ព្រះសីហនុៈ អ្នកនាំពាក្យរដ្ឋបាលសាលាខេត្ដព្រះសីហនុលោក ឃាង ភារម្យ បានអះអាងកាលពីថ្ងៃអង្គារថា ក្រុមហ៊ុនផ្ដល់សេវាដឹកជញ្ជូនថ្មីមួយដែលទើបសម្ពោធថ្មីៗនេះគឺជាការបើកដំណើរការត្រឹមត្រូវតាមច្បាប់ ខណៈក្រុមហ៊ុននេះមានការវិនិយោគរួមគ្នារវាងជនជាតិខ្មែរ និងចិន ប៉ុន្តែមន្ត្រីសង្គមស៊ីវិលបារម្ភពីការប៉ះពាល់ដល់ជនជាតិខ្មែរដែលមានរបរស្រដៀងគ្នានេះ ។
លោក ឃាង ភារម្យ បានថ្លែងថា៖ «គ្មានច្បាប់ណាហាមឃាត់មិនឲ្យពួកគាត់រកស៊ីទេ។ ពួកគាត់បើករបរនេះត្រឹមត្រូវតាមច្បាប់។ ជាក្រុមហ៊ុនដែលមានម្ចាស់ជាជនជាតិខ្មែរ និងចិនសហការគ្នាបង្កើតឡើង។ សេវាកម្មដឹកជញ្ជូនរបស់ពួកគាត់អាចធ្វើបានដូចខ្មែរដែរ។ ជនជាតិខ្មែរក៏គាត់ដឹក ជនជាតិចិនក៏ដឹក»។
លោកបានឲ្យដឹង ទោះបីជាក្រុមហ៊ុនផ្ដល់សេវាដឹកជញ្ជូននេះមានអ្នកបើកបររថយន្តជាជនជាតិចិនខ្លះក្ដី ប៉ុន្ដែពួកគេត្រូវមានការត្រួតពិនិត្យច្បាស់លាស់ពីសមត្ថកិច្ចកម្ពុជាជាមុនសិនទើបអនុញ្ញាតឲ្យប្រកបការងារបើកបររថយន្តតាក់ស៊ីនេះ។
កាលពីថ្ងៃទី ២៦ ខែតុលាកន្លងទៅ ក្រុមហ៊ុនឈ្មោះ ស៊ីន ភីងអាន ត្រេនស្ពតថេសិន ដែលវិនិយោគលើសេវាដឹកជញ្ជូនអ្នកដំណើរតាមរថយន្តតាក់ស៊ីម៉ែត្រថ្មីមួយនៅក្រុងព្រះសីហនុដែលមានម្ចាស់ជាជនជាតិចិនសហការជាមួយអ្នកវិនិយោគិនខ្មែរបានបើកសម្ពោធនៅសណ្ឋាគារព្រីសន៍ថាមហូរថល ជិតរង្វង់មូលតោ ២ ក្នុងសង្កាត់លេខ ៤ ក្រុងព្រះសីហនុដោយមានការចូលរួមពីអភិបាលរងខេត្តព្រះសីហនុ និងមន្ត្រីនគរបាលព្រមទាំងឧកញ៉ាៗច្រើនរូបផងដែរ។
លោក ហេង វណ្ណា សហស្ថាបនិកនៃក្រុមហ៊ុនដឹកជញ្ជូនមួយនេះបានថ្លែងប្រាប់អ្នកសារព័ត៌មាននៅថ្ងៃសម្ពោធនោះថា ក្រុមហ៊ុននេះបង្កើតឡើងដោយមានកិច្ចសហការជាមួយក្រុមហ៊ុនចិនក្នុងនោះលោកជាម្ចាស់ខ្មែរមានភាគហ៊ុន ៥១ ភាគរយ និងម្ចាស់ភាគហ៊ុនចិនមានភាគហ៊ុន ៤៩ ភាគរយ ។
លោកថ្លែងថា៖ «យើងមានសេវាកម្មដឹកទាំងជនជាតិខ្មែរ និងចិន។ សម្រាប់អ្នកបើកបរ យើងមានតៃកុងឡានជនជាតិខ្មែរ និងជនជាតិចិន ប៉ុន្ដែតៃកុងឡានយើងគឺមានបណ្ណបើកបរត្រឹមត្រូវ។ សេវាកម្មដឹកភ្ញៀវរបស់យើងគឺអាចយកពីភ្ញៀវគិតជាគីឡូម៉ែត្រដោយក្នុង ១ គីឡូម៉ែត្រ ចាប់ពី ៤ ០០០-៤ ៥០០ រៀល»។
លោក វណ្ណា បានអះអាងថា ក្រុមហ៊ុនលោកជាក្រុមហ៊ុនដំបូងដែលបើកសេវាកម្មដឹកជញ្ជូនភ្ញៀវនៅក្នុងខេត្ដព្រះសីហនុ។ ការបើកដំណើរការសេវាកម្មដំបូងនេះក្រុមហ៊ុនមានរថយន្តតាក់ស៊ីទំនើបដាក់ឲ្យដំណើរការចំនួន ៣០ គ្រឿងជាលើកដំបូងជាមួយបុគ្គលិកជនជាតិខ្មែរ-ចិន ចំនួន ១០០ នាក់។
លោក អ៊ី សុខា ស្នងការរងទទួលបន្ទុកសណ្តាប់ធ្នាប់ខេត្ដព្រះសីហនុបានថ្លែងក្នុងពេលបើកដំណើការក្រុមហ៊ុននេះដែរថា ក្រុមហ៊ុននេះមានច្បាប់ត្រឹមត្រូវ ហើយជនបរទេសក៏អាចបើកបរបានឲ្យតែមានបណ្ណបើកបរត្រឹមត្រូវ។
លោកថ្លែងថា៖ «បណ្ណបើកបរខ្ញុំពិនិត្យឃើញថា (បុគ្គលិកក្រុមហ៊ុន) ពិតជាមានពិតប្រាកដមែន។ ការបើកបរគេមិនដែលរើសអើងទេ ជនជាតិខ្មែរក៏ដោយ ជនជាតិបរទេសណាក៏ដោយឲ្យតែមានបណ្ណបើកបរ គឺបើកបរបាន។ សម្រាប់ជនបរទេសបណ្ណបើកបររបស់ពួកគាត់មានសុពលភាពរយៈពេល ១ ឆ្នាំ។ ដូច្នេះបើពួកគាត់មានឯកសារច្បាប់ត្រឹមត្រូវយើងអាចឲ្យពួកគាត់រកស៊ីបានធម្មតា»។
ទោះជាយ៉ាងណាក្ដីអ្នកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្សអាដហុកប្រចាំខេត្ដព្រះសីហនុបានលើកឡើងថា ថ្វីដ្បិតប្រទេសកម្ពុជាជាប្រទេសទីផ្សារសេរីដែលអាចឲ្យមានការប្រកួតប្រជែងក្នុងការប្រកបអាជីវកម្មក្ដី ប៉ុន្ដែការបើកឲ្យមានក្រុមហ៊ុនរថយន្ដដឹកជញ្ជូនអ្នកដំណើរក្នុងខេត្ដព្រះសីហនុនេះអាចនឹងប៉ះពាល់ដល់ប្រជាពលរដ្ឋដែលប្រកបរបរលើសេវាកម្មដឹកជញ្ជូននេះដែរដូចជាតាមរយៈម៉ូតូកង់ ៣ ម៉ូតូឌុប ដែលធ្លាប់ទទួលបានផលនាពេលកន្លងមក។
អ្នកស្រីបានបញ្ជាក់ថា៖ «ពលរដ្ឋយើងជីវភាពនៅមានកម្រិតមិនអាចទៅប្រកួតប្រជែងជាមួយក្រុមហ៊ុនដែលមានរថយន្ដទំនើបសម្រាប់បម្រើសេវាកម្មឲ្យភ្ញៀវនោះទេ។ ដូច្នេះចង់មិនចង់ពួកគាត់អាចនឹងបាត់បង់ប្រាក់ចំណូលដែលធ្លាប់ទទួលបានពីសេវាកម្មដឹកភ្ញៀវនាពេលកន្លងមក។ ជនជាតិចិនភាគច្រើនគឺគាត់ចង់បានភាពងាយស្រួល និងទាន់ពេលវេលាសម្រាប់បំពេញការងារពួកគាត់។ ដូច្នេះពួកគាត់នឹងប្រើប្រាស់សេវាកម្មរថយន្ដទំនើបវិញ»៕