ភ្នំពេញៈ អ្នកនាំពាក្យក្រសួងការបរទេស និងសហប្រតិបត្តិការអន្ដរជាតិលោក កុយ គួង បានប្រាប់ភ្នំពេញប៉ុស្តិ៍ពីម្សិលមិញថា មន្ត្រីស្ថានទូតកម្ពុជាប្រចាំប្រទេសថៃ កំពុងជួយសម្រួលឯកសារ ដើម្បីបញ្ជូនសពស្ត្រីខ្មែរម្នាក់មកស្រុកកំណើតនៅកម្ពុជាវិញ បន្ទាប់ពីគាត់រងការបាញ់ប្រហាររហូតដល់ស្លាប់កាលពីយប់ថ្ងៃទី ៣ ខែសីហា នៅទីក្រុងបាងកក ប្រទេសថៃ។
លោកបានថ្លែងថា រហូតមកទល់ពេលនេះមន្ត្រីស្ថានទូតកម្ពុជាកំពុងធ្វើការជាមួយប៉ូលិសថៃ និងបានធ្វើដំណើរទៅកន្លែងតម្កល់សព ដើម្បីចូលរួមសង្កេតការណ៍ក្នុងការធ្វើកោសល្យវិច័យសពរកមូលហេតុនៅពីក្រោយការបាញ់សម្លាប់នេះ។
លោក គួង បានបញ្ជាក់ថា៖ «ពេលនេះក្រុមមន្ត្រីស្ថានទូតយើងប្រចាំនៅទីក្រុងបាងកកប្រទេសថៃ កំពុងខិតខំសម្របសម្រួលឯកសារ និងដឹកយកសពស្ត្រីរងគ្រោះមកកម្ពុជាវិញ ដើម្បីប្រគល់ជូនក្រុមគ្រួសារទទួលយកទៅធ្វើបុណ្យតាមប្រពៃណី»។
បើតាមលោក កុយ គួង សពស្ត្រីរងគ្រោះនឹងត្រូវមកដល់ព្រំដែនប៉ោយប៉ែតនៅវេលាម៉ោងជិត ៨ យប់ថ្ងៃពុធ (ម្សិលមិញ) នេះ។
តាមកាសែត Bangkok Post ករណីបាញ់ប្រហារនេះបានបង្កឲ្យមនុស្សចំនួន ៤ នាក់ស្លាប់ ក្នុងនោះមានបុរសម្នាក់ជាមន្ត្រីប៉ូលិស និងបុរស-ស្ត្រី ៣ នាក់ទៀតជាបុគ្គលិកបម្រើការក្នុងបនល្បែងលួចលាក់នៃអគារពាណិជ្ជកម្មមួយនៅកែងផ្លូវ Rama III និងផ្លូវលេខ ៦៦ ក្នុងសង្កាត់ Chong Nonsi នៃខណ្ឌ Yan Nawa ក្រុងបាងកកក្នុងនោះមានស្ត្រីខ្មែរផង។
ប្រភពដដែលបានបញ្ជាក់ថា៖ «ករណីបាញ់ប្រហារនេះបានកើតឡើងបន្ទាប់ពីបុរសជនជាតិចិនម្នាក់បានកាន់កាំភ្លើងហើយស្រែកទាមទារប្រាក់របស់គាត់មកវិញ ដោយអះអាងថា គាត់ត្រូវបានគេបោក»។
បើតាមកាសែត Bangkok Post ពេលនេះសមត្ថកិច្ចនៅមិនទាន់ចាប់ខ្លួនខ្មាន់កាំភ្លើងជាតិចិននោះបាននៅឡើយទេ ខណៈអ្នកលេងល្បែង និងបុគ្គលិកបម្រើការឲ្យបនល្បែងនោះប្រមាណជាង ៦០ នាក់ ត្រូវបានសមត្ថកិច្ចថៃឃាត់ខ្លួនសួរនាំ។
យ៉ាងណាក៏ដោយសមត្ថកិច្ចកំពុងបន្តហ៊ុមព័ទ្ធតំបន់នោះយ៉ាងតឹងរ៉ឹង ដើម្បីតាមចាប់ខ្មាន់កាំភ្លើងប្រគល់ឲ្យតុលាការ។
ជុំវិញករណីបាញ់ប្រហារនេះប្ដីរបស់ស្ត្រីខ្មែររងគ្រោះគឺលោក សាំង សីហា អាយុ ៣៤ ឆ្នាំ ដែលមានលំនៅក្នុងភូមិបាលិលេយ្យ ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានប្រាប់ភ្នំពេញប៉ុស្តិ៍កាលពីម្សិលមិញថា ស្ត្រីរងគ្រោះនោះ ឈ្មោះ ម៉ៅ ស្រីពៅ អាយុ ២៩ ឆ្នាំ។
លោក សីហា បានឲ្យដឹងថា ពីមុនប្រពន្ធរបស់លោកធ្លាប់ធ្វើការជាបុគ្គលិកនៅកាស៊ីណូផ្កាយ ៥ (DNA Casino) ក្នុងក្រុងប៉ោយប៉ែតប្រទេសកម្ពុជា ប៉ុន្តែក្រោយផ្ទុះជំងឺកូវីដ១៩កាស៊ីណូនេះបានផ្អាកបណ្ដោះអាសន្ន ក៏ប៉ុន្តែដើម្បីជួយដោះស្រាយជីវភាពគ្រួសារ ប្រពន្ធរបស់លោក និងមិត្តភក្ដិរួមការងារមួយចំនួនបាននាំគ្នាទៅរកការងារធ្វើនៅក្នុងបនល្បែង ១ ទៀតក្នុងទីក្រុងបាងកកប្រទេសថៃ។
លោក សីហា បានបញ្ជាក់ថា៖ «នៅយប់ថ្ងៃកើតហេតុ ប្រពន្ធខ្ញុំ [ស្ត្រីរងគ្រោះ] បានទូរស័ព្ទមកសួរសុខទុក្ខខ្ញុំ និងកូនប្រុសអាយុ ១៣ ខែ ព្រមទាំងក្រុមគ្រួសារសាច់ញាតិ។ នាងបានប្រាប់ខ្ញុំ កុំឲ្យបារម្ភអំពីនាង និងប្រាប់ឲ្យខ្ញុំមើលថែទាំកូនឲ្យបានល្អហើយថា នៅខែក្រោយនេះនាងនឹងដាក់ច្បាប់សម្រាក ២-៣ ថ្ងៃ ដើម្បីមកលេងផ្ទះ»។
លោកបានប្រាប់ឲ្យដឹងទៀតថា បន្ទាប់ពីពួកគាត់បញ្ចប់ការសន្ទនាគ្នាបានប្រមាណជាង ៣០ នាទី ស្រាប់តែមានគេទូរស័ព្ទមកប្រាប់គាត់ថា ប្រពន្ធគាត់បានស្លាប់ក្រោយមានករណីផ្ទុះអាវុធជាច្រើនគ្រាប់ដែលបង្កឡើងដោយបុរសជនជាតិចិនម្នាក់ដែលចាញ់បៀរ។
លោកថា៖ «ខ្ញុំរកនិយាយអ្វីមិនចេញទេនៅពេលឮដំណឹងនោះ ព្រោះខ្ញុំទើបតែនិយាយជាមួយប្រពន្ធខ្ញុំតាមទូរស័ព្ទប្រមាណ ៣០ នាទីមុន [ទទួលដំណឹង] នេះប៉ុណ្ណោះ»។ លោកបន្តថា នៅពេលនេះលោកកំពុងបំពេញបែបបទឯកសារមួយចំនួន ដើម្បីស្នើសុំកិច្ចអន្តរាគមន៍ពីមន្ត្រីការទូតកម្ពុជាប្រចាំទីក្រុងបាងកកប្រទេសថៃជួយនាំយកសពប្រពន្ធរបស់លោកមកកម្ពុជាវិញដើម្បីធ្វើបុណ្យតាមប្រពៃណី៕