បាត់ដំបងៈ ក្រុមឧទ្យានុរក្សនៃមន្ទីរបរិស្ថានខេត្តបាត់ដំបងបានបើកយុទ្ធនាការចុះល្បាតព្រៃ ដើម្បីទប់ស្កាត់ និងបង្ក្រាបបទល្មើសសត្វព្រៃដែលបទល្មើសនេះបានកំពុងកើតមានអំឡុងពេលប៉ុន្មានថ្ងៃចុងក្រោយនេះ ស្របពេលដែលពលករខែ្មរដែលបានចេញទៅធ្វើការនៅប្រទេសថៃនាំគ្នាសម្រុកចូលមកកម្ពុជាវិញតាមច្រករបៀងតាមព្រំដែន ក្រោយពីមានការរីករាលដាលឆ្លងជំងឺកូវីដ១៩។
លោក កត់ បូរ៉ាន់ ប្រធានមន្ទីរបរិស្ថានខេត្តបាត់ដំបងបានប្រាប់ភ្នំពេញប៉ុស្តិ៍នៅថ្ងៃអង្គារថា ក្រោយពីមានកំណើនពលករ ចំណាកស្រុកពីប្រទេសថៃបានធ្វើឲ្យបទល្មើសសត្វព្រៃកើតមានគួរឲ្យកត់សម្គាល់នាប៉ុន្មានថ្ងៃចុងក្រោយនេះ ពិសេសនៅក្នុងតំបន់ប្រើប្រាស់ច្រើនយ៉ាងសំឡូត និងតំបន់រ៉ាមសារព្រែកទាល់។
លោក បូរ៉ាន់ បានឲ្យដឹងថា៖ «តាមរយៈយុទ្ធនាការចុះល្បាតព្រៃទាំងក្នុងតំបន់ដែនជម្រកសត្វព្រៃភ្នំសំកុស តំបន់ប្រើប្រាស់ច្រើនយ៉ាងសំឡូត និង តំបន់រ៉ាមសារព្រែកទាល់ក្នុងរយៈពេល ៤ ថ្ងៃមកនេះ (ពីថ្ងៃ ២៨-៣១ ខែមីនា ឆ្នាំ២០២០) មន្ត្រីឧទ្យានុរក្សរបស់យើងបានធ្វើការបង្ក្រាបចាប់ជនប្រព្រឹត្តបទល្មើសសត្វព្រៃចំនួន ៣ នាក់ និងរឹបអូសវត្ថុតាងមួយចំនួនបញ្ជូនទៅឲ្យតុលាការខេត្ត ហើយតុលាការខេត្តក៏បានសម្រេចឃុំខ្លួនពួកគេជាបណ្ដោះអាសន្នផងដែរ ដោយចោទប្រកាន់ពីបទល្មើសធនធានធម្មជាតិថ្នាក់ទី ៣ តាមបញ្ញត្តិមាត្រា ៥៦ និង ៦១ នៃច្បាប់ស្ដីពីតំបន់ការពារធម្មជាតិ»។
យោងតាមបញ្ញតិ្តមាត្រា ៥៦ និង ៦១ នៃច្បាប់ស្ដីពីតំបន់ការពារធម្មជាតិ ជនសង្ស័យទាំងនោះនឹងត្រូវប្រឈមការផ្តន្ទាទោសជាប់ពន្ធនាគារពី ១ ឆ្នាំទៅ ៥ ឆ្នាំ ឬ ទោសពិន័យជាប្រាក់ពី ១៥ លានទៅ ៥០ លានរៀល។
លោក បូរ៉ា បានឲ្យដឹងថាកាលពីថ្ងៃទី ២៩ ខែមីនា ឆ្នាំ ២០២០ មន្ត្រីឧទ្យានុរក្សនៃតំបន់ប្រើប្រាស់ច្រើនយ៉ាងសំឡូតបានសហការជាមួយកម្លាំងមន្ត្រីយោធាស្រុកប្រតិបត្តិចុះល្បាតនៅចំណុចភូមិសាស្ត្រស្រែសាម៉ ហើយបានប្រទះឃើញជនសង្ស័យ ៤ នាក់ក្នុងនោះមានម្នាក់ស្ពាយការុងពណ៌ស។
ប៉ុន្តែនៅពេលក្រុមល្បាតបានហៅឲ្យពួកគេឈប់ដើម្បីធ្វើការត្រួតពិនិត្យជនសង្ស័យទាំងនោះបានទម្លាក់ការុងចោលរួចរត់គេចខ្លួនចូលទៅព្រៃ។ បន្ទាប់មកក្រុមល្បាតបានត្រួតពិនិត្យមើលក្នុងការុងនោះ ឃើញមានសត្វស្វាឈ្មោលងាប់ ១ ក្បាល ទម្ងន់ ១០ គីឡូក្រាម និងកូនអណ្តើកចំនួន ០២ ក្បាល។ សត្វស្វាឈ្មោលដែលងាប់នោះត្រូវបានមន្ត្រីឧទ្យានុរក្សដុតកម្ទេចចោលនៅនឹងកន្លែងកើតហេតុ ចំណែកកូនសត្វអណ្ដើក ២ ក្បាលដែលនៅរស់នោះ ត្រូវបាននាំយកទៅលែងនៅក្នុងស្ទឹងមុខស្នាក់ការបរឡាងស្ថិតក្នុងភូមិ-ឃុំសំឡូត ស្រុកសំឡូត ខេត្តបាត់ដំបង។
លោក បូរ៉ា បានឲ្យដឹងទៀតថានៅយប់ថ្ងៃទី ២៨ ខែ មីនា ឆ្នាំ ២០២០ លោកបានដឹកនាំកម្លាំងមន្ត្រីឧទ្យានុរក្សពីថ្នាក់ខេត្តទៅចូលរួមជាមួយកម្លាំងមន្ត្រីឧទ្យានុរក្សតំបន់រ៉ាមសារព្រែកទាល់ និងកម្លាំងពីប្រជាសហគមន៍ក្នុងតំបន់នោះសរុបចំនួន ១៦ នាក់ ចុះល្បាតទប់ស្កាត់បទល្មើសនៅត្រង់ចំណុចរាន ៤៩ ហើយបានប្រទះឃើញ និងបង្ក្រាបចាប់ក្រុមជនប្រព្រឹត្តបទល្មើសចាប់កូនសត្វបាន ៣ នាក់ ក្នុងចំណោមគ្នា ៨ នាក់ ដោយរឹបអូសវត្ថុតាងសត្វស្លាបទឹក ប្រភេទសត្វរនាលពណ៍សរុបចំនួន ៦ ការុងស្មើនឹង ៣៨ ក្បាល។
លោក បូរ៉ាន់ បានបន្ថែមថា កាលពីថ្ងៃទី ២២ ខែមីនាកន្លងទៅនេះកម្លាំងមន្ត្រីឧទ្យានុរក្សក្នុងតំបន់រ៉ាមសារព្រែកទាល់បានបង្ក្រាបចាប់ជនប្រព្រឹត្តបទល្មើសសត្វព្រៃចំនួន ៨ នាក់រួមទាំងវត្ថុតាងសត្វស្លាបទឹកប្រភេទសត្វរនាលពណ៍ សរុបចំនួន ៨ ការុងស្មើនឹង ១២៣ ក្បាល (ងាប់ទាំងអស់) បញ្ជូនទៅតុលាការ ដើម្បីចាត់វិធានការបន្តតាមផ្លូវច្បាប់។
លោក បូរ៉ាន់ បានបញ្ជាក់ទៀតថា៖ «បើតាមការកត់សម្គាល់របស់ខ្ញុំ ចាប់តាំងពីប្រជាពលរដ្ឋដែលបានចំណាកស្រុកទៅធ្វើការនៅក្នុងប្រទេសថៃ ត្រឡប់មកកម្ពុជាវិញ ពិសេសអ្នកដែលចូលមកតាមច្រករបៀងគឺពួកគេបានដើរកាត់តាមព្រៃ ហើយលួចបន្លំប្រព្រឹត្តបទល្មើសសត្វព្រៃ។ នេះជាមូលហេតុដែលមន្ត្រីឧទ្យានុរក្សយើងចាំបាច់ត្រូវពង្រឹងការអនុវត្តច្បាប់ ដោយបង្កើនការចុះល្បាតព្រៃ ដើម្បីទប់ស្កាត់បទល្មើសសត្វព្រៃ និងព្រៃឈើនេះ»។
តាមរបាយការណ៍របស់រដ្ឋបាលខេត្តបាត់ដំបងដែលភ្នំពេញប៉ុស្តិ៍ទទួលបានកាលពីម្សិលមិញ ជនចំណាកស្រុកទៅធ្វើការនៅក្នុងប្រទេសថៃដែលបារម្ភពីឆ្លងជំងឺកូវីដ១៩ ហើយបាននាំគ្នាសម្រុកវិលត្រឡប់ចូលមកកម្ពុជាវិញតាមច្រកនានាជាប់ព្រំប្រទល់ខេត្តបាត់ដំបង គិតត្រឹមថ្ងៃទី ៣១ ខែមីនា ឆ្នាំ ២០២០ មានចំនួនជិត ១០ ០០០ នាក់ ដែលជនចំណាកស្រុកទាំងនោះភាគច្រើនជាអ្នកមានលំនៅក្នុងខេត្តបាត់ដំបង និងខ្លះទៀតមានលំនៅក្នុងខេត្តស្វាយរៀង ព្រៃវែង កំពង់ចាម និងខេត្តត្បូងឃ្មុំ៕