ភ្នំពេញៈ មន្ត្រីក្រសួងបរិស្ថានបានលើកឡើងថា គំនិតផ្ដួចផ្ដើមហិរញ្ញប្បទានជីវចម្រុះ (BIOFIN) នឹងជួយបំពេញការខ្វះខាតចំណាយដើម្បីគ្រប់គ្រងធនធានធម្មជាតិនៅកម្ពុជាខណៈបច្ចុប្បន្នការចំណាយមានទំហំធំជាងថវិកាដែលមាន។
លោក ទិន ពន្លក អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាពថ្លែងថា បច្ចុប្បន្នកម្ពុជាមានផ្ទៃដីតំបន់ការពារធម្មជាតិ និងអភិរក្សជីវចម្រុះប្រមាណ ៤១% នៃផ្ទៃដីសរុបដែលអាចទាញចំណូលនាពេលអនាគតតាមរយៈបង្កើនព្រៃស្ដុកកាបូន និងការបង្កើតយន្តការនិរន្តរភាពហិរញ្ញវត្ថុសម្រាប់ជាតិ ប៉ុន្តែលោកថា កន្លងមកការចំណាយថវិកា នៅខ្វះខាត។
លោកថា៖ «ជាធម្មតាការចំណាយលើការគ្រប់គ្រងធនធានធម្មជាតិតែងមានចំនួនច្រើនជាងធនធានដែលមាន ដូច្នេះការអនុវត្តយន្តការ (BIOFIN) នឹងអាចរកវិធីសាស្ដ្របំពេញកង្វះខាតថវិកា និងផែនការអនុវត្តឲ្យមានប្រសិទ្ធភាពក្នុងការគ្រប់គ្រងធនធានធម្មជាតិ។
ប៉ុន្តែលោកមិនបានបញ្ជាក់ពីចំនួនថវិកាដែលខ្វះនោះទេ។ លោក ទិន ពន្លក លើកឡើងបែបនេះក្នុងសិក្ខាសាលាបើកដំណើរការអនុវត្ត និងពិគ្រោះយោបល់នៃគម្រោងគំនិតផ្ដួចផ្ដើមហិរញ្ញប្បទានជីវចម្រុះ កាលពីថ្ងៃទី ២០ ខែ មិថុនា ដើម្បីផ្សព្វផ្សាយអំពីគម្រោង BIOFIN ដល់អ្នកទទួលផលនិងអ្នកពាក់ព័ន្ធនានា។
កម្ពុជាបានចូលរួមក្នុងគំនិតផ្ដួចផ្ដើមហិរញ្ញប្បទានជីវចម្រុះកាលពីឆ្នាំ ២០១៨ ដើម្បីអនុវត្តវិធីសាស្ដ្រហិរញ្ញវត្ថុថ្មីសម្រាប់ការអភិរក្ស និងការគ្រប់គ្រងជីវចម្រុះប្រកបដោយចីរភាព។
យោងតាមហ្វេសប៊ុកក្រសួងបរិស្ថានថា គំនិតផ្ដួចផ្ដើមនេះគឺជាការឆ្លើយតបនឹងតម្រូវការបន្ទាន់របស់ពិភពលោក។
កម្ពុជាទទួលបានការគាំទ្រហិរញ្ញប្បទានពីកម្មវិធីអភិវឌ្ឍន៍សហប្រជាជាតិ (UNDP) ពីឆ្នាំ ២០១៨ ដល់ឆ្នាំ ២០២២។ លោកស្រី Jessica Alvsilver តំណាង UNDP បានថ្លែងឲ្យដឹងថា គំនិតរួមនៃគម្រោងនេះគឺស្វែងរកដំណោះស្រាយដោយប្រើប្រាស់សេដ្ឋកិច្ច និងហិរញ្ញវត្ថុដើម្បីសម្រេចនូវគោលដៅអភិវឌ្ឍន៍ជីវចម្រុះ និងការអភិវឌ្ឍនៅកម្ពុជា។
លោកស្រី Jessica Alvsilver បានថ្លែងទៀតថា៖ «យើងពិតជាត្រូវការការគាំទ្រពីភាគីពាក់ព័ន្ធដើម្បីចូលរួមអភិរក្សជីវចម្រុះ។ ការចូលរួមនេះមិនមែនសម្រាប់ធម្មជាតិនោះទេ ប៉ុន្តែសម្រាប់មនុស្ស សេដ្ឋកិច្ច និងរាជរដ្ឋាភិបាលទាំងអស់។យើងអាចនិយាយម្យ៉ាងទៀតថា វាសម្រាប់ប្រជាជនកម្ពុជាទាំងមូល៕