.jpg)
ជនជាតិចិន ធ្វើដំណើរមកដល់ព្រលានយន្តហោះអន្តរជាតិខេត្ដព្រះសីហនុ កាលពីពេលថ្មីៗនេះ។ រូបថត សហការី
ព្រះសីហនុៈ វិនិយោគិន និងអ្នកធ្វើការងារផ្សេងៗជនជាតិចិនវិលត្រឡប់មកខេត្ដព្រះសីហនុវិញជាបន្តបន្ទាប់តាមជើងហោះហើរត្រង់ពីប្រទេសចិនដោយចាប់ពីថ្ងៃទី ២៣ ឧសភា ដល់ថ្ងៃទី ១៣ មិថុនា មានជនជាតិចិន ១ ០៦៦ នាក់ ក្នុងនោះមានស្រី ២២៩ នាក់ បានត្រឡប់មកខេត្ដនេះ។ នេះបើតាមមន្ត្រីសាលាខេត្ដព្រះសីហនុប្រាប់ពីម្សិលមិញ។
មន្ត្រីនាំពាក្យសាលាខេត្តព្រះសីហនុលោក ឃាង ភារម្យ ថ្លែងថាជនជាតិចិនដែលធ្វើដំណើរតាមជើងហោះហើរត្រង់ពីប្រទេសចិនមកកាន់ខេត្ដព្រះសីហនុនេះ បើរាប់ចាប់ពីថ្ងៃទី ២៣ ឧសភា ដល់ថ្ងៃទី ១៣ មិថុនា មានជនជាតិចិនចំនួន ១០៦៦ នាក់ក្នុងនោះមានស្រី ២២៩ នាក់។ ជនជាតិចិនដែលវិលត្រឡប់មកវិញនេះ ពួកគាត់ភាគច្រើនជាអ្នកធ្វើជំនួញ និងជាអ្នកធ្វើការងារផ្សេងៗ។
លោកថា ក្នុង ១ សប្ដាហ៍ មានជនជាតិចិនធ្វើដំណើរតាមជើងហោះហើរត្រង់ពីប្រទេសចិន មកកាន់ខេត្ដព្រះសីហនុមានចន្លោះពី ៣-៤ ជើងហោះហើរ។ ចំណាត់ការរបស់អាជ្ញាធរមានការត្រួតពិនិត្យសុខភាពរបស់ក្រុមជនជាតិចិន ដែលបានវិលមកកម្ពុជាវិញយ៉ាងយកចិត្ដទុកដាក់។ អាជ្ញាធរតម្រូវឲ្យធ្វើចត្ដាឡីស័កចំនួន ១៤ ថ្ងៃបន្ថែមទៀតចំពោះជនជាតិចិនដែលបានវិលត្រឡប់មកវិញនេះ។
មន្ត្រីនាំពាក្យរូបនេះថ្លែងថា៖ «បន្ទាប់ពីការធ្វើចត្តាឡីស័ករយៈពេល ១៤ ថ្ងៃនេះរួចហើយ យើងយកសំណាកពួកគាត់ទៅពិនិត្យម្ដងទៀត ដើម្បីឲ្យប្រាកដថា ពួកគាត់មិនមានផ្ទុកជំងឺកូវីដ១៩។ ដូច្នេះនៅពេលដែលយើងយកសំណាកទៅពិនិត្យ ២ លើករួចហើយ នៅតែមិនមានផ្ទុកជំងឺកូវីដ១៩ នោះយើងនឹងអនុញ្ញាតឲ្យពួកគាត់ប្រកបរបរទទួលទាន ឬធ្វើដំណើរទៅណាមកណាវិញបានដូចធម្មតា»។
លោក ឃាង ភារម្យ ឲ្យដឹងទៀតថា បច្ចុប្បន្នរដ្ឋបាលខេត្ដព្រះសីហនុកំពុងធ្វើបច្ចុប្បន្នភាពចំនួនជនជាតិចិនរស់នៅក្នុងខេត្ដព្រះសីហនុឡើងវិញ។ ប៉ុន្ដែបើតាមលោក គួច ចំរើន អភិបាលខេត្ដព្រះសីហនុប្រាប់ភ្នំពេញប៉ុស្ដិ៍ក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារបន្តរបស់រដ្ឋបាលខេត្តព្រះសីហនុនៅទីស្តីការគណៈរដ្ឋមន្ត្រីថ្ងៃទី ៩ មិថុនា ថាបច្ចុប្បន្នមានជនជាតិចិនប្រហែល ១៥ ០០០ នាក់ កំពុងស្នាក់នៅក្នុងខេត្ដនេះ។ លោកថា កាលពីមុនមានការរីករាលដាលជំងឺកូវីដ ១៩ មានជនជាតិចិនទាំងស្នាក់នៅ និងទេសចរជាង ២ លាននាក់។
លោកអភិបាលខេត្ដបញ្ជាក់ថា រដ្ឋបាលខេត្ដព្រះសីហនុកំពុងមានកិច្ចសហប្រតិបត្ដិការគ្រប់ជ្រុងជ្រោយជាមួយខេត្ដ-ក្រុងរបស់ចិនចំនួន ១៦ ដើម្បីជំរុញ និងលើកទឹកចិត្ដលើការវិនិយោគ ទេសចរណ៍ វប្បធម៌ អប់រំ និងកីឡាជាដើម។
បើតាមលោកអភិបាលខេត្ដ ខេត្តព្រះសីហនុ គឺជាខេត្តដែលមានវិស័យសេដ្ឋកិច្ចសំខាន់ៗរួមមាន វិស័យឧស្សាហកម្ម ពាណិជ្ជកម្ម ទេសចរណ៍ និងកសិកម្មដែលជាវិស័យអាទិភាពសម្រាប់ការអភិវឌ្ឍខឿនសេដ្ឋកិច្ចជាតិរបស់រាជរដ្ឋាភិបាល។ សក្តានុពលរួមមាន កំពង់ផែសមុទ្រទឹកជ្រៅ តំបន់សេដ្ឋកិច្ចពិសេសមានចំនួន ១០ ទីតាំង [៤ កំពុងដំណើរការ និង ៦ ត្រៀមដំណើការ] អាកាសយានដ្ឋានអន្តរជាតិខេត្តព្រះសីហនុ និងឆ្នេរសមុទ្រដ៏ស្រស់ស្អាតដែលត្រូវបានប្រសិទ្ធនាមជា «តារា រះនាទិសនិរតី»៕
