.jpg)
ពលរដ្ឋធ្វើប្រហុកនៅសង្កាត់ច្រាំងចំរេះ ខណ្ឌឫស្សីកែវ កាលពីថ្ងៃទី ១៩ ធ្នូ។ ហេង ជីវ័ន
ភ្នំពេញៈ រដូវត្រីធ្វើប្រហុកវគ្គដំបូងនឹងត្រូវបិទបញ្ចប់នៅថ្ងៃទី ២៩ ខែ ធ្នូ ឆ្នាំ ២០២០ នេះ ប៉ុន្តែប្រជាពលរដ្ឋដែលខកខានធ្វើប្រហុក ផ្អក និង ត្រីឆ្អើរ ក្នុងវគ្គដំបូងនេះ កុំទាន់អស់សង្ឃឹម ព្រោះមន្ត្រីជំនាញជលផលបានអះអាងថា នៅពាក់កណ្ដាលខែមករា ឆ្នាំ ២០២១ ខាងមុខនេះ ត្រីប្រហុកនឹងកើតមានជាថ្មីម្ដងទៀត។
លោក អ៊ុច វុត្ថា ប្រធាននាយកដ្ឋានកិច្ចការជលផលបានប្រាប់ ភ្នំពេញ ប៉ុស្តិ៍ នៅថ្ងៃអាទិត្យថា នៅសល់តែ ២ ថ្ងៃទៀតប៉ុណ្ណោះខែរនោចនឹងចូលមកដល់។ ក្នុងរយៈពេល ១៥ ថ្ងៃនៃខែរនោចនេះ ត្រីនឹងមិនបំផ្លាស់ទីចេញពីបឹងទន្លេសាប ចូលមកតាមដងទន្លេសាបនៃខ្សែទឹកខាងក្រោម ដើម្បីឆ្ពោះទៅកាន់ទន្លេមេគង្គនោះឡើយ។
លោកបានថ្លែងថា៖ «ជាទូទៅនៅក្នុងខែរនោចត្រីមិនត្រូវនោះទេ។ ប៉ុន្តែនៅថ្ងៃទី ៥-៦ ខ្នើត ខែមាឃខាងមុខនេះ ត្រីនឹងត្រូវច្រើនជាថ្មីម្ដងទៀត ដូច្នេះអ្នកដែលខកខានធ្វើប្រហុក ផ្អក និងត្រីឆ្អើរនៅក្នុងវគ្គដំបូងនេះ កុំទាន់អស់សង្ឃឹម»។
ទោះយ៉ាងណាប្រជាពលរដ្ឋដែលមកពីតំបន់ដាច់ស្រយាលមួយចំនួនក្នុងខេត្តកណ្ដាល កំពង់ស្ពឺ និងតាកែវ បានត្អូញត្អែរថា តម្លៃត្រីប្រហុកនៅក្នុងឆ្នាំនេះថ្លៃសម្រាប់ទីតាំងដាយត្រីក្នុងដងទន្លេសាបក្នុងភូមិសាស្ត្រខេត្តកណ្ដាល និងរាជធានីភ្នំពេញ គឺ ចន្លោះពី ៣ ៥០០ រៀល ដល់ ៥ ៥០០ រៀល ក្នុង ១ គីឡូក្រាមដែលតម្លៃនេះថ្លៃខ្ពស់ជាងឆ្នាំ ២០១៩ ទ្វេដង។
តម្លៃត្រីដ៏ខ្ពស់នេះបានធ្វើឱ្យប្រជាពលរដ្ឋមួយចំនួនសម្រេចចិត្តមិនទិញត្រីធ្វើប្រហុកក្នុងវគ្គដំបូងនោះទេ ដោយពួកគេខ្លះបានសម្រេចចិត្តត្រឡប់ទៅផ្ទះវិញដោយដៃទទេ ដើម្បីត្រៀមរកប្រាក់បន្ថែមសម្រាប់ការធ្វើត្រីប្រហុកនៅវគ្គបន្ទាប់ ដែលនឹងមកដល់នៅពាក់កណ្ដាលខែមករាឆ្នាំ ២០២១។
អ្នកស្រី អ៊ុក ចន្ធី អាយុ ៤៥ ឆ្នាំមកពីខេត្តកំពង់ស្ពឺបានប្រាប់ ភ្នំពេញ ប៉ុស្តិ៍ ថា អ្នកស្រី និងប្ដីរបស់គាត់បានសម្រេចចិត្ត មិនទិញត្រីធ្វើប្រហុកទេ នៅក្នុងវគ្គដំបូងនេះ ដោយសារតែតម្លៃត្រីថ្លៃពេក គឺក្នុង ១ គីឡូក្រាមថ្លៃពី ៣ ៥០០ រៀល ទៅ ៥ ៥០០ រៀល។
អ្នកស្រីនិយាយថា៖ «យើងបានត្រៀមលុយ ៥០ ម៉ឺនរៀល ដើម្បីមកធ្វើប្រហុកនាដើមរដូវកាលនេះ ប៉ុន្តែតម្លៃត្រីវាខ្ពស់ពេក។ ដូច្នេះមានតែត្រឡប់ទៅ ផ្ទះវិញ ដើម្បីរង់ចាំដល់ខ្នើតថ្មី ដែលនឹងមកដល់នាពាក់កណ្ដាល ខែមករា ឆ្នាំ ២០២១ នេះវិញ»។
ជុំវិញករណីនេះ ម្ចាស់អាជីវកម្មដាយត្រីក្នុងដងទន្លេសាប ដែលមានទីតាំងស្ថិតក្នុងសង្កាត់ច្រាំងចំរេះ ១ ខណ្ឌឫស្សីកែវ រាជធានីភ្នំពេញ គឺលោក គីម នាង អាយុ ៥២ ឆ្នាំបានប្រាប់ភ្នំពេញប៉ុស្តិ៍នៅថ្ងៃអាទិត្យថា តម្លៃត្រីថោក ឬថ្លៃអាស្រ័យទៅលើត្រីចាប់បានតិច ឬច្រើន។
«កាលពីថ្ងៃទី ២០-២៣ ខែធ្នូ ឆ្នាំ ២០២០ ខ្ញុំចាប់ត្រីបានជាមធ្យម ៣,៥ តោន ក្នុងរយៈពេល ២៤ ម៉ោង»។ នេះជាការលើកឡើងរបស់លោក គីម នាង។ លោកបាននិយាយថា ក្នុងអំឡុងពេលនោះតម្លៃត្រីដែលគាត់លក់ចេញគឺក្នុងតម្លៃត្រឹមតែ ៣ ០០០ រៀល ទៅ ៣ ៥០០ រៀល ក្នុង ១ គីឡូក្រាម។
លោកបានបន្ថែមថា៖ «ប៉ុន្តែឥឡូវនេះ ខ្ញុំចាប់បានត្រឹមតែ ៨០០ គីឡូក្រាមប៉ុណ្ណោះក្នុង ១ ថ្ងៃ ១ យប់ ដូច្នេះតម្លៃលក់ក៏ឡើងថ្លៃខ្ពស់ទៅតាមហ្នឹងដែរ»។
ជាមួយគ្នានេះលោកបានត្អូញត្អែរផងដែរថា ក្នុងរយៈពេលប៉ុន្មានឆ្នាំចុងក្រោយនេះ មុខរបរអាជីវកម្មដាយត្រីរបស់គាត់រកមិនឃើញប្រាក់ចំណេញនោះទេ ដោយសារតែចាប់ត្រីមិនបានច្រើនដូចកាលពីអំឡុងទសវត្សរ៍ឆ្នាំ ២០០០។ លោកអះអាងថា ក្នុងរដូវប្រមូលផលត្រីប្រហុកមកដល់ នៅគន្លងដាយត្រីរបស់គាត់ ធ្លាប់ចាប់បានក្នុងចន្លោះពី ៥ តោនដល់ ៨ តោនក្នុងរយៈពេល ២៤ ម៉ោង។
ទោះយ៉ាងណាក៏ដោយ លោក គីម នាង នៅតែមានសុទិដ្ឋិនិយមទៅលើមុខរបរអាជីវកម្មដាយត្រីនេះ ព្រោះបើតាមម្ចាស់អាជីវកម្មរូបនេះ ការងារនេះជាមុខរបរតពីឪពុកម្ដាយរបស់លោក អស់រយៈពេលជាង ៣០ ឆ្នាំមកហើយ។
ម្យ៉ាងទៀតនោះ បើតាមលោក គីម នាង ការថយចុះនូវទិន្នផលត្រីទឹកសាបក្នុងធម្មជាតិពី ១ ឆ្នាំទៅ ១ ឆ្នាំ គឺបណ្ដាលមកពីការប្រែប្រួលអាកាសធាតុ ដែលធ្វើឱ្យមានការផ្លាស់ប្ដូររបបទឹកទន្លេមេគង្គ និងជាពិសេសគឺការកើតមានបទល្មើសនេសាទខុសច្បាប់។ ក្នុងនោះ ការប្រើប្រាស់ឧបករណ៍នេសាទខុសច្បាប់ដែលរួមមាន មងកន្ទុយកណ្តុរ ឬមងប្រើស ១០០ លូស្បៃមុង និងមងបណ្ដែត ដែលមានភ្ជាប់ដុំឆក់ត្រជាក់ជាដើម៕
