សៀមរាបៈ សង្កាត់រដ្ឋបាលព្រៃឈើស្វាយលើនៃខេត្តសៀមរាបបានទុកពេលមួយខែឱ្យម្ចាស់គោយន្តកន្ត្រៃដែលដឹកឈើខុសច្បាប់ឱ្យចូលខ្លួនមកដោះស្រាយតាមនីតិវិធីច្បាប់ បន្ទាប់ពីបានឃាត់ទុកកាលពីសប្ដាហ៍មុន និងបានព្រមានថា បើមិនដូច្នោះ រដ្ឋបាលព្រៃឈើនឹងកសាងសំណុំរឿងបញ្ជូនទៅតុលាការ ដើម្បីសម្រេចតាមនីតិវិធី។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្ដសៀមរាប លោក ទា គឹមសុទ្ធ ប្រាប់ ភ្នំពេញ ប៉ុស្តិ៍ នៅថ្ងៃនេះថា មន្ត្រីរដ្ឋបាលព្រៃឈើខេត្តកាលពីសប្តាហ៍មុនបានចាប់ឃាត់គោយន្តកន្ត្រៃចំនួន ៦ គ្រឿង ស្ថិតនៅភូមិចាន់ហៀ ឃុំបឹងមាលា ស្រុកស្វាយលើ ដែលដឹកជញ្ជូនឈើហ៊ុបមូលដោយគ្មានលិខិតអនុញ្ញាតពីរដ្ឋបាលព្រៃឈើ។
បើតាមរបាយការណ៍រដ្ឋបាលព្រៃឈើខេត្តឈើហ៊ុបមូលទាំងនេះមានមុខកាត់ចាប់ពី ០,២៥ ម៉ែត្រ ទៅ ០,៣០ ម៉ែត្រ ប្រវែងចាប់ពី ៤ ម៉ែត្រ ទៅ ៦ ម៉ែត្រ ជាប្រភេទឈើលេខ ១ លេខ ២ និងលេខ ៣ ចំនួន ៣៦ ដើម ស្មើនឹង ៩,០៤ ម៉ែត្រគុប។ វត្ថុតាងទាំងអស់នេះ ត្រូវបានយកមករក្សាទុកនៅស្នាក់ការសង្កាត់រដ្ឋបាលព្រៃឈើស្វាយលើ ដើម្បីរៀបចំចងក្រងសំណុំរឿងតាមនីតិវិធីច្បាប់ស្តីពីព្រៃឈើ។
លោក ទា គឹមសុទ្ធ បានបញ្ជាកថា៖ «នៅពេលដែលចាប់ហើយនេះ ម្ចាស់គោយន្តកន្ត្រៃត្រូវតែបង់ពិន័យទៅតាមច្បាប់ ទើបអនុញ្ញាតឱ្យយកគោយន្តចេញវិញបាន។ ចំណែកឈើមិនអនុញ្ញាតឱ្យយកទៅវិញទេ គឺតម្រូវរឹបអូសទុកធ្វើជាសម្បត្តិរដ្ឋ»។
បើតាមលោក ទា គឹមសុទ្ធ ប្រសិនបើម្ចាស់គោយន្តទាំងនេះ មិនបានបង់ពិន័យទេ សង្កាត់រដ្ឋបាលព្រៃឈើនឹងរៀបចំសំណុំរឿងបញ្ជូនទៅតុលាការ។ ប៉ុន្តែរហូតមកទល់ពេលនេះ ម្ចាស់គោយន្តទាំងនោះមិនទានបានមកបង់ពិន័យនៅឡើយទេ ខណៈតាមច្បាប់គឺម្ចាស់គោយន្តមានរយៈពេល ១ ខែ ដើម្បីឱ្យម្ចាស់គោយន្តទាំងនោះមកបង់ពិន័យ។
លោក ទា គឹមសុទ្ធ ថ្លែងថា៖ «យើងចាប់ភ្លាមៗបែបនេះ គឺគាត់មិនអាចរកលុយមកបង់ភ្លាមៗបានទេ បើពិន័យគុណនឹង ៣។ គាត់ទិញតម្លៃប្រហែល ៣០ ទៅ ៤០ ម៉ឺនរៀល ហើយយើងពិន័យគាត់ប្រហែល ៣ លានរៀលឯណោះ»។
លោក ទា គឹមសុទ្ធ បញ្ជាក់ថា សម្រាប់មនុស្ស គឺមិនត្រូវបានឃាត់ខ្លួននោះទេ ហើយបើតាមច្បាប់ គឺពួកគាត់ក៏មិនត្រូវបានជាប់គុកដែរ ព្រោះវាជាការពិន័យអន្តរកាលប៉ុណ្ណោះ បើគាត់បង់ពិន័យ គឺអាចយកគោយន្តទៅវិញ បើគាត់មិនបង់ គឺតុលាការសម្រេចហើយរឹបអូសគោយន្ត និង ឈើទាំងអស់ជាសម្បត្តិរដ្ឋ៕