.jpg)
សមត្ថកិច្ចបានជួយអន្តរាគមន៍ ករណីអគ្គិភ័យឆេះឃ្លាំងសម្ភាររោងចក្រនៅភូមិ ៣ ទំនប់រលក សង្កាត់លេខ ១ ក្រុងព្រះសីហនុ កាលពីថ្ងៃទី ១៩ ខែកញ្ញា។ រូបថត រដ្ឋបាលខេត្តព្រះសីហនុ
ព្រះសីហនុ/តាកែវៈ សមត្ថកិច្ចបានប៉ាន់ប្រមាណថា ករណីអគ្គិភ័យឆេះឃ្លាំងសម្ភាររោងចក្រ Lin’s Textile Co., Ltd នៅក្រុមទី៣៥ ភូមិ ៣ ទំនប់រលក សង្កាត់លេខ ១ ក្រុងព្រះសីហនុ កាលពីថ្ងៃទី ១៩ ខែកញ្ញា និងករណីឆេះផ្សារសំរោងយ៉ោងក្នុងខេត្តតាកែវ កាលពីថ្ងៃព្រហស្បតិ៍បានធ្វើឲ្យខូចខាតទ្រព្យសម្បតិ្តយ៉ាងច្រើន ក៏ប៉ុន្តអ្នកគ្រប់គ្រងមិនទាន់បូកសរុបនៅឡើយទេ។
លោក ប៊ួរ សុទ្ធី ស្នងការរងខេត្តព្រះសីហនុទទួលផែនអាវុធជាតិផ្ទុះ និងអគ្គិភ័យបានប្រាប់ភ្នំពេញប៉ុស្តិ៍កាលពីថ្ងៃទី ២០ កញ្ញា ថា តាមការពិនិត្យជាក់ស្ដែងនៅកន្លែងកើតហេតុមានសម្ភារ និងវត្ថុធាតុដើមរួមមានអំបោះ និងក្រណាត់រាប់ពាន់ដុំរួមទាំងសំណង់អគារនៃឃ្លាំងស្តុកសម្ភារទំហំ ២០ ម៉ែត្រ គុណ ៤៥ ម៉ែត្រ ត្រូវបានឆេះខូចខាតស្ទើរទាំងស្រុង។ ប៉ុន្តែគ្មានមនុស្សរងគ្រោះនៅក្នុងហេតុការណ៍នោះទេ។
លោកបានបន្តថា តាមការបំភ្លឺពីបុគ្គលិកសន្តិសុខដែលយាមនៅខាងមុខរោងចក្រ និងបុគ្គលិកជនជាតិចិនម្នាក់នៃក្រុមហ៊ុនរោងចក្រនេះសមត្ថកិច្ចជំនាញបានសន្និដ្ឋានក្នុងជំហានបឋមថា អគ្គិភ័យនេះអាចបង្កឡើងពី «ការផ្ទុះឆ្លងចរន្តអគ្គិសនី»។
លោកថា៖ «តាមការបំភ្លឺពីបុគ្គលិកសន្តិសុខ និងបុគ្គលិកជនជាតិចិនថា ដំបូងពួកគេបានធុំក្លិនឈ្ងៀម និងឃើញមានផ្សែងហុយចេញពីក្នុងឃ្លាំង។ តែពួកគេមិនអាចចូលទៅពិនិត្យបានព្រោះឃ្លាំងនោះត្រូវបានចាក់សោពីក្រៅ»។
ទោះជាយ៉ាងណា លោក Lin Yati នាយកគ្រប់គ្រងរោងចក្រ Lin’s Textile Co., Ltd បានប្រាប់ភ្នំពេញប៉ុស្តិ៍កាលពីថ្ងៃទី ២០ កញ្ញា ថា លោកពុំទាន់ឯកភាពលើការសន្និដ្ឋានដែលថា ករណីឆេះនេះបង្កឡើងដោយការឆ្លងចរន្តអគ្គិសនីទេដោយសារបណ្ដាញអគ្គិសនីនៅទីនោះបានបិទទាំងអស់ព្រោះជាពេលកម្មករឈប់សម្រាកភ្ជុំបិណ្ឌ។
លោកបញ្ជាក់ថា៖ «មកទល់ពេលនេះខ្ញុំនៅមិនទាន់ដឹងពីមូលហេតុនៃការឆេះនេះពិតប្រាកដនោះទេហើយក៏នៅមិនទាន់យល់ស្របតាមការសន្និដ្ឋានរបស់សមត្ថកិច្ចជំនាញដែរ ព្រោះយើងបានបិទភ្លើងនៅក្នុងរោងចក្រអស់ហើយ កម្មករមិនធ្វើការទេ ហេតុអ្វីក៏ត្រូវផ្ទុះឆ្លងចរន្តអគ្គិសនី យើងចង់ឲ្យមានការស្រាវជ្រាវបន្ថែមលើករណីនេះ»។
ចំពោះការខូចខាតវិញ លោក LinYati បានថ្លែងថានៅមិនទាន់បានសរុបទេ ដោយលោកបញ្ជាក់ថា៖ «ខ្ញុំនៅមិនទាន់ពិនិត្យបញ្ជីទំនិញអស់នៅឡើយទេមកទល់ពេលនេះ»។
ដោយឡែកនៅឯស្រុកបាទីខេត្តតាកែវឯណោះវិញ សមត្ថកិច្ចនគរបាលមូលដ្ឋានបានឲ្យដឹងថា មានតូបលក់ដូរចំនួន ២៣០ ក្នុងចំណោម ២៨២ តូប ក្នុងផ្សារសំរោងយ៉ោងរួមទាំងទំនិញក្នុងតូបទាំងនោះផងត្រូវបានឆេះអស់ទាំងស្រុងកាលពីល្ងាចថ្ងៃព្រហស្បតិ៍ដែលជាថ្ងៃចុងក្រោយនៃពិធីបុណ្យភ្ជុំបិណ្ឌ។
លោក យស ណាស៊ី អភិបាលរងខេត្តតាកែវ បានប្រាប់ភ្នំពេញប៉ុស្តិ៍ថា ករណីអគ្គិភ័យនៅផ្សារសំរោងយ៉ោងនោះ ត្រូវបានគេប៉ាន់ប្រមាណក្នុងជំហានបឋមថា មានការខាតបង់ប្រមាណ ៨ លានដុល្លារ ដោយទំនិញតូបលក់ដូរ និងទំនិញស្ទើរតែទាំងអស់ត្រូវបានឆេះខូចខាតទាំងស្រុង។
កញ្ញា ម៉ិច ម៉ារីកា ជាតារាសម្ដែងទើបលេចឈ្មោះដែលមានតូបលក់ដូរក្នុងផ្សារនេះត្រូវបានកាសែតក្នុងស្រុកដកស្រង់សម្ដីថាទំនិញក្នុងតូបនាងមានតម្លៃសរុបប្រមាណ ២ ម៉ឺនដុល្លារ ដែលបានពីកម្លាំងញើសឈាមរបស់នាង និងក្រុមគ្រួសារជាង ១០ ឆ្នាំមកនេះ ត្រូវបានឆេះក្លាយជាផេះផង់ក្នុងមួយប៉ព្រិចភ្នែក។
កញ្ញាបានថ្លែងថា៖ «ខ្ញុំពិតជាសោកស្តាយខ្លាំងបំផុតរហូតគេងមិនលក់ ២ យប់ហើយ ព្រោះតែអាល័យ និងសោកស្តាយតូបលក់កាបូប និងស្បែកជើងរបស់ខ្ញុំ»។ ក៏ប៉ុន្តែកញ្ញាថា ពេលនេះអាជ្ញាធរខេត្តតាកែវកំពុងជួយអន្តរាគមន៍ជួសជុលតូបឡើងវិញ៕
