ភ្នំពេញ៖ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានអះអាងថា ការងារចាក់វ៉ាក់សាំងគឺនៅតែដំណើរការធម្មតា រិតតែសម្រុកធ្វើថែមទៀត ដោយមិនមានការពន្យារពេល ឬផ្អាកនោះឡើយ ទោះជាមានការបិទ ឬបម្រាមមិនឱ្យចេញចូលពីខណ្ឌមួយទៅខណ្ឌមួយ ឬពីស្រុកមួយទៅស្រុកមួយក៏ដោយ។ យោងតាមការឲ្យដឹងតាមរយៈហ្វេសប៊ុករបស់លោក ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន។
លោកស្រីបានឲ្យដឹងថា អ្នកដែលត្រូវចាក់លើកទីពីរ ចាំបាច់ត្រូវតែមកចាក់តាមពេលវេលាដែលបានកំណត់រួចហើយ ដោយប្រើប្រាស់កាតចាក់វ៉ាក់សាំងបង្ហាញអាជ្ញាធរមូលដ្ឋាន ឬសមត្ថកិច្ច ដើម្បីបានមកចាក់វ៉ាក់សាំងលើកទីពីរជាចាំបាច់។ រីឯអ្នកដែលត្រូវចាក់លើកទីមួយ ជាភារកិច្ចរបស់អាជ្ញាធរមូលដ្ឋាន ឃុំ-សង្កាត់ ដែលត្រូវសម្របសម្រួលទទួលខុសត្រូវ ធ្វើយ៉ាងណាឱ្យក្រុមគោលដៅកំណត់រួចហើយនោះ ពួកគាត់បានទៅចាក់វ៉ាក់សាំងទៅតាមទីតាំងរៀងៗខ្លួន។
លោកស្រីឲ្យដឹងថា អ្នកដែលមិនត្រូវគោលដៅកំណត់របស់រាជរដ្ឋភិបាល មិនត្រូវអនុញ្ញាតឱ្យទៅចាក់នោះឡើយ ដោយរង់ចាំដល់វេនសឹមឱ្យទៅចាក់។
លោកស្រីថ្លែងថា៖ "ជនបរទេសដែលទទួលបានការអនុញ្ញាតឱ្យចាក់ហើយនោះ ខ្ញុំស្នើសុំក្រសួងការបរទេស ឬសាមីក្រសួង ដូចជាក្រសួងអប់រំ យុវជន និងកីឡា ដែលមានទីប្រឹក្សា ឬសាមីអង្គការដែលទទួលបានការណែនាំជាលិខិតពីក្រសួងការបរទេសរួចហើយនោះ ហើយដែលការស្នើសុំចាក់ទទួលបានការអនុញ្ញាតរួចហើយៗកំពុងតែដំណើរការចាក់នៅមជ្ឈមណ្ឌលគាំពារមាតា និងទារកជារៀងរាល់ថ្ងៃនេះ ធ្វើការបញ្ជាក់ជូនដោយមានលិខិតត្រឹមត្រូវជូនដល់អង្គការអន្តរជាតិ ឬសាមីទីប្រឹក្សាក្រសួង ដើម្បីអាចធ្វើដំណើរទៅចាក់វ៉ាក់សាំងបាន"។
ចំណែក "ជនបរទេស ដែលមានកាតចាក់វ៉ាក់សាំងលើកទីមួយរួចហើយនោះ ត្រូវប្រើកាតចាក់វ៉ាក់សាំងបង្ហាញសមត្ថកិច្ចថា ខ្លួនមានតម្រូវការទៅចាក់លើកទីពីរជាចាំបាច់ផងដែរ។ ខ្ញុំស្នើសុំឯកឧត្តម លោកជំទាវប្រធានអនុគណៈកម្មការចាក់វ៉ាក់សាំងកូវីដ ១៩ ក្នុងក្របខ័ណ្ឌក្រសួង ឬរាជធានី-ខេត្ត សុំមេត្តាចាត់ចែងឱ្យមានប្រសិទ្ធភាពខ្ពស់ដើម្បីចៀសវាងនូវការខកខានរបស់បុគ្គលក្នុងការទៅទទួលយកវ៉ាក់សាំងទាំងលើកទីមួយ និងលើកទីពីរនេះ"។
លោកស្រីបានឲ្យដឹងថា ប្រធាន និងអនុប្រធានលេខាធិការដ្ឋាន គ.វ.ក ១៩ ធ្វើការសម្របសម្រួលបន្តទៀតជាមួយផ្នែកពាក់ព័ន្ធលើកិច្ចការនេះ៕