.jpg)
ក្រចេះ មន្ដ្រីនគរបាលខេត្ដក្រចេះបានអះអាងនៅថ្ងៃទី ៤ ធ្នូនេះថា ករណីឃាតករស៊ីឈ្នួលសម្លាប់មនុស្សរត់ចេញពីពន្ធនាគារខេត្តបានសម្រេចកាលថ្ងៃទី២ ខែធ្នូ ខណៈទើបជាប់ឃុំបាន៣ឆ្នាំក្នុងទោសអស់១ជីវិតនោះ ជាការកើតឡើងដោយសារការធ្វេសប្រហែសរបស់មន្ដ្រីពន្ធនាគារ ។
លោក ស៊ុម សុខឃីម ស្នងការរងនគបាលខេត្ដក្រចេះបានថ្លែងប្រាប់ភ្នំពេញបុស្ដិ៍ថា ករណីនេះគឺជាការធ្វេសប្រហែសរបស់មន្ដ្រីពន្ធនាគារ ប៉ុន្ដែពេលនេះនគបាលខេត្ដកំពុងការស្រាវជ្រាវចាប់ខ្លួនជនល្មើសមកវិញ។
លោកថា៖«ករណីនេះជាការធ្វេសប្រហែសរបស់មន្ដ្រីពន្ធនាគារ គ្មានអ្នកណាទៅហែកគុកបានទេ មានអ្នកចាក់សោឲ្យវាចេញមក ហើយនិងការធ្វេសប្រហែសរបស់គាត់ម៉ាតង់ទៀត អាហ្នឹង វាមានពីរតង់»។
លោក សុខឃីម បានបន្ថែមថា៖ «កម្លាំងសមត្ថកិច្ចយើងជួយស្វែងរកព័ត៌មានហើយ ប៉ុន្ដែនេះជាកំហុសរបស់ពន្ធនាគារសោះ ខាងយើងនេះ គ្មានពាក់ព័ន្ធអ្វីទេ ព្រោះនេះជាករណីដែលយើងបានចាប់បញ្ចូនទៅតុលា ហើយគេបានកាត់ទោសរួចហើយឲ្យជាប់ពន្ធនាគារមួយជីវិត»។
លោក ជា សុភ័ក្ក្រ អ្នកនាំពាក្យអយ្យការសាលាដំបូងខេត្តក្រចេះ បានទទួលស្គាល់ថា ពិតជាមានករណីជនល្មើសលួចរត់ចេញពីគុកពិតមែន ប៉ុន្ដែលោកនៅមិនទាន់ទទួលបានព័ត៌មានលម្អិតទេ ព្រោះរវល់បំពេញបេសកកម្មនៅភ្នំពេញ ។
លោកថា៖ «ឥឡូវខ្ញុំកំពុងនៅតាមផ្លូវមិនទាន់ទទួលបានព័ត៌មានច្បាស់ទេ ប៉ុន្ដែមានមែន មានករណីរត់ចេញពីគុកនេះមែន។ ខ្ញុំអត់ទាន់ដឹងថា យ៉ាងម៉េចខ្លះទៅឡើយទេ តែជាធម្មតាពេលជនល្មើសរត់ចេញពីគុកបែបនេះ គឺយើងត្រូវតែចេញដីកាតាមចាប់ខ្លួនវិញហើយ»។
ភ្នំពេញបុស្ដិ៍មិនអាចទាក់ទង លោក ខ្វា សារ៉ន ប្រធានពន្ធនាគារ ខេត្ដក្រចេះដើម្បីសុំបកស្រាយពីករណីជនល្មើសរត់ចេញពីគុកនេះបានទេនៅថ្ងៃទី៤ធ្នូ នេះ ។
តាមរបាយការណ៍នគរបាលខេត្ដក្រចេះ បានឲ្យដឹងថា ទណ្ឌិតដែលបានរត់គេចខ្លួនចេញពីពន្ឋនាគារ ឈ្មោះ ឡឹក ចាន់វាសនា ហៅក្លូ អាយុ ២៨ ឆ្នាំ មានលំនៅ នៅភូមិ អូរពោធិ៍ ឃុំក្បាលដំរី ស្រុក សំបូរ ខេត្តក្រចេះ។
ជននេះ ត្រូវបាននគរបាលស្រុកសំបូរ ចាប់ខ្លួនបាន កាលពីដើម ខែវិច្ឆិកា ឆ្នាំ២០១៥ ពាក់ព័ន្ធនឹងករណីអំពើមនុស្សឃាត ដោយជននេះ បានស៊ីឈ្នួលធ្វើឃាតឲ្យគេ ក្នុងតម្លៃខ្លួន ២លានរៀលពីស្ត្រីម្នាក់ទៀតឱ្យទៅសម្លាប់ស្ត្រីជាជនរងគ្រោះ ឈ្មោះ ហ៊ិន ភាព ភេទស្រី អាយុ ៦១ ឆ្នាំ ដែលរស់នៅក្នុងភូមិឃុំ ជាមួយគ្នា ក្នុងទំនាស់រឿងជំពាក់លុយចង់ការប្រាក់។
របាយការណ៍ដដែល បានឲ្យដឹងថា កាលនោះ ជនល្មើស បានយកថ្នាំដាក់បំពុលសម្លាប់សត្វឆ្កែរបស់ជនរងគ្រោះហើយ ចូលទៅក្រោមផ្ទះយកដែកចុងស្រួចចាក់ចំដើមទ្រូងខាងឆ្វេង បណ្ដាលឲ្យស្លាប់នៅលើប៉ៅអ៊ីក្រោមផ្ទះគាត់តែម្ដដង៕
