តាកែវៈ អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទកាលពីម្សិលមិញ បានដុតកម្ទេចជ្រូកជាង ១០០ ក្បាល បន្ទាប់ពីវិភាគសំណាកឃើញមានជំងឺប៉េស្តជ្រូកអាហ្វ្រិក ក្រោយពីចាប់បាននៅខេត្តស្ទឹងត្រែងជាអ្វីដែលមន្ត្រីជំនាញព្រមានពីការឆ្លងជំងឺនេះចូលប្រទេសតាមរយៈការលួចនាំចូលជ្រូកដោយខុសច្បាប់។
កាលពីថ្ងៃទី ២៣ មីនា កម្លាំងសមត្ថកិច្ចខេត្តស្ទឹងត្រែងរួមនឹងមន្ត្រីជំនាញនៃក្រសួងកសិកម្មបានឃាត់រថយន្តធុនធំ ១ គ្រឿងដែលមានផ្ទុកជ្រូកជាង ១០០ ក្បាល នាំចូលខុសច្បាប់ពីប្រទេសថៃឆ្លងកាត់ប្រទេសឡាវតាមច្រកព្រំដែនខេត្តស្ទឹងត្រែង។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មបានប្រាប់ភ្នំពេញប៉ុស្តិ៍កាលពីម្សិលមិញក្រោយពេលដុតកម្ទេចជ្រូកទាំងនេះថា ការដុតកម្ទេចចោលនេះគឺបានធ្វើឡើងនៅស្រុកបាទីខេត្តតាកែវ ដើម្បីចៀសវាងបង្កហានិភ័យដល់អ្នកទទួលទាន និងបង្កជំងឺទៅដល់សត្វជ្រូកនៅក្នុងស្រុក។
លោកបញ្ជាក់ថា៖ «ខ្ញុំបានកម្ទេចចោលហើយ មុនហ្នឹងបន្តិច នៅភ្នំតាម៉ៅទាំង ១០២ ក្បាល។ យើងមិនបានដុតលាយឡំជាមួយសត្វដទៃទេ ការដុតនេះគឺដុតតែសត្វជ្រូកដែលចាប់បាននៅខេត្តស្ទឹងត្រែងនេះឯង»។
ក្រៅពីដុតកម្ទេចចោលជ្រូកមានជំងឺទាំងនេះលោក តាន់ផាន់ណារ៉ា បានឱ្យដឹងទៀតថា អគ្គនាយកដ្ឋានក៏បានណែនាំដោយមានទាំងកិច្ចសន្យារួមទាំងពិន័យជាប្រាក់ចំនួន ៣០ លានរៀលពីឈ្មួញដែលនាំចូលជ្រូកខុសច្បាប់នេះផងដែរ។
លោកបានបញ្ជាក់ថា៖ «អគ្គនាយកដ្ឋានក៏ដូចជាក្រសួងយើងនៅតែរឹតបន្តឹងការនាំចូលជ្រូកដោយខុសច្បាប់គ្មានការពិនិត្យត្រឹមត្រូវ។ យើងនៅតែហាមឃាត់មិនឱ្យមានការនាំចូលខុសច្បាប់ទេព្រោះនេះជាការងាររបស់ជំនាញហើយការនាំចូលជ្រូកខុសច្បាប់ជាហានិភ័យនៃការនាំចូលសត្វជ្រូកឈឺ»។
កាលពីខែកុម្ភៈឆ្នាំនេះ កម្ពុជាក៏ធ្លាប់បានរកឃើញជ្រូកនាំចូលពីថៃខុសច្បាប់ចំនួន ៣០ ក្បាល នៅខេត្តបន្ទាយមានជ័យដែលមានផ្ទុកជំងឺប៉េស្តជ្រូកអាហ្វ្រិកផងដែរ ហើយពេលនោះសមត្ថកិច្ចបានសម្រេចដុតកម្ទេចចោលទាំងអស់។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានសាទរ ចំពោះចំណាត់ការទាន់ពេលវេលារបស់សមត្ថកិច្ចក្នុងការទប់ស្កាត់ជ្រូកមានជំងឺចូលក្នុងប្រទេស ខណៈលោកបារម្ភពីហានិភ័យដែលអាចធ្វើឱ្យជ្រូកក្នុងស្រុកឆ្លងងាប់ ប្រសិនបើជ្រូកមានជំងឺចូលចរាចរណ៍នៅលើទីផ្សារកម្ពុជា។
លោកបានបន្តថា ការបារម្ភដូច្នេះក៏ព្រោះតែជំងឺប៉េស្តជ្រូកអាហ្វ្រិកនេះគឺងាយឆ្លងបំផុតហើយមិនមានថ្នាំការពារ និងព្យាបាលទេនៅពេលមានការប៉ះពាល់សត្វជ្រូកមានជំងឺតាមរយៈរុយ ឬចៃរបស់សត្វ គឺងាយនឹងចម្លងជំងឺនេះបំផុត។
លោកបានបញ្ជាក់ថា៖ «ជំងឺប៉េស្តជ្រូកអាហ្វ្រិកនេះសាហាវបំផុតដោយខ្ញុំសិក្សាមកគឺជាង ១០០ ឆ្នាំមកហើយអត់មានវ៉ាក់សាំងការពារ និងព្យាបាលសត្វជ្រូកទេ។ បើសិនណាតែឆ្លងចូលមកជ្រូកក្នុងទ្រុងយើងតែ ១ គឺ ១ ហ្នឹងនឹងធ្វើឱ្យជ្រូកទាំងអស់ឈឺងាប់ទាំងអស់។ បើមាន ១ ០០០ ងាប់ទាំង ១ ០០០ បើមាន ១ ម៉ឺនជ្រូកគឺងាប់ទាំង ១ ម៉ឺនមិនមែនឆ្លងហើយឈប់ទេ»។
កាលពីឆ្នាំ ២០១៩ កម្ពុជាធ្លាប់ផ្ទុះជំងឺនេះម្តងរួចមកហើយដោយការឆ្លងចូលនៃជំងឺប៉េស្តជ្រូកអាហ្វ្រិកជាហេតុធ្វើឱ្យកម្ពុជាជួបប្រទះនូវការខ្វះជ្រូកសម្រាប់ផ្គត់ផ្គង់ក្នុងស្រុកដោយសារតែត្រូវសម្លាប់ជ្រូកដែលឆ្លងក្នុងស្រុករាប់ពាន់ក្បាល។ នេះបើតាមអះអាងរបស់រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ៕
វីដេអូ៖