ប៉ៃលិនៈ មន្ត្រីនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តប៉ៃលិនបានឲ្យដឹងថា ករណីប្រធានមន្ទីរសុរិយោដីខេត្តដឹកនាំមន្ត្រីក្រោមឱវាទប្រមាណ ៤០ នាក់ ទៅស្បថសច្ចាចំពោះមុខលោកយាយយ៉ាត គឺពាក់ព័ន្ធនឹងការបាត់សន្លឹកបណ្ណមិនទាន់បានប្រើប្រាស់ចំនួន ២១ សន្លឹក ដែលមិនមែនជាការបាត់ប្លង់ដីរបស់ពលរដ្ឋនោះទេ។
កាលពីព្រឹកថ្ងៃទី ៨ ខែ មិថុនា ឆ្នាំ ២០២០ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តប៉ៃលិនបានដឹកនាំមន្ត្រីទៅស្បថចំពោះមុខរូបសំណាកលោកយាយយ៉ាតនៅភូមិវត្ត សង្កាត់ប៉ៃលិន ក្រុងប៉ៃលិន ដើម្បីបង្ហាញពីភាពស្អាតស្អំទៅតាមជំនឿ បន្ទាប់ពីសន្លឹកបណ្ណថ្មី ២១ សន្លឹក បានបាត់មិនដឹងមូលហេតុ និងមិនមានមន្ត្រីណាម្នាក់ដឹងថា បាត់ទៅណា។
លោក សួន លក្សស្មី អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តនេះបានប្រាប់ភ្នំពេញប៉ុស្តិ៍ពីម្សិលមិញថា ព័ត៌មានពាក់ព័ន្ធនឹងមន្ទីររៀបចំដែនដីធ្វើឲ្យបាត់ប្លង់ដីរបស់ពលរដ្ឋជាង ២០ ប្លង់នោះគឺមិនពិតនោះទេ។ លោកបន្តថា តាមពិតការបាត់នេះគឺគ្រាន់តែជាសន្លឹកបណ្ណដែលមិនទាន់បានប្រើប្រាស់ ឬបញ្ចូលនិយាមការម្ចាស់អចលនទ្រព្យ ហើយជាសន្លឹកបណ្ណថ្មីដែលត្រូវរក្សាទុកនៅមន្ទីរតែប៉ុណ្ណោះ។
លោកបញ្ជាក់ថា៖ «បាត់សន្លឹកថ្មីមិនទាន់បានប្រើប្រាស់អីណា សន្លឹកបណ្ណនេះ សម្រាប់ធ្វើប្លង់នៅពេលបញ្ចូលទិន្នន័យទៅ ទៅជាបណ្ណកាន់កាប់អចលនទ្រព្យ ឬប្លង់ហ្នឹងហើយ។ បណ្ណដែលបាត់នេះមិនមែនជារបស់ពលរដ្ឋណាទេ»។
លោក សួន លក្សស្មី បានបន្តថា ការបាត់សន្លឹកបណ្ណនេះគឺមិនប៉ះពាល់ដល់ពលរដ្ឋណាម្នាក់ទេ គ្រាន់តែជាការបាត់មិនដឹងមូលហេតុដែលនាំឲ្យមានមន្ទិលសង្ស័យចំពោះមន្ត្រីបម្រើការងារក្នុងអង្គភាពទាំងមូលជាហេតុតម្រូវឲ្យអ្នកជាប់ពាក់ព័ន្ធ ចូលមកស្បថតាមជំនឿស្របជាមួយនឹងការស៊ើបអង្កេតពីមន្ត្រីជំនាញក្នុងករណីនេះផងដែរ។
លោក ផូ សង្ហា ប្រធានការិយាល័យសុរិយោដី និងភូមិសាស្ត្រនៃមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តប៉ៃលិនបានប្រាប់ភ្នំពេញប៉ុស្តិ៍ពីម្សិលមិញដែរថា សន្លឹកបណ្ណទាំង ២១ សន្លឹកនេះតាមការសង្ស័យអាចបាត់តាំងពីចុងឆ្នាំ ២០១៩ មកម្ល៉េះ។ លោកបន្តថា មន្ត្រីជំនាញនៃក្រសួងរៀបចំដែនដី និងមន្ទីរកំពុងបន្តស្រាវជ្រាវ តែសន្លឹកបណ្ណទាំងនេះនឹងមិនអាចយកទៅប្រើប្រាស់បាននោះទេ ។
លោកបញ្ជាក់ថា៖ «បើអ្នកណាយកបណ្ណដែលបាត់នេះទៅប្រើប្រាស់នឹងទទួលទោសទណ្ឌតាមច្បាប់ពាក់ព័ន្ធនឹងការក្លែងលិខិតឯកសាររបស់មន្ត្រីរាជការសាធារណៈ ហើយនៅពេលយកមកប្រើគឺដឹងតែខុសច្បាប់ហើយព្រោះមន្ត្រីយើងគ្រប់ខេត្ត ក្រុងបានដឹងអស់ហើយ តាមរយៈលេខកូដរបស់បណ្ណដែលមិនមានក្នុងទិន្នន័យ»។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ មិនអាចសុំការបញ្ជាក់បានទេកាលពីម្សិលមិញ ដោយសារលោកបានចុចផ្តាច់ទូរស័ព្ទ។
ប៉ុន្តែលោក ផូ សង្ហា បានអះអាងថា ការបាត់សន្លឹកប័ណ្ណនេះ មន្ត្រីជំនាញបានធ្វើរបាយការណ៍ទៅរដ្ឋមន្ត្រីក្រសួងរួចហើយ ដើម្បីស្វែងរកការទទួលខុសត្រូវចំពោះមុខច្បាប់របស់មន្ត្រីទទួលបន្ទុក តែក្នុងដំណាក់កាលស៊ើបអង្កេតមិនទាន់មានការដាក់ពិន័យ ឬទោសរដ្ឋបាលណាមួយទេ។
លោក យិន ម៉េងលី មន្ត្រីសម្របសម្រួលសមាគមអាដហុកប្រចាំខេត្តបាត់ដំបង និងប៉ៃលិនបានប្រាប់ភ្នំពេញប៉ុស្តិ៍ម្សិលមិញថា ករណីបាត់សន្លឹកបណ្ណ និងការស្បថស្បែបែបនេះ គឺជាករណីទី ១ ហើយ ខណៈតាមច្បាប់ មន្ត្រីគ្រប់រូបធ្លាប់ឆ្លងកាត់ការស្បថសច្ចាប្រណិធានរួចជាស្រេច មុនពួកគេចូលកាន់តំណែងជាមន្ត្រីរាជការ។
លោកបន្តថា ការធ្វេសប្រហែសនេះមិនមែនជារឿងគ្រាន់តែស្បថស្បែហើយចប់រឿងទេ តែត្រូវស៊ើបអង្កេតរកអ្នកទទួលខុសត្រូវ ព្រោះនេះជាការធ្វេសប្រហែសរបស់មន្ត្រីរាជការសាធារណៈ។
លោកថា៖ «ប្រសិនបើជនណាហ៊ានយកឯកសារដែលបានបាត់នេះទៅប្រើប្រាស់ ហើយត្រូវបានស្រាវជ្រាវរកឃើញនោះគឺជាបទល្មើសព្រហ្មទណ្ឌហើយ។ តែយើងមិនដឹងស៊ីជម្រៅលើជំនាញនេះទេថា ឯកសារដែលបានបាត់បង់នេះគេអាចយកទៅធ្វើអ្វីបានខ្លះក្នុងផ្លូវងងឹតតាមរបៀបណាខ្លះ?ឯកសារដែលបានបាត់ ខ្ញុំជឿថា បើគ្មានតម្លៃទេគេមិនខិតខំប្រឹងប្រែងលួចយកទៅដែរគឺគេអាចយកទៅប្រើក្នុងផ្លូវងងឹតណាមួយដែលយើងមិនអាចយល់ដល់នៅក្នុងជំនាញនេះ»។
លោក យិន ម៉េងលី ជំរុញឲ្យមន្ត្រីថ្នាក់ជាតិស្រាវជ្រាវរកជនដែលពាក់ព័ន្ធករណីនេះ យកមកផ្តន្ទាទោសតាមច្បាប់ ខណៈលោកសង្ស័យថា ការបាត់សន្លឹកបណ្ណនេះអាចជាប់ពាក់ព័ន្ធនឹងមន្ត្រីទទួលខុសត្រូវទុកដាក់សន្លឹកបណ្ណទាំងនេះ៕
វីដេអូ៖