ភ្នំពេញៈ រដ្ឋមន្ត្រីក្រសួងកសិកម្ម លោក វេង សាខុន ថ្លែងថា ជំងឺប៉េស្តជ្រូក បង្កមហន្តរាយដល់ឧស្សាហកម្មជ្រូក និងធ្វើឲ្យសេដ្ឋកិច្ចខាតបង់ច្រើន ដោយលោកជំរុញដល់ម្ចាស់កសិដ្ឋានចិញ្ចឹមជ្រូកបង្កើនផលិតកម្មនៃការចិញ្ចឹមជ្រូក ប្រកបដោយអនាម័យ និងសុវត្ថិភាព ដើម្បីឆ្លើយតបតាមតម្រូវការរបស់អ្នកបរិភោគ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងសិក្ខាសាលាផ្សព្វផ្សាយស្តីពី «វិធានការការពារ និងទប់ស្កាត់ជំងឺប៉េស្តជ្រូកអា្រហ្វិកនៅកម្ពុជា» ដែលមានអ្នកចូលរួមប្រមាណ ៥០០ នាក់ ពីម្សិលមិញ នាក្រសួងកសិកម្ម បានលើក ឡើងថា នៅកម្ពុជា ការចិញ្ចឹមជ្រូកជាលក្ខណៈគ្រួសារ ក្នុងឆ្នាំ ២០១៨ មានប្រមាណជា ១,៩ លានក្បាល និងជាលក្ខណៈឧស្សាហកម្មប្រមាណជា ០,៨ លានក្បាល និងមានកសិដ្ឋានគ្រប់កម្រិតជាង ៦៧០ កសិដ្ឋាននៅទូទាំងប្រទេស។
ប៉ុន្តែដោយមានកំណើននៃការអភិវឌ្ឍគ្រប់វិស័យ និងលំហូរទេសចរណ៍ពីក្រៅប្រទេសកាន់តែច្រើនឡើង តម្រូវការសាច់ជ្រូកក៏មានការកើនឡើង ដែលទាមទារឲ្យមានការបង្កើនផលិតកម្មជ្រូកបន្ថែមទៀត ដើម្បីឆ្លើយតបតាមតម្រូវការកើនឡើងនេះ។
លោក សាខុន បានអំពាវនាវដល់អ្នកចិញ្ចឹមជ្រូក ម្ចាស់សត្តឃាតដ្ឋាន និងអាជីវករលក់សាច់ជ្រូក ឲ្យចូលរួមសហការ «រក្សាតម្លៃសាច់ជ្រូក ឲ្យនៅដដែល ដោយមិនត្រូវឆក់ឱកាសដំឡើងតម្លៃសាច់ជ្រូកជាដាច់ខាត»។
លោករដ្ឋមន្រ្តីក៏បានសង្ខេបពីប្រវត្តិនៃជំងឺប៉េស្តជ្រូកអាហ្រ្វិក ដល់អង្គសិក្ខាសាលានោះថា ជំងឺនេះបានផ្ទុះឡើងលើកដំបូងនៅឆ្នាំ ១៩០៧ នៅប្រទេស កេនយ៉ា ហើយវាបានផ្ទុះឡើងជាបន្តបន្ទាប់ ទៅតាមបណ្តាប្រទេសក្នុងទ្វីបអាហ្រ្វិក និងចុងក្រោយក្នុងឆ្នាំ ២០១៨ ជំងឺនេះបានផ្ទុះឡើងនៅបណ្តាប្រទេសក្នុងទ្វីបអឺរ៉ុប រួចបន្តរាលឆ្លងចូលក្នុងប្រទេស ចិន ហើយបច្ចុប្បន្នបាននិងកំពុងបន្តរាលដាលតាមបណ្តាខេត្តមួយចំនួននៅប៉ែកខាងជើង និងកណ្តាលនៃប្រទេស វៀតណាម។
លោកបន្ថែមថា៖ «ជំងឺនេះបានបង្កមហន្តរាយយ៉ាងធ្ងន់ធ្ងរដល់ឧស្សាហកម្មជ្រូក និងបានធ្វើឲ្យសេដ្ឋកិច្ចជាតិមានការខាតបង់យ៉ាងច្រើន»។
កាលពីថ្ងៃទី ២២ ខែ មីនា កន្លងទៅថ្មីៗនេះ ក្រុមសមត្ថកិច្ចចម្រុះ ខេត្តស្វាយរៀង បានបង្ក្រាបចាប់រថយន្តដឹកជ្រូកចំនួន ៣ គ្រឿង ដែលនាំចូលពីប្រទេស វៀតណាម ដោយខុសច្បាប់ សរុប ៨៩ ក្បាល ប៉ុន្តែ សំណាងល្អ ដែលជ្រូកទាំងនោះ មិនត្រូវបានគេរកឃើញថាមានផ្ទុក ជំងឺប៉េស្តជ្រូកអាហ្រ្វិក (ASF) ឬ ជំងឺត្រចៀកខៀវ (PRRS) នោះទេ។
លោកសែន ចាន់ធី ប្រធានការិយាល័យ ផលិតកម្ម និងបសុព្យាបាល នៃមន្ទីរកសិកម្ម ខេត្តស្វាយរៀងប្រាប់ភ្នំពេញប៉ុស្តិ៍ ម្សិលមិញថា៖ «ក្រោយពីបង្ក្រាបចាប់ឃាត់រថយន្តទាំង ៣ គ្រឿងនោះរួចហើយ មន្ត្រីជំនាញយើង បានធ្វើការបូមយកសំណាកឈាម ពីសត្វជ្រូកទាំងនោះ បញ្ជូនមកមន្ទីរពិសោធន៍នៅរាជធានី ភ្នំពេញ ដើម្បីពិនិត្យរកមេរោគ ASFV និង PRRSV ប៉ុន្តែជាលទ្ធផល សត្វជ្រូកទាំងនោះមិនមានផ្ទុកមេរោគ ឬជំងឺទាំងនេះឡើយ»៕