បន្ទាយមានជ័យៈ អ្នកស្រុកមង្គលបុរីអាចនឹងប្រឈមចំពោះកង្វះខាតទឹកប្រើប្រាស់ ខណៈប្រភពទឹកនៅក្នុងស្ទឹងមង្គលបុរី គោករីងយ៉ាងឆាប់រហ័ស ដែលបញ្ហាកំពុងប្រឈមនេះអាចធានាការប្រើប្រាស់ក្នុងរយៈពេលប្រហែល ៣ ថ្ងៃទៀត។ នេះបើតាមការអះអាងរបស់មន្ត្រីក្រសួងធនធានទឹក និងឧតុនិយមកាលពីថ្ងៃទី ៨ មករា។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមដែលបានដឹកនាំក្រុមការងារចុះពិនិត្យប្រភពទឹកនៅស្ទឹងមង្គលបុរីកាលពីថ្ងៃទី ៨ ខែមករា ដើម្បីជួយអន្តរាគមន៍បូមទឹកសង្គ្រោះស្រូវប្រាំងក្នុងស្រុកមង្គលបុរី និយាយថាទឹកស្ទឹងមង្គលបុរីអាចរីងស្ងួតក្នុងរយៈពេលដ៏ខ្លីខាងមុខនេះ បើគ្មានការបូមបង្វែរប្រភពទឹកពីតំបន់ផ្សេងទៀតមកជួយទេនោះ។
លោកបានបញ្ជាក់ថា៖ «យោងតាមការពិនិត្យភាពជាក់ស្ដែងប្រភពទឹកនៅស្ទឹងមង្គលបុរីអាចធានាការប្រើប្រាស់បានតែក្នុងរយៈពេល ៣ ថ្ងៃទៀតប៉ុណ្ណោះ»។
បើតាមលោក យុត្ថា ភាពរីងស្ងួតយ៉ាងឆាប់រហ័សនៃប្រភពទឹកស្ទឹងមង្គលបុរីនាពេលនេះ គឺដោយសារប្រជាកសិករធ្វើស្រូវប្រាំងលើសពីផែនការដែលបានគ្រោងទុកចំនួនជាង ១០ ដង។ ផែនការដាំដុះរបស់មន្ទីរកសិកម្មខេត្តបន្ទាយមានជ័យ ការធ្វើស្រូវប្រាំងក្នុងស្រុកនេះមានត្រឹមតែ ៧ ពាន់ហិកតាប៉ុណ្ណោះ។ ប៉ុន្តែជាក់ស្ដែងប្រជាកសិករបានដាំដុះស្រូវប្រាំងរហូតដល់ជិត ៨ ម៉ឺនហិកតាក្នុងនោះការដាំដុះស្រូវប្រាំងលើកទី ១ មានជាង ៥ ម៉ឺនហិកតា និងស្រូវប្រាំងលើកទី ២ មានជាង ២ ម៉ឺនហិកតា។
យ៉ាងណាក៏ដោយនៅចំពោះមុខបញ្ហានេះ លោក យុត្ថា បានដឹកនាំក្រុមការងារបូមបង្វែរទឹកពីប្រភពផ្សេងៗមកកាន់ស្រុកមង្គលបុរីដោយដំឡើងស្ថានីយបូមទឹកចេញពីស្ទឹងសិរីសោភ័ណទម្លាក់ចូលទៅក្នុងប្រឡាយមេ ដើម្បីឲ្យហូរចូលទៅក្នុងស្ទឹងមង្គលបុរី។ ទន្ទឹមនេះលោកក៏បានណែនាំដល់អាជ្ញាធរស្រុក ឃុំ ជួយផ្សព្វផ្សាយដល់ប្រជាពលរដ្ឋឲ្យចូលរួមប្រើប្រាស់ទឹកដោយសន្សំសំចៃ និងកុំធ្វើការដាំដុះ ស្រូវប្រាំងបន្ថែមទៀតព្រោះរដូវប្រាំងនៅសល់រយៈពេលវែងទៀត។
លោកថ្លែងថា៖ «ទឹកដែលយើង បូមបង្វែរទៅនេះគឺអាចឆ្លើយតបតែទៅលើការប្រើប្រាស់ក្នុងជីវភាពប្រចាំថ្ងៃតែប៉ុណ្ណោះមិនសម្រាប់ការផ្គត់ផ្គង់ ស្រូវប្រាំងនោះទេ។ ដូច្នេះសូមបងប្អូនប្រជាពលរដ្ឋ កុំធ្វើការដាំដុះស្រូវប្រាំងបន្ថែមទៀត និងសូមចូលរួមប្រើប្រាស់ទឹកដោយសន្សំសំចៃ»។
លោក ស៊ាង វ៉ាន់សេដ្ឋ ប្រធានមន្ទីរកសិកម្ម ខេត្តបន្ទាយមានជ័យប្រាប់ភ្នំពេញប៉ុស្តិ៍ថា ការធ្វើស្រូវប្រាំងដែលរាប់ចាប់ពីចុងខែវិច្ឆិកា ២០១៩ មកខាងមន្ទីរបានកំណត់ផែនការដាំដុះនៅទូទាំងខេត្តត្រឹមចំនួន ២២០០០ ហិកតាប៉ុណ្ណោះ។ ប៉ុន្តែប្រជាកសិករបានដាំដុះលើផ្ទៃដីរហូតដល់ជាង ៥ ម៉ឺនហិកតាក្នុងនោះប្រជាកសិករនៅស្រុកមង្គលបុរីបានដាំដុះស្រូវប្រាំងច្រើនជាងគេគឺរហូតដល់ជាង ៣ ម៉ឺនហិកតា។
លោកថ្លែងថា៖ «ថ្វីបើប្រភពទឹកស្ទឹងមង្គលបុរីមានការគោករីងយ៉ាងឆាប់រហ័ស ប៉ុន្តែរហូតមកទល់ពេលនេះពុំទាន់មានស្រូវរបស់ប្រជាកសិករ យើងណាម្នាក់ រងការខូចខាតដោយសារកង្វះទឹកស្រោចស្រពនោះទេ។ ទន្ទឹមនឹងនេះប្រជាកសិករ យើងក៏បានប្រមូលផលស្រូវប្រាំងប្រមាណ ៤០ ភាគរយហើយដែរគិតត្រឹមថ្ងៃទី ៨ ខែមករា ឆ្នាំ ២០២០នេះ»។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយប្រាប់ភ្នំពេញប៉ុស្តិ៍ថ្ងៃទី ៨ មករា ថាស្រូវប្រាំងប្រជាកសិករចំនួន ៣៥០០០ ហិកតានៅខេត្តបាត់ដំបងបន្ទាយមានជ័យ កំពង់ធំ កំពង់ចាម កំពង់ឆ្នាំង ព្រៃវែង ស្វាយរៀង ត្បូងឃ្មុំ ក្រចេះ កំពត និងខេត្តតាកែវកំពុងប្រឈមបញ្ហាកង្វះទឹក។
លោកបានបន្តថា ខណៈនេះក្រុមមន្ត្រីជំនាញផ្នែកកសិកម្មកំពុងសហការជាមួយក្រុមមន្ត្រីជំនាញផ្នែកធនធានទឹកចុះបូមទឹកបញ្ចូលស្រែ ដើម្បីសង្គ្រោះស្រូវប្រាំងទាំងនោះជូនប្រជាកសិករជាបណ្ដើរៗហើយ។
លោក រ័ត្ន ដាស៊ីណង់ អភិបាលស្រុកមង្គលបុរីនិយាយថា ការគោករីងទឹកស្ទឹងមង្គលបុរីដ៏ឆាប់រហ័សនេះបង្កឲ្យមានបញ្ហាប្រឈមជាច្រើនសម្រាប់ពលរដ្ឋជាង ៧០០០ គ្រួសារនៅក្នុងស្រុកនេះ។
លោកថ្លែងថា៖ «បញ្ហាប្រឈមដ៏ធំបំផុតនៅពេលខាងមុខដ៏ខ្លីនេះគឺកង្វះទឹកស្អាតប្រើប្រាស់ដែលបញ្ហានេះ វាមិនគ្រាន់តែប៉ះពាល់ដល់ការរស់នៅរបស់ពលរដ្ឋយើងជាង ៧០០០ គ្រួសារប៉ុណ្ណោះទេ ថែមទាំងប៉ះពាល់យ៉ាងធ្ងន់ធ្ងរផងដែរដល់បុគ្គលិកសុខាភិបាលនៃមន្ទីរពេទ្យមិត្តភាពកម្ពុជា-ជប៉ុនមង្គលបុរី ដែលកំពុងផ្ដល់ការព្យាបាលដល់អ្នកជំងឺ រាប់រយនាក់ក្នុង ១ ថ្ងៃៗ»។
លោកបន្តថា នៅពេលនេះក្រុមការងារថ្នាក់ខេត្តកំពុងដំឡើងម៉ាស៊ីនបូមទឹក ដើម្បីបូមទឹកពីស្ទឹងសេរីសោភ័ណ និងប្រព័ន្ធដៃអូរ និងព្រែកមួយចំនួនពីទំនប់ស្ទាក់ទឹកនៅផ្នែកខាងក្រោម ចាក់មកក្នុងស្ទឹងមង្គលបុរី ដើម្បីជួយដោះស្រាយនូវបញ្ហាប្រឈមខាងលើ។ ប៉ុន្តែមិនដឹងថាការបូមទឹកពីតំបន់ផ្សេងៗមកជួយនេះអាចទប់ទល់នឹងភាពខ្វះខាតបានរយៈពេលប៉ុន្មានខែនោះទេ ខណៈរដូវប្រាំងនៅមានរយៈពេលវែង៕