.jpg)
សិស្សម្នាក់ជិះម៉ូតូឆ្លងកាត់មុខវិទ្យាល័យ ជា ស៊ីម សន្ធរម៉ុក នាពេលកន្លងមក។ ហុង មិនា
ភ្នំពេញៈ មន្ត្រីបានលើកឡើងថា សាលារៀនដែលមានស្ដង់ដាសុវត្ថិភាពខ្ពស់នឹងត្រូវបើកទ្វារឡើងវិញនៅក្នុងខែសីហា ខណៈសាលារៀនដែលមានស្ដង់ដាសុវត្ថិភាពមធ្យម និងស្ដង់ដាអប្បបរមានឹងត្រូវអនុញ្ញាតឱ្យបើកទ្វារជាបន្តបន្ទាប់ទៀត។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងកាលពីថ្ងៃម្សិលមិញថា ក្រសួងនឹងស្នើសុំការសម្រេចពីលោកនាយករដ្ឋមន្ត្រី ហ៊ុន សែន ដើម្បីអនុញ្ញាតឱ្យសាលារៀនស្ដង់ដាសុវត្ថិភាពខ្ពស់មួយចំនួនតូច បើកដំណើរការសាកល្បងនៅអំឡុងខែក្រោយនេះ ប៉ុន្តែសាលាទាំងនោះត្រូវតែអនុវត្តវិធានការចាំបាច់មួយចំនួន ដើម្បីបង្ការជំងឺឆ្លងកូវីដ១៩។
លោកថាយោងតាមស្មារតីនៃកិច្ចប្រជុំអន្តរក្រសួង ក្រសួងអប់រំនឹងស្នើសុំការសម្រេចពីប្រមុខរាជរដ្ឋាភិបាលនូវវិធានការចាំបាច់សម្រាប់ការបើកដំណើរការសាលារៀនដំណាក់កាលទី ១។
លោកបន្តថា៖ «គ្រឹះស្ថានសិក្សាត្រូវចុះកិច្ចសន្យាទទួលខុសត្រូវលើការអនុវត្តវិធានការសុវត្ថិភាព សុខភាពសិស្ស គឺការអនុវត្តលក្ខខណ្ឌតម្រូវនៃការលើកកម្ពស់សុខភាពសិក្សាក្នុងបរិបទកូវីដ ១៩ ការរៀបចំបរិស្ថានសាលារៀន និងថ្នាក់រៀនឲ្យស្របតាមស្តង់ដាសុវត្ថិភាពសុខភាពសិក្សាការរក្សាគម្លាតសុវត្ថិភាព ការវាស់កម្តៅបុគ្គលជាប្រចាំ និងការលាងដៃជាប្រចាំ ការពាក់ម៉ាស់ជាដើម»។
លោកបន្តទៀតថា គ្រឹះស្ថានសិក្សាគឺត្រូវអនុវត្តការអប់រំតាមគន្លងថ្មី គឺរៀនក្នុងថ្នាក់ខ្លះ និងរៀនអនឡាញខ្លះ តាមគោលការណ៍ស្ម័គ្រចិត្ត និងការយល់ព្រមពីមាតាបិតា និងត្រូវរៀបចំក្រុមការងារទទួលបន្ទុកសុវត្ថិភាពសុខភាពសិក្សាដើម្បីត្រួតពិនិត្យជាប្រចាំក្រោមការដឹកនាំរបស់ប្រធានគ្រឹះស្ថានសិក្សា និងម្ចាស់ភាគហ៊ុន។
ជាមួយគ្នានេះគ្រឹះស្ថានសិក្សាក៏ត្រូវធ្វើតេស្តពិនិត្យសុខភាពរកជំងឺកូវីដ១៩ លើបុគ្គលិកអប់រំ និងសិស្សានុសិស្ស និងត្រូវអនុវត្តវិធានការតម្រូវនានាមួយចំនួនដែលក្រសួងនឹងចុះត្រួតពិនិត្យវាយតម្លៃយ៉ាងម៉ឺងម៉ាត់លើការអនុវត្តរបស់គ្រឹះស្ថានសិក្សាទាំងនេះ។ ទោះយ៉ាងណាលោក រស់ សុវាចា ពុំបានបញ្ជាក់ពីចំនួនសាលា និងថ្ងៃកំណត់ពិតប្រាកដនៃការបើកសាលារៀនក្នុងដំណាក់កាលទី ១ នេះទេ។
ក្រសួងអប់រំបានប្រកាសអនុញ្ញាតរួចហើយឱ្យគ្រឹះស្ថានឧត្តមសិក្សារដ្ឋអាចរៀបចំប្រឡងបញ្ចប់ឆ្នាំរយៈពេល ២ ថ្ងៃនៅតាមសាលា ហើយគ្រឹះស្ថានសិក្សាឯកជនក៏អាចរៀបចំការប្រឡងឌីប្លូម បាក់ឌុប និងការប្រឡងបញ្ចប់ឆ្នាំនៅតាមសាលារៀនរៀងៗខ្លួនបានដែរ។
លោក ពឹង គិមឆេន នាយកសាលាបឋមសិក្សាវត្តបូព៌នៅខេត្តសៀមរាប ដែលជាសាលារៀនមួយត្រូវបានក្រសួងអប់រំទទួលស្គាល់ថា ជាសាលាគំរូក្នុងការបណ្ដុះបណ្ដាលសិស្សមានសីលធម៌ សុជីវធម៌ វិន័យ និងមានអនាម័យខុសប្លែកពីសាលាដទៃទៀតបានថ្លែងពីម្សិលមិញថា លោកបានត្រៀមវិធានការបង្ការជំងឺកូវីដ ១៩ មួយចំនួនរួចរាល់ហើយ ដើម្បីអនុវត្តក្នុងករណីក្រសួងអនុញ្ញាតឱ្យបើកសាលាវិញ។
លោកបញ្ជាក់ថា៖ «វិធានការរបស់ខ្ញុំគឺទី ១ យើងត្រូវរៀបចំបន្ទប់រៀននីមួយៗ ឱ្យមានគម្លាតសុវត្ថិភាពទី ២ បែងចែកពេលវេលារៀនជា ២ វេនសម្រាប់សិស្សជា ២ ក្រុមឧទាហរណ៍ថា ថ្នាក់មានសិស្ស ៥០ នាក់យើងត្រូវបែងចែក ១ ក្រុម ២៥ នាក់ ហើយយើងអប់រំគាត់ឱ្យចេះប្រើប្រាស់របស់ណាដែលជារបស់ខ្លួន កុំឱ្យប៉ះពាល់របស់រួមនៅក្នុងថ្នាក់រៀន»។
លោកបន្ថែមថា៖«ចំពោះនៅខាងក្រៅថ្នាក់រៀនវិញ គឺយើងបានរៀបចំ និងប្រយ័ត្នប្រយែងតាំងពីមុនចូលបរិវេណសាលារៀនទី ១ គឺយើងត្រូវវាស់កម្ដៅសិនគ្រប់សិស្សទាំងអស់ទី ២ ត្រូវឱ្យពួកគេលាងដៃជាមួយសាប៊ូ និងអាល់កុលដែលមានស្រេច ហើយទី ៣ យើងមានក្រុមការងារប្រចាំការដើម្បីណែនាំឱ្យពួកគាត់ (សិស្ស) កុំឱ្យដើរប្រកៀកប្រកើយគ្នា»។
ចំណែកលោក ច័ន្ទ សុផល នាយកមជ្ឈមណ្ឌលសិក្សាគោលនយោបាយបានសរសេរបង្ហោះនៅលើហ្វេសប៊ុករបស់លោកកាលពីថ្ងៃទី ៧ ខែកក្កដា ដែលបានលើកឡើងពីជម្រើសដែលរដ្ឋាភិបាលគួរ ឬមិនគួរធ្វើក្នុងការបើកសាលារៀនឡើងវិញ នៅពេលសាលារៀនត្រូវបើកឲ្យសិស្សចូលរៀនសម្រាប់ឆ្នាំសិក្សាថ្មីនាពេលខាងមុខ។
លោកបានលើកឡើងថាការបិទសាលារៀនយូរទំនងមានទំហំខាតបង់សង្គមដែលពិបាកវាស់បាន ព្រោះសិស្សរាប់លាននាក់អាចប្ដូរឥរិយាបថទៅជាមិនល្អ ដោយសារទម្លាប់លេងហ្គេមជ្រុលសម្រាប់សិស្សមានស្មាតហ្វូន ឬកុំព្យូទ័រ និងមានទម្លាប់ដើរលេងជ្រុល សម្រាប់សិស្សក្រីក្រមិនមានឧបករណ៍ទាំងនេះប្រើប្រាស់ ស្របពេលដែលលោកយល់ឃើញថា ហានិភ័យខ្ពស់ក្នុងការចម្លងជំងឺកូវីដ ១៩ ពីគ្រួសារមួយទៅគ្រួសារមួយ ឬពីខេត្តមួយទៅខេត្តមួយគឺតាមរយៈការធ្វើដំណើររបស់កម្មករ និងអ្នកទេសចរតាមមធ្យោបាយសាធារណៈ៕
