ភ្នំពេញៈ មន្ត្រីនៃគណៈកម្មាធិការជាតិគ្រប់គ្រងគ្រោះមហន្តរាយបានកំពុងបន្តចុះផ្សព្វផ្សាយអប់រំណែនាំដល់សហគមន៍ប្រជាពលរដ្ឋឲ្យមានការត្រៀម និងបង្ការជាមុនចំពោះគ្រោះមហន្តរាយពីធម្មជាតិដូចជាគ្រោះរាំងស្ងួត ទឹកជំនន់ ខ្យល់កន្ត្រាក់ និងផ្គររន្ទះដែលអាចនឹងកើតមាននៅតាមតំបន់មួយចំនួនក្នុងខេត្តបាត់ដំបង ប៉ៃលិន បន្ទាយមានជ័យ ឧត្តរមានជ័យ និងខេត្តសៀមរាប។
ការអប់រំ និងណែនាំពីរបៀបបង្ការនេះបានធ្វើឡើងក្រោយពីមានសេចក្ដីជូនដំណឹងស្ដីពីអាកាសធាតុរបស់ក្រសួងធនធានទឹក និងឧតុនិយមចុះកាលបរិច្ឆេទថ្ងៃទី ៣ ខែ មីនា ឆ្នាំ ២០២០ បានឲ្យដឹងថា នៅពេលនេះកម្រិតសម្ពាធទាបនៅលើផ្ទៃដីបានគ្របដណ្ដប់នៅលើតំបន់ខ្លះនៃខេត្តបាត់ដំបង ប៉ៃលិន បន្ទាយមានជ័យ ឧត្តរមានជ័យ និងខេត្តសៀមរាបមានភ្លៀងធ្លាក់ក្នុងកម្រិតពីតិចទៅច្រើនចាប់ពីថ្ងៃនេះដល់ថ្ងៃទី ៩ ខែមីនា ឆ្នាំ ២០២០។ ទន្ទឹមនឹងនេះបាតុភូតខ្យល់កន្ត្រាក់ និងផ្គររន្ទះក៏នឹងកើតមានព្រមជាមួយនឹងភ្លៀងផងដែរ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្តិ៍នៅថ្ងៃអង្គារថា នៅពេលនេះគណៈប្រតិភូជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយកំពុងបន្តចុះផ្សព្វផ្សាយអប់រំណែនាំដល់សហគមន៍ប្រជាពលរដ្ឋឲ្យមានការត្រៀមបង្ការជាមុនចំពោះគ្រោះមហន្តរាយពីធម្មជាតិ ដែលរួមមានគ្រោះរាំងស្ងួត ទឹកជំនន់ ខ្យល់កន្ត្រាក់ និងផ្គររន្ទះ។ ពិសេសសហគមន៍ប្រជាពលរដ្ឋដែលរស់នៅក្នុងតំបន់វាលទំនាបតាមដងទន្លេមេគង្គ និងក្នុងតំបន់មួយចំនួនទៀតនៅភាគពាយព្យ និងភាគឧត្តរនៃប្រទេសកម្ពុជាដែលជារៀងរាល់ឆ្នាំតែងតែជួបប្រឈមទៅនឹងគ្រោះធម្មជាតិខាងលើនេះ។
លោក វី បានបញ្ជាក់ថា៖ «នៅពេលនេះគណៈកម្មាធិការជាតិគ្រប់គ្រងគ្រោះមហន្តរាយបានចុះអប់រំផ្សព្វផ្សាយពីវិធានការត្រៀមបង្ការមួយចំនួនដល់សហគមន៍មូលដ្ឋានប្រជាពលរដ្ឋដែលងាយរងគ្រោះដោយបាតុភូតខ្យល់កន្ត្រាក់ឲ្យរៀបចំបោះបង្គោល និងប្រើខ្សែលួសចងកៀបរឹតដំបូល និងសសរផ្ទះឲ្យបានរឹងមាំ ដើម្បីការពារ ការដួលរលំ ឬប៉ើងរបើកដំបូលផ្ទះពីការបក់បោកដោយខ្យល់កន្ត្រាក់។ ជាមួយគ្នានេះយើងក៏បានណែនាំឲ្យពលរដ្ឋ ចៀសវាងប្រើប្រាស់ទូរស័ព្ទដៃ ឬឧបករណ៍អេឡិចត្រូនិកក្នុងពេលមេឃកំពុងភ្លៀងដើម្បីបង្ការគ្រោះថ្នាក់ដែលបង្កឡើងដោយបាតុភូតផ្គររន្ទះ»។
សេចក្ដីជូនដំណឹងអំពីអាកាសធាតុបានឲ្យដឹងថា តំបន់ខ្លះនៃខេត្តទាំងនោះនឹងមានភ្លៀងធ្លាក់លាយឡំបាតុភូតខ្យល់កន្ត្រាក់ និងផ្គររន្ទះកើតឡើងក្នុងកម្រិតពីតិចទៅច្រើន ខណៈសីតុណ្ហភាពនៅក្នុងតំបន់ជួរភ្នំដងរែក និង ខ្ពង់រាបឦសាន មានការប្រែប្រួលកើនឡើង ១ អង្សាសេ បើធៀបទៅនឹងសប្ដាហ៍មុន។
ចំណែកបរិយាកាសនៃអាកាសធាតុនឹងមានការប្រែប្រួលកើនឡើង ១ អង្សាសេធៀបទៅនឹងសប្ដាហ៍មុន ដែលសីតុណ្ហភាពអប្បបរមាស្ថិតក្នុងចន្លោះពី ២១-២៣ អង្សាសេសម្រាប់តំបន់ជួរភ្នំដងរែក និងខ្ពង់រាបឦសាន ខណៈតំបន់វាលទំនាបកណ្តាលមានសីតុណ្ហភាពអប្បបរមាចន្លោះពី ២៣-២៥ អង្សាសេ និងតំបន់មាត់សមុទ្រមានសីតុណ្ហភាពអប្បបរមាចន្លោះពី ២៤-២៦ អង្សាសេ ហើយផ្នែកខ្លះនៃតំបន់មាត់សមុទ្រនេះនឹងមានភ្លៀងធ្លាក់ក្នុងកម្រិតតិចតួចផងដែរ។
ក្រសួងធនធានទឹក និងឧតុនិយមក៏បានគូសបញ្ជាក់បន្ថែមនៅក្នុងសេចក្ដីជូនដំណឹងនោះផងដែរថា៖ «អាស្រ័យស្ថានភាពអាកាសធាតុដូចបានជម្រាបជូននេះ សូមសាធារណជនបង្កើនការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលអាចនឹងកើតមានក្នុងអំឡុងពេលមានភ្លៀងធ្លាក់ ពិសេសសាធារណជនដែលរស់នៅក្នុងខេត្តភាគពាយព្យ និងឧត្តរដែលរួមមានខេត្តបាត់ដំបង ប៉ៃលិន បន្ទាយមានជ័យ ឧត្តរមានជ័យ និងខេត្តសៀមរាប»។
លោក វី បានឲ្យដឹងផងដែរថា បាតុភូតខ្យល់កន្ត្រាក់ និងផ្គររន្ទះក្នុងឆ្នាំ ២០១៩ កន្លងទៅនេះបានបណ្ដាលឲ្យមនុស្ស ៩៧ នាក់ស្លាប់ និងជាង ២០០ នាក់ទៀតបានរងរបួស។ ក្នុងនោះបាតុភូតផ្គររន្ទះបានសម្លាប់មនុស្ស ៩៥ នាក់ និង ៩០ នាក់ទៀតបានរងរបួស ខណៈបាតុភូតខ្យល់កន្ត្រាក់បានធ្វើមនុស្ស ២ នាក់ស្លាប់ និង ១១៦ នាក់ទៀតបានរងរបួស៕