ភ្នំពេញៈ មន្ត្រីរដ្ឋាភិបាលថ្លែងថា ការលើកពេលកិច្ចប្រជុំគណៈរដ្ឋមន្ត្រីដែលគ្រោងធ្វើនៅថ្ងៃសុក្រនេះគឺមិនមែនមកពីបញ្ហាសុខភាពរបស់លោកនាយករដ្ឋមន្ត្រី ហ៊ុន សែន នោះទេ ដោយសារមិនទាន់មានសេចក្តីព្រាងច្បាប់ ឬមិនទាន់មានរបៀបវារៈកិច្ចប្រជុំ ខណៈដែលលោក ហ៊ុន សែន ក៏ប្រកាសថា លោកជួបប្រជុំជាមួយមន្ត្រីមូលនិធិអន្តរជាតិសម្រាប់អភិវឌ្ឍន៍កសិកម្មនៅទីស្តីការគណៈរដ្ឋមន្ត្រីនៅថ្ងៃនេះ។
លោក ផៃ ស៊ីផាន អ្នកនាំពាក្យរាជរដ្ឋាភិបាលប្រាប់អ្នកកាសែតក្នុងសន្និសីទសារព័ត៌មានស្ដីពី “ព័ត៌មានក្លែងក្លាយ អន្ដរាយដល់សន្ដិសុខជាតិ” នៅទីស្ដីការគណៈរដ្ឋមន្រ្ដីពីម្សិលមិញថា ការអាក់ខានប្រជុំគណៈរដ្ឋមន្ត្រីនេះគឺដោយសារមិនទាន់មានសេចក្តីព្រាងច្បាប់ដែលត្រូវបញ្ជូនទៅកាន់រដ្ឋសភា ឬមិនទាន់មានរបៀបវារៈគ្រប់គ្រាន់។ លោកថា ការលើកពេលនេះក៏ពាក់ព័ន្ធនឹង គោលនយោបាយថ្មីរបស់លោក ហ៊ុន សែន ដែលតម្រូវឱ្យរដ្ឋមន្ត្រី និងមន្ត្រីជំនាញចុះមូលដ្ឋាន។
លោក ផៃ ស៊ីផាន ថ្លែងថា៖ «ឧទាហរណ៍ជាក់ស្តែង យើងឃើញឯកឧត្តម រដ្ឋមន្ត្រីក្រសួងសាធារណការ និងដឹកជញ្ជូន លោក [ស៊ុន ចាន់ថុល] បានចុះជិះកង់ទៅដល់មូលដ្ឋាននៃឯកទេសរបស់លោក។ ទៅមើល (ការ) វាយតម្លៃផ្លូវថ្នល់ ក៏ដូចជាឯកឧត្តមរដ្ឋមន្ត្រីក្រសួងកសិកម្ម លោក [វេង សាខុន] ក៏បានអញ្ជើញចុះវាយតម្លៃពីរឿងភាពរីងស្ងួត ហើយក៏ដូចជារដ្ឋមន្ត្រីមួយចំនួនកំពុងបំពេញភារកិច្ច»។
លោក ស៊ីផាន បន្ថែមថា ក្នុងគោលនយោបាយថ្មីអំពីការធ្វើវិមជ្ឈការ រដ្ឋមន្ត្រីរៀងៗខ្លួនមានភារកិច្ចបើកកិច្ចប្រជុំអន្តរក្រសួងក្នុងការរៀបចំសេចក្តីព្រាងច្បាប់ដើម្បីដាក់មកឱ្យគណៈរដ្ឋមន្ត្រីធ្វើការពិនិត្យមើល។
លោកអះអាងថា សុខភាពរបស់លោក ហ៊ុន សែន នៅប្រក្រតីជាធម្មតា មិនដូចអ្វីដែលជាការវាយតម្លៃអាក្រក់ពីមជ្ឈដ្ឋានខាងក្រៅនោះទេ។ លោកថា បានទាក់ទងទៅលោក ហ៊ុន សែន ផ្ទាល់ កាលពីថ្ងៃទី ២៤ កក្កដា។
លោក ផៃ ស៊ីផាន ថ្លែងថា៖ «គឺគ្មានរឿងអ្វីដែលមានការចម្លែកដូចការវាយតម្លៃរបស់អ្នកដទៃនោះទេ។ អ្នកវាយតម្លៃហាក់បីដូចយកចិត្តទុកដាក់ហ្នឹងវាហួសពីព្រំដែននៃការពិត។ សម្តេចអគ្គមហាសេនាបតីតេជោ ហ៊ុន សែន លោកនៅតែបំពេញភារកិច្ចរបស់លោកប្រក្រតី»។
លិខិតរបស់ទីស្តីការគណៈរដ្ឋមន្ត្រីដែលចុះហត្ថលេខាដោយលោក ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី កាលពីថ្ងៃទី ២៣ ខែ កក្កដា បានបញ្ជាក់ថា កិច្ចប្រជុំពេញអង្គគណៈរដ្ឋមន្ត្រីប្រចាំសប្តាហ៍ដែលគ្រោងធ្វើឡើងនៅថ្ងៃសុក្រទី ២៦ កក្កដា នេះ ត្រូវបានលើកទៅពេលក្រោយវិញ តែមិនបានបញ្ជាក់ពីមូលហេតុ និងពេលវេលានៃការលើកពេលប្រជុំនេះទេ។
ដូចគ្នានេះដែរ លោក ហ៊ុន សែន ក៏បានប្រកាសពីម្សិលមិញ នៅក្នុងហ្វេសប៊ុករបស់លោកថា សុខភាពរបស់លោកនៅរឹងមាំធម្មតា។ បន្ទាប់ពីវិលត្រឡប់មកពីកិច្ចប្រជុំត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្ម ឆ្នាំ ២០១៩ នៅអង្គការពាណិជ្ជកម្មពិភពលោក (WTO) នៅទីក្រុងហ្សឺណែវ ប្រទេសស្វ៊ីស កាលពីព្រឹកថ្ងៃទី ៦ ខែ កក្កដា លោក ហ៊ុន សែន នៅរសៀលថ្ងៃដដែលនោះដែរ បានគ្រេចស្មាខាងស្តាំ ខណៈដែលលោកហាត់ជិះកង់ប្រណាំងដើម្បីឈានទៅចុះឈ្មោះជាកីឡាករប្រណាំងកង់សម្រាប់មនុស្សចាស់។ ខណៈដែលលោកកំពុងជិះកង់ ពេលនោះកង់ក៏បានដួលទៅលើស្មៅដែលលោកអះអាងថា កង់ស្ទើរតែអស់ល្បឿន។
ដោយជួបបញ្ហាបែបនេះលោក ហ៊ុន សែន បានប្រកាសថា ដោយសារមានបញ្ហាគ្រេចស្មាខាងស្តាំ ហើយគ្រូពេទ្យតម្រូវឱ្យលោកទៅពិនិត្យ និងសម្រាកព្យាបាលនៅប្រទេសសិង្ហបុរី លោកក៏បានលុបចោលជំនួបទាំងថ្នាក់ជាតិ និងជំនួបជាមួយមន្ត្រីអន្តរជាតិ ដែលត្រូវជួបនៅសប្តាហ៍បន្ទាប់នោះ។
ក្រោយមក លោក ហ៊ុន សែន បានប្រកាសថា គ្រូពេទ្យបានដោះស្រាយដោយជោគជ័យនូវកន្លែងគ្រេចស្មាស្តាំរបស់លោក ហើយតម្រូវឱ្យលោកផ្អាកវាយកូនគោលមួយរយ:ពេល។
បន្ថែមពីនេះលោក ហ៊ុន សែន បានសរសេរថា៖ «ទន្ទឹមនឹងប្រជាជនច្រើនលើសលប់បន់ស្រន់ឱ្យខ្ញុំឆាប់ជាសះស្បើយ ក៏មានជនមួយក្តាប់តូចលួចចូលមក Comment ឬបង្ហោះតាម Facebook បន់ខ្ញុំឆាប់ស្លាប់ ឬបង្កើតព័ត៌មានក្លែងក្លាយអំពីស្ថានភាពជំងឺរបស់ខ្ញុំទៅវិញ។ ខ្ញុំសូមជូនយោបល់ទៅអ្នកទាំងនោះវិញថា ឈប់បាន ឈប់ទៅ ព្រោះការធ្វើនយោបាយរង់ចាំឱ្យខ្ញុំស្លាប់ដើម្បីដណ្តើមអំណាច សូមរង់ចាំជាតិក្រោយទៅចុះ ព្រោះយមរាជមិនត្រូវការជីវិតខ្ញុំទេក្នុងរយ:ពេលមិនតិចជាង ៤០ ឆ្នាំពេលខាងមុខ ព្រោះយមរាជត្រូវការឱ្យខ្ញុំនៅបន្តបម្រើប្រជាជន និងកម្ចាត់ពួកក្បត់ជាតិដើម្បីរក្សាសន្តិភាព និងការអភិវឌ្ឍបន្តទៅទៀត»។
ក្រោយវិលត្រឡប់ពីការព្យាបាលបញ្ហាគ្រេចស្មានៅសិង្ហបុរី លោក ហ៊ុន សែន បានដឹកនាំកិច្ចប្រជុំគណៈរដ្ឋមន្ត្រីកាលពីថ្ងៃទី ១២ ខែកក្កដា៕