.jpg)
លោក វង្សី វិសុទ្ធ រដ្ឋលេខាធិការក្រសួងសេដ្ឋកិច្ចថ្លែងក្នុងកិច្ចប្រជុំស្តីពីច្បាប់ថវិកា និងមីក្រូហិរញ្ញវត្ថុពីម្សិលមិញ។ ហុង មិនា
ភ្នំពេញៈ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិសុទ្ធ បានបង្ហើបឱ្យដឹងពីម្សិលមិញថា កម្ពុជាអាចមានវ៉ាក់សាំងប្រឆាំងកូវីដ ១៩ សរុបចំនួន ២០ លានដូស ដោយក្នុងនោះ ១១ លានដូសជាជំនួយទទួលបានពីប្រទេសជាមិត្ត និងដៃគូអភិវឌ្ឍន៍នានា ហើយក៏បានត្រៀមផែនការចាក់វ៉ាក់សាំងនោះរួចរាល់ដែរ។
លោកបានថ្លែងដូច្នេះក្នុងសន្និសីទសារព័ត៌មាន បន្ទាប់ពីបញ្ចប់វេទិកាស្ដីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២១» ធ្វើឡើងនៅសណ្ឋាគារមួយក្នុងរាជធានីភ្នំពេញកាលពីថ្ងៃទី ២៧ ខែមករា។
ឆ្លើយតបនឹងសំណួរអ្នកសារព័ត៌មានលោក វិសុទ្ធ ថ្លែងដូច្នេះថា៖ «រឿងវ៉ាក់សាំង តាមពិតយើងត្រៀម ២០ លានដូស។ ខ្ញុំមិនគួរនិយាយមុនសោះ តែបើមិនឆ្លើយក៏មិនកើត។ តាមពិតក្នុង ២០ លានដូសដែលយើងមានផែនការ ឥឡូវយើងបានរៀបចំព្រាងរួចហើយ។ ស្អែកយើងនឹងពិភាក្សា ហើយផែនការចាក់វ៉ាក់សាំងក៏បានត្រៀមរួចហើយដែរ»។
លោកបានបន្តថា ក្នុងចំណោមវ៉ាក់សាំង ២០ លានដូសនេះមានរហូតដល់ទៅ ១១ លានដូស គឺជាវ៉ាក់សាំង ដែលទទួលបានក្នុងរូបភាពជាអំណោយ។ កម្ពុជារំពឹងថានឹងបានវ៉ាក់សាំងចំនួន ៧ លានដូសតាមរយៈយន្តការកូវ៉ាក់ដែលជាប្រព័ន្ធអន្តរជាតិរបស់អង្គការសុខភាពពិភពលោក។ ក្នុងខែកុម្ភៈ ឬខែមីនា កម្ពុជាសង្ឃឹមថា បានវ៉ាក់សាំងពីចិន ហើយវ៉ាក់សាំងនេះនឹងចាប់ផ្ដើមចាក់ក្នុងខែកុម្ភៈ ឬខែមីនា។
បើតាមលោក វង្សី វិសុទ្ធ ប្រទេសអូស្ត្រាលីកាលពីថ្មីៗនេះបានប្ដេជ្ញាផ្ដល់ជំនួយឥតសំណង ២៨ លានដុល្លារអាមេរិក ឬ ៣៥ លានដុល្លារអូស្ត្រាលី ដើម្បីទិញវ៉ាក់សាំងចំនួន ៣ លានដូស។ ការទិញនេះអាចធ្វើឡើងតាមយន្តការកូវ៉ាក់ WHO យូនីសេហ្វ ឬយន្តការណាផ្សេង។ ក្រៅពីនេះកម្ពុជាក៏បានស្នើសុំវ៉ាក់សាំងពីឥណ្ឌា និងរុស្ស៊ី។
លោករដ្ឋលេខាធិការ បន្តថា បន្ថែមលើជំនួយជាវ៉ាក់សាំង ១ លានដូសពីប្រទេសចិន នោះ កម្ពុជាក៏អាចនឹងយកថវិកាជំនួយឥតសំណងដែលចិនឱ្យនោះទៅទិញវ៉ាក់សាំងចិនវិញ។ ក្រៅពីនេះកម្ពុជាក៏អាចទិញផ្ទាល់ដោយប្រើថវិកាជាតិ ឬថវិកាសប្បុរសជនដែលមាន ៥៧ លានដុល្លារក្នុងដៃស្រាប់។
ចំពោះវ៉ាក់សាំងរបស់ប្រទេសអង់គ្លេសវិញ លោក វិសុទ្ធ ថ្លែងដូច្នេះថា៖ «យើងបានទាក់ទងហើយ ស្រួលបំផុតអង់គ្លេស ចង់ទិញប៉ុន្មានក៏បានដែរ ១ ដូស ៤ ដុល្លារនៅថៃ ១ ម៉ោងដឹកមកដល់។ ដូច្នេះបើនិយាយអំពីវត្តមានវ៉ាក់សាំង ស្រុកខ្មែរដូចលែងចោទជាបញ្ហាធំហើយ។ សំខាន់យើងត្រូវរៀបចំឃ្លាំង ការដឹកជញ្ជូន ការចាក់វ៉ាក់សាំងតាមនីតិវិធី ហើយការគ្រប់គ្រងសំណល់ វាក៏ពិបាក»។
បើតាមលោករដ្ឋលេខាធិការរូបនេះ រដ្ឋាភិបាលកម្ពុជាកំពុងធ្វើផែនការឱ្យបានច្បាស់លាស់ថា តើវ៉ាក់សាំងនឹងមកដល់ពេលណា រក្សាទុក និងចាក់ជូនពលរដ្ឋយ៉ាងដូចម្តេច? រដ្ឋាភិបាលកំពុងធ្វើផែនការចុះឈ្មោះ ចាក់វ៉ាក់សាំងជា ២ ដំណាក់កាលចាប់ផ្ដើមនៅភ្នំពេញ ដោយប្រើប្រាស់កម្មវិធី (App) របស់ក្រសួងសុខាភិបាល។ ចំណែកផែនការចាក់ទូទាំងប្រទេសវិញនឹងមានទម្រង់មួយធំដែលកំពុងស្ថិតក្នុងដំណាក់កាលរៀបចំ។
លោកថ្លែងថា៖ «ប៉ុន្តែមានទស្សនវិស័យថាប្រទេសកម្ពុជាអាចជាប្រទេសមួយក្រ ប៉ុន្តែមានល្បឿនលឿនជាងគេដែរក្នុងការទិញ និងចាក់វ៉ាក់សាំងនេះហើយនេះជាសញ្ញាមួយល្អបំផុតសម្រាប់ការងើបឡើងនៃសេដ្ឋកិច្ច។ ជាសញ្ញាមួយល្អបំផុតក្នុងការទាក់ទាញការវិនិយោគដែលកំពុងតែមានឱកាសនៅក្នុងតំបន់យើងនេះ»។
ពាក់ព័ន្ធនឹងវ៉ាក់សាំងនេះអ្នកនាំពាក្យស្ថានទូតអូស្ត្រាលីប្រចាំកម្ពុជាបានថ្លែងតាមអ៊ីមែលកាលពីម្សិលមិញថា៖ «រដ្ឋាភិបាលអូស្ត្រាលីកំពុងមានកិច្ចពិភាក្សាជាន់ខ្ពស់ជាមួយរដ្ឋាភិបាលកម្ពុជាអំពីការគាំទ្ររបស់យើងលើបញ្ហាវ៉ាក់សាំង ហើយយើងនឹងធ្វើការប្រកាសនាពេលឆាប់ៗនេះ»។
កាលពីថ្ងៃទី ២២ ខែមករា លោកនាយករដ្ឋមន្ត្រី ហ៊ុន សែន ក៏បានបញ្ជាក់ពីបញ្ហាវ៉ាក់សាំងកូវីដ ១៩ ដែរ ដោយលោកបញ្ជាក់ថា ក្រៅពីស្នើសុំពីឥណ្ឌា លោកក៏បានស្នើសុំពីប្រទេសកូរ៉េខាងត្បូងផងដែរ។ លោកនឹងទៅទទួលវ៉ាក់សាំងចិនរបស់ក្រុមហ៊ុនស៊ីណូហ្វាមដោយផ្ទាល់នៅអាកាសយានដ្ឋាន។ ការចាក់វ៉ាក់សាំងនេះធ្វើឡើងលើគោលការណ៍ស្ម័គ្រចិត្ត។
កាលពីពេលថ្មីៗនេះលោកក៏បានបង្ហាញពីបញ្ជីអ្នកដែលមានអាទិភាពមុនគេក្នុងការទទួលបានវ៉ាក់សាំងនេះ ដែលក្នុងនោះរួមមានទាំងអ្នករត់តាក់ស៊ី និងម៉ូតូកង់បីផងដែរ។
អ្នករត់តាក់ស៊ីក្រចេះ-ភ្នំពេញម្នាក់បានថ្លែងពីម្សិលមិញថា នៅពេលវ៉ាក់សាំងនេះមកដល់ហើយរដ្ឋាភិបាលចាក់ជូនពលរដ្ឋនោះលោកនឹងស្ម័គ្រចិត្តចាក់វ៉ាក់សាំងនេះដោយរីករាយ។
ចំណែកបុគ្គលិកមា្នក់នៃក្រុមហ៊ុនម៉ូតូកង់បី PassApp ឈ្មោះ អាត សុភ័ណ្ឌ និយាយថា លោកមិនបានដឹងអំពីគម្រោងចាក់វ៉ាក់សាំងនេះទេ ប៉ុន្តែលោកនឹងជំរុញឱ្យអ្នករត់ម៉ូតូកង់បីទៅទទួលចាក់វ៉ាក់សាំងនេះ។
លោកបាននិយាយថា៖ «បើសិនគាត់ [រដ្ឋាភិបាល] ផ្ដល់វ៉ាក់សាំង ខាងខ្ញុំក៏ទៅតាមនោះដែរ យើងសម្របសម្រួលទៅតាមនោះដែរ។ យើងជំរុញគាត់ឱ្យគាត់ចាក់ ព្រោះវាជួយកុំឱ្យគាត់ឆ្លងជំងឺ ហើយគាត់មិនមានការភិតភ័យច្រើនលើបញ្ហាជំងឺនេះទៀត»៕
វីដេអូ៖
