ភ្នំពេញៈ រដ្ឋលេខាធិការក្រសួងមហាផ្ទៃលោក ប៊ុន ហុន បានជំរុញឱ្យអង្គការសង្គមស៊ីវិល ស្វែងរកអ្នកជំនាញច្បាប់ឱ្យបានច្រើន ដើម្បីងាយស្រួលស្វែងយល់ និងចូលរួមពិភាក្សាពីនីតិវិធីនៃការកែសម្រួលច្បាប់ស្តីពីសមាគម និងអង្គការមិនមែនរដ្ឋាភិបាល ខណៈមានអង្គការមួយ ចំនួនបានស្នើឲ្យនិរាករណ៍ច្បាប់នេះទាំងស្រុង។
ការថ្លែងរបស់លោក ប៊ុន ហុន ដូចនេះបានធ្វើឡើងនៅក្នុងកិច្ចប្រជុំជាមួយអង្គការសង្គមស៊ីវិលដើម្បីពិនិត្យ និងពិភាក្សាលើខ្លឹមសារធ្វើវិសោធនកម្មច្បាប់នេះនៅក្រសួងមហាផ្ទៃកាលថ្ងៃទី ១០ ខែកុម្ភៈ ដោយមានមន្ត្រីអន្តរក្រសួងអង្គទូតនានា និងដៃគូអភិវឌ្ឍន៍ចូលរួមផងដែរ។
តាមគេហទំព័រក្រសួងមហាផ្ទៃកាលពីថ្ងៃចន្ទដែលបានដកស្រង់ប្រសាសន៍លោក ប៊ុន ហុន បានឲ្យដឹងថា ដើម្បីដោះស្រាយសំណើ និងសំណូមពររបស់អង្គការសង្គមស៊ីវិល លោកបានជំរុញឱ្យអង្គការសង្គមស៊ីវិលស្វែងរកអ្នកជំនាញច្បាប់ឱ្យបានច្រើនដើម្បីចូលរួមពិភាក្សាពីនីតិវិធីនៃការកែសម្រួល នូវផ្នែកផ្សេងៗនៃច្បាប់សមាគម និងអង្គការមិនមែនរដ្ឋាភិបាលនេះ។
លោកបានបញ្ជាក់ថា៖ «ការកែសម្រួល ឬតាក់តែងច្បាប់នីមួយៗគឺមានការពិបាក ហើយទាមទារឱ្យមានអ្នកជំនាញផ្នែកច្បាប់ចូលរួមឱ្យបានច្រើន ព្រោះស្មារតីនៃច្បាប់គឺបញ្ជាក់ពីគោលបំណងច្បាស់លាស់ពីការចង់បាននៅក្នុងមាត្រានីមួយៗនៃច្បាប់»។
លោក ប៊ុន ហុន បានបន្តថា នេះជាកិច្ចប្រជុំលើកទី ៤ ហើយ ដូច្នេះស្នើឱ្យអង្គការសង្គមស៊ីវិលដែលចូលរួមក្នុងកិច្ចប្រជុំទាំងអស់លើកយកនូវមតិយោបល់ និងសំណើថ្មីៗដែលជាចំណុចនៅលើមាត្រាថ្មីបន្ថែមទៀតដើម្បីយកមកពិភាក្សាសម្រាប់ធ្វើជាធាតុចូលក្នុងការស្នើសុំធ្វើវិសោធនកម្មច្បាប់ នេះឱ្យបានស្របតាមបំណងរួម។
យ៉ាងណាក្ដីលោកបានស្នើឱ្យលើកយកចំណុចខ្វះខាត និងចំណុចដែលមិនទាន់ច្បាស់លាស់ដែលចង់បំពេញបន្ថែម ឬកែប្រែដោយធ្វើយ៉ាងណាដើម្បីការពារផលប្រយោជន៍ស្របច្បាប់របស់ខ្លួន និងការពារផលប្រយោជន៍សាធារណៈព្រមទាំងលើកកម្ពស់ភាពជាដៃគូជាមួយអាជ្ញាធរសាធារណៈ។
លោកថា៖ «ការបន្តកិច្ចប្រជុំនេះគឺដើម្បីជាការប្រមូលធាតុចូលសំខាន់ៗរបស់ក្រុមអង្គការសង្គមស៊ីវិល ដើម្បីដាក់ជូនរាជរដ្ឋាភិបាលពិនិត្យតាមនីតិវិធី»។
ក៏ប៉ុន្តែអគ្គលេខាធិការសម្ព័ន្ធសហគមន៍កសិករកម្ពុជាលោក ថេង សាវឿន បានអះអាងថា អង្គការសង្គមស៊ីវិលមានអ្នកច្បាប់ និងអ្នកជំនាញគ្រប់គ្រាន់ និងបានឆ្លងកាត់ការប្រជុំផ្ទៃក្នុងរួចហើយមុននឹងជួបប្រជុំជាមួយក្រសួងមហាផ្ទៃ ហើយថាការបានលទ្ធផលល្អដោយសារតែភាគីទាំង ២ មានការយល់យោគគ្នាទៅវិញទៅមក។
លោកបានថ្លែងថា៖ «យើងមានការជជែកយល់គ្នារវាងអង្គការតំណាងអង្គការសង្គមស៊ីវិល ហើយយើងបានជជែកបាន ៣ មាត្រាដែលក្នុងនោះមានមាត្រាទី ១០ មាត្រាទី ១១ មាត្រាទី ២០ ដែលអង្គការសង្គមស៊ីវិលយល់ថា មាត្រាទាំងនេះបានធ្វើឲ្យប៉ះពាល់ខ្លះដល់ប្រជាពលរដ្ឋ និងអង្គការសង្គមស៊ីវិល »។
មន្ត្រីជាន់ខ្ពស់អង្គការសង្គមស៊ីវិលម្នាក់ដែលសុំមិនបញ្ចេញឈ្មោះបានថ្លែងថា មានមាត្រាសំខាន់ៗមួយចំនួនដែលតម្រូវឲ្យមានការកែសម្រួលក្នុងនោះមានមាត្រា ១១ ដោយស្នើសុំឲ្យលុបកថាខណ្ឌទី ១ ចេញ ខណៈដែលក្រសួងមហាផ្ទៃស្នើឲ្យរក្សាទុកដដែល ។
លោកបានបន្ថែមថា៖ «មាត្រា ២០ គឺពាក់ព័ន្ធនឹងការស្នើសុំរបស់អង្គការសមាគមឲ្យដាក់បញ្ចូលការលើកលែងពន្ធផ្សេងៗដោយស្វ័យប្រវត្ដិ បន្ទាប់ពីខ្លួនបានចុះឈ្មោះនៅក្រសួងមហាផ្ទៃ និងទទួលស្គាល់ដោយក្រសួងមហាផ្ទៃ»។
លោក ប៊ុន ហុន រដ្ឋលេខាធិការក្រសួងមហាផ្ទៃមិនអាចទាក់ទងសុំការអត្ថាធិប្បាយបន្ថែមពាក់ព័ន្ធនឹងបញ្ហានេះបានទេកាលពីម្សិលមិញ។
ក៏ប៉ុន្តែកាលពីថ្ងៃចន្ទមានសហគមន៍ និងអង្គការសង្គមស៊ីវិលចំនួន ១០០ បានចេញសេចក្ដីថ្លែងការណ៍រួមមួយដោយទទូចឱ្យរាជរដ្ឋាភិបាលកម្ពុជា និរាករណ៍ច្បាប់នេះចោលដោយលើកហេតុផលថា មិនចាំបាច់ និងគ្រាន់តែជាឧបករណ៍ដើម្បីរឹតត្បិតសេរីភាពក្នុងការជួបជុំ ការបង្កើតអង្គការ និងការសម្ដែងមតិផ្សេងៗ ។
សេចក្តីថ្លែងការណ៍នោះថា៖ «យើងខ្ញុំជឿជាក់ថាក្រុមសង្គមស៊ីវិល សហគមន៍មូលដ្ឋាន និងសមាគមក្នុងស្រុកគួរត្រូវបានអនុវត្តការងារឆ្ពោះទៅរកការអភិវឌ្ឍប្រទេស កម្ពុជា ដោយគ្មានការរឹតត្បិត និងរំលោភបំពានក៏ដូចជា ការជ្រៀតជ្រែកពីសំណាក់ច្បាប់ស្ដីពីសមាគម និងអង្គការមិនមែនរដ្ឋាភិបាលនេះ»៕