ព្រះសីហនុៈ លោក ជិន ម៉ាលីន អ្នកនាំពាក្យក្រសួងយុត្តិធម៌បានណែនាំឲ្យភាគីប្រជាពលរដ្ឋចំនួន ២៣ នាក់ត្រៀមឯកសារផ្លូវច្បាប់ សម្រាប់ជាភ័ស្តុតាងដាក់ជូនតុលាការខេត្តព្រះសីហនុ ដើម្បីតតាំងក្តីជាមួយអ្នកស្រី ហុង សួន ភរិយាលោកឧកញ៉ា ស៊ី គង់ទ្រីវ និងលោកឧកញ៉ា លី យ៉ុងផាត់ ជុំវិញរឿងជម្លោះដីធ្លីដែលពាក់ព័ន្ធនឹងពលរដ្ឋជាង ១០០ គ្រួសារនៅឃុំបិតត្រាំង បន្ទាប់ពីតុលាការបានចេញដីកាកោះហៅឲ្យពលរដ្ឋទាំងនោះចូលទៅបំភ្លឺជាបន្តបន្ទាប់។
កាលពីពាក់កណ្តាលខែសីហាលោក គួន ចន្ថា ចៅក្រមស៊ើបសួរសាលាដំបូងខេត្តព្រះសីហនុបានចេញដីកាបង្គាប់ផ្សេងៗគ្នាចំនួន ២៣ ច្បាប់ដោយតម្រូវឲ្យប្រធានគណៈកម្មការខេត្តនៃសម្ព័ន្ធសហគមន៍កសិករកម្ពុជា (CCFC) លោក ស៊ុន សុផាត និងប្រជាពលរដ្ឋចំនួន ២២ នាក់ផ្សេងទៀតដែលមានលំនៅក្នុងភូមិចំណោតរាម ឃុំបិតត្រាំង ស្រុកព្រៃនប់ ចូលខ្លួនទៅបំភ្លឺជាបន្តបន្ទាប់ចាប់ពីថ្ងៃទី ១ ខែតុលារហូតដល់ថ្ងៃទី ២២ ខែតុលា។
ការកោះហៅនេះគឺដើម្បីសាកសួរពីដំណើររឿងដែលអ្នកស្រី ហុង សួន និងលោក លី យ៉ុងផាត់ បានប្តឹងប្រជាពលរដ្ឋទាំង ២៣ រូបនោះពីបទ «ធ្វើឲ្យខូចខាតដោយចេតនា» ដែលបានប្រព្រឹត្តនៅចំណុចដីជម្លោះខាងលើកាលពីអំឡុងខែកញ្ញា ឆ្នាំ ២០១៨។
លោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់ភ្នំពេញប៉ុស្តិ៍ពីម្សិលមិញថា លោកមិនអាចធ្វើការសន្និដ្ឋានជុំវិញវិវាទនេះបានទេ ដោយសារវាស្ថិតក្នុងនីតិវិធីរបស់តុលាការ។ ប៉ុន្តែលោកថ្លែងថាឲ្យតែមានពាក្យបណ្តឹង នោះតុលាការត្រូវតែកោះហៅភាគីវិវាទមកបំភ្លឺហើយ។ ដូច្នេះលោកជំរុញឲ្យភាគីវិវាទទាំងសងខាងត្រៀមភ័ស្តុតាងឲ្យបានច្បាស់លាស់ ដើម្បីការពារខ្លួន ហើយបើករណីនេះគ្មានភ័ស្តុតាងច្បាស់លាស់តុលាការមានសិទ្ធិសម្រេចទម្លាក់ចោល។
លោកបញ្ជាក់ថា៖ «យើងមិនហ៊ានសន្និដ្ឋានថា ខាងណាត្រូវខាងណាខុសដែរទាល់តែតុលាការបានគេស៊ើបអង្កេត មានសិទ្ធិសម្រេចផ្អែកទៅលើភ័ស្តុតាង។ អ្នកណាមានភ័ស្តុតាងរឹងមាំស្របតាមផ្លូវច្បាប់ មិនស្របតាមផ្លូវច្បាប់ ព្រោះជាក់ស្តែងយើងធ្វើការសន្និដ្ឋានម៉េចកើត។ ខ្ញុំមិនសន្និដ្ឋាន ខាងណាខុស ខាងណាត្រូវទេ គឺមានតែតុលាការទេ ដែលអាចធ្វើការសន្និដ្ឋានបាន ដោយផ្អែកទៅលើដំណើរការនៃការស៊ើបអង្កេត។ បើសិនជាមានភ័ស្តុតាង មានឯកសារអ្វីដែលរឹងមាំ យើងដាក់ទៅ ដើម្បីការពារខ្លួន ហើយកុំគិតថា ខាងណាមានខាងណាក្រ សំខាន់ខាងណាមានភ័ស្តុតាងមូលដ្ឋានច្បាស់លាស់»។
លោក សុខ កល្យាណ ប្រធានតុលាការខេត្ត និងលោក យឹម ប៊ុណ្ណារ៉េត អ្នកនាំពាក្យតុលាការខេត្តព្រះសីហនុកាលពីម្សិលមិញបានបដិសេធធ្វើអធិប្បាយជុំវិញករណីនេះដោយបានបង្វែរសំនួរទៅកាន់លោក គួន ចន្ថា ចៅក្រមស៊ើបសួរដែលភ្នំពេញប៉ុស្តិ៍មិនអាចស្វែងរកប្រភពទាក់ទងលោក។
លោក នួន សូរិយា ដែលជាពលរដ្ឋម្នាក់ក្នុងចំណោម ២៣ នាក់ដែលត្រូវបានតុលាការកោះហៅបានអះអាងថា លោកបានកាន់កាប់ដីនេះតាំងពីឆ្នាំ ១៩៩០ ជាង និងមានការទទួលស្គាល់ពីអាជ្ញាធរ ៣ ទៅ ៤ អាណត្តិមកហើយ។
លោកបន្តថាក្នុងអំឡុងពេលកាន់កាប់ដីនេះគឺមិនមានអ្នកណាអះអាងជាដីរបស់គេនោះទេទើបតែចុងក្រោយនេះគឺក្នុងឆ្នាំ ២០១៨ ស្រាប់តែមានការអះអាងថា ពួកលោកបានរស់នៅលើដីរបស់គេ ដែលមានបណ្ណកម្មសិទ្ធិទៅវិញ។
«ដីហ្នឹងជារបស់យើង ដីហ្នឹងគឺគាត់ (ភាគីឧកញ៉ា) បានមកបំពាន (ពលរដ្ឋ) នៅឆ្នាំ ២០១៨ ហើយប្លង់គាត់គឺប្លង់ធ្វើតាំងពី ១៩៩៣។ ខ្ញុំមិនមែនចេះតែនិយាយទេ មិនដឹងជាគាត់ទិញអ្នកណាខ្ញុំក៏មិនដឹងដែរ ប៉ុន្តែមានតែវត្ថុស័ក្តិសិទ្ធិទេដែលបង្ហាញបាន»។ លោក សូរិយា ដែលកំពុងកាន់កាប់ដីទំហំ ៤០ គុណនឹង ៤០ ម៉ែត្រក្នុងចំណោមដីជិត ១០ ហិកតារូបនេះអះអាងថា មានពលរដ្ឋចំនួន ១២៧ គ្រួសាររស់នៅក្នុងភូមិនេះដោយបង្កើតជាភូមិមួយដែលមានអាជ្ញាធរដឹងឮហើយក្នុងនោះពលរដ្ឋចំនួន ១១៤ គ្រួសារទទួលបានបណ្ណកាន់កាប់ដីធ្លីពីអាជ្ញាធរដែនដីថ្នាក់ឃុំ។
លោក ឡុង វិចិត្រ ពលរដ្ឋម្នាក់ទៀតថ្លែងថាការចោទប្រកាន់ពួកលោកថា បានបំពានលើដីឧកញ៉ានេះគឺជារឿងអយុត្តិធម៌ខ្លាំងណាស់ព្រោះលោកមិនបានធ្វើឲ្យខូចខាតទ្រព្យសម្បត្តិរបស់អ្នកណានោះទេ។ «ខ្ញុំបានទិញដីនេះពីអ្នកភូមិដូចគ្នាក្នុងអំឡុងឆ្នាំ ២០១៦ ដែលមានទំហំ ២០ គុណនឹង ៤០ ម៉ែត្រដោយមានការទទួលស្គាល់ពីអាជ្ញាធរ។ ក្នុងអំឡុងឆ្នាំ ២០១៨ នោះខ្ញុំមិនបានទៅរំលោភបំពាន ឬធ្វើឲ្យខូចខាតទ្រព្យសម្បត្តិរបស់បុគ្គលណាឡើយ។ ខ្ញុំមិនយល់ដែរ ដែលតុលាការកោះហៅខ្ញុំឲ្យចូលបំភ្លឺពីរឿងនេះ»។
បើតាមប្រជាពលរដ្ឋទាំងនោះ ពួកគេនឹងតៀមឯកសារដែលខ្លួនមាន ខណៈអ្នកខ្លះនឹងស្វែងរកមេធាវីដើម្បីជួយការពារក្តីក្នុងរឿងវិវាទដីធ្លីនេះពីការចោទប្រកាន់របស់អ្នកស្រី ហុង សួន ភរិយាឧកញ៉ា ស៊ី គង់ទ្រីវ និងលោក លី យ៉ុងផាត់ ដោយពួកគេនឹងចូលខ្លួនទៅបំភ្លឺនៅតុលាការតាមការកំណត់។
លោក ណាច ទ្រី សហមេធាវីម្នាក់ក្នុងចំណោម ៤ រូបដែលការពារក្តីឲ្យអ្នកស្រី ហុង សួន និងលោក លី យ៉ុងផាត់ ប្រធានក្រុមហ៊ុនលីយ៉ុងផាត់បានប្រាប់ភ្នំពេញប៉ុស្តិ៍ពីម្សិលមិញថា ជម្លោះរវាងកូនក្តីរបស់លោកជាមួយប្រជាពលរដ្ឋនៅក្នុងឃុំបិតត្រាំងមានច្រើនករណី។ ដូច្នេះលោកមិនអាចបញ្ជាក់ឲ្យច្បាស់បានទេ ដោយគ្រាន់តែអាចនិយាយថា ការដែលកូនក្តីលោកសម្រេចប្តឹងទៅតុលាការ ព្រោះសំអាងថាបានប្លង់កាន់កាប់លើដីនេះស្របច្បាប់។
លោកបញ្ជាក់ថា៖ «នៅក្នុងឃុំបិតត្រាំង មាន(ជម្លោះ) ដល់ទៅ ៤ កន្លែងដូចជាជម្លោះលើដី ៦០ ហិកតា ២៦ ហិកតា ១៧ ហិកតា និង ២ ហិកតាគឺសុទ្ធតែប្រជាពលរដ្ឋគាត់ចូលមកកាន់កាប់ហើយគាត់អត់មានអីសោះ គាត់ចូលមករំលោភធ្វើផ្ទះ យកដីគេអ៊ីចឹង ហើយដីគេ គឺសុទ្ធតែមានបណ្ណកម្មសិទ្ធិទាំងអស់»។
មេភូមិចំណោត រាម លោក ប៉ាង សុឃាន ឲ្យដឹងថា ប្រជាពលរដ្ឋទាំង ២៣ នាក់ដែលត្រូវបានតុលាការកោះហៅនេះគឺជាពលរដ្ឋក្នុងចំណោមប្រជាពលរដ្ឋប្រមាណ ១២៧ គ្រួសារដែលកំពុងអាស្រ័យផលលើដីជាក់ស្តែងទំហំជិត ១០ ហិកតា។
លោកមេភូមិដែលអះអាងថា បានរស់នៅក្នុងតំបន់នេះតាំងពីឆ្នាំ ១៩៩២ និងបានឡើងធ្វើជាមេភូមិចំណោតរាមកាលពីឆ្នាំ ២០១២ បានបញ្ជាក់ថា ប្រជាពលរដ្ឋទាំងនោះពិតជាបានកាន់កាប់ដីទាំងនេះជាយូរឆ្នាំមកហើយមែនដោយមានអ្នកខ្លះបានកាន់កាប់តាំងពីឆ្នាំ ១៩៩០ មកម្ល៉េះ និងបានចែក ឬលក់បន្តទៅឲ្យប្រជាពលរដ្ឋដទៃស្របច្បាប់។ «តាំងពីខ្ញុំមិនទាន់ធ្វើជាមេភូមិមក ក៏ខ្ញុំឃើញពួកគាត់រស់នៅហ្នឹងដែរ គឺ (ដំបូង) រស់នៅជាង ១០ គ្រួសារដែលតមកចេះតែចែកគ្នាពុះឡូត៍ម្នាក់ ១០ ម្នាក់ ២០ តមកហើយដីហ្នឹងទទួលស្គាល់ពីអាជ្ញាធរចាស់ពីមុនមកទៀត ហើយអ្នកដែលនៅ នៅរហូតមកដល់សព្វថ្ងៃ អ្នកខ្លះ ១៨ ឆ្នាំ អ្នកខ្លះ ២០ ឆ្នាំហើយ»។
លោក ប៉ាង សុឃាន បានស្នើឲ្យតុលាការគួរធ្វើការពិនិត្យឲ្យបានត្រឹមត្រូវ និងផ្តល់យុត្តិធម៌ដល់ប្រជាពលរដ្ឋនៅក្នុងភូមិរបស់លោកផងដោយលោក អះអាងថាប្រជាពលរដ្ឋទាំងនេះមិនដែលបានបំផ្លាញអចលនទ្រព្យរបស់ជនណាម្នាក់ដូចការចោទប្រកាន់នោះទេ៕