The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​នគរបាល​ ១០ នាក់​ទៀត​ជាប់​ពាក់​ព័ន្ធ​ករណី​ធ្វើ​ទារុណកម្ម​

មន្ត្រី​នគរបាល​ ១០ នាក់​ទៀត​ជាប់​ពាក់​ព័ន្ធ​ករណី​ធ្វើ​ទារុណកម្ម​

Content image - Phnom Penh Post
ជន​រងគ្រោះ​ដែល​ត្រូវ​សមត្ថកិច្ច​វាយ​ធ្វើ​បា​បនា​ពេល​កន្លងមក​​​។ រូបថត សហ​ការី

មន្ត្រី​នគរបាល​ ១០ នាក់​ទៀត​ជាប់​ពាក់​ព័ន្ធ​ករណី​ធ្វើ​ទារុណកម្ម​

ភ្នំពេញៈ យ៉ាង​ហោច​ណាស់​ក៏​នៅ​មាន​មន្ត្រី​នគរបាល​ ១០ ​នាក់​ទៀត ដែល​ជាប់​ពាក់​ព័ន្ធ ក្នុង​​ករណី​សមត្ថកិច្ច​ចម្រុះ ដេញ​បាញ់ និង​ចាប់ចង​ធ្វើ​ទារុណ កម្ម​ទៅ​លើ​អ្នក​បើក​ឡាន និង​ព្រូ​ឡាន បន្ទាប់​ពី​មន្ត្រី​កង​រាជ​អាវុធ​ហត្ថ​ខេត្ត​ត្បូងឃ្មុំ និង​ខេត្ត​ព្រៃវែង​ ៦ នាក់ ត្រូវ​បាន​បញ្ជូន​ទៅ​កាន់​​សាលា​ដំបូង​ខេត្ត និង​រង​ចោទ​ពីបទ​បង្ក​ហិង្សា​ដោយ​ចេតនា។ នេះ​បើតាម​ការ​បង្ហើប​ឲ្យ​ដឹង​ពី​មន្ត្រី​មួយ​រូប នៃ​គណៈ កម្មការ​ចំពោះ​កិច្ច ដែល​សុំ​មិន​បញ្ចេញ​ឈ្មោះ។

មន្ត្រី​ដដែល​នេះ​បាន​ឲ្យ​ដឹង​ថា អ្នក​​ទាំង ១០ នាក់​នោះ រួម​មាន ក្រុម​មន្ត្រី​ជញ្ជីង​ខេត្ត​ត្បូង​ឃ្មុំ ៣ នាក់ ប៉ូលិស​ខេត្ត​ត្បូងឃ្មុំ ២ ​នាក់ ប៉ូលិស​ស្រុក​អូររាំងឪ ៣ ​នាក់ ដែល​មាន​ម្នាក់​ជា​អ្នក​ចាប់​ចង​ជន​រងគ្រោះ និង​ប៉ូលិស​សេដ្ឋ​កិច្ច​ខេត្ត​ព្រៃវែង​ម្នាក់ ដែល​ជា​​អ្នក​វាយ​ជន​រងគ្រោះ​នឹង​ស្នាប់​​កាំភ្លើង។

លោក​បាន​បញ្ជាក់​ថា៖ «ពួកគេ​នេះ ជា​ក្រុម​អ្នក​ចូល​រួម​នៅ​ក្នុង​ហេតុការណ៍​នោះ​ដែរ ឥឡូវ​​​ខាង​គេ (អង្គភាព​នីមួយ) មិន​ទាន់​មាន​ចំណាត់​ការ​ទេ បើ​តាម​នីតិ​វិធី​មាន​តែ​ខាង​តុលាការ​ទេ​ជា​អ្នក​សម្រេច​កោះ​ហៅ​មក​សាកសួរ»។

ក្នុង​​សន្និសីទ​សារព័ត៌មាន​កាល​ពី​ថ្ងៃទី ១០ មេសា បន្ទាប់​ពី​បញ្ចប់​ការ​ស៊ើប​អង្កេត មេ​បញ្ជា​ការ​រង​កង​រាជ​អាវុធហត្ថ​លើ​ផ្ទៃ​ប្រទេស និង​ជា​ប្រធាន​គណៈក​ម្មការ​ចំពោះ​កិច្ច លោក ស៊ិន សូផាន្នី បាន​​ឲ្យ​ដឹងថា ទាក់​ទិន​​នឹង​ផ្នែក​អាវុធហត្ថ ក្រៅពី​មន្ត្រី​ ៦ នាក់ រង​ចោទ​ប្រកាន់ និង​​បញ្ជូន​ទៅ​តុលាការ​ហើយ​នោះ ក៏​មាន​​មន្ត្រី ៦ នាក់​ផ្សេង​ទៀត ត្រូវ​បាន​ទទួល​ការ​ស្តី​​បន្ទោស និង​​អប់រំ ចំណែក មេបញ្ជាការ​​កង​រាជ​អាវុធហត្ថ​ខេត្ត​ត្បូងឃ្មុំ និង​ខេត្តព្រៃវែង ក៏បាន​ទទួល​ការ​ស្តី​បន្ទោស​ផង ដែរ ក្នុង​ការ​គ្រប់​គ្រង​ដឹកនាំ​បញ្ជា ដែល​មិន​បាន​រាយការណ៍​ជូន​អភិបាល​ខេត្ត និង​ព្រះ​រាជអាជ្ញា។

ក្នុង​របាយការណ៍​ដែល​ត្រូវ​បាន​​អាន​ជូន​អ្នក​សារព័ត៌មាន​នៅ​​ថ្ងៃ​ដដែល​នោះ លោក ស៊ិន សូ​ផាន្នី ក៏បាន​លើក​ឡើង​ពី​ការ​សាក​សួរ និង​ការ​រក​ឃើញ​នូវ​កំហុស​របស់​អ្នក​ពាក់​ព័ន្ធ​ទាំង​អស់ រួម​មាន អ្នក​បើកបរ​ឡាន មន្ត្រី​ជញ្ជីង និង​ប៉ូលិស ខេត្ត​ត្បូងឃ្មុំ ប៉ូលិស​ស្រុក​អូរ​រាំងឪ និង​​ប៉ូលិស​ខេត្តព្រៃវែង​ផងដែរ តែ​លោក​ថា មិន​មាន​សិទ្ធិ​អំណាច​ធ្វើ​ចំណាត់​ការ​លើ​អ្នក​ពាក់​ព័ន្ធ​ទាំង​នេះ​ឡើយ។

លោក​ថា៖ «គណៈ​កម្មការ​ចំ​ពោះ​​កិច្ច​ក្នុងការ​ស្រាវ​ជ្រាវ​នេះ មិនបាន​ទៅ​បង្អាក់​កិច្ច​នីតិវិធី​ផ្សេង​ៗ ដែល​ត្រូវ​ចាត់​ការ​ដោយ​សមត្ថកិច្ច​ពាក់​ព័ន្ធ​​ទេ។ ឧទាហរណ៍ សមត្ថកិច្ច​ជញ្ជីង​ឲ្យ​គេ​ចាត់​ការ​ទៅ។ ការ​ដោះស្រាយ​រឿង​គ្រោះថ្នាក់​ចរាចរណ៍​ជា​សមត្ថកិច្ច​របស់​នគរបាល​ចរាចរណ៍​ឲ្យ​គេ​ដោះ​ស្រាយ​ទៅ»។

ទាក់ទិន​​នឹង​មន្ត្រី​ពាក់ព័ន្ធ ដែល​​​ត្រូវបាន​ចង្អុល​បង្ហាញ​ពី​កំហុស​ដោយ​គណៈកម្មការ​ចំពោះ​កិច្ច​នេះ ស្នងការ​នគរបាល​​ខេត្ត​ព្រៃ​វែង លោក ស្រេង ជា បាន​ឲ្យ​ដឹង​កាលពី​ម្សិលមិញ​នេះ​ថា សម្រាប់​មន្ត្រី​ប៉ូលិស​សេដ្ឋកិច្ច ឈ្មោះ រឿង ផល្លីន បច្ចុប្បន្ន​​គឺ​កំពុង​​បំពេញ​ការងារ​ជា​ធម្មតា តែ​មិន​ត្រូវ​បាន​អនុញ្ញាត​​ឲ្យ​ចាក​ចេញ​ពី​ខេត្ត​ព្រៃវែង​​នោះ​ទេដោយ​រង់ចាំ​ដំណើរ​ការ​​នីតិវិធី​របស់​តុលាការ​ចប់​សព្វ​គ្រប់​សិន។

លោកថា៖ «យើង​បាន​ឲ្យ​គាត់​រក្សា​ការងារ​នៅ​ក្នុង​ខេត្ត ហើយ​បើ​តុលាការ​កោះ​ហៅ​យើង​នឹង​បញ្ជូន​គាត់​ទៅ​តាម​ការកោះ​ហៅ»។

ចំណែក​ស្នងការរង​នគរបាល​ខេត្ត​ត្បូងឃ្មុំ​លោក អ៊ាង ភារៈ និង​​អ្នក​នាំ​ពាក្យ​ក្រសួង​សាធារណការ និង​ដឹក​ជញ្ជូន លោក ផែង សុវិជ្ជា​នោ បាន​អះអាង​ដូច​គ្នា​​ថា ខ្លួន​មិន​មាន​សមត្ថកិច្ច​ក្នុងការ​ចាត់​វិធានការ​លើ​រឿង​នេះ​ទេ គឺ​មាន​តែ​តុលាការ​ប៉ុណ្ណោះ ដែល​មាន​យុត្តាធិការ​ពេញ​លេញ​លើ​រឿង​នេះ។

យ៉ាង​ណា​ក៏​ដោយ លោក ហេង សុខ​ជា ចៅក្រម​ស៊ើបសួរ​សាលា​ដំបូង​ខេត្ត​ព្រៃវែង មិន​អាច​ទាក់ទង​បានទេ កាលពី​ម្សិលមិញ​នេះ។

លោក​ ណេន ​ស៊ីដា​ អ្នក​បើកបរ​ឡាន ​និង​ជាអ្នក​រង​ការ​វាយ​យ៉ាង​ដំណំ​ពី​សមត្ថកិច្ច​ប៉េអឹម​ បាន​ថ្លែង​ឲ្យ​ដឹង​ថា លោក​ ចំណាំ​បាន​មុខ​មាត់​របស់​អ្នក​ពាក់​ព័ន្ធ​ផ្សេង​ទៀត​ ក្រៅ​ពី​ក្រុម​កង​រាជ​អាវុធ​ហត្ថ​ទាំង ៦ នាក់​នោះ។

លោក​ថា៖ ​«ខ្ញុំ​សង្ឃឹម​ថា តុលា​ការ នឹង​ចាត់​ការ​រឿង​នេះ ដាក់​ទោស​​លើ​មន្រ្តី​ប៉ូលិស​ផ្សេង​ទៀត ដូច​កង​រាជ​អាវុធ​ហត្ថ​ផង​ដែរ»។

គួរ​រំឭកថា កាលពី​ថ្ងៃទី ១៩ ខែ មីនា ឆ្នាំ២០១៥ ម៉ោង​ជាង ៩ យប់ មុន​ពេល​កើត​ហេតុ រថយន្ដ​យីឌុប​ដឹក​ស្រូវ​មួយគ្រឿង​នេះ បាន​ធ្វើ​ដំណើរ​តាម​ផ្លូវ​ជាតិ​លេខ ១១ ក្នុង​ស្រុក​អូររាំង​ឪ ខេត្ដ​ត្បូង​ឃ្មុំ លុះ​មក​ដល់​ត្រង់​គីឡូម៉ែត្រ​លេខ ៨៩ មាន​ជញ្ជីង​ចល័ត​មួយ​ដែល​មិន​ធ្លាប់​មាន​ពី​មុន អ្នក​បើកបរ​ក៏​បាន​​បន្ថែម​ល្បឿន​គេច រហូត​កម្លាំង​សមត្ថកិច្ច​ខេត្ដ​ត្បូងឃ្មុំ បើក​​ដេញ​តាម​រហូត​ដល់​រង្វង់​មូលស្វាយ​អន្ទរ ខេត្ដ​ព្រៃវែង ថែម​ទាំង​កៀរ​រថយន្ដ​ស៊ីរ៉ែន​របស់​មន្ដ្រី​អាវុធ​ហត្ថ​ផង​នោះ ទើប​អាវុធហត្ថ បាន​សម្រេច​បាញ់​គំរាម​ទៅ​លើ​រថយន្ដ​ជា​ច្រើន​គ្រាប់ រហូត​អ្នកបើក​សុខ​ចិត្ដ​ឈប់​​ប្រគល់​ខ្លួន ប៉ុន្តែ​ត្រូវ​បាន​សមត្ថកិច្ច​ចាប់​ចង និង​ធ្វើ​ទារុណកម្ម​យ៉ាង​ដំណំ​ទៅ​វិញ៕

អត្ថបទគួរចាប់អារម្មណ៍