The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​ត្រូវ​​បាន​បណ្តុះបណ្តាល​ក្នុង​ការ​បង្ក្រាប​បទល្មើស

មន្ត្រី​ត្រូវ​​បាន​បណ្តុះបណ្តាល​ក្នុង​ការ​បង្ក្រាប​បទល្មើស

Content image - Phnom Penh Post
ប៉ូលិស​ចុះ​ត្រួត​ពិនិត្យ​ទី​តាំង​ផលិត​កាហ្វេ​ក្លែងក្លាយ​មួយ​កន្លែង​ក្នុង​ខណ្ឌ​សែនសុខ​កន្លង​មក​។ រូបថត សហការី

មន្ត្រី​ត្រូវ​​បាន​បណ្តុះបណ្តាល​ក្នុង​ការ​បង្ក្រាប​បទល្មើស

ភ្នំពេញៈ ក្រសួង​ពាណិជ្ជកម្ម​សហការ​ជាមួយ​ការិយាល័យ​មេធាវី​ក្រៅ​ប្រទេស Tilleke & Gibbins បាន​បើក​វគ្គ​បណ្តុះ​បណ្តាល​ដល់​មន្ត្រី​មាន​សមត្ថកិច្ច​ប្រមាណ​ ៨០​ នាក់​ដើម្បី​ពង្រឹង​សមត្ថភាព​បន្ថែម​ទៀត​ក្នុង​ការ​បង្ក្រាប​បទល្មើស​កម្មសិទ្ធិ​បញ្ញា និង​ផលិតផល​ក្លែងក្លាយ​ក្នុង​ប្រទេស​កម្ពុជា។

វគ្គ​បណ្តុះបណ្តាល​​នេះ​ត្រូវ​បាន​ធ្វើ​ឡើង​កាលពី​ម្សិលមិញ​នៅ​សណ្ឋាការ​អាំងទែរ​កុងទីណុង់តាល់​ដោយ​មាន​អ្នក​ចូលរួម​​ដែល​ជា​មន្ត្រី​គយ​កាំកុងត្រូល​ប៉ូលិស​សេដ្ឋកិច្ច​ព្រះរាជអាជ្ញា​ចៅក្រម​មន្ត្រី​នាយកដ្ឋាន​កម្មសិទ្ធិ​បញ្ញា​ក្រសួង​ពាណិជ្ជកម្ម​ ក្រសួងយុត្តិធម៌ ក្រសួង​សេដ្ឋកិច្ច និង​ក្រសួង​វប្បធម៌ និង​វិចិត្រ​សិល្បៈ​សរុប​ប្រមាណ​ ៨០ ​​រូប។

អនុប្រធាន​នាយកដ្ឋាន​កម្មសិទ្ធិ​បញ្ញា​នៃ​ក្រសួង​ពាណិជ្ជកម្ម​ដែល​បាន​ចូលរួម​​លោក តូ រិត ថ្លែង​ថា​វគ្គ​បណ្តុះ​បណ្តាល​​នេះ​នឹង​ផ្តល់​ឱកាស​ដល់​មន្ត្រី​ពាក់ព័ន្ធ​​ក្នុង​ការ​​បង្ក្រាប​ការ​រំលោភ​បំពាន​កម្មសិទ្ធិ​បញ្ញា និង​ដើម្បី​មក​ជួបជុំ​គ្នា​ផ្លាស់ប្តួរ​ព័ត៌មាន​នៃ​​សកម្មភាព​បង្ក្រាប និង​ពង្រឹង​បន្ថែម​នូវ​ការ​សហប្រតិបត្តិការ​​បង្ក្រាប​បទល្មើស​។

យ៉ាង​ណា​ក៏ដោយ​ លោក​សង្កត់​ធ្ងន់​ថា ​ការ​ប្រើប្រាស់​ផលិតផល​ក្លែង និង​បន្លំ​ម៉ាក​សញ្ញា​ពិត​ជា​ធ្វើ​ឱ្យ​ប៉ះពាល់​ធ្ងន់ធ្ងរ​ដល់​​សេដ្ឋកិច្ច និង​សង្គម​។

លោក​ថា៖ ​«​ផលប៉ះពាល់​ដល់​ផ្នែក​សេដ្ឋកិច្ច​បង្កើត​ឱ្យ​មាន​ការ​ប្រកួត​ប្រជែង​​មិន​ស្មោះត្រង់​ប៉ះពាល់​កិត្តិនាម​​ម៉ាក​គេ​ដែល​ល្បី និង​មាន​ទីផ្សារ​ឧទាហរណ៍​អ្នក​ប្រើប្រាស់​ទិញ​ប៉ះ​ផលិតផល​​ក្លែងក្លាយ​ប្រើ​មិន​បាន​យូរ​ហើយ​ខូច​អ៊ីចឹង​នាំ​គ្នា​និយាយ​តៗ​គ្នា​ថា​ម៉ាក​ហ្នឹង​ប្រើ​មិន​កើត​ទេ​អ៊ីចឹង​វា​ធ្វើ​ឱ្យ​ប៉ះពាល់​ដល់​ផលប្រយោជន៍​ម្ចាស់​ម៉ាក ឬ​សិទ្ធិ»។ លោក​បន្ត​ថា​ការ​ប្រើ​ផលិតផល​​ក្លែង​នេះ​នឹង​ធ្វើ​ឱ្យ​ពលរដ្ឋ​បាត់បង់​ការងារ និង​វិយោគ​ថមថយ​ខណៈ​ក្រុមហ៊ុន​ស្រប​ច្បាប់​ងាយ​ដួលរលំ​ដោយសារ​អ្នក​បន្លំ​ម៉ាក​លក់​ថោក​ជាង​របស់​ដើម។

បើ​តាម​លោក តូ រិត នៅ​ក្នុង​​ឆ្នាំ ២០១៤ ក្រសួង​ពាណិជ្ជកម្ម​បាន​ចុះ​បញ្ជី​ម៉ាក​​បាន​ជាង ៤ ពាន់​ម៉ាក (ម៉ាក​ក្នុង​ស្រុក​ជាង ​៧០០​ ម៉ាក) ឆ្នាំ ២០១៥ មាន​ជាង ៥ ពាន់​ម៉ាក់ (ម៉ាក​ក្នុង​ស្រុក​ជាង​ ៨០០ ម៉ាក)។

នាយក​គ្រប់គ្រង​ផ្នែក​កម្មសិទ្ធិ​បញ្ញា​របស់​​ក្រុមហ៊ុន​ ថាយលើគី និង​ហ្គីប៊ីន លោកស្រី ដារ៉ានី វចនាវទិវង្ស​ថ្លែង​ថា​ការ​ចូលរួម​សហការ​រវាង​ស្ថាប័ន​ឯកជន និង​មន្ត្រី​សាធារណៈ​គឺជា​គន្លឹះ​ដើម្បី​ធានា​នូវ​​កិច្ច​បន្ត​ភាព​ជោគជ័យ​​របស់​ប្រទេស​កម្ពុជា​ក្នុង​ការ​​​ប្រយុទ្ធ​ប្រឆាំង​ការ​រំលោភបំពាន​កម្មសិទ្ធិ​បញ្ញា។​

លោកស្រី​បញ្ជាក់​ថា​៖ ​«មន្ត្រី​រដ្ឋាភិបាល​កម្ពុជា​បង្កើត​នូវ​​វឌ្ឍនភាព​ដ៏ធំធេង​ក្នុង​ការ​លុប​បំបាត់​នូវ​ទីផ្សារ​ទំនិញ​ក្លែងក្លាយ និង​ផលិតផល​ចម្លង​ប៉ុន្តែ​ពួកគេ​មិន​អាច​ធ្វើ​តែ​ម្នាក់​ឯង​បាន​ទេ​ហើយ​វគ្គ​បណ្តុះបណ្តាល​នេះ​ដើម្បី​បង្ហាញ​ឱ្យ​មន្ត្រី​យល់​ដឹង​អំពី​ម៉ាក​ទំនិញ​របស់​ខ្លួន​ក្នុង​គោលបំណង​បង្កើន​ប្រសិទ្ធិភាព​ការងារ​ដល់​មន្ត្រី​រដ្ឋាភិបាល​»។

ផ្អែក​តាម​ស្ថិតិ​បង្ក្រាប​បទល្មើស​រំលោភ​​បំពាន​កម្មសិទ្ធិ​បញ្ញា​របស់​នាយកដ្ឋាន​នគរបាល​ប្រឆាំង​បទល្មើស​សេដ្ឋកិច្ច​នៃ​ក្រសួង​មហាផ្ទៃ​ឱ្យ​ដឹង​ថា​នៅ​ឆ្នាំ ២០១១ បង្ក្រាប​បាន ៨ ករណី​ឆ្នាំ ២០១២ បាន​ ៣០ ​ករណី​ឆ្នាំ ២០១៣ ១៣ ករណី ឆ្នាំ ២០១៤ បាន​ ២៨ ករណី ឆ្នាំ ២០១៥ បាន​​ ២៩ ករណី និង​ឆ្នាំ ២០១៦ ​គិត​ត្រឹម​ថ្ងៃ​ម្សិលមិញ​បាន​ប្រមាណ​ ៦ ​ករណី​ខណៈ​នាយកដ្ឋាន​នឹង​បូក​សរុប​ការ​បង្ក្រាប​​បទល្មើស​ទាំងអស់​​នៅ​ពាក់​កណ្តាល​ខែ​ធ្នូ ឆ្នាំ ២០១៦។

អនុប្រធាន​នាយកដ្ឋាន​នគរបាល​ប្រឆាំង​បទល្មើស​សេដ្ឋកិច្ច​លោក​ ឡុង ស្រេង បាន​ជំរុញ​ឱ្យ​ម្ចាស់​ម៉ាក ឬ​ផលិតផល​ដាក់​ពាក្យ​​បណ្តឹង​មក​ស្ថាប័ន​ខ្លួន​ដើម្បី​ងាយស្រួល​ដល់​សមត្ថកិច្ច​ធ្វើការ​​បង្ក្រាប។ «ព្រោះ​ការ​វេចខ្ចប់​របស់​ផលិតផល​ក្លែងក្លាយ​ស្ទើរ​តែ​ ៩៨ ​ភាគរយ​ដូច​របស់​ដើម​អ៊ីចឹង​យើង​ពិបាក​សំគាល់​តែ​កន្លង​មក​ក្រុមហ៊ុន​ទាំងអស់​មិន​បាន​សហការ​ជាមួយ​សមត្ថកិច្ច​​ទេ​»។

សមត្ថកិច្ច​បាន​បង្ក្រាប​លើ​ផលិតផល​ក្លែងក្លាយ​ក្លែង​បន្លំ​ម៉ាក​សញ្ញា រំលោភ​សិទ្ធិ​អ្នក​និពន្ធ និង​​បង្ក្រាប​លើ​បទល្មើស​រំលោភ​សិទ្ធិ​ផ្តាច់​មុខ។ ផលិតផល​ក្លែង​ដែល​ត្រូវ​បាន​បង្ក្រាប​កន្លង​មក​រួមមាន​ផលិតផល​សម្លៀក​បំពាក់​ស្បែក​ជើង ឱសថ ទឹក​ស៊ីអ៊ីវ គោយន្ត សម្បក​កង់ ស្រា ភេសជ្ជៈ​ប៉ូវកម្លាំង CD VCD និង DVD និង​សាប៊ូ​ជាដើម​។

លោក តូ រិត ឱ្យ​ដឹង​ដែរ​ថា​ផ្អែក​ទៅ​តាម​​ច្បាប់​ស្តីពី​ពី​ម៉ាក​ពាណិជ្ជ​នាម និង​ការ​ប្រកួត​ប្រជែង​ដោយ​ស្មោះត្រង់​មាត្រា​ ៦៤ និង ៦៥ ចែង​ពី​ការ​ដាក់​ទោស​ទណ្ឌ​ទាប​បំផុត​ត្រូវ​ជាប់​ពន្ធនាគារ​ពី ១ ខែ​ទៅ ៥ ឆ្នាំ​ហើយ​​ពិន័យ​​ជា​ប្រាក់​ខ្ពស់​បំផុត ២០ លាន​រៀល​តែ​ការ​ដាក់​ពិន័យ​ ឬ​ទោស​អាស្រ័យ​ទៅ​លើ​តុលាការ៕

អត្ថបទគួរចាប់អារម្មណ៍