បន្ទាយមានជ័យៈ ទីស្នាក់ការកណ្ដាល នៃមជ្ឈមណ្ឌលសកម្មភាពកំចាត់មីនកម្ពុជា កាលពីថ្ងៃពុធ បានចាត់បញ្ជូនមន្ត្រីជំនាញមួយក្រុមចុះទៅកាន់ស្រុកព្រះនេត្រព្រះ ខេត្តបន្ទាយមានជ័យ ដើម្បីត្រួតពិនិត្យ និងជួយអន្តរាគមន៍បោសសម្អាតគ្រាប់បែកប្រភេទទម្លាក់ពីលើយន្តហោះចំនួន ៤ គ្រាប់ ដែលប្រជាពលរដ្ឋប្រទះឃើញកប់នៅក្នុងដី នៃតំបន់ព្រៃលិចទឹក ជាប់មាត់បឹងទន្លេសាបកាលពីពេលថ្មីៗនេះ។
កាលពីថ្ងៃចន្ទក្រុមប្រតិបត្តិការកម្ចាត់មីន និងគ្រាប់យុទ្ធភណ្ឌមិនទាន់ផ្ទុះ នៃអង្គភាពស៊ីម៉ាក់ ខេត្តបន្ទាយមានជ័យ រួមទាំងកម្លាំងប្រដាប់អាវុធចម្រុះ នៃស្រុកព្រះនេត្រព្រះ បានចុះទៅកាន់ចំណុចទួលក្រចាប់ នៃតំបន់ព្រៃលិចទឹកជាប់មាត់បឹងទន្លេសាបដើម្បីពិនិត្យវាយតម្លៃទៅលើប្រភេទគ្រាប់បែកចំនួន ៤ ក្រោយពីទទួលបានសេចក្ដីរាយការណ៍ពីប្រជាពលរដ្ឋ ក្នុងមូលដ្ឋានភូមិក្របៅ ឃុំភ្នំលៀប។
បន្ទាប់ពីបានឃើញគ្រាប់បែកទាំងនោះហើយក្រុមមន្ត្រីជំនាញស៊ីម៉ាក់ថ្នាក់ខេត្តទាំងនោះ មិនហ៊ានសម្រេចចិត្តជីកកាយយកគ្រាប់ទាំងនោះឡើយ ដោយអះអាងថា ពួកគេមិនធ្លាប់ជួបប្រទះនូវប្រភេទគ្រាប់បែកដែលមានទំហំធំបែបនោះទេកាលពីមុនមក។
លោក ជុំ សុជាតិ ប្រធានក្រុមប្រតិបត្តិការដោះមីន និងគ្រាប់យុទ្ធភណ្ឌមិនទាន់ផ្ទុះ នៃអង្គភាពកំចាត់មីន ស៊ីម៉ាក់ខេត្តបន្ទាយមានជ័យ បានប្រាប់ភ្នំពេញប៉ុស្តិ៍ថា គ្រាប់បែកទាំងនោះមានទំហំធំ និងមានប្រវែងប្រមាណជា២ម៉ែត្រ ប៉ុន្តែវាជាប្រភេទគ្រាប់បែកអ្វីឲ្យពិតប្រាកដនោះគឺនៅមិនទាន់ដឹងច្បាស់ទេ ព្រោះវាបានកប់ក្បាលចូលទៅក្នុងជម្រៅដី នៅសល់កំណាត់ផ្នែកកន្ទុយដែលមានរាងជាកង្ហារប្រវែងជាងកន្លះម៉ែត្រពីលើដីហើយគ្មានអក្សរឬលេខសម្គាល់នោះទេ។
លោក សុជាតិ បញ្ជាក់ថា៖ «វាអាចជាប្រភេទគ្រាប់បែកទម្លាក់ពីលើយន្តហោះ។ ប៉ុន្តែជាការពិត ខ្ញុំមិនធ្លាប់ជួបប្រទះនូវប្រភេទគ្រាប់បែកដ៏ធំបែបនោះកាលពីមុនមកទេ ដូច្នេះ ខ្ញុំនិងក្រុមការងារ មិនហ៊ានជីកកកាយយកវាចេញពីតំបន់នោះដែរ។ ខ្ញុំបានថតវា និងរាយការណ៍ទៅស្នាក់ការកណ្ដាលស៊ីម៉ាក់នៅ ភ្នំពេញដើម្បីបញ្ជូនក្រុមមន្ត្រីជំនាញ និងអ្នកឯកទេសផ្នែកគ្រាប់ បែក មកជួយអន្តរាគមន៍ពិនិត្យ និងបោសសម្អាតចេញ»។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានប្រាប់ភ្នំពេញប៉ុស្តិ៍ថា លោកបានបញ្ជូនមន្ត្រីជំនាញការមួយក្រុម ចុះទៅសហការជាមួយក្រុមមន្ត្រីស៊ីម៉ាក់ថ្នាក់ខេត្ត និងអាជ្ញាធរមូលដ្ឋានដើម្បីចុះទៅកាន់តំបន់ដែលមានគ្រាប់បែកទាំងនោះ។
លោកថ្លែងថា៖ «យ៉ាងណាក៏ដោយការបោសសម្អាតប្រភេទគ្រាប់បែកធំៗបែបនោះ គឺត្រូវការពេលវេលា ពោលគឺមិនអាចធ្វើឡើងក្នុងពេល ១ ថ្ងៃឬ ២ ថ្ងៃបានទេ»។
បើតាមលោក ស៊ិន រ៉ាស៊ី មេបញ្ជាការកងរាជអាវុធហត្ថស្រុកព្រះនេត្រព្រះ ទីតាំងគ្រាប់បែកទាំងនោះស្ថិតនៅចម្ងាយ ១០០ ម៉ែត្រពីគ្នា ក្នុងនោះ ១ គ្រាប់ បានដួលដេកនៅលើដីគ្មានកន្ទុយរាងកង្ហារនោះទេ ខណៈ ២ គ្រាប់ទៀត គឺដាំក្បាលចូលទៅក្នុងដី និងផ្នែកកន្ទុយជាប់នៅលើដីកម្ពស់ប្រមាណជាងកន្លះម៉ែត្រ។ ចំណែក ១ គ្រាប់ទៀត ស្ថិតនៅបាតអូរ ក្រោមជម្រៅទឹកប្រមាណជា ៣ ម៉ែត្រ។
លោកថ្លែងថា៖ «យើងបានបោះសញ្ញាសម្គាល់ទីតាំងគ្រាប់បែកទាំងនោះរួចហើយ និងបានដាក់សញ្ញាការពារ និងហាមឃាត់អ្នកភូមិមិនឲ្យចូលលុកលុយទៅកាន់តំបន់នោះផងដែរ»៕