ភ្នំពេញៈ មន្ត្រីនគរបាលម្នាក់ និងកូនស្រីម្នាក់ដែលបានវាយសិស្សស្រីនៅសាលាជម្ពូវ័ន្តចំនួន ២ នាក់ ក្នុងចំណោម ៤ នាក់ រហូតដល់សន្លប់កាលពីថ្ងៃទី ៣ មីនា ត្រូវបាននគរបាលខណ្ឌពោធិសែនជ័យបញ្ជូនទៅសាលាដំបូងរាជធានីភ្នំពេញកាលពីរសៀលថ្ងៃម្សិលមិញ។
លោក ម៉ន វុទ្ធី អធិការខណ្ឌពោធិសែនជ័យបានឲ្យដឹងថា ជនសង្ស័យជាមន្ត្រីនគរបាលឈ្មោះ ឆាយ វណ្ណធឿន អាយុ ៤៦ ឆ្នាំ និងកូនស្រីឈ្មោះ ភ.ប អាយុ ១៧ ឆ្នាំ គឺសមត្ថកិច្ចរបស់លោកកសាងសំណុំរឿងបញ្ជូនទៅសាលាដំបូងរាជធានីភ្នំពេញនៅរសៀលថ្ងៃទី ៤ ខែមីនា ព្រោះមន្ត្រីនគរបាលរូបនោះប្រព្រឹត្តខុស។ លោកថ្លែងថា៖ «បើគាត់មានកំហុសខ្ញុំត្រូវតែបញ្ជូនគាត់ និងកូនគាត់ទៅតុលាការហើយ។ តែរឿងអ្វីទៀតនោះតុលាការជាអ្នកសម្រេច»។
លោក ថេង កុសល នាយប៉ុស្តិ៍សង្កាត់ចោមចៅ ៣ ថ្លែងពីម្សិលមិញតាមសម្តីសាក្សីជាគ្រូបង្រៀនថា មូលហេតុដែលនាំឲ្យកើតមានរឿងបែបនេះ គឺមុនដំបូងមានសិស្សស្រី ២ នាក់ ឈ្លោះវាយតប់គ្នានៅក្នុងបរិវេណសាលាវិទ្យាល័យជម្ពូវ័ន្តហើយសិស្សស្រីម្នាក់បានទូរស័ព្ទហៅឪពុករបស់ខ្លួនជាមន្ត្រីនគរបាលមក។ មួយសន្ទុះក្រោយមកគេបានឃើញមន្ត្រីនគរបាលរូបនោះជិះរថយន្ត ១ គ្រឿង ចូលក្នុងវិទ្យាល័យជម្ពូវ័ន្តដោយមិនបានផ្តល់ដំណឹងដល់អ្នកគ្រប់គ្រងសាលាឡើយ។
ពេលនោះគេឃើញកូនស្រីម្នាក់របស់មន្ត្រីនគរបាលដែលជិះរថយន្តជាមួយឪពុកនោះបានបើកទ្វាររថយន្តចុះទៅវាយសិស្សស្រីម្នាក់ដែលជាគូទំនាស់របស់ប្អូនស្រីខ្លួនទាំងកំរោលតែម្តង។ គ្រានោះក្រុមកាយឫទ្ធិរបស់សាលាជម្ពូវ័ន្តបាននាំគ្នាទៅឃាត់ ហើយជនសង្ស័យបានវាយត្រូវទាំងសិស្សកាយឫទ្ធិទៀតផង។
លោក កុសល បន្តថា ពេលឃើញកូនរបស់ខ្លួនវាយតប់គ្នាជាមួយសិស្សស្រីម្នាក់នោះស្រាប់តែជនសង្ស័យចុះពីលើរថយន្តស្ទុះទៅវាយសិស្សស្រីជាភាគីរងគ្រោះបណ្តាលឲ្យក្មេងៗជាសិស្សស្រី ២ នាក់ ដួលសន្លប់ហើយត្រូវបានគ្រូៗបង្រៀននៅក្នុងសាលាទៅឃាត់ខ្លួនជនសង្ស័យរូបនោះចូលក្នុងការិយាល័យសាលាសួរនាំ។ តែចម្លើយរបស់ជនសង្ស័យថា គាត់មិនបានវាយទៅលើសិស្សស្រី ២ នាក់នោះទេ គាត់គ្រាន់តែគ្រវាសដៃត្រូវប៉ុណ្ណោះ។
លោកប្រាប់ថា៖ «ចំពោះក្មេងៗរងគ្រោះថា ជនសង្ស័យវាយហើយក៏មានសាក្សីជាគ្រូបង្រៀនមើលឃើញពីសកម្មភាពជនសង្ស័យវាយលើក្មេងៗដែរ»។
លោកបញ្ជាក់ថា មន្ត្រីនគរបាលរូបនោះមានតួនាទីជានគរបាលផ្នែកបច្ចេកទេសវិទ្យាសាស្ត្រ ក្រសួងមហាផ្ទៃ និងមានលំនៅឋានក្នុងភូមិជ្រៃកោង សង្កាត់ចោមចៅទី ៣ ខណ្ឌពោធិ៍សែនជ័យ និងមានស្រុកកំណើតនៅក្នុងឃុំគោកខ្សាច់ ស្រុកគិរីវង្ស ខេត្តតាកែវ។ ចំណែកកូនស្រីទី១- ឈ្មោះ ភ.ប អាយុ ១៧ ឆ្នាំ ត្រូវជាបងស្រី និងរៀនថ្នាក់ ១១ D2 និងកូនស្រីទី២- ឈ្មោះ ភ.ផ អាយុ ១៦ ឆ្នាំ ជាសិស្សថ្នាក់ទី ១០ នៃវិទ្យាល័យ ហ៊ុន សែនជម្ពូវ័ន្តទាំង ២ នាក់។
រីឯសិស្សស្រីរងគ្រោះទី១- ឈ្មោះ ស.ច អាយុ ១៧ ឆ្នាំជាសិស្សរៀនថ្នាក់ទី ១២ GO រស់នៅក្នុងភូមិថ្នល់បំបែក សង្កាត់ចោមចៅទី ៣ ខណ្ឌពោធិ៍សែនជ័យ និងសិស្សរងគ្រោះទី២- ឈ្មោះ ផ.ប អាយុ ១៧ ឆ្នាំ រៀននៅថ្នាក់ទី ១២A2 និងមានលំនៅក្នុងភូមិព្រៃទា សង្កាត់ចោមចៅទី ៣ ខណ្ឌពោធិ៍សែនជ័យ។ ពួកគេជាសិស្សរៀននៅវិទ្យាល័យ ហ៊ុន សែន ជម្ពូវ័ន្តជាមួយគ្នា។
លោក កុសល បន្តទៀតថាបើតាមសិស្សស្រីរងគ្រោះឈ្មោះ ស.ច បានរៀបរាប់ថា នាងធ្លាប់មានទំនាស់ជាមួយកូនស្រីរបស់មន្ត្រីនគរបាលខាងលើឈ្មោះ ភ.ផ លុះដល់ព្រឹកថ្ងៃកើតហេតុ នាងបានទៅទិញបាយហូប ហើយបានជួបឈ្មោះ ភ.ផ កំពុងកាន់ចានបាយនៅកន្លែងលក់។ ពេលនោះឈ្មោះ ភ.ផ ដើរបុកនាង ទើបនាងច្រានទៅវិញ ខណៈនោះឈ្មោះ ភ.ផ បានយកទឹកស៊ុបដែលក្ដៅ ជះលើរូបនាង ទើបបណ្តាលឲ្យមានការវាយតប់គ្នាកើតឡើងតែម្ដង។
ចំណែកសិស្សស្រីរងគ្រោះទី២ ឈ្មោះ ផ.ប បានរៀបរាប់ដែរថា បុរសជាមន្ត្រីនគរបាលនោះវាយច្រឡំដោយស្មានថានាង ជាបក្ខពួករបស់ឈ្មោះ ស.ច តែនាងមិនធ្លាប់មានទំនាស់ ឬស្គាល់កូនស្រីរបស់គាត់ទេ។
លោក កុសល បន្តថាមុនពេលកើតហេតុនាង និងមិត្តភក្តិ ២ នាក់ទៀត បានយកសម្ភារដែលស្រោចដំណាំទៅទុក។ ពេលនោះស្រាប់តែមន្ត្រីនគរបាលរូបនោះ និងកូនស្រីដើរសំដៅទៅរកនាងដោយមិនបានសួរនាំអ្វីទេហើយបានស្ទុះមកវាយនាងតែម្តង។ ក្រោយសមត្ថកិច្ចឃាត់ខ្លួន ២ នាក់ ឪពុកកូនមកសិស្សរងគ្រោះទាំង ២ នាក់ បានដាក់ពាក្យបណ្តឹងមកប៉ុស្តិ៍នគរបាលសង្កាត់ចោមចៅទី ៣៕