.jpg)
លោក សម រង្ស៊ី អតីតប្រធានអតីតបក្សសង្គ្រោះជាតិ។ ហេង ជីវ័ន
ភ្នំពេញៈ មន្ត្រីជាន់ខ្ពស់រដ្ឋាភិបាលបានព្រមានថា អតីតប្រធានគណបក្សសង្គ្រោះជាតិលោក សម រង្ស៊ី កាន់តែផុងជ្រៅទៅៗនៅក្នុងអំពើដែលខ្លួនបាននិងកំពុងប្រព្រឹត្តហើយត្រូវតែប្រឈមនឹងច្បាប់មិនអាចដោះរួច ដែលនេះជាប្រតិកម្មតបនឹងការអំពាវនាវរបស់លោក រង្ស៊ី ឲ្យប្រជាពលរដ្ឋ និងកងកម្លាំងប្រដាប់អាវុធងើបឈរប្រឆាំងនឹងរដ្ឋាភិបាលក្រោយការបោះឆ្នោត។
លោក ខៀវ សុភ័គ អ្នកនាំពាក្យក្រសួងមហាផ្ទៃក៏បានថ្លែងចំអកទៅលោក សម រង្ស៊ី វិញថាកងកម្លាំងប្រដាប់អាវុធទាំងមូលកំពុងចង់បានខ្លួន សម រង្សី មកក្បែរហើយថាលោក រង្ស៊ី កុំរត់ចោលកងកម្លាំងអ៊ីចឹងទៀត។ លោកថា លោក សម រង្ស៊ី និយាយនៅក្រៅប្រទេសដើម្បីធ្វើឲ្យតែឮហើយគ្មាននរណាគាំទ្រគាត់ទេ។
លោក សុភ័គ បញ្ជាក់ថា៖ «ទណ្ឌិត សម រង្ស៊ី បាននិងកំពុងផុងខ្លួនកាន់តែជ្រៅទៅក្នុងសំណាញ់ច្បាប់កម្ពុជា ហើយខ្ញុំគិតថាទោសគាត់កាន់តែធ្ងន់ទៅៗបន្ថែមទាំងការប្រមាថព្រះមហាក្សត្រមួយករណីទៅទៀតកាន់តែធ្ងន់ធ្ងរ ៤-៥ ឆ្នាំទៀត។ វាកាន់តែច្រើនឡើងហើយ ដោះមិនរួចទេ»។
បន្ថែមពីនេះមន្ត្រីនាំពាក្យគណបក្សប្រជាជនកម្ពុជាដែលជាបក្សកាន់អំណាចរបស់លោកនាយករដ្ឋមន្ត្រី ហ៊ុន សែន នោះគឺលោក សុខ ឥសាន ក៏បានឆ្លើយតបថាការអំពាវនាវរបស់លោក សម រង្ស៊ី មិនមានឥទ្ធិពលអ្វីទៅលើប្រជារាស្ត្រ និងកងកម្លាំងប្រដាប់អាវុធទេ។ លោកថានេះគ្រាន់តែជាការធ្វើការវិនិច្ឆ័យមុនរបស់លោក រង្ស៊ី មុនការបោះឆ្នោតមកដល់។
លោក ឥសាន ថ្លែងថា៖ «មិនទាន់បោះឆ្នោតផងហេតុអ្វីបានជាអន្តរជាតិមិនទទួលស្គាល់។ ប្រជាជនមិនទាន់សម្តែងឆន្ទៈផងមកនិយាយមុនទៅហើយ ដូច្នេះនេះវាជាបុរេវិនិច្ឆ័យរបស់ទណ្ឌិត សម រង្ស៊ី។ វាមិនពិតទេការនិយាយនេះគ្មានប្រជាជន ឬកងទ័ពណាទៅឈឺក្បាលវិលមុខនឹងជនរត់ចោលស្រុក និងគ្មានប្រជាជនណាមួយទៅយកទុក្ខទោសដាក់ខ្លួនប្រឆាំងជាមួយនឹងរាជរដ្ឋាភិបាលរបស់ខ្លួនឯងនោះទេ»។
ថ្លែងក្នុងកិច្ចសម្ភាសន៍ជាមួយវិទ្យុអាស៊ីសេរីកាលពីសប្តាហ៍មុនលោក សម រង្ស៊ី អតីតប្រធានអតីតគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិដែលកំពុងនិរទេសខ្លួននៅក្រៅប្រទេសបានអំពាវនាវប្រជាពលរដ្ឋគ្រប់មជ្ឈដ្ឋានព្រមទាំងកងកម្លាំងប្រដាប់អាវុធត្រូវតែក្រោកឈរក្រោយការបោះឆ្នោតថ្ងៃទី ២៩ ខែកក្កដាឆ្នាំ ២០១៨ ប្រឆាំងនឹងការដឹកនាំរបស់លោកនាយករដ្ឋមន្ត្រី ហ៊ុន សែន ដែលមិនស្របច្បាប់ដោយសារបន្ទាប់ពីការបោះឆ្នោតខាងមុខនេះទៅរដ្ឋាភិបាលលោក ហ៊ុន សែន នឹងមិនមានការទទួលស្គាល់ និងគាំទ្រពីអន្តរជាតិដែលជារដ្ឋាភិបាលស្របច្បាប់នោះទេ ព្រោះជារដ្ឋាភិបាលដែលកើតឡើងពីការបោះឆ្នោតក្លែងក្លាយ និងលេងសើច។
លោក រង្ស៊ី ថ្លែងថា៖ «ពេលនោះអន្តរជាតិគេអត់ទំនាក់ទំនងជាមួយរដ្ឋាភិបាលលោក ហ៊ុន សែន ដូចសព្វថ្ងៃទេ។ ក្រោយពីថ្ងៃ ២៩ កក្កដានេះគឺសភាពការណ៍ថ្មីហើយពេលនោះខ្ញុំសូមអំពាវនាវក្នុងឋានៈខ្ញុំជាប្រធានចលនាសង្គ្រោះជាតិ ឲ្យប្រជារាស្ត្រខ្មែរងើបឡើងត្រូវតែងើបឡើងទាំងអស់គ្នាបងប្អូន។ ឃើញទេអ្វីៗជុំវិញយើងគេលក់ខ្ទេច លក់ខ្ទីគ្មានសល់អី្វទេ»។
លោកបន្តថា៖ «ខ្មែរវេទនាពេកចំណាកស្រុកទៅប្រទេសជិតខាងពេលទន្ទឹមគ្នានេះបរទេសទាំងយួនទាំងចិនចូលមកកាន់តែច្រើននៅស្រុកយើង។ នេះជាដំណាក់កាលចុងក្រោយយើងត្រូវតែងើបឈរទាំងអស់គ្នា»។
ការអំពាវនាវឲ្យប្រជាពលរដ្ឋងើបឈរប្រឆាំងនឹងរបបលោក ហ៊ុន សែន នេះគឺលោក សម រង្ស៊ី បញ្ជាក់ថាជាការប្រឆាំងតវ៉ាដោយនៅស្ងៀមមិនទៅបោះឆ្នោត ហើយមិនធ្វើអ្វីៗដែលរដ្ឋាភិបាលលោក ហ៊ុន សែន ចង់ឲ្យធ្វើ។ ជាមួយគ្នានេះលោកអំពាវនាវ មន្ត្រីរាជការ គ្រូបង្រៀន និស្សិត សិស្ស អាជីវករ កម្មករ ត្រូវធ្វើបាតុកម្ម កូដកម្ម ប្រឆាំងនឹងរដ្ឋាភិបាលដើម្បីបង្ហាញថាពួកគេចង់ឲ្យមានការផ្លាស់ប្តូរ។
លោកថ្លែងថា៖ «ហើយក្នុងឱកាសនោះក៏ខ្ញុំសូមអំពាវនាវទៅកងកម្លាំងប្រដាប់អាវុធ ជាពិសេសកូនទាហាន ពលទាហាន ថាបងប្អូនក្មួយៗនៅបម្រើពួកជនផ្តាច់ការដល់ណាទៀត។ ឧត្តមសេនីយ៍មួយក្តាប់តូចគេមានកប់ក្តោង គេយកដីប្រជារាស្ត្រ កាប់ព្រៃឈើយកទៅលក់ហើយគេប្រើពលទាហានកូនទាហានគ្រាន់តែយាមដីឲ្យគេ កាប់ឈើឲ្យគេ ដឹកឈើឲ្យគេ ការពារការជួញដូររបស់គេ។ គេក្លាយជាមហាសេដ្ឋី ហើយពលទាហានតូចតាចនៅតែក្រមួយជីវិត គ្រួសារយើងក្ររហេមរហាម។ កុំស្តាប់បញ្ជាពួកជនផ្តាច់ការទៀត ពលទាហានទាំងអស់ដែលមានអាវុធត្រូវតែការពារប្រជារាស្ត្រ។ កុំប្រើអាវុធមកបាញ់ប្រហារលើប្រជារាស្ត្រតាមបញ្ជាពួកជនផ្តាច់ការ»។
ដោយឡែកលោក យ៉ែម បុញ្ញឫទិ្ធ អតីតតំណាងរាស្ត្រនៃគណបក្សសង្គ្រោះជាតិដែលត្រូវបានរំលាយ ថ្លែងនៅក្នុងពិធីបុណ្យផ្កាកាលពីថ្ងៃទី ៩ មិថុនានៅសហរដ្ឋអាមេរិកថានៅពេលដែលបេះដូងស្មោះពិតជាមួយនឹងជាតិខ្មែរមែន ពេលនោះប្រាកដជាអាចជួយជាតិបាន។
លោក បុញ្ញឫទ្ធិ ថ្លែងថា៖ «សូមគិតឲ្យច្បាស់ និងប្រាកដដោយសារជាតិយើងជួបបញ្ហាដ៏ធ្ងន់ធ្ងរ និងបញ្ហាច្របូកច្របល់ និងប្រព័ន្ធព័ត៌មានផ្សព្វផ្សាយញុះញង់ លាបពណ៌ បំបែកបំបាក់ដើម្បីឲ្យខ្មែរ និងសង្គមជាតិខ្មែរបែកបាក់»។
លោកអះអាងថាការបោះឆ្នោតដែលគ្មានគូប្រកួតពិតប្រាកដមិនមែនជាការបោះឆ្នោតឆ្លុះបញ្ចាំងពីឆន្ទៈរបស់ពលរដ្ឋទេគឺជាការបោះឆ្នោតក្លែងក្លាយ ដូច្នេះពលរដ្ឋមានសិទ្ធិសម្រេចថាទៅឬមិនទៅបោះឆ្នោត។
លោកថា៖ «ការបោះឆ្នោតនេះអាចទទួលយកបានដែរឬទេនៅពេលដែលគេចាប់លោកប្រធានបក្សប្រឆាំងដាក់គុក គេរំលាយបក្សប្រឆាំងគេបិទប្រព័ន្ធផ្សព្វផ្សាយឯករាជ្យ ហើយគេបិទអង្គការនានាដែលធ្វើការដើម្បីសង្គម និងជាតិ»។
ប៉ុន្តែលោក សុខ ឥសាន បានលើកឡើងថាមិនមានការច្របូកច្របល់អ្វីនោះទេ ហើយប្រសិនបើវាច្របូកច្របល់ ឬហុយផ្សែងមានទម្លាក់គ្រាប់បែកផ្លោងចុះឡើង គឺអ្នកកាសែត មិនអាចទៅយកព័ត៌មានចុះផ្សាយបានដែរ។
លោកថា៖ «ដូច្នេះការនិយាយរបស់គាត់គឺវាគ្មានតម្លៃអីទេ ពីព្រោះវាមិនបានផ្សារភ្ជាប់ទៅនឹងសភាពការណ៍ពិតជាក់ស្តែងដែលកំពុងកើតមានឡើងនៅកម្ពុជា»។
លោកព្រមានថា៖ «អ្នកញុះញង់ អ្នកកៀរគរប្រជាពលរដ្ឋក៏ដូចជាអ្នកដែលអំពាវនាវមិនឲ្យប្រជាពលរដ្ឋទៅបោះឆ្នោតអាហ្នឹងហើយគឺជាការរំលោភសិទ្ធិប្រជាពលរដ្ឋដូច្នេះត្រូវមានទោស»៕
