ព្រៃវែងៈ មន្ត្រីនគរបាលប្រឆាំងគ្រឿងញៀនចំនួន ៧ នាក់ នៃស្នងការដ្ឋាននគរបាលខេត្តព្រៃវែង ត្រូវបានអគ្គស្នងការនគរបាលជាតិលោក នេត សាវឿន ដាក់ពិន័យដោយផ្អាកការងារបណ្ដោះអាសន្ន បន្ទាប់ពីមន្ត្រីទាំង ៧ រូបនេះត្រូវបានពលរដ្ឋអះអាងថា មានជាប់ពាក់ព័ន្ធនឹងការវាយដំ គំរាមទារប្រាក់ ដោយចោទពលរដ្ឋស្លូតត្រង់ថា ជាប់ពាក់ព័ន្ធនឹងគ្រឿងញៀន។
បើតាមសេចក្ដីសម្រេចរបស់លោក នេត សាវឿន ចុះថ្ងៃទី ២៧ ខែកក្កដា បញ្ជាក់ថា មន្ត្រីនគរបាលដែលត្រូវផ្អាកការងារបណ្ដោះអាសន្នរួមមានឈ្មោះ ថោង វណ្ណឌី ស្នងការរងនគរបាលខេត្តព្រៃវែងទទួលបន្ទុកផ្នែកគ្រឿងញៀន ឈ្មោះ ពៅ ជីវ័ន នាយការិយាល័យប្រឆាំងគ្រឿងញៀន ឈ្មោះ ទូច ធារ៉ា នាយរងការិយាល័យប្រឆាំងគ្រឿងញៀន ឈ្មោះ ស៊ី បូ នាយផ្នែកនៃការិយាល័យប្រឆាំងគ្រឿងញៀន ឈ្មោះ ហេង ចាន់រតនា, សៀក ចាន់ធឿន និងឈ្មោះ យុន តារាភ័ស្ត មានឋានៈជាមន្ត្រីនៃការិយាល័យប្រឆាំងគ្រឿងញៀន។
លោក នេត សាវឿន ថ្លែងថា៖ «សាមីខ្លួនដែលមានឈ្មោះក្នុងប្រការ ១ ត្រូវមកបង្ហាញខ្លួនរៀងរាល់ម៉ោងការងារនៅការិយាល័យបុគ្គលិកនៃស្នងការដ្ឋាននគរបាលខេត្តព្រៃវែងដើម្បីរង់ចាំការសម្រេចជាថ្មី»។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងប្រាប់កាលពីម្សិលមិញថា លោក នេត សាវឿន បានសម្រេចដាក់ពិន័យកងកម្លាំងនគរបាលជាតិទាំង ៧ នាក់ ដែលបានប្រព្រឹត្តខុសពីក្រមសីលធម៌វិជ្ជាជីវៈ និងវិន័យកងកម្លាំងនគរបាលជាតិ។ ការដាក់ពិន័យនេះ ដោយសារតែមន្ត្រីនគរបាលទាំង ៧ នាក់ បានធ្វើប្រតិបត្តិការបង្ក្រាបគ្រឿងញៀនផ្ទុយពីក្រមសីលធម៌វិជ្ជាជីវ: និងវិន័យរបស់កងកម្លាំងនគរបាលជាតិ និងបង្កឲ្យមានរបួសស្នាមដល់ជនសង្ស័យ។
លោកថ្លែងដូច្នេះថា៖ «ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបានដាក់បទបញ្ជាឲ្យថ្នាក់ដឹកនាំនាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្តទាំង ២៥ ត្រូវពង្រឹងការអនុវត្តវិន័យរបស់កងកម្លាំងនគរបាលជាតិនៅទូទាំងប្រទេស និងមិនលើកលែងដាច់ខាត ចំពោះមន្ត្រីនគរបាលណាម្នាក់ដែលប្រព្រឹត្តខុសពីវិន័យ និងវិជ្ជាជីវៈរបស់កងកម្លាំងនគរបាលជាតិ និងអាចឈានដល់ការអនុវត្តនីតិវិធីច្បាប់ទៀតផង»។
សាក្សី ២ រូបមានឈ្មោះ ថៃ សាមាឌ និងឈ្មោះ ភឿន រ័ត្ន រស់នៅភូមិស្វាយសុខោ សង្កាត់ជើងទឹក ក្រុងព្រៃវែង ខេត្តព្រៃវែងបានរៀបរាប់នៅក្នុងវីដេអូសម្ភាសតាមហ្វេសប៊ុកថា ពួកគេត្រូវបានប៉ូលិសឈ្មោះ ទូច ធារ៉ា និងប៉ូលិស ៣ នាក់ទៀតចាប់ខ្លួននៅយប់ថ្ងៃទី ២០ ខែកក្កដា និងដោះលែងវិញនៅថ្ងៃទី ២១ ខែកក្កដា បន្ទាប់ពីឪពុកម្ដាយរបស់ពួកគេបានយកប្រាក់ ៤ លានរៀលទៅឲ្យឈ្មោះ ទូច ធារ៉ា។
សាក្សីឈ្មោះ ភឿន រ័ត្ន បានរៀបរាប់ថា នៅខណៈពេលគេកំពុងជិះម៉ូតូពីកន្លែងហូបចុក ២ នាក់ឈ្មោះ ថៃ សាមាឌ ប៉ូលិសឈ្មោះ ទូច ធារ៉ា បានជិះម៉ូតូពីក្រោយ និងបានកៀរម៉ូតូពួកគេឲ្យឈប់ ហើយបានដកកាំភ្លើងខ្លីមកវាយក្បាល។ ពេលនោះ ឈ្មោះ ថៃ សាមាឌ និយាយទៅឈ្មោះ ធារ៉ា ថា បើហ៊ានប្រើកាំភ្លើងគំរាមបន្តទៀតគេនឹងថតវីដេអូនៅលើទូរស័ព្ទទុកជាភ័ស្តុតាង។ ពេលនោះ ឈ្មោះ ទូច ធារ៉ា បានទូរស័ព្ទហៅបក្ខពួក ៣ នាក់មកទៀត។ ពេលប៉ូលិស ៣ នាក់មកដល់ពួកប៉ូលិសបានវាយ និងយកពួកគេទាំង ២ នាក់ទៅស្នងការតែម្ដង។ ចំណែកឈ្មោះ ថៃ សាមាឌ ក៏បានរៀបរាប់ថា ឈ្មោះ ទូច ធារ៉ា បានចាប់ពួកគេទាំង ២ នាក់ទៅធ្វើទារុណកម្មនៅក្នុងកន្លែងឃុំឃាំង ដោយវ៉ៃនឹងដំបងក្ដគោទៅលើខ្លួន និងប្រើដំបងឆក់ ឆក់នៅលើភ្លៅ។ បន្ទាប់មកពួកគេបានទូរស័ព្ទទៅឪពុកម្ដាយរបស់ខ្លួនឲ្យយកប្រាក់ម្នាក់ ២ លានរៀលទៅដោះខ្លួនពួកគេយកទៅផ្ទះវិញ។
វីដេអូ៖
ថៃ សាមាឌ និយាយថា៖ «គេយកខ្ញុំទៅវ៉ៃតប់រួចហើយយកខ្ញុំទៅពិនិត្យទឹកនោម រួចចោទខ្ញុំថា មានសារធាតុញៀនបឋម។ ប៉ុន្តែដោយសារខ្ញុំមិនដែលជាប់ពាក់ព័ន្ធនឹងការប្រើប្រាស់គ្រឿងញៀនខ្ញុំក៏ចេញទៅពេទ្យរដ្ឋពិនិត្យមើលសារធាតុញៀន។ នេះគឺក្រដាសបញ្ជាក់ពីមន្ទីរពេទ្យរដ្ឋខេត្តព្រៃវែងបញ្ជាក់ថា ខ្ញុំអត់មានសារធាតុញៀនទេ។ ខ្ញុំទៅពិនិត្យឈាមនៅប៉ាស្ទ័រគេបញ្ជាក់ថា ខ្ញុំអត់មានសារធាតុញៀនទេ»។
ថៃ សាមាឌ បានរៀបរាប់ថា ក្រោយពេលខ្លួនបានចេញពីស្នងការវិញ ប៉ូលិសឈ្មោះ ទូច ធារ៉ា បានមកសម្របសម្រួលប្រគល់ប្រាក់ឲ្យវិញ តែលោកមិនយល់ព្រមដោយចង់បានយុត្តិធម៌ និងភាពស្អាតស្អំ។
ពាក់ព័ន្ធនឹងករណីផ្អាកការងារនេះដែរ គេហទំព័រនគរបាលជាតិបានចុះផ្សាយពីម្សិលមិញថា លោក ព្រុំ សន្ធរ ស្នងការនៃស្នងការដ្ឋាននគរបាលខេត្តព្រៃវែងតំណាងឲ្យលោក នេត សាវឿន បានចុះផ្ទាល់ទៅសុំអភ័យទោស និងនាំយកថវិកាទៅប្រគល់ជូនពលរដ្ឋ ៦ គ្រួសារនៅភូមិអណ្តូង ឃុំមេសរប្រចាន់ ស្រុកពារាំង ដែលពាក់ព័ន្ធនឹងករណីនគរបាលខេត្តព្រៃវែង បង្ក្រាបអ្នកប្រើប្រាស់គ្រឿងញៀនរួចដោះលែងត្រឡប់ទៅផ្ទះវិញជាថ្នូរនឹងការទទួលប្រាក់។
លោក ឆាយ គឹមខឿន បញ្ជាក់ថាឈ្មោះ ទូច ធារ៉ា មានជាប់ពាក់ព័ន្ធទាំងករណីទារប្រាក់ ៤ លានរៀលនៅក្រុងព្រៃវែង និងករណីពលរដ្ឋ ៦ គ្រួសារនៅស្រុកពារាំង។ ចំណែកនគរបាល ៦ នាក់ទៀតជាប់ពាក់ព័ន្ធនឹងករណី ១ ក្នុងចំណោមករណីទាំង ២ នេះ។
លោកប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាយល់ថាករណីនេះ ពាក់ព័ន្ធនឹងក្រមសីលធម៌ អំពើពុករលួយ និងការប្រើប្រាស់អំណាចលើសពីអ្វីដែលសមត្ថកិច្ចមាន។ លោកស្នើឲ្យមន្ត្រីដែលមានសមត្ថកិច្ចពិនិត្យពិច័យលើការគ្រប់គ្រងកងកម្លាំងសមត្ថកិច្ចឲ្យបានដិតដល់ ដើម្បីចៀសវាងបញ្ហាបែបនេះ។
លោកថ្លែងដូច្នេះថា៖ «ជាការល្អណាស់ដែលក្រសួង និងថ្នាក់ដឹកនាំជាន់ខ្ពស់ ដាក់ទណ្ឌកម្មចំពោះកងកម្លាំងសមត្ថកិច្ចណាដែលប្រព្រឹត្តខុស ហើយលើកទឹកចិត្តចំពោះកងកម្លាំងសមត្ថកិច្ចដែលបំពេញការងារបានល្អ ដើម្បីជាគំរូដល់សមត្ថកិច្ចដទៃទៀត។ នេះក៏ជាការឆ្លុះបញ្ចាំងឲ្យបានឃើញពីចំណាត់ការដ៏មានប្រសិទ្ធភាព និងយុត្តិធម៌ក្នុងការគ្រប់គ្រងសមត្ថកិច្ច ដើម្បីបង្កើនជំនឿទុកចិត្តរបស់ប្រជាពលរដ្ឋលើសមត្ថកិច្ចក្នុងកិច្ចការពារសុវត្ថិភាពជូនពួកគាត់»៕