.jpg)
មន្ត្រីនគរបាលទទួលការបំពាក់ស័ក្ដិពីថ្នាក់លើរបស់ខ្លួន។ រូបថត FN
រតនគិរី: ស្នងការដ្ឋាននគរបាលខេត្តរតនគិរីបានប្រកាសផ្ទេរភារកិច្ចតែងតាំងមុខតំណែងថ្មីជូនមន្ត្រីនគរបាលក្នុងខេត្តនេះចំនួន ២០០ នាក់ក្នុងនោះមាន ស្រី ៤ នាក់ដែលមានមន្ត្រីដែលត្រូវផ្ទេរភារកិច្ច ឬតែងតាំងមុខតំណែងថ្មីចំនួន ៦០ នាក់ និងបំពាក់ឋានន្តរស័ក្តិដល់មន្ត្រីចំនួន ១៤០ នាក់។
កម្មវិធីនេះត្រូវបានរៀបចំធ្វើនៅស្នងការដ្ឋាននគរបាលខេត្តរតនគិរីនៅថ្ងៃទី ១១ ខែមីនា ដែលប្រកាសដោយលោក យិន ចំណាន ស្នងការនគរបាលខេត្តរតនគិរី និងមានការចូលរួមពីមន្ត្រីនគរបាលជាន់ខ្ពស់ជាច្រើន។
លោក យិន ចំណាន បានថ្លែងក្នុងកម្មវិធីនោះថា កងកម្លាំងមន្ត្រីនគរបាលទាំងអស់ត្រូវតែយកចិត្តទុកដាក់ក្នុងការបំពេញតួនាទីភារកិច្ចឲ្យបានល្អប្រសើរ ហើយត្រូវស្មោះត្រង់ចំពោះជាតិ សាសនា ព្រះមហាក្សត្រ និងអនុវត្តតាមកម្មវិធីនយោបាយរាជរដ្ឋាភិបាលក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។
លោក ចំណាន បានប្រកាសផ្ទេរភារកិច្ចតែងតាំងមុខតំណែងថ្មីដល់មន្ត្រីនគរបាលជាតិចំនួន ៦០ នាក់ (ស្រីម្នាក់) និងបំពាក់ឋានន្តរស័ក្តិដល់មន្ត្រីនគរបាលជាតិចំនួន ១៤០ នាក់ (ស្រី ៣ នាក់)។ ក្នុងនោះថ្នាក់អនុសេនីយ៍ចំនួន ១៣០ នាក់ថ្នាក់ព្រឹន្ទបាលចំនួន ៩នាក់ និងថ្នាក់ពលបាលចំនួន ១ នាក់។
លោក យិន ចំណាន ថ្លែងថា៖ «ខ្ញុំសូមសំណូមពរដល់កងកម្លាំងគ្រប់លំដាប់ថ្នាក់ ពិសេសប៉ុស្តិ៍នគរបាលរដ្ឋបាលត្រូវចូលរួមការពារសន្តិសុខ ត្រូវមានឥរិយាបថទន់ភ្លន់ជាមួយប្រជាពលរដ្ឋផ្តល់សេវា ជូនប្រជាពលរដ្ឋឲ្យបានទាន់ពេលវេលា និងត្រូវបន្តការអនុវត្តគោលនយោបាយភូមិ-ឃុំ មានសុវត្ថិភាពទាំង ៩ ចំណុចរបស់រាជរដ្ឋាភិបាល»។
លោក ម៉ម ភារិន ដែលទើបទទួលមុខតំណែងថ្មីបានឲ្យដឹងថា ក្នុងនាមតំណាងឲ្យមន្ត្រីនគរបាលដែលទើបទទួលបានមុខតំណែងថ្មី និងដំឡើងឋានន្តរស័ក្តិត្រូវតែស្មោះត្រង់ចំពោះនយោបាយរបស់រាជរដ្ឋាភិបាលកម្ពុជា ដើម្បីបម្រើផលប្រយោជន៍រាស្ត្រ និងមិនធ្វើអ្វីដែលប៉ះពាល់ប្រយោជន៍រាស្ត្រឡើយ។
លោកបន្តថា៖ «យើងជា មន្ត្រីនគរបាលត្រូវតែគោរពប្រតិបត្តិយ៉ាងម៉ឺងម៉ាត់ និងដោយសច្ចៈ យុត្តិធម៌ចំពោះច្បាប់បទប្បញ្ញត្តិ និងបទបញ្ជាផ្សេងៗរបស់ថ្នាក់ដឹកនាំគ្រប់លំដាប់ថ្នាក់ ព្រមទាំងខ្លឹមសារច្បាប់មួយចំនួនទៀតដែលត្រូវតែគោរពឲ្យខាងតែបាន»។
លោក សេង សាវុធ អធិការរងនគរបាលក្រុងបានលុងបានថ្លែងពីម្សិលមិញដោយបានបង្ហាញភាពសប្បាយរីករាយដែលបានឃើញមន្ត្រីដែលមានស្នាដៃបំពេញការងារបានល្អទទួលតួនាទីថ្មី និងបំពាក់ឋានន្តរស័ក្តិ។
លោកបន្តថា ការដំឡើងឋាន្តរស័ក្តិ ឬផ្ដល់តួនាទីថ្មីៗដល់មន្ត្រីនគរបាលនេះគឺថ្នាក់ដឹកនាំបានគិតគូរល្អិតល្អន់ហើយដោយជ្រើសរើសមន្ត្រីដែលមានស្នាដៃច្រើនបំពេញការងារបានល្អ និងគោរពបទបញ្ជាពីថ្នាក់លើបានល្អដែលជាការលើកទឹកចិត្តដល់មន្ត្រីនគរបាលឲ្យមានការខិតខំប្រឹងប្រែងបំពេញការងាររបស់ខ្លួនបន្តទៀត។
លោក ស៊ឹង សែនករុណា មន្ត្រីអង្កេតផ្នែកសិទ្ធិមនុស្សនៃសមាគមអាដហុក (ADHOC) បានថ្លែងថា កម្ពុជាធ្លាប់មានការរិះគន់មួយចំនួនដោយមានមន្ត្រីខ្លះឡើងតំណែងតាមរយៈសែស្រឡាយ បក្ខពួកនិយម និងអំណាចទឹកប្រាក់សូកប៉ាន់នានាដែលទាក់ទងអំពើពុករលួយ។
លោកថា៖ «យើងគួរតែចៀសវាងការតំណែងតួនាទីទាំងឡាយណាដែលប្រើសែស្រឡាយ បក្ខពួកនិយម និងយកអំណាចទឹកប្រាក់ទៅសូកប៉ាន់នោះ វានឹងធ្វើឲ្យមានការបាក់ទឹកចិត្តដល់សមត្ថកិច្ចដែលស្មោះត្រង់ការងារ មន្ត្រីមានជំនាញ ចំណេះដឹង និងអ្នកដែលមានស្នាដៃល្អ។ អ៊ីចឹងថ្នាក់ដឹកនាំស្ថាប័ននានាគឺពិនិត្យករណីនេះឡើងវិញ ដើម្បីចៀសវាងការរិះគន់ ការច្រណែនឈ្នានីសគ្នា និងអាចឈានទៅរកការបែកបាក់ផ្ទៃក្នុងអង្គភាពផងដែរ»៕
