.jpg)
លោក សុខ ខារីន មន្ត្រីជំរឿនបង្ហាញតារាងជំរឿន។ ហេង ជីវ័ន
ភ្នំពេញៈ លោកនាយករដ្ឋមន្រ្តី ហ៊ុន សែន បានអំពាវនាវជាបន្ដបន្ទាប់ដល់ជនរួមជាតិកម្ពុជាអំពីការធ្វើជំរឿនទូទៅប្រជាជននៅក្នុងប្រទេស កម្ពុជា ឲ្យសហការផ្ដល់ព័ត៌មានពីសាវតារជាមួយមន្រ្ដីជំរឿន ដើម្បីទទួលបានស្ថិតិជាក់លាក់សម្រាប់ ការអភិវឌ្ឍនៅកម្ពុជា។
កាលពីថ្ងៃទី ៣ មីនា លោក នាយករដ្ឋមន្រ្ដី ក៏បានផ្តល់ បទសម្ភាសដល់ក្រុមមន្រ្តីជំរឿន ដែលដឹកនាំសម្ភាសព័ត៌មានដោយលោក ឆាយ ថន រដ្ឋមន្រ្តីក្រសួងផែនការ នៅគេហដ្ឋានរបស់លោក នាក្រុងតាខ្មៅខេត្តកណ្តាលផងដែរ។
លោកនាយករដ្ឋមន្រ្ដី បានអំពាវនាវបែបនេះជាបន្ដបន្ទាប់នៅតាមបណ្ដាជំនួបធំៗមួយចំនួននៅកម្ពុជានាពេលថ្មីៗនេះ ដោយបានបញ្ជាក់ថា ការធ្វើជំរឿននេះ មានសារៈសំខាន់ និងជាប្រភពតែមួយគត់ដែលអាចផ្ដល់ទិន្នន័យពេញលេញ និងច្បាស់លាស់ ព្រមទាំងបានកំណត់នូវចរិតលក្ខណៈ និងស្ថានភាពរស់នៅពិតប្រាកដរបស់ប្រជាជនទូទាំងប្រទេសកម្ពុជា។
លោកបានថ្លែងថា៖ «សូមអំពាវនាវចំពោះប្រជាពលរដ្ឋ សូមមេត្ដា ថ្ងៃ ៣ ខែ មីនា នេះ កុំចេញទៅណា ដើម្បីឲ្យគេទៅកត់ត្រាស្រង់ស្ថិតិ ដើម្បីឲ្យគេកំណត់ រាប់មនុស្សនៅក្នុងផ្ទះតែម្ដង ឲ្យឃើញថា មនុស្សប៉ុន្មានពិតប្រាកដ»។
ក្រៅពីការថ្លែងសារផ្ទាល់មាត់ជាបន្ដបន្ទាប់នេះ លោកនាយករដ្ឋមន្រ្ដី ក៏បានអំពាវនាវ តាមរយៈសារកាលពីខែមករា និងបានបង្ហាញថា ជំរឿនទូទៅប្រជាជននៅកម្ពុជានេះគឺជាជំរឿនលើកទី ១ ហើយដែលបានប្រើប្រាស់ថវិកាជាតិ បន្ទាប់ពីប្រទេសកម្ពុជាបានក្លាយជាប្រទេសមួយមានចំណូលមធ្យមកម្រិតទាប។
ជំរឿនលើកនេះជាជំរឿនលើកទី៣ បន្ទាប់ពីជំរឿនលើកទី២ កាលពីឆ្នាំ ២០០៨ ដែលមានរយៈពេល ១១ ឆ្នាំគត់។ ច្បាប់ស្ដីពីស្ថិតិ បានកំណត់នូវកាតព្វកិច្ចរបស់ប្រជាពលរដ្ឋម្នាក់ៗ ត្រូវចូលរួមសហការក្នុងការធ្វើជំរឿន។
សារអំពាវនាវនេះបញ្ជាក់ថា៖ «ការធ្វើជំរឿនប្រជាជន ជាការងារដ៏ធំរបស់ប្រទេសជាតិ មានសារៈសំខាន់ណាស់ ហើយជាការងារស្ថិតិពិតប្រាកដ។ ការធ្វើជំរឿនប្រជាជន ជាការងារដែលប្រទេសទាំងអស់នៅលើពិភពលោក គេធ្វើគ្រប់ៗគ្នា»។
លោក ស ខេង រដ្ឋមន្ដ្រីក្រសួងមហាផ្ទៃ កាលពីថ្ងៃទី ២ ខែ មីនាបានឆ្លើយតបចម្ងល់ និងសំណួរមួយចំនួនទាក់ទង បញ្ហាជំរឿនទូទៅប្រជាជនកម្ពុជានេះតាមរយៈគេហទំព័រហ្វេសប៊ុកផ្លូវការរបស់លោកថា៖ «ក្រោយការអំពាវនាវរបស់ខ្ញុំ ដើម្បីឲ្យប្រជាពលរដ្ឋទាំងអស់ ចូលរួមធ្វើជំរឿនទូទៅទូទាំងប្រទេស ខ្ញុំសង្កេតឃើញ និងទទួលចម្ងល់ ក៏ដូចជា សំណួរមួយចំនួនទាក់ទងបញ្ហានេះដែលខ្ញុំសុំធ្វើការបកស្រាយបំភ្លឺ»។
លោកបញ្ជាក់ថា៖ «បងប្អូនដែលកំពុងធ្វើការនៅក្រៅប្រទេស គឺមិនតម្រូវឲ្យត្រឡប់ចូលប្រទេសនោះទេ គឺអ្នកបច្ចេកទេសធ្វើជំរឿន បានសហការជាមួយក្រសួងការបរទេស និងសហប្រតិបត្តិការអន្តរជាតិដោយមានរៀបចំឯកសារ សម្រាប់ភ្នាក់ងារ តាមប្រទេសនានា ដើម្បីធ្វើជំរឿនប្រជាពលរដ្ឋខ្មែរដែលកំពុងរស់នៅបណ្តាប្រទេសទាំងនោះ។ ដូច្នេះបងប្អូនជនរួមជាតិខ្មែរ ដែលកំពុងរស់នៅក្រៅប្រទេស សូមចូលរួមជាមួយភ្នាក់ងារជំរឿន ដើម្បីឲ្យការធ្វើជំរឿនមានភាពត្រឹមត្រូវ និងទទួលលទ្ធផលយកជាការបាន»។
ដោយឡែកទាក់ទងនឹងចម្ងល់ការធ្វើជំរឿនលើជនបរទេសជាអន្តោប្រវេសន៍ និងមិនមែនអន្តោប្រវេសន៍ ដែលកំពុងរស់នៅក្នុងប្រទេសកម្ពុជា លោកបានបញ្ជាក់ថា៖ «បញ្ហានេះ ខ្ញុំសូមជម្រាបជូនបងប្អូនជនរួមជាតិថា ការធ្វើជំរឿននេះ ក្រុមបច្ចេកទេសរបស់យើង បានត្រៀមឯកសារសំណួរជាច្រើនភាសារួចរាល់ហើយ ហើយកិច្ចការនេះនឹងធ្វើឲ្យយើងដឹងកាន់តែច្បាស់ អំពីបរិមាណជនបរទេសទាំងអស់ គ្រប់សញ្ជាតិ ដែលកំពុងរស់នៅលើទឹកដីកម្ពុជា»។
លោកស្រី ហង់ លីណា ទទួលបន្ទុកអគ្គនាយកវិទ្យាស្ថានជាតិស្ថិតិ បានឲ្យដឹងថា ការធ្វើជំរឿនមានរយៈពេល ១១ ថ្ងៃ ចាប់ពីថ្ងៃទី ៣ រហូតដល់ថ្ងៃទី ១៣ ខែមីនា ឆ្នាំ ២០១៩។ ការធ្វើជំរឿននេះនឹងត្រូវសម្ភាសឥស្សរជន និងប្រជាពលរដ្ឋដែលជាមេគ្រួសារប្រមាណជិត ៣ លានគ្រួសារ ក្នុងនោះមានមន្រ្តីជំរឿនប្រមាណ ៥ ម៉ឺននាក់នៅទូទាំងប្រទេសនឹងចុះធ្វើជំរឿននេះតាមផ្ទះប្រជាពលរដ្ឋ។
មន្រ្តីជំរឿនម្នាក់ៗ នឹងត្រូវសម្ភាសប្រជាពលរដ្ឋ ១២០ ទៅ ១៥០ គ្រួសារ។ លទ្ធផលបណ្តោះអាសន្ននៃជំរឿននេះ នឹងបង្ហាញក្នុងអំឡុងពេល ៣ ខែ ក្រោយបញ្ចប់ជំរឿន ហើយលទ្ធផលផ្លូវការអាចបង្ហាញនូវចន្លោះចាប់ពី ៦-៩ ខែក្រោយបន្ទាប់ពីបញ្ចប់ការធ្វើជំរឿននេះ។
ជំរឿនលើកនេះបានចំណាយថវិកាជាតិសរុបប្រមាណ ៩ លានដុល្លារអាមេរិក។ ការធ្វើជំរឿនដើម្បីទទួលបានទិន្នន័យប្រជាសាស្ត្រជាក់លាក់សម្រាប់ប្រើប្រាស់ រៀបចំតាក់តែងគោលនយោបាយឲ្យបានត្រឹមត្រូវនិងដើម្បីធ្វើជាសូចនាករ ក្នុងការតាមដានត្រួតពិនិត្យ ផែនការយុទ្ធសាស្ត្រអភិវឌ្ឍន៍ជាតិ ២០១៦-២០៣០ ដោយមិនទុកឲ្យនរណាម្នាក់ឯកោឡើយ៕
