កំពង់ឆ្នាំងៈ មន្ត្រីអគ្គនាយកដ្ឋានសុខភាពសត្វ និងផលិតកម្មសត្វបានអះអាងកាលពីថ្ងៃអាទិត្យថា សត្វគោ ក្របី ១៩២ ក្បាល ដែលត្រូវបានឃាត់ពេលកំពុងដឹកតាមរថយន្តធុនធំ ៤ គ្រឿង ក្នុងខេត្តកំពង់ឆ្នាំងនោះមិនមានបញ្ហាសុខភាពនោះទេ ខណៈម្ចាស់ក្រុមហ៊ុនដែលដឹកជញ្ជូនសត្វទាំងទើបបានចូលខ្លួនមកបង់ពិន័យអន្តរកាលពាក់ព័ន្ធករណីដឹកលើសការស្នើសុំ។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានប្រាប់ភ្នំពេញប៉ុស្តិ៍ថា កាលពីយប់ថ្ងៃទី ១ ខែឧសភា កម្លាំងរបស់លោកបានសហការជាមួយកម្លាំងការិយាល័យផលិតកម្មសត្វ និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានឃាត់រថយន្តដឹកសត្វគោក្របី ៤ គ្រឿងក្នុងនោះ ៣ គ្រឿងដឹកចេញពីថៃ ឆ្ពោះទៅកាន់ប្រទេសវៀតណាម និង ១ គ្រឿងទៀតដឹកចេញពីខេត្តបាត់ដំបងឆ្ពោះទៅខេត្តតាកែវ។
លោកបានបញ្ជាក់ថា៖ «ក្រោយការត្រួតពិនិត្យផ្ទៀងផ្ទាត់លិខិតស្នាមផ្សេងៗ សមត្ថកិច្ចយើងបានរកឃើញនូវភាពមិនប្រក្រតីមួយចំនួនរួមមាន កង្វះលិខិតបញ្ជាក់អំពីសុខភាពសត្វពីដើមទី និងដឹកជញ្ជូនសត្វគោ ក្របី លើសពីចំនួនដែលត្រូវបានស្នើសុំការអនុញ្ញាតពីស្ថាប័នជំនាញ»។
លោកបានបន្ថែមថា រថយន្តមួយស្នើសុំដឹកតែ ១០ ក្បាល តែដឹករហូតដល់ ៣៨ ក្បាល រីឯរថយន្តមួយទៀតសុំដឹក ២០ ក្បាល តែដឹករហូតដល់ ៥៤ ក្បាល។ ចំណែករថយន្ត ២ គ្រឿងទៀត សុំដឹក ៣០ ក្បាល តែមួយដឹករហូតដល់ ៤៨ ក្បាល និងមួយទៀតដឹកដល់ ៥២ ក្បាល។ ការប្រព្រឹត្តផ្ទុយពីលិខិតស្នើសុំនេះជាអំពើល្មើសច្បាប់ ដែលម្ចាស់អាជីវកម្មដឹកជញ្ជូនគោក្របីនីមួយៗត្រូវបង់ប្រាក់ផាកពិន័យពី ១០ លានរៀលដល់ ១៥ លានរៀល ក្នុងរថយន្ត ១ គ្រឿង។
លោកបានថ្លែងថា៖ «សំណាងហើយដែលក្រោយពីមន្ត្រីជំនាញយើងបានបូមឈាមពីសត្វគោក្របីទាំងនោះ ទៅពិសោធរកមិនឃើញមានមេរោគ ឬជំងឺឆ្លង បើពុំនោះវានឹងបង្កការរាតត្បាតដល់សត្វគោក្របីនៅក្នុងស្រុករបស់យើងថែមទៀត»។
បើតាមលោក ផាន់ ណារ៉ា ទាំងរថយន្ត និងគោក្របីទាំងនោះកំពុងត្រូវបានឃាត់ទុកបណ្ដោះអាសន្ននៅការិយាល័យសុខភាពសត្វ និងផលិតកម្មសត្វខេត្តកំពង់ឆ្នាំងដើម្បីរង់ចាំម្ចាស់អាជីវកម្មចូលខ្លួនមកដោះស្រាយ និងបង់ប្រាក់ផាកពិន័យទៅតាមផ្លូវច្បាប់។
ជុំវិញករណីនេះភ្នំពេញប៉ុស្តិ៍មិនអាចស្វែងប្រភពដើម្បីទាក់ទងម្ចាស់អាជីវកម្មសុំការបំភ្លឺបានទេ ខណៈសមត្ថកិច្ចអះអាងថា រថយន្តដឹកគោក្របីទាំង ៤ គ្រឿងនោះជាកម្មសិទ្ធិរបស់ក្រុមហ៊ុនអង្គរសុខសែនជ័យដែលមានម្ចាស់ឈ្មោះ ជឹម សុខ។
យ៉ាងណាក៏ដោយលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងផលិតកម្មបានបញ្ជាក់ប្រាប់ភ្នំពេញប៉ុស្តិ៍កាលពីម្សិលមិញថាករណីនេះ តំណាងក្រុមហ៊ុនអង្គរសុខសែនជ័យបានចូលខ្លួនមកបង់ប្រាក់ផាកពិន័យទៅតាមផ្លូវច្បាប់រួចហើយ បន្ទាប់ពីសន្យាក្រោយពេលសមត្ថកិច្ចឃាត់រថយន្តទាំងនោះ៕