The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​នគរបាល​យុត្តិធម៌​ស្បថ​ចូល​បំពេញ​ការងារ​នៅ​ ACU

មន្ត្រី​នគរបាល​យុត្តិធម៌​ស្បថ​ចូល​បំពេញ​ការងារ​នៅ​ ACU

Content image - Phnom Penh Post
មន្ត្រី​នគរបាល​យុត្តិធម៌ ១១៩ នាក់​ពេល​ស្បថ​ចូល​បំពេញ​ការងារ​ជា​មន្ត្រី​ក្របខ័ណ្ឌ​រដ្ឋ​នៅ​អង្គភាព​ប្រឆាំង​អំពើ​ពុករលួយ​កាលពី​ថ្ងៃ​ព្រហស្បតិ៍​ម្សិលមិញ។ មន្ត្រី​នគរបាល​យុត្តិធម៌​ទាំង​នេះ​នឹង​បំពេញ​ការងារ​នៅ​ ៨ នាយកដ្ឋាន​​នៃ​អង្គភាព​ប្រឆាំង​អំពើ​ពុករលួយ។ ផា លីណា

មន្ត្រី​នគរបាល​យុត្តិធម៌​ស្បថ​ចូល​បំពេញ​ការងារ​នៅ​ ACU

ភ្នំពេញ: មន្ត្រី​នគរបាល​យុត្តិធម៌​ ១១៩​ នាក់​ពី​ម្សិលមិញ​បាន​ស្បថ​ចូល​បំពេញ​ការងារ​ជា​មន្ត្រី​ក្របខ័ណ្ឌ​រដ្ឋ​នៅ​អង្គភាព​ប្រឆាំង​​អំពើ​ពុករលួយ​ដើម្បី​បំពេញ​ការងារ​នៅ ៨ នាយកដ្ឋាន​នៃ​អង្គភាព​មួយ​នេះ​។

ក្នុង​ពិធី​ស្បថ​ចូល​បម្រើ​ការងារ​ត្រូវ​បាន​ធ្វើ​ឡើង​កាលពី​ម្សិលមិញ​នៅ​សាល​ឧទ្ធរណ៍​ដែល​មាន​មន្ត្រី​ក្របខ័ណ្ឌ​ចំនួន​ ១១៩ នាក់​ត្រូវ​ចូល​បម្រើ​ការងារ​តែ​អវត្តមាន​មន្ត្រី​ពីរ​នាក់​ដែល​បំពេញ​បេសកកម្ម​នៅ​ក្រៅ​ប្រទេស​។

សមាជិក​ក្រុម​ប្រឹក្សា​ជាតិ​ប្រឆាំង​អំពើ​ពុករលួយ​លោក​ លី ណារុន ថ្លែង​ក្រោយ​បញ្ចប់​ពិធី​នេះ​ថា​បន្ទាប់ពី​ស្បថ​នេះ​មន្រី្ត​ជំនាញ​នីមួយៗ​នឹង​ចូល​បំពេញ​ការងារ​តាម​ផ្នែក​របស់​ខ្លួន​ដែល​​ច្បាប់​ចង្អុល​បង្ហាញ​ពី​តួនាទី និង​ភារកិច្ច​របស់​គេ​នីមួយៗ​សំខាន់​ផ្តោត​លើ​ការ​ស៊ើបអង្កេត​ពី​បទ​ពុករលួយ។

លោក​បញ្ជាក់​ថា​ការ​ស្បថ​នេះ​នឹង​ពញ្ញាក់​ស្មារតី​ដល់​មន្ត្រី​នគរបាល​យុត្តិធម៌​ដើរ​លើ​ផ្លូវ​ត្រូវ​។ ​លោក​ថា៖ ​«​ពាក្យ​ថា​ស្បថ​មួយ​ម៉ាត់ សម្ដែង​នូវ​ឆន្ទៈ​ហើយ​តម្រូវ​ឱ្យ​យើង​ធ្វើ​អ្វី​ដែល​ទៀង​ត្រង់​ សច្ចៈ​ យុត្តិធម៌ កុំ​ឱ្យ​ភូត កុហក ឬ​បោក​ប្រាស់​»​។

លោក លី ណារុន ថ្លែង​ថា​នេះ​ជា​លើក​ទី​ ៣ ដែល​អង្គភាព​ប្រឆាំង​អំពើ​ពុករលួយ​បាន​ជ្រើសរើស​មន្ត្រី​នគរបាល​យុត្តិធម៌​បាន​ចំនួន​ ២១៧​ នាក់​ហើយ​​ប្រសិន​បើ​ខ្វះ​អង្គភាព​នឹង​ពិចារណា​រើស​មន្ត្រី​នគរបាល​យុត្តិធម៌​បន្ថែម​ទៀត​។

មន្ត្រី​ទាំង​ ១១៧​ នាក់​ (ពីរ​នាក់​ទៀត​ជាប់​បេសកកម្ម​នៅ​ក្រៅ​ប្រទេស​) បាន​ធ្វើការ​ស្បថ​នៅ​មុខ​ប្រធាន​ក្រុម​ប្រឹក្សា​ជំនុំ​ជម្រះ​ចៅក្រម​ប្រឹក្សា និង​តំណាង​​មហាអយ្យការ​នៃ​សាលា​ឧទ្ធរណ៍​ដែល​មន្ត្រី​ទាំងអស់​ធ្វើ​សច្ចាប្រណិធាន​បើ​ប្រព្រឹត្ត​ល្អៀង​មិន​ត្រឹមត្រូវ​តាម​ច្បាប់​ដោយ​មាន​ចេតនា​ទុច្ចរិត សូម​អស់​ទេវៈ និង​បារមី​ដ៏ស័ក្តិសិទ្ធិ​ទាំងអស់​បំផ្លាញ​ឱ្យ​វិនាស​ ឱ្យ​ស្លាប់​តៃហោង​ដោយ​គ្រាប់​កាំភ្លើង រន្ទះបាញ់ ឡាន​ម៉ូតូ​បុក ខ្លា​ខាំ ពស់​ចឹក ​ឱ្យ​ព្រាត់ប្រាស​និរាស​ឪពុក​ម្តាយ​ដោយ​ក្រ​រហាម រងទុក្ខ​វេទនា​អស់ ៥០០ ជាតិ​។

លោក ឡា រស្មីវង្ស អាយុ ២៧ ឆ្នាំ​ជា​មន្ត្រី​នាយកដ្ឋាន​បុគ្គលិក​ផ្នែក​បណ្តុះ​បណ្តាល​ដែល​បាន​ចូល​ស្បថ​ធ្វើ​ជា​មន្ត្រី​ក្របខ័ណ្ឌ​ថ្លែង​ដោយ​​សប្បាយ​រីករាយ​ថា​នឹង​បន្ត​អនុវត្ត​ការងារ​ដោយ​គោរព​តាម​វិជ្ជាជីវៈ។

លោក​ថា​៖ «ខ្ញុំ​មាន​អារម្មណ៍​ប្លែក​ព្រោះ​ពី​មុន​យើង​ជា​មន្ត្រី​ធម្មតា គ្មាន​សិទ្ធិ​ទាក់ទង​ការងារ​តែ​ស្បថ​ហើយ​យើង​ដឹង​ខ្លួន​យើង​ថា​មាន​តួនាទី​អី​ហើយ​អារម្មណ៍​មួយ​ទៀត​ថា​មាន​ការងារ​ច្រើន​ហើយ​ក៏​ត្រូវ​ពង្រឹង​សមត្ថភាព​ខ្លួនឯង​ច្រើន​ជាង​មុន​»​។​

លោក​បន្ថែម​ថា៖ ​«​ការ​ស្បថ​យើង​ត្រូវ​តែ​គោរព ​មិន​អាច​បំពាន​បាន​សម្រាប់​ខ្លួន​ខ្ញុំ​ក៏​មិន​ដែល​គិត​ថា​ធ្វើ​អ្វី​ដែល​ខុស​ឆ្គង​ជាមួយ​ក្រម​សីលធម៌​មន្ត្រី​រាជការ​ដែរ ក៏ដូចជា​បញ្ញត្តិ​របស់​អង្គភាព​ខ្ញុំ​នឹង​ធ្វើ​ការងារ​ឱ្យ​បាន​ល្អ​»។

មន្ត្រី​ម្នាក់​ទៀត​ដែល​បម្រើ​ការងារ​នៅ​នាយកដ្ឋាន​កិច្ចការ​គតិយុត្តិ​ថ្លែង​ក្នុង​លក្ខខណ្ឌ​មិន​បញ្ចេញ​ឈ្មោះ​ថា​នៅ​ពេល​ក្លាយ​​ជា​មន្ត្រី​នគរបាល​យុត្តិធម៌​ពួកគេ​អាច​ជួយ​ពន្លឿន​ការងារ​បន្ថែម​ទៀត​គឺ​អនុវត្ត​ច្បាប់​៕

អត្ថបទគួរចាប់អារម្មណ៍