ភ្នំពេញៈ អ្នកនាំពាក្យក្រសួងមហាផ្ទៃលោក ខៀវ សុភ័គ បានអះអាងកាលពីម្សិលមិញថាសមត្ថកិច្ចនឹងស៊ើបអង្កេតករណីក្លែងលិខិតរបស់សមាជិកគណបក្សប្រជាជនខេត្តបាត់ដំបងដែលបានអំពាវឲ្យដកលោក ហ៊ុន សែន ពីប្រធានគណបក្ស និងពីនាយករដ្ឋមន្ត្រី ខណៈរដ្ឋមន្ត្រីក្រសួងមហាផ្ទៃចាត់ទុកលិខិតនោះថា មានចេតនាបំបែកបំបាក់ផ្ទៃក្នុងគណបក្សប្រជាជនកម្ពុជា។
ការលើកឡើងរបស់ថ្នាក់ដឹកនាំក្រសួងមហាផ្ទៃនេះបានកើតឡើងបន្ទាប់ពីមានលិខិតមានបន្លំត្រាគណបក្សប្រជាជនចុះផ្សាយកាលពីថ្ងៃទី ១៣ ខែវិច្ឆិកាឆ្នាំនេះ ទាក់ទងនឹងការដកប្រព័ន្ធអនុគ្រោះពន្ធ EBA របស់សហគមន៍អឺរ៉ុបដែលថា នាំឲ្យកម្ពុជាខាតបង់ចំណូលជាតិនូវទឹកប្រាក់ជាង ២ ពាន់លានដុល្លារក្នុង ១ ឆ្នាំ។ លិខិតដដែលក៏បានអំពាវនាវដល់សមាជិកគណៈអចិន្រៃ្តយ៍គណបក្សប្រជាជនកម្ពុជាបោះឆ្នោតដកសេចក្តីទុកចិត្តពីលោក ហ៊ុនសែន ផងដែរដើម្បីផលប្រយោជន៍ប្រទេសជាតិ។
យ៉ាងណាក្ដីជាការឆ្លើយតបនឹងលិខិតខាងលើនេះលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានលើកឡើងកាលពីទី ១៥ ខែវិច្ឆិកាដោយលោកបានចាត់ទុកលិខិតខាងលើថាជាទង្វើរបស់គណបក្សប្រឆាំងដើម្បីបំបែកបំបាក់ផ្ទៃក្នុងគណបក្សប្រជាជន។
លោកបានបញ្ជាក់ថា៖ «យើងជំទាស់ហើយមកពីមជ្ឈដ្ឋានប្រឆាំងហើយ ហើយខ្ញុំព្រះកុរណាខ្ញុំបានចាត់ចែងឲ្យគ ៨៥ ហើយ គណបក្សនៅបាត់ដំបងធ្វើការបដិសេធរួចហើយ។ គឺថាបំណងមិនល្អរបស់អ្នកប្រឆាំងក្នុងន័យបំបែកបំបាក់ផ្ទៃក្នុងរបស់គណបក្សប្រជាជនដែលយើងប្រឆាំងដាច់ខាត ហើយមិនអាចទទួលយកបានទេ»។
ទន្ទឹមនឹងនេះកាលពីថ្ងៃ ១៥ វិច្ឆិកាដដែលនោះ គណៈកម្មាធិការគណបក្សប្រជាជនខេត្តបាត់ដំបងក៏បានចេញសេចក្ដីប្រកាសបដិសេធផងដែរដោយបានចាត់ទុកលិខិតខាងលើថាក្លែងក្លាយដែលធ្វើឡើងដោយក្រុមពួកអគតិក្នុងបំណងបំភាន់មតិជាតិអន្ដរជាតិ និងសាធារណជនឲ្យមានការយល់ច្រឡំ និងបំបែកបំបាក់សាមគ្គីភាពឯកភាពផ្ទៃក្នុងរបស់ថ្នាក់ដឹកនាំគណបក្សប្រជាជនគ្រប់លំដាប់ថ្នាក់។
សេចក្តីប្រកាសនោះបញ្ជាក់ថា៖ «សូមស្នើសុំអាជ្ញាធរមានសមត្ថកិច្ចធ្វើការស្រាវជ្រាវតាមចាប់ខ្លួនជនប្រព្រឹត្តបទល្មើសយកមកផ្តន្ទាទោសតាមច្បាប់ជាធរមានចំពោះសកម្មភាពខ្មៅកខ្វក់ប្រកបដោយឧបាយកលញុះញង់បែបថ្មីដ៏ពិសពុលដែលមិនអាចទទួលយកបានជាដាច់ខាត...»។
ដោយឡែកលោក ខៀវ សុភ័គ អ្នកនាំពាក្យក្រសួងមហាផ្ទៃកាលពីម្សិលមិញបានបង្ហាញការហួសចិត្តចំពោះការចេញលិខិតក្លែងក្លាយនេះ ប៉ុន្តែលោកថា សមត្ថកិច្ចនឹងស៊ើបអង្កេតរកបុគ្គលមុខសញ្ញាដែលបានបង្កើតលិខិតញុះញង់បំបែកបំបាក់ផ្ទៃក្នុងគណបក្សប្រជាជននោះដើម្បីយកមកផ្តន្ទាទោសតាមច្បាប់។
លោកបានបញ្ជាក់ថា៖ «គួរឲ្យអស់សំណើចណាស់ចំពោះអ្នកដែលបានធ្វើ។...វាពូកែជ្រើសរើសខេត្តដែលដឹកនាំដោយសម្តេចក្រឡាហោម ខេត្តដទៃទៀត វាមិនយកទេ។
ការពិតហើយវាជាលិខិតក្លែងក្លាយសុទ្ធសាធ។ គ្រាន់តែចេញមកគេដឹងបាត់ហើយ និងគ្មានគេចាប់អារម្មណ៍ទេ។ លិខិតនេះមានបំណងដើម្បីបំបែកបំបាក់ផ្ទៃក្នុងរបស់គណបក្សប្រជាជន ហើយការព្យាយាមបំបែកបំបាក់បែបនេះមានតាំងពីឆ្នាំ ១៩៧៩។ មិនយូរមិនឆាប់យើងគង់តែរកឃើញ។ យើងស៊ើបអង្កេតរកអ្នកដែលបានប្រព្រឹត្តយកមកផ្តន្ទាទោស»។
លោក ឯម សុវណ្ណារ៉ា អ្នកវិភាគនយោបាយមិនអាចទាក់ទងសុំការអត្ថាធិប្បាយពីករណីខាងលើបានទេកាលពីម្សិលមិញ៕