចរណ៍កុំឲ្យកើតមានលើបងប្អូនកម្មករនិយោជិត»។
លោក ព្រាប ច័ន្ទវិបុល ទីប្រឹក្សាផ្នែកសុវត្ថិភាពចរាចរណ៍នៃ ប.ស.ស បានថ្លែងឲ្យដឹងតាមរយៈហ្វេសប៊ុកដដែលនេះឲ្យដឹងថា គ្រោះថ្នាក់ចរាចរណ៍នៅតែបន្តកើតមានឡើងលើកម្មករនិយោជិត នៅពេលធ្វើដំណើរដោយហេតុរថយន្តដឹកកម្មករនិយោជិតមួយចំនួនត្រូវបានកែច្នៃចេញពីរថយន្តដឹកទំនិញទៅជារថយន្តដឹកកម្មករដែលមិនស្របទៅតាមលក្ខណៈបច្ចេកទេស។
លោក ច័ន្ទវិបុល បានឲ្យដឹងទៀតថា៖ «អ្នកបើកបររថយន្តដឹកកម្មករ និងបងប្អូនកម្មករនិយោជិតទាំងអស់ត្រូវគោរពច្បាប់ចរាចរណ៍»។
ភ្នំពេញប៉ុស្តិ៍មិនអាចទាក់ទងលោក ហេង សុផាន់ណារិទ្ធ ប្រធានការិយាល័យគោលនយោបាយនៃ ប.ស.ស បានទេកាលពីថ្ងៃពុធ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានប្រាប់ភ្នំពេញប៉ុស្តិ៍កាលពីថ្ងៃពុធថា ការចុះផ្សព្វផ្សាយពីគោលការណ៍ច្បាប់ស្តីពីចរាចរណ៍គឺជារឿងមួយល្អណាស់ដើម្បីចែករំលែកក៏ដូចជាបង្កើននូវចំណេះដឹងដល់អ្នកបើករថយន្តដឹកកម្មករ និងកម្មករឱ្យបានយល់ដឹងអំពីសុវត្ថិភាពនៃការធ្វើដំណើរការការពារខ្លួន ការគោរពច្បាប់ជាដើម។ ប៉ុន្តែការចុះបង្រៀនឱ្យពួកគាត់បានយល់ដឹងគឺជាផ្នែកមួយ តែអ្វីដែលសំខាន់គឺត្រូវពិនិត្យមើលទៅលើការអនុវត្តច្បាប់ជាក់ស្តែង។
លោក ប៉ាវ ស៊ីណា បានចោទសួរថាតើការអនុវត្តច្បាប់មានភាពតឹងរ៉ឹងហើយឬនៅចំពោះអ្នកបើកបរដែលមិនគោរពឬ បំពានច្បាប់ ឬមិនមានឯកសារត្រឹមត្រូវ? តើរថយន្តដឹកកម្មករត្រូវបានត្រួតពិនិត្យមើលហើយឬនៅ? ថាតើជាប្រភេទរថយន្តដឹកមនុស្ស ឬដឹកសត្វ? តើរថយន្តដែលដឹកកម្មករមានសុវត្ថិភាពឬនៅ? តើបច្ចេកទេសរបស់រថយន្តគ្រប់គ្រាន់ហើយឬនៅ?
លោក ប៉ាវ ស៊ីណា បានថ្លែងឲ្យដឹងថា៖ «ខ្ញុំឃើញឡានភាគច្រើនដែលដឹកកម្មករ ច្រើនតែឡានចាស់ៗឡានគ្មានគុណភាពអីទេ ឡានសុទ្ធតែជំនំៗ ឡានយកមកផ្សារ កែច្នៃអ៊ីចឹងទៅ។ ប្រភេទឡានទាំងអស់ហ្នឹងហើយសុទ្ធសឹងតែធាតុផ្សំបង្កទៅជាគ្រោះថ្នាក់នៅពេលដែលបើកបរ ខណៈដែលឡានផ្ទុកចំណុះច្រើនលើសពីស្តង់ដា ហើយតៃកុងបើកបរដោយបំពាន ហើយមិនសូវគិតពីសុវត្ថិភាពរបស់អ្នកជិះនោះ»។
ក្នុងត្រីមាសទី ៣ ឆ្នាំនេះ អ្នកស្លាប់ដែលបណ្តាលមកពីគ្រោះថ្នាក់ចរាចរណ៍មានចំនួន ៤៨៨ នាក់ក្នុងនោះកម្មករនិយោជិតមានរហូតដល់ទៅ ៣៨ ភាគរយនៃអ្នកដែលបានគ្រោះថ្នាក់ស្លាប់សរុប។ នេះបើយោងតាមគេហទំព័រ ប.ស.ស ដែលបានដកស្រង់សម្តីលោក ហ៊ឹម យ៉ាន អគ្គស្នងការរងនគរបាលក្នុងសិក្ខាសាលាពិគ្រោះយោបល់មួយស្តីពីការជំរុញការកែលម្អសុវត្ថិភាពរថយន្តដឹកកម្មករនិយោជិតកាលពីដើមខែវិច្ឆិកា។
យោងតាមគេហទំព័រនេះលោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយក ប.ស.ស បានថ្លែងនៅក្នុងសិក្ខាសាលានេះថា ការគិតគួរពីសុវត្ថិភាពធ្វើដំណើររបស់កម្មករនិយោជិតគឺជាកត្តាសំខាន់ដែលគ្រប់អង្គភាពពាក់ព័ន្ធត្រូវយកចិត្តទុកដាក់ខ្ពស់បំផុត។
គេហទំព័រនេះបានស្រង់សម្តីលោក អ៊ុក សមវិទ្យា ថា៖ «គ្រោះថ្នាក់ចរាចរណ៍ផ្លូវគោក គឺជាឃាតករលាក់មុខដែលធ្វើឱ្យមនុស្សស្លាប់ របួស និងពិការជារៀងរាល់ថ្ងៃ។ បញ្ហាប្រឈមដ៏ធ្ងន់ធ្ងរនេះមិនអាចឱ្យក្រសួង ស្ថាប័ន ឬផ្នែកណាមួយធ្វើការទប់ស្កាត់ កាត់បន្ថយ ឬលុបបំបាត់តែឯងបានឡើយ ប៉ុន្តែយើងអាចសហការគ្នាទប់ស្កាត់ និងកាត់បន្ថយគ្រោះថ្នាក់ចរាចរណ៍ឱ្យស្ថិតនៅកម្រិតទាបបំផុត»។
គិតត្រឹមនព្វមាស ឆ្នាំ ២០១៩ ប.ស.ស បានចុះផ្សព្វផ្សាយអប់រំអំពីច្បាប់ស្តីពីចរាចរណ៍ផ្លូវគោកដល់អ្នកបើកបររថយន្តដឹកកម្មករ និងកម្មករនិយោជិត ប្រមាណជាង ១៦ ៣១២ នាក់ ដែលមានចំនួន ២៤៣ លើក នៅតាមបណ្តារាជធានី ខេត្ត ទូទាំងប្រទេស។ នេះបើយោងតាមគេហទំព័រ ប.ស.ស ដែលបានចេញផ្សាយកាលពីខែតុលា។
គេហទំព័របានបញ្ជាក់ទៀតថា ប.ស.ស បានរៀបចំការប្រឡងយកបណ្ណបើកបរជូនដល់អ្នកបើកបររថយន្តដឹកកម្មករនិយោជិតបានចំនួន ២៣ លើក ដែលមានចំនួន ១ ២១៦ នាក់៕