ភ្នំពេញៈ មន្ត្រីនគរបាលម្នាក់ដែលបានប្រព្រឹត្តអំពើប្លន់ប្រដាប់អាវុធ យករថយន្តមួយគ្រឿងនៅក្នុងសង្កាត់ព្រែកឯង ខណ្ឌច្បារអំពៅកាលពីដើមខែវិច្ឆិកាត្រូវបានចាប់ខ្លួនបញ្ជូនទៅសាលាដំបូងរាជធានីភ្នំពេញពីថ្ងៃសុក្រសប្ដាហ៍កន្លងមកនេះ។
លោក ស ថេត ស្នងការរាជធានីភ្នំពេញបានថ្លែងឲ្យដឹងកាលពីម្សិលមិញថា៖ «យើងបានឃាត់ខ្លួន ហើយយើងបានបញ្ជូនទៅតុលាការអស់ហើយនៅថ្ងៃសុក្រ»។
លោក អ៊ុក ផាត់ ប្រធានការិយាល័យព្រហ្មទណ្ឌ ខេត្តព្រៃវែងកាលពីម្សិលមិញបានអះអាងថា ឈ្មោះ ជុត ជីវ័ន្ត អាយុ ២៧ ឆ្នាំ មានតួនាទីជាមន្ត្រីនគរបាល ព្រហ្មទណ្ឌនៅខេត្តព្រៃវែង។
លោក ផាត់ បានថ្លែងឲ្យដឹងថា៖ «គាត់ជាមន្ត្រីនគរបាលព្រហ្មទណ្ឌដែលទើបនឹងផ្ទេរមកពីខេត្តបន្ទាយមានជ័យ»។
អ្នកនាំពាក្យតំណាងអយ្យការអមសាលាដំបូងរាជធានីភ្នំពេញលោក គុជ គឹមឡុង មិនអាចទាក់ទងសុំការអត្ថាធិប្បាយពាក់ព័ន្ធនឹងករណីប្លន់នេះបានទេ។
លោក ស ថេត កាលពីម្សិលមិញបដិសេធក្នុងការផ្ដល់ព័ត៌មានលម្អិត ប៉ុន្តែកាលពីថ្ងៃទី ២៧ ខែ វិច្ឆិកា ឆ្នាំ ២០១៩ បានឲ្យដឹងថា ជនសង្ស័យឈ្មោះ ជុត ជីវ័ន្ត អាយុ ២៧ ឆ្នាំ។ សមត្ថកិច្ចបានចាប់ខ្លួនកាលពីថ្ងៃទី ២៧ ខែ វិច្ឆិកា ឆ្នាំ ២០១៩ នៅសង្កាត់ចោមចៅទី ១ ខណ្ឌពោធិ៍សែនជ័យ ក្រោយពីធ្វើសកម្មភាពប្រើអាវុធវែងភ្ជង់ប្លន់យករថយន្តចំនួន ១ គ្រឿងម៉ាកហាយឡេនឌ័រកាលពីថ្ងៃទី ១២ ខែ វិច្ឆិកា ឆ្នាំ ២០១៩ សង្កាត់ព្រែកឯង ខណ្ឌច្បារអំពៅរាជធានីភ្នំពេញ។ សមត្ថកិច្ចរឹបអូសអាវុធវែងចំនួន ០៣ ដើមម៉ាក AK47 ២ ដើម និងម៉ាកហ្វាងឡុង ១ ដើមពីជនសង្ស័យ។
ការឃាត់ខ្លួនជនសង្ស័យធ្វើឡើងបន្ទាប់ពីសមត្ថកិច្ចទទួលបានពាក្យបណ្តឹងជនរងគ្រោះឈ្មោះ ពុធ រិទ្ធី អាយុ ៣៣ ឆ្នាំបានប្តឹងថាកាលពីថ្ងៃទី ១២ ខែ វិច្ឆិកា ឆ្នាំ ២០១៩ ឈ្មោះ ជុត ជីវ័ន្ត ដែលជាមនុស្សធ្លាប់ស្គាល់គ្នាបានដកអាវុធភ្ជង់យករថយន្ត និង យកកាបូបលុយរបស់គេនៅក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
ជនសង្ស័យបានចេញពីលេងល្បែងនៅណាហ្គាវើលជិះម៉ូតូឌុបទៅច្បារអំពៅដើម្បីម៉ៅរថយន្តទៅខេត្តព្រៃវែងពេលទៅដល់ក៏បានឃើញរថយន្តតាក់ស៊ី ១ គ្រឿងម៉ាកហាយឡេនឌ័រ ហើយជនសង្ស័យបានហៅម្ចាស់រថយន្តនោះឲ្យបើកជូនទៅខេត្តព្រៃវែង និងត្រឡប់មកភ្នំពេញវិញរហូតមកដល់ផ្លូវបំបែកចូលរោងចក្រថៃហ្គ័រ សង្កាត់ព្រែកឯងគេបានឲ្យអ្នកបើករថយន្តបត់ទៅតាមរោងចក្រ ថៃហ្គ័រ បានប្រហែល ១ គីឡូម៉ែត្រ ជនសង្ស័យដែលអង្គុយកៅផ្នែកខាងក្រោយបានដកអាវុធពីក្នុងសាក់កាដូ ភ្ជង់ម្ចាស់រថយន្តឲ្យចុះរួចយកកាបូបលុយ និងរថយន្តបើកត្រឡប់ក្រោយចូលភ្នំពេញវិញ។ ឈ្មោះ ជុត ជីវ័ន្ត ក៏បានលក់រថយន្តនោះទៅឲ្យមនុស្សប្រុសម្នាក់មិនស្គាល់ឈ្មោះក្នុងតម្លៃ ១៤ ០០០ ដុល្លារ ហើយក៏គេចខ្លួនបាត់៕