កំពង់ស្ពឺៈ មន្ត្រីជាន់ខ្ពស់នៃអាជ្ញាធរជាតិប្រយុទ្ធប្រឆាំងគ្រឿងញៀនបានជំរុញឲ្យនាយទាហាន និងនិស្សិត នៃសាលានាយទាហានសកម្មទាំងអស់ ត្រូវធ្វើជាជនបង្គោល សម្រាប់ស្ថាប័ន សហគមន៍ និងគ្រួសារមួយដែលមានការទទួលខុសត្រូវក្នុងការទប់ស្កាត់នូវការរីករាលដាលនៃបញ្ហាគ្រឿងញៀន ខណៈដែលសមត្ថកិច្ចបានធ្វើការបង្ក្រាបបទល្មើសគ្រឿងញៀនជាបន្តបន្ទាប់។
លោក មាស វិរិទ្ធ អ្នកនាំពាក្យអាជ្ញធរជាតិប្រយុទ្ធប្រឆាំងគ្រឿងញៀន បានថ្លែងនៅក្នុងពិធីផ្សព្វផ្សាយបញ្ហាទប់ស្កាត់ការប្រើប្រាស់គ្រឿងញៀនខុសច្បាប់ និងច្បាប់ស្តីពីការត្រួតពិនិត្យគ្រឿងញៀន ដល់នាយទាហាន និងនិស្សិតនាយទាហានសកម្មចំនួន ១ ២០០ នាក់ នៅសាលានាយទាហានសកម្មត្មាតពងក្នុងខេត្តកំពង់ស្ពឺ កាលពីថ្ងៃចន្ទម្សិលមិញថា ការងារបង្ការទប់ស្កាត់ ការរីករាលដាលនូវបញ្ហាគ្រឿងញៀន នៅក្នុងសង្គមគ្រួសារ និងសហគមន៍ មិនមែនជាការងារផ្តាច់មុខរបស់នរណាម្នាក់ ឬក្រុមណាមួយឡើយ «តែវាជាការងាររួមរបស់យើងទាំងអស់គា្ន»។
លោក វិរិទ្ធ បញ្ជាក់ថា៖ «យើងត្រូវចាត់ទុកបញ្ហាគ្រឿងញៀន ជាបញ្ហារួមរបស់យើងទាំងអស់គ្នា និងត្រូវចូលរួមគ្នាដើម្បី ប្រយុទ្ធប្រឆាំងនូវបញ្ហាគ្រឿងញៀននេះ ដើម្បីភាពសុខសាន្តរបស់ប្រជាជន និងសង្គមជាតិរបស់យើង»។
កាលពីពេលថ្មីៗនេះ មន្ទីរប្រឆាំងគ្រឿងញៀននៃក្រសួងមហាផ្ទៃ បានបង្ក្រាបទីតាំងលួចលាក់ផលិតគ្រឿង ញៀនខុសច្បាប់មួយកន្លែង នៅក្នុងខណ្ឌសែនសុខ រាជធានីភ្នំពេញ ដោយរឹបអូសបានគ្រឿងញៀនប្រភេទ Pyrovalerone សរុបជាង ២០០ គីឡូក្រាម និងសារធាតុផ្សំសម្រាប់ធ្វើការកែច្នៃជាគ្រឿងញៀន ជាង ៥៨៧ គីឡូក្រាម រួមទាំងម៉ាស៊ីនផលិតគ្រឿងញៀនមួយឈុត។ ទីតាំងនោះត្រូវបានជនជាតិតៃវ៉ាន់ម្នាក់ ជួលពីលោក អ៊ុយ រាស៊ីនាយករងសាខាគយនិងរដ្ឋាកររាជធានីភ្នំពេញ។
ពាក់ព័ន្ធនឹងរឿងគ្រឿងញៀននេះ សាលាដំបូងខេត្តកំពង់ស្ពឺបានធ្វើការចោទប្រកាន់ជនសង្ស័យក្នុងអំពើ ជួញ ដូរ គ្រឿងញៀនចំនួន ៦ នាក់ និងបានបញ្ជាឲ្យកម្លាំងនគរបាលយុត្តិធម៌នាំយកពួកគេទៅឃុំខ្លួន នៅពន្ធនាគារខេត្ត បន្ទាប់ពីត្រូវបានកម្លាំងនគរបាលបង្ក្រាបគ្រឿងញៀននៃអធិការដ្ឋានស្រុកសំរោងទង ចាប់ឃាត់ខ្លួន កាល់ពីព្រឹកថ្ងៃទី ៧ ខែ មេសា ឆ្នាំ ២០១៩ នៅចំណុចភូមិត្រពាំងត្រស់ ឃុំសំរោងទង។
លោក ឃុត សុផល អធិការស្រុកសំរោងទង បានប្រាប់ភ្នំពេញប៉ុស្តិ៍ កាល ពីម្សិលមិញថា ជនជាប់ចោទក្នុងអំពើជួញដូរគ្រឿងញៀនទាំងនោះ រួមមាន ឈ្មោះ អ៊ុន ផល្លី អាយុ ៣៣ ឆ្នាំ ជាមេខ្លោង និងអ្នកកំណត់ទីផ្សារជួញដូរដល់បក្ខពួកចំនួន ៥ នាក់ទៀត រួមមានឈ្មោះ អាន ពិសី អាយុ ២៤ ឆ្នាំ, ខៀវ ចែ អាយុ ២២ ឆ្នាំ, ទេព កុសល អាយុ ២៨ ឆ្នាំ, យ៉ាន់ ដា អាយុ ១៩ ឆ្នាំ និងឈ្មោះ ចន សុជាតិ អាយុ ៣០ ឆ្នាំ។
លោកសុផលបញ្ជាក់ថា៖ «ក្នុងការបង្ក្រាបចាប់មុខសញ្ញាក្រុមជួញដូរគ្រឿងញៀនខាងលើនេះ សមត្ថកិច្ច បានរឹបអូសវត្ថុតាង ថ្នាំគ្រាប់ប្រភេទមេតំហ្វេតាមីនសរុប ១១ កញ្ចប់ធំ-តូច ជញ្ជីងថ្លឹងគ្រឿងញៀនចំនួន ១ និង សម្ភារប្រើប្រាស់ផ្សេងទៀត»៕