ភ្នំពេញៈ មន្ត្រីជំនាញខាងសុខភាពសត្វ នៃក្រសួងកសិកម្ម រុក្ខាប្រមាញ់ និងនេសាទ បានជំរុញឲ្យអាជ្ញាធរបង្កើតការប្រុងប្រយ័ត្ន ខណៈជំងឺប៉េស្ដជ្រូកអាហ្រ្វិក បានរាលដាលដល់ខេត្តរបស់ប្រទេសវៀតណាម ដែលនៅជាប់គ្នាជាមួយខេត្តមណ្ឌលគិរីនិងខេត្តក្រចេះ។
លោក តាន់ ផាន់ណារ៉ា អគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វបានឲ្យដឹងកាលពីថ្ងៃទី ១៥ ខែ មីនា ថា តាមព័ត៌មានមិនផ្លូវការដែលលោកទទួលបានពីខាងក្រុមហ៊ុនលក់ចំណីសត្វ និងសមាគមចិញ្ចឹមសត្វគឺបញ្ជាក់ថា ជំងឺប៉េស្ដជ្រូកអាហ្រ្វិក ដែលរាលដាលនៅក្នុងប្រទេសវៀតណាម កំពុងតែខិតជិតមកដល់ប្រទេសកម្ពុជាហើយ ដោយលោកបានអំពាវនាវឱ្យមន្ទីរកសិកម្មខេត្តរតនគិរី និងក្រចេះ ត្រូវបង្កើនការតាមដាន និងប្រុងប្រយ័ត្ននៅពេលណាមានសត្វជ្រូកឈឺ។
លោកថា៖ «ដោយសារកាលពីពេលថ្មីៗនេះខ្ញុំទទួលបានព័ត៌មានថា នៅបណ្ដាខេត្តទល់ដែនជាប់ប្រទេស កម្ពុជា ដែលជាប់នឹងខេត្តក្រចេះ និងរតនគិរី គឺមានបញ្ហានេះ (ជំងឺប៉េស្តជ្រូកអាហ្រ្វិក) ហើយ ហើយពីពេលនេះទៅខ្ញុំក៏សូមសំណូមពរលោកលោកស្រីដែលជាប្រធានការិយាល័យដែរថា ប្រសិនបើមានសត្វឈឺក្នុងករណីមួយណាក៏ដោយ ត្រូវប្រុងប្រយ័ត្ន»។
វៀតណាមគឺជាប្រទេសអាស៊ីទី៣ បន្ទាប់ពីប្រទេស ចិន និងប្រទេស ម៉ុងហ្គោលី ដែលបានផ្ទុះជំងឺប៉េស្តជ្រូកអា្រហ្វិកនៅក្នុងដើមខែកុម្ភៈមុននេះ។ បើតាមសារព័ត៌មាន VN Express ចុះផ្សាយនៅថ្ងៃទី ១៥ ខែ មីនា ជំងឺប៉េស្តជ្រូកអាហ្រ្វិកកំពុងវាយប្រហារឧស្សាហកម្មជ្រូកប្រទេសវៀតណាម ដែលមានតម្លៃស្មើ ១០ ពាន់លានដុល្លារ អាមេរិក និងកំពុងធ្វើឱ្យវៀតណាមរងការគំរាមកំហែងកាន់តែធ្ងន់ធ្ងរលើការនាំចេញជ្រូក។
សារព័ត៌មាននេះបន្តថា ក្រោយពីខេត្តរបស់វៀតណាមចំនួន ១៧ បានផ្ទុះឡើងជំងឺប៉េស្ដជ្រូកអាហ្រ្វិកជាបន្តបន្ទាប់គឺបានធ្វើឱ្យប្រទេសមួយចំនួន ដូចជា កោះតៃវ៉ាន់ ទីក្រុងឌូបៃរបស់អារ៉ាប់រួម សហរដ្ឋអាមេរិក និងប្រទេស អង់គ្លេស បានចេញបម្រាមចំពោះការនាំចូលសាច់ជ្រូកពីប្រទេស វៀតណាម ហើយជនណាល្មើសនឹងបម្រាមនោះ នឹងត្រូវផាកពិន័យឬត្រូវជាប់ពន្ធនាគារ។
លោក ញ៉ែម សំអឿន អភិបាលរងខេត្តរតនគិរី ថ្លែងថា លោកមិនបានទទួលព័ត៌មានថា ជំងឺប៉េស្ដជ្រូកអាហ្រ្វិកបានរាលដាលដល់តំបន់ព្រំដែនប្រទេស វៀតណាម ជាប់គ្នាជាមួយខេត្តរតនគិរីឡើយ ប៉ុន្តែលោកបញ្ជាក់ថា ក្នុងខេត្តរតនគិរីគឺពុំមានការនាំជ្រូកចូលពីវៀតណាមនោះទេ។
លោកបន្តថា៖ «ភាគច្រើន (នាំជ្រូកចូល) ពីខេត្តកំពង់ចាមទៅវិញទេ។យើងបានជូនដំណឹងដល់អ្នករកស៊ីទាំងអស់ មិនឱ្យដឹកជញ្ជូន (ជ្រូកពីវៀតណាម) ចូលខេត្តយើងទេ»។
ភ្នំពេញប៉ុស្ដិ៍ មិនអាចសុំការបកស្រាយបន្ថែមពីលោក លី សូវ៉ាន់ អ្នកនាំពាក្យក្រសួងសុខាភិបាលបានទេ ដោយទូរស័ព្ទរបស់លោកពុំមានអ្នកទទួល។
ប៉ុន្តែលោក តាន់ ផាន់ណារ៉ា បានអះអាងថា មានបទល្មើសដឹកជ្រូកចូលខុសច្បាប់ជាច្រើនករណីពីវៀតណាម ប៉ុន្តែលោកថា ខាងអគ្គនាយកដ្ឋានសុខភាពសត្វ និងផលិតកម្មសត្វសហការជាមួយអាជ្ញាធរគ្រប់ខេត្ត បានទប់ស្កាត់បទល្មើសទាំងនោះបានយ៉ាងល្អហើយរាល់ការវិភាគកន្លងមក ក៏បង្ហាញថា កម្ពុជាពុំមានករណីផ្ទុះឡើងជំងឺប៉េស្ដជ្រូកអាហ្រ្វិកនោះទេ៕